ၚုဟ်ထဝ်သွက်ဂွံတိုန်ဂှ် ဂၠံင်ဟွံမွဲ နူကဵုဥက္ကဌဂကောံတၠကမၠောန်ထဝ်လ္ဂုင် ဥူမျိုဝ်မျေအ် ဟီုကီုလေဝ် ၚုဟ်ထဝ် မ္ၚးဏံနတဲဍာံဍာံဂှ် တိုန်ဒှ်မံင် လျိုၚ်မွဲဒ္ကေဝ် စဵုကဵု ၆၀ ကိုဋ်ပြၚ်ရောင် ဂွံတီကေတ်ရ။
ထဝ်အပ္ဍ္ဍဲဍုင်ဒေသလ္ၚဵုလေဝ် တိတ်မံင်နွံတုဲ ၚုဟ်ထဝ်သွက်ဂွံတိုန်ဟွံမွဲရောင် နူတနေံတေံ (ဂျာန္နဝါရဳ ၁၅) ဥက္ကဌ ဂကောံတၠကမၠောန်ထဝ်လ္ဂုင် ကံင်ဇြဳပၞာန်တံ ဟီုကီုလေဝ် ပ္ဍဲကဵုဆေင်ထဝ်လတူဍုင်ဂမၠိုင် သွံရာန်မံင်ဂှ် ထဝ်ဒကောင် ၁၆ ၜဲ လျိုင်မွဲဒ္ကေဝ်ဂှ် င္ရုဟ်ပံက်ဒၟံင် ၆၆ ကိုဋ်ရ။
“ၚုဟ်ထဝ်ဂကောံတၠကမၠောန်ထဝ်လ္ဂုင်တံ လလောင်ပတိတ်မံင်ၚုဟ်လၟေင်တ္ၚဲဂှ် ၜိုတ်ဆလလောင်ပတိတ်ပရိုင်မွဲဓဝ်ရဏောင်၊ သွံရာန်မံၚ်မ္ၚးဏံဂှ် ၚုဟ်ဍေံကဵုဍေံ ပံက်သွံရာန်နွံမံင်ရရဏောင်၊ ၚုဟ်ညးတံ မိက်ဂွံဒှ် ကဵု ၚုဟ်သွံရာန်မံင် လၟုဟ်ဏံဂှ် တၞဟ်ခြာမံင် ၁၀ ကိုဋ်ပြင်မံင်” သာ်ဝွံ တၠဆေၚ်ထဝ် နာဲအုမ်မိုၚ် နူကဵုမုဟ်ဍုၚ်ဂှ် ဟီုရ။
ၚုဟ်ထဝ်နူတနေံတေံ (ဂျာန်နဝါရဳ ၁၅) မ္ဂး ၚုဟ်နူဂကောံတၠကမၠောန်ထဝ်လ္ဂုင်တံ လလောင်ပတိတ်လဝ်ပရိုင်ဂှ် ထဝ်ဒကောင် ၁၆ ၜဲလျိုင်မွဲဒ္ကေဝ်ဂှ် မသုန်ကိုဋ်ပိဠက်ဒ္စါံလ္ရီ (၅၃၈၀၀၀) ဒ္ကေဝ်နွံတုဲ ၚုဟ်သွံရာန်မံင်မ္ၚးဏံ ဍာံဍာံဂှ် ဒှ်မံင် ၆၆ ကိုဋ်ရ။
ၚုဟ်ထဝ်မ္ၚးဆက်ထပက်တိုန်မံင်သာ်ဏအ်ဂှ် ဟိုတ်နူမုက်လိက် (facebook Page) လ္ၚဵု ကဵု ညးသွံရာန်ထဝ်လ္ၚဵုတံ ဝေင်ဒၟံင်ၚုဟ်ထဝ်ဂှ်ရ ၚုဟ်ထဝ်တိုန်မံင်ဂှ်တုဲ နူတနေံတေံ ကံင်ဇြဳပၞာန်တံ ထိင်ရပ်ထောံ တၠမုက်လိက်လ္ၚဵု ကဵု သၟာသွံရာန်ထဝ် လ္ၚဵု ပ္ဍဲလ္တူဍုင်လ္ဂုင် ၜိုတ် ၂၀ တၠပြင်နွံရောင် ဂွံတီကေတ်ရ။
ၚုဟ်ထဝ်ဂှ် တုဲကၠုင် (၂၀၂၄) အဒေါဝ်သၞာံဂှ် ကေင်တိုန်စိုပ်လဝ် ၇၀ ကိုဋ်ပြင် ကရပ် ၈၀ ကိုဋ်ဒှ်ကၠုင်မွဲဝါတုဲ ကြဴနူဂှ် ကံင်ဇြဳပၞာန်တံ ထိင်ရပ်ကၠုင်မၞိဟ်ဝေၚ်ၚုဟ်ထဝ် လၟိဟ်ကဵုစှော်တၠတုဲဂှ် ၚုဟ်ထဝ်ကလေင်ဆုတ်စှ်ေကၠုင် အကြာ ၅၀ ကိုဋ်ပြင်ကီုရ။
နူကၠာသၞာံ (၂၀၂၄) ဟွံအိုတ်ဂှ် င္ရုဟ်ထဝ် ကလေင်တိုန်ကၠုင်သိုက်က်ပၠန်တုဲ ၚုဟ်ထဝ်သတ္တဟတုဲကၠုင်ဏံဂှ် နူကဵု ၆၀ ကိုဋ်ဂှ် အကြာပွိုၚ် ၃-၄ တ္ၚဲဏံ ကလေင်တိုန်ဒှ်အာ စဵုကဵု ၆၆ ကိုဋ်ပၠန်ရောင် ဂွံတီကေတ်ရ။
0 Comments