ပ္ဍဲဆေင်သွံကၠေၚ်စက်တံဂှ် ကၠေင်ဒဳဇြေဝ်ဟွံမွဲတုဲ သွက်တၠဝါ တၠကၠအ်တံ ဂွံတံင်ဍာ်ဂှ် ဒှ်မံင်ခက်ခုဲဇၞော်ကဵုဇြဟတ်ရောင် တၠဝါ နူပွိုင်ဍုင်မုဟ်ဍုင်မွဲတၠ ဟီုရ။

ပ္ဍဲအခိင်ဍာ်ဝါတ်ဏံဂှ် တၠဝါတံ ကၠောန်သွံကညင်တံကီု၊ တၠကၠအ်သတ်ဆုနာနာတံကီု ဒးတံင်ပၠောပ်ဍာ် နကဵုစက်ဒဳဇြေဝ်တုဲ ဗက်ရာန်ကၠေၚ်စက်ဒဳဇြေဝ်ဟွံဂွံဂှ်တုဲ သွက်တၠဝါ တၠကၠအ်တံ သာ်လဵုဂွံသ္ပဂှ် ဒှ်မံင်ဒဒိုက်ရောင် သ္ဂးရ။

“သွံကညင်ဂှ် အဓိက ဒးပတှ်ေဍာ်ရတှ်ေ ကၠေင်စက်ရာန်ဟွံဂွံတှ်ေ တၠဝါတံ ဒှ်ဒဒဒိုက်အိုတ်ရ၊ ဟွံဂွံတံင်မံင်ဍာ် ဂွံ ၄ တ္ၚဲတုဲရ၊ သြောံပ္ဍဲခံက်ဂှ်လေဝ် ဍာ်ကှ်မံင်အိုတ်ရ၊ ကၠေင်လေဝ်ကေတ်ဟွံဂွံ ဒှ်မံင်ဒဒိုက်ဟွံဍောတ်” နာဲခိုင်တာန် မဒှ်တၠဝါ နူပွိုင်ဍုင်မုဟ်ဍုင်ဂှ် ဟီုရ။

ကၠေင်ဒဳဇြေဝ်ဂှ် ဗွဲကြဴနူကဵု ဒေသပယျဵုသေံ ဗြဝတဳ ကျာ်ပိ အလဵုအသဳသေံတံ ထပိုတ်ထောံပၟတ်ဍုင်၊ ဟွံကဵုအခေါင် ပၠောပ်ကၠေင်စက်ဂှ်တုဲ ပ္ဍဲဆေင်သွံကၠေင်စက်တံဂှ် ကၠေင်ဓာတ်ဂှ် ရာန်ဂွံဆဗၞတ်နွံလေဝ် ကၠေင်ဒဳဇြေဝ်ဂှ် ဟွံမွဲရ။

မုဟိုတ်သာ်လဵု ကၠေင်ဒဳဇြေဝ် ဟွံမွဲရောဂှ် တၠဆေင်သွံကၠေင် လတူဍုင်မတ်မလီုမွဲတၠ ဟီုဂှ် “ကၠေင်ဓာတ်ကီု ကၠေင်ဒဳဇြေဝ်ကီုဂှ် ၜိုတ်ပိုဲဂွံအခေါင်ဖျေံ(ခွဲတမ်း)နူကဵု လ္ဂုင် ဂှ် ဂွံမံင်ပေင်ရ။ ၜိုတ်ပိုဲဂွံလဝ်(ခွဲတမ်း)ဂှ် ဂကောံရပ်လွဟ်ကရေင်တံ ရာန်ကေတ်ထောံဖအိုတ်၊ ဟွံသွံကဵုဍေံတံလေဝ် ဟွံဂွံပုဟ်၊ ဍေံတံဂွံအခေါင်ရာန် နူကံင်ဇြဳပၞာန်ပေင်င်ဂး တုဲတှ်ေ ကၠေင်ၜိုတ်နွံဂှ် ဒးသွံကဵုဍေံတံဖအိုတ် ဇၟာပ်ဆေင်ဂှ် ဍေံဗက်ရာန်ကေတ်ထောံဖအိုတ် ဇှ်ရ သွက်ညးဍုင်ကွာန်တံ ဂွံသုင်စောဲဂှ် ဒှ်အာခက်ခုဲ” မာန်နေဂျာ ဆေၚ်သွံကၠေင်ဂှ်ဟီုရ။

နူကဵုကၠေင်ဒဳဇြေဝ် ဗက်ရာန်ဟွံဂွံဒှ်ကၠုင်ဂှ်တုဲ ရုင်ကမၠောန်နာနာကီု၊ ရုင်ဂဥုဲဂမၠိုင်တံကီု၊ ရုင်စက်ပူဂဵုဂမၠိုင်တံကီု သွက်ဂွံဗ္ဂေတ်ကမၠောန်တံဂှ် ဒးပတှ်ေဒၟံင် ဇြဟတ်စက်ပၟတ် နကဵုကၠေင်ဒဳဇြေဝ်ရတုဲ ကၠေင်ဒဳဇြေဝ် ရာန်ဟွံဂွံဗက်ဂှ် ဒှ်အာဒဒိုက်ဖအိုတ်ရ။

ဆေင်သွံကၠေင်စက်ဂမၠိုင်ဂှ် ကၠေင်ဓာတ်ကီု၊ ကၠေင်ဒဳဇြေဝ်ကီု၊ ၜိုတ်ဂွံလဝ်အခေါင် (ခွဲတမ်း) နူကဵု သၞေဟ် (သီလဝါဆိပ်ကမ်း) လ္ဂုင်ဂှ်ဟေင် အခေါင်သွံနွံတုဲ လၟုဟ်မ္ဂး ဟိုတ်နူ ဂကောံရပ်လွဟ်ကရေင် ဒဳကေဗဳအေ ကဵု ဒပ်မင်ပယျဵု BGF တံ ကၠေင်ဒဳဇြေဝ် ပ္ဍဲဆေင်ၜိုတ်နွံဂှ် ရာန်ကေတ်ထောံဖအိုတ်ဂှ်ရ ကၠေင်ဒဳဇြေဝ် သွက်ညးဍုင်ကွာန်တံ ဂွံသုင်စောဲ ဟွံမွဲဒှ်ကၠုင်ရောင် ဂွံတီကေတ်ရ။