လိက်လညာတ်၊ မယံင် (ဍုင်မန်)

ဗွဲကြဴနူကဵု ဂကောံပၠန်ဂတးမန် ၄ ဒပ်တံ ပံင်ကောံတုဲ ဒက်ပတန်ဏာ “ကရောင်ပၞာန်ပံင်တောဲရာမည” တုဲဂှ် ဒဒှ်ရ ဂကောံပၠန်ဂတးမန်တံ သွက်ဂွံသၠုင်ပတိုန်အသိင်ပေါဲပၞာန် ပ္ဍဲဒေသတိဍာ်ဍုင်မန်ရောင်ဂှ် အခါတ်အကာဲဒးရ။

အခိင်လၟုဟ်ဏံလေဝ် ညောန်ကြပ်ကၠုင်ကဵု တ္ၚဲကောန်ဂကူမန်မရနုက်ကဵု (၇၈) ဝါရတုဲ အလုံဂကူမန်ဂမၠိုင် အပ္ဍဲဍုင် မ္ၚးဍုင် အာရီုစိုပ်မံင်ကဵု သွက်ဂွံကၠောန်အသေအဟာန်တ္ၚဲကောန်ဂကူမန်အိုတ်ရ။

တ္ၚဲကောန်ဂကူမန်ဂှ် ဒှ်တ္ၚဲတၟေင်တ္ၚဲပြဲ သွက်ဂကူမန်မွဲတ္ၚဲရ။ ပ္ဍဲတ္ၚဲတၟေင် တ္ၚဲပြဲဏံ သွက်ဂွံထ္ၜးဆီဇာတိမာန်ဇာတိဂကူကီု၊ သွက်ဂွံထ္ၜးစရာဲဂကူကုညးဂၠးတိတံ ဒဒှ်ရ ဂကူမန်နွံကၠုင်ဝင်အာဲကၟာဲ ယေန်သၞာင်အခိုက်ကၞာ ပြဝေဏဳ နန်ထဝ် က္ဍိုၚ်ဗတာင် ချိုတ်တ်ပၠိုတ်ရောင်ဒှ်တုဲ အလုံဂကူမန်တံ သ္ပစၟတ်သမ္တီကဵု တ္ၚဲမန်ပတန်ကၠုင်ဍုင် ဟံသာဝတဳ ကိုပ်ကၠာအိုတ်တုဲ ကၠောန်ဗဒှ်ကၠုင်တ္ၚဲကောန်ဂကူမန် နကဵုစိုတ်ဓာတ်မၚ်မွဲဂကူ၊ သ္ပသမ္တီဝင်ဂကူတုဲ ကောံဇက်ဂၠောဲ ရှ်ေသှ်ေ အလာံကောန်ဂကူမန်၊ ရှ်ေသှ်ေက္ဍိုပ်သ္ကိုပ်သ္ဂံင်ဆာန်ဂကူပြဟ်လလုဲအာဂမၠိုင်ရ။

ပ္ဍဲကဵုသမ္မယျတ္ၚဲကောန်ဂကူမန် မရနုက်ကဵု (၇၈) ဝါသၞာံဏံဂှ် ဒှ်အခိင်အကာဲအရာပရေင်ဍုင်ကွာန် ပရေင်ပေါဲပၞာန် ထတ်သ္ကာတ်တုဲ သီုကဵုဒှ်အခိင်သွက်ဂွံဗတိုက်သရိုဟ်ဖျေံတၠအဝဵု မကေမ်ၛာပ်လဝ်အဝဵု နူတဲညးဍုင်ကွာန် နကဵုအဓမ္မရ။

ပ္ဍဲပေါဲပၞာန်တ္ၚဲဏံဂှ် နကဵုကောန်ဂကူဗၟာ ဒးဒုင်ဍဵုဍိုက်တုပ်ကဵု ကောန်ဂကူကောန်ဍုင်အရၚ်တံ ညးတံလေဝ် ဘဝတုပ် ကဵု ကောန်ဂကူကောန်ဍုင်အရင် မလုပ်ကၠုင်ဒၟံင်ပေါဲဗတိုက်အဆက်ဆက်တေံရဂှ် ကၠိုဟ်တီဒုၚ်စသိုင်လေပ်ကၠုင်တုဲ ပၠန်ဂတးဂကူဗၟာ ကဵု ပၠန်ဂတးကောန်ဍုင်အရင်ဂမၠိုင်တံ ဒှ်မွဲထပ် လုပ်မံင်ပေါဲဗတိုက် သွက်ဂွံဗတိုက်ပလှ်ဖျေံတၠအဝဵု မွဲစွံတ္ၚဲဏံဂှ် ဒှ်အခိင်အခါခိုဟ် သွက်ကောန်ဂကူကောန်ဍုင်အရင်ဂမၠိုင် (သီုပၠန်ဂတးဗၟာ) တံရ။

