ကြဴနူကဵု ကမ္မတဳကၠောန်ဗဒှ်တ္ရဲကောန်ဂကူမန် မရနုက်ကဵု (၇၈)ဝါ ဗဟဵုတံ ပတိတ်ကၠုင်လိက် စေဝ် ပၞောန် အလာံပ္ဍဲတ္ရဲကောန်ဂကူမန်ဂှ်တုဲ ညးဂမၠိုင် ဟီုပါ်ပါဲကၠုင်နွံရ။
လိက်စေဝ်ပၞောန်အလာံဂှ် လတူစင်အသေအဟာန် တ္ရဲကောန်ဂကူမန် လဒေါဝ်တပ်ပ်ဂှ် သ္ဒးပစူအာအလာံ ကၟိန်ဍုင်မွဲတုဲ သဝ်နူအလာံ ကၟိန်ဍုၚ် ဗၞတ်အောန်အိုတ်မွဲပၞောန် လ္ပာ်ပါဲပုင်တံဂှ် အလာံကောန်ဂကူမန် ဗၞတ်လၟိဟ် ဗွဲမဒးရးဂမၠိုင် သ္ဒးရန်တုဲ ပစူလဝ်ရောင် သာ်ဝွံ ချူဓမံက်ရ။
လတူစင်အသေအဟာန် တ္ရဲကောန်ဂကူမန် လဒေါဝ်တပ်ပ်ဂှ် သ္ဒးပစူအာအလာံ ကၟိန်ဍုင်ရောင်ဂှ် ညးဍုင်ကွာန်လ္ရဵုတံကီု၊ ကမ္မတဳကၠောန်ဗဒှ်တ္ရဲကောန်ဂကူမန် ဒေသလ္ရဵုတံကီု ဟွံစှ်ေစိုတ်တုဲ ဟီုပါ်ပါဲကၠုင်ရ။
“အခိင်ဍုင်ကွာန်ဒှ်မံင်ပၞာန် ဟွံစှ်ေစိုတ်မံင်ကဵု အလဵုအသဳပၞာန်ကီု ဟွံစှ်ေစိုတ်ကဵု သၞောဝ်ဥပဒေ ၂၀၀၈ ဏံဂှ် ကမ္မတဳကၠောန်ဗဒှ်တ္ၚဲကောန်ဂကူဗဟဵုတံ ပတိတ်ကၠုင်စေဝ်ပၞောန်အလာံ တုပ်ကဵု အလဵုအသဳပၞာန် ရပ်ကေမ်ၛာပ်လဝ် ၂၀၀၈ ကီုဂှ် ဒှ်ဟွံထေက်” သာ်ဝွံ ကမ္မတဳကၠောန်ဗဒှ်တ္ၚဲကောန်ဂကူမန် နူပွိုင်ဍုင်ရေဝ်သၟဝ်ကျာမွဲတၠ ဟီုပါ်ပါဲရ။
အခိင်တ္ၚဲဏံဂှ် ညးဍုင်ကွာန်ဗွဲမဂၠိုင် ကောန်ဂကူဗွဲမဂၠိုင် ဟိုတ်နူဟွံစှ်ေစိုတ်ကဵု ဂၠံင်တရဴပရေၚ်ဍုၚ်ကွာန် ကံင်ဇြဳပၞာန်ဗၟာ ရပ်ကေမ်ၛာပ်လဝ် သၟဝ်သၞောဝ် ၂၀၀၈ ဂှ်တုဲ ကောန်ဂကူကောန်ဍုင်အရင်ဂမၠိုင် သီုဂကူဗမာ ဗတိုက်သရိုဟ်ဒၟံင်တၠအဝဵုပၞာန် ညံင်ဂွံဒေါမ်သရိုဟ်တုဲ ဖန်ဇန်ပလေဝ်ပလေတ်ဒၟံင် သွက်ဂွံဒက်ပတန်အာဍုင်ဖေဝ်ဒရေဝ် မဍာံပြ မွဲရ။
“အခိင်ဏံဂှ် ဟီုပရောအလာံကၟိန်ဍုင် အလာံဗၟ ဟွံဂွံရ၊ အလာံအဒေါဝ်စင် တ္ၚဲကောန်ဂကူဂှ် ဒေသညးကဵုညးဂှ် ကၠောန်ကၠုင်လဝ်နွံကၠုင်မံင်ရရ အခိုက်ညးကဵုညး ဥပမာတှ်ေ စင်ကြပ်ကဵုဍုင်တှ်ေ ညးတံဒိုအ်ဟွံဂွံ ဒးစုတ်တှ်ေ စုတ်ဏာ၊ ဗီုကဵု ဒေသ ကွာန်ရးတှ်ေ ဗွဲမဂၠိုင်ဂှ် ညးတံ ဟွံစုတ်လဝ်ပုဟ် အတိုင်ဂှ် ကၠောန်အာတှ်ေ တုဲမံင်ရရ အဲညာတ်” သာ်ဝွံလေဝ် ညးကွာန် နူပွိုင်ဍုင်မုဟ်ဍုင်မွဲတၠဂှ် ထပ်ဟီုရ။
ပ္ဍဲဂကူမန်ဂှ် အလာံကောန်ဂကူမန်ဟီုဂှ် ဒဵုကဵုတ္ၚဲဏံဂှ် နကဵုအလုံဂကူမန်မွဲ ဟွံဂွံစၟတ်သ္ပလဝ်ဒတန်ဏီတုဲ အလာံကောန်ဂကူမန် သ္ပစၞးကဵု အလုံဂကူမန်ဂှ် ဟွံမွဲကၠုင်ဏီရ။
ၜိုန်ဂှ်လေဝ် ပ္ဍဲကောံဓရီုဇၞော်ပရေင်ဂကူမန် တုဲတုဲကၠုင်တေံဂှ် စပ်ကဵုအလာံတုဲ ဗွိုင်ညးခံင်ဂှ် ရပ်စပ်သုၚ်စောဲအာကၠာ မပ္တံသာ်ဏံ သဳကၠဳဖျေံကၠုင်နွံရောင် ဂွံတီကေတ်ရ။