နကဵုကောန်ဂကူကောန်ဍုင်အရင်ဂမၠိုင်တံဂှ် အခေါင်အရာကောန်ဂကူထေက်ကဵုဒးကလိဂွံ ညံၚ်ဂွံဂွံ (ဝါ) ကံကုသဵုဂကူဇကု ညံၚ်ဂကူဇကုဂွံဖန်ဖက်ကေတ်ကေတ်မာန်ဂှ် လုပ်ကၠုၚ်မံင်ပေါဲဗတိုက် နနဲပရေင်ဍုင်ကွာန်၊ နနဲပရေင်ရပ်လွဟ် ဟွံအံင်ဇၞးကၠုင်ဏီရ။

အခိင်အခါတ္ၚဲဏံ နကဵုကောန်ဂကူဗၟာတံလေဝ် ဒုင်စသိုင်ဘဝတုပ်ကဵု ကောန်ဂကူကောန်ဍုင်အရင် မလုပ်ကၠုင်ဒၟံင် ပေါဲဗတိုက်ဆက်တုဲတုဲကၠုင်တေံတုဲ ကောန်ဂကူကောန်ဍုင်အရင်ဟီုဂှ် နကဵုဇကုဂကူဗၟာတံလေဝ် ဒုင်ဂိုင်ကေတ်တုပ်ကၠုင်ကဵု ကောန်ဂကူတံ မွဲထပ်ကီုရ။

ဂကူဇၞော်ဂကူဗၟာတံကဵု ကောန်ဂကူကောန်ဍုင်အရင်တံ ပံင်ကောံဒှ်မွဲထပ်တုဲ ပ္ဍဲကဵုဂကူကောန်ဍုင်အရင်ဂမၠိုင်တံဂှ် ဂကူဗၟာတံလေဝ် တၞီပါလုပ်ပ္ဍဲကောန်ဂကူကောန်ဍုင်အရင်မွဲဂကူကီုရောင် ပၠန်ဂတးဂကူဗၟာတံ ပတှ်ေစှ်ေကၠုင်စိုတ် တုဲ ပံင်ကောံလုပ်ကၠုင်ပေါဲဗတိုက်မွဲစွံ မွဲဇြဟတ်အိုတ်ရ။

ဂွံစိုပ်ကၠုင်အကာဲအရာဗီုတ္ၚဲဏံဂှ် နကဵုကောန်ဂကူကောန်ဍုင်အရင်ဂမၠိုင် ဒုင်စေက်ပတိတ်လဝ်ဇြဟတ်တမ်ရိုဟ် ဇြဟတ်လမျီုဆီပဠက် ညိညမံင်ရောဟွံသေင်။

အခိင်ဒပ်ပၠန်ဂတးဂကူဗၟာတံကဵု ပၠန်ဂတးကောန်ဍုင်အရင်တံ ပံင်ကောံလုပ်မံင်ပေါဲဗတိုက် သွက်ဂွံဗတိုက်သရိုဟ်ဖျေံ မဟာတၠအဝဵုဒပ်ပၞာန်ဗၟာတံတ္ၚဲဏံဂှ်ဒေသညး ဒေသညး၊ ဂကူညး ဂကူညး ပလေဝ်ပလေတ်စ သွက်ပေါဲပၞာန် တ္ၚဲဏံအိုတ်ရ။

ပေါဲပၞာန်တ္ၚဲဏံဂှ် ဒှ်ပေါဲပၞာန် သီဍုင်ဂကူညး ဂကူညးရ။ ရံင်အာပၠန်ဂတးရခေင်တံကီု၊ ပၠန်ဂတးချေင်တံကီု၊ ပၠန်ဂတး ကချေင်တံကီု၊ ပၠန်ဂတးကရေင်ဍာဲတံကီု ပ္ဍဲတိဍာ်တွဵုရးဍုင်ညးတံ ဗတိုက်သ္အးထောံ တၠအဝဵုပၞာန်တံတုဲ ညံၚ်ဂွံပတန် အဝဵုပရေင်အုပ်ဓုပ်ဇကုကဵုဇကုဂှ် ဖန်ဇန်ပလေဝ်ပလေတ်ကၠုင်အိုတ်ရ။

တုပ်သာ်ဂှ်ကီု အဒေါဝ်ဂြိုဟ်ဍုင် ဗီုကဵု ရးသေတ်ကိုင်၊ ရးမဂွေ၊ ရးမာန္တလေဝ်၊ ရးလ္ဂုင်၊ ရးဗ္ဂောတံလေဝ် ဒပ်ပၠန်ဂတး ဗၟာတံ လုပ်ဖျေံဂွံသဇိုင်တုဲ ဇန်ကၠုင်ပေါဲဗတိုက် ပ္ဍဲဒေသညးတံ ဇၞော်ကၠုင်မံင်သိုက်သိုက်ရ။

ပ္ဍဲဒေသတိဍာ်ဍုင်မန်ပိုဲဏံလေဝ် ညးအာက္ဍိုပ်ဂကောံပၠန်ဂတးမန်ဂမၠိုင်တံ ဇန်မံင်သွက်ဂွံဝေင်ပေါဲဗတိုက် သီဒပ် သီဍုင် ပလေဝ်ပလေတ်စဒၟံင် ဍုင်တီ ကွာန်တီရ။

အခိင်ဂကောံပၠန်ဂတးတံ ဖန်ဖန်ပလေဝ်ပလေတ်စဒၟံင် သွက်ဂွံသၠုင်ပတိုန်ပေါဲပၞာန် သီဒပ် သီဍုင်တ္ၚဲဏံဂှ် နကဵုညးဍုင်ကွာန်တံ မံင်ထောံသ္ပညံင်ဟွံတီ ညံင်ဟွံမိင်၊ သ္ပထောံဥပေက္ခာတုဲ ကမၠောန်ညး ညးကၠောန်ကေတ် မုဟွံဆေင်စပ်ကဵုဇကု စွံစိုတ်ဟွံထေက်ရ။

သမ္မယျတ္ၚဲကောန်ဂကူမန်သၞာံဏံဂှ် ဒှ်အခိင်သွက်ဂွံပလေဝ်ပလေတ် ပေါဲပၞာန်သီဒပ် သီဍုင်တုဲ အစဳဇန်ကဏ္ဍမိပ်လလဟိင် ဗီုပြင်မိပ်ဂှ် ၜိုတ်ဖအောန်ဖျေံဂွံ ဖအောန်ဖျေံတုဲ ဒးတက်ပၠောပ်စိုတ်ဓာတ် ပရေင်ပၠန်ဂတးတ္ၚဲဏံရ။

ဂကောံပၠန်ဂတးမန်ဂမၠိုင်တံဂှ် တာလျိုင်ဇြိုင်အိုတ်၊ ကမၠောန်ဇၞော်အိုတ် စိုပ်မံင်ကၞောတ်တုဲ နကဵုညးဍုင်ကွာန်တံ ဒယှ် လှ်ေ ဗုတ်မိပ်လဟိင်မံင် ဗီုတုဲတုဲကၠုင်တေံ ဟွံဂပ်ဂဝ်ရ။

ရဲညးရုန်ဂစာန်ဖန်ဇန်မံင် သွက်ဂွံဗတိုက်သရိုဟ်ဖျေံတၠအဝဵုပၞာန်တံဂှ် ရိုဟ်ဗတမ်တ္ၚဲ ဖန်ဇန်မံင် သွက်ဂွံဗတိုက်သရိုဟ် ဖျေံတၠအဝဵုတံဂှ် နကဵုညးဍုင်ကွာန်အလုံသီုဖအိုတ်တံ ဒးစွံအာရီုတုဲ ရဲညးကာယထတ်စောံတံဂှ် ပါလုပ်နဇိုင်နတဲ၊ ရဲညးပါလုပ်ဟွံသၟဟ်အစောံတံဂှ် ပူဗိုင်ထံက်ပၚ်နကဵုဇြဟတ်ဝတ္တု မပတံသာ်ဏံ ဒးပတိတ်ဇြဟတ်ဂြုဂြုရောင်။

ပၠန်ဂတးတ္ၚဲဏံဂှ် ဒှ်ပၠန်ဂတးကၞောတ်အထောဋ်ကေတ်ဗၠးၜးဍုင်ရောင်။ ရှ်သာဗၠးၜးဏံဂှ် ဇၟာပ်ကောန်ဂကူ ဇၟာပ်ညးဍုင်ကွာန်ကြက်ဂွံဒုင်စသိုင်ရောင်။ ကေတ်ဗၠးၜးမ္ဂး ဒးကဵုဇြဟတ်ကဵုပၠန်ဂတးရောင်။ ညံင်ဂွံဗၠးၜးဍာံဍာံဂှ် ဇၟာပ်ညးဒှ်ဂကူမန် မ္ဒးဂံင်ပၠန်ဂတးရောင်။