ကြဴနူကဵုပေါဲဗတိုက် ဗ္ဒါဲကွာန်ကြုင်လံင်ကတဵုဒှ်တုဲ ကံင်ဇြဳပၞာန်တံ တံင်ရပ်သၟတ်အကြာဂၠံင်ဍာန်ဂၠိုင်ကၠုင်ဂှ်တုဲ ညးဍုင်ကွာန်တံ တိတ်မ္ၚးအာကၠုင်အောန်စှ်ေကၠုင်မံင်ရောင် ညးဒေသတံဟီုရ။
ကံင်ဇြဳပၞာန်တံဂှ် ပတေင်လဝ်ပရေင်ဂီုကၠီုကီု၊ သၠုင်ပတိုန်လဝ်ချဳဒရာင်ကရောင်ပၞာန်အကြာကွာန် မ္ၚးကွာန်တုဲ သၟတ်တံ အာကၠုင်မ္ၚးကွာန်မ္ဂး ဟွံသၟာန်စၟဳစၟတ်မွဲသာ် တံင်ရပ်ဏာသၟတ်တံ ဂၠိုင်ကဵုကွာန်နွံကၠုင်ရ။
“ၝၜါဂှ် မၞိဟ်ဍောတ်ဍောတ်(သၟတ်)ကွာန်ပိုဲၜါတၠ ဍေံတံအာမံင်အကြာဂၠံင်ရ မၞိဟ်ၜါမွဲကွဳလိုန်ဓာတ် ဍေံတံ(ပၞာန်ဗၟာ) ရပ်ပတိုန်ဏာကဵုကွဳစက် မုမုဍေံသ္ပကေတ်ဟွံဒး၊ ရပ်ကွဳ(ဝစ်တောက်)ဟာ ရပ်သ္ပကောန်ပၞာန်ဟာဂှ် ကေတ်ဟွံဒး ပရိုင်ကၠေံမံၚ်ဖိုဟ်” သာ်ဝွံ ညးကွာန်ရေဝ်သၟဝ်ကျာမွဲတၠ ဟီုထ္ၜးရ။
ပၞာန်ဗၟာတံဗက်တံင်ရပ်သၟတ်တံ အကြာဂၠံင်ဍာန်ဂှ် ကောန်ကွာန်ရေဝ်သၟဝ်ကျာတံ ဗွဲမဂၠိုင် ဒးဒုင်ရပ်လဝ်နွံတုဲ မုမုဟိုတ်ဖဵုတုဲ အလဵုဂွံဗက်သၟာန်သၟုက်ဂှ် ဟွံတီအိုတ်ရ။
“ဍေံရပ်ဏာတုဲ မုမုဟိုတ်ဖဵုလေဝ် ကေတ်ဟွံဒး၊ ဂွံအာသၟာန်အလဵုလေဝ် ဟွံဂံင်ဗက်အာသၟာန်မွဲ၊ ညးဒးတှ်ေ ညးဒုင်ကေတ်အဂှ်ရ၊ ဗီုဏံဂှ် ဒးမံင်ကြပ်ဇၟါပ်ကွာန်ရ ဒေသပိုဲဏံ ဖေက်လကိုတ်မံၚ်သက်ဟီုဟွံမွဲရ လၟုဟ်တှ်ေ မၞိဟ်ဍောတ်တ်တံ ပါဲဂြိပ်အာဍုင်သေံလေဝ် ဟွံအောန်ရ မၞိဟ်သှ်ေမံင်ပ္ဍဲကွာန်ဏံတှ်ေ အလဵုဟွံဂံင်တိတ်မ္ၚးကွာန်ရပုဟ်” သာ်ဝွံ မိမသၟတ်မွဲတၠဂှ် ဟီုရ။
ကိစ္စကံင်ဇြဳပၞာန်တံ ဗက်တံင်ရပ်ဒၟံင်သၟတ်တံ အကြာဂၠံင်ဍာန်သာ်ဏအ်ဂှ် မၞိဟ်လ္ၚဵု ထေင်ခယျကေတ် ရပ်ကွဳလိုန်ဓာတ် ဟွံမွဲကဵုလာင်ဇြေန်(ဝစ်တောက်)လေဝ်နွံ၊ မၞိဟ်လ္ၚဵုဂှ် ပၞာန်ဗၟာတံ ရပ်သ္ပကောန်ပၞာန် (ဗၟာ) စှ်ေစိုတ်လေဝ်နွံတုဲ ဟိုတ်ဖဵုဍာံဍာံ အရာလဵုဒှ်ဍာံဂှ် ညးဍုၚ်ကွာန်တံ ဟွံတီကီုလေဝ် ဗွဲမဂၠိုင်ဂှ် စှ်ေမံင်စိုတ် ရပ်သ္ပကောန်ပၞာန်နွံဂၠိုင်ရ။
ပွိုင်ဍုင်ရေဝ်ဂှ် ဒကုတ်လ္ပာ်ဗၟံက် ဒေသကၞောတ်ၜဳရေဝ်ကီု၊ ဒကုတ်ရေဝ်သၠုင်ကျာကီု၊ ဒေသရေဝ်သၟဝ်ကျာကီုဂှ် ဂကောံပၠန်ဂတးဂမၠိုင် ချဳဒရာင်ဒၟံင်နွံဂေတ်ကၠောံတုဲ နူလ္ပာ်ကံင်ဇြဳပၞာန်တံလေဝ် ဂလိုင်လဝ်ဇြဟတ်ချဳဒရာင်ကၠုင်ပရေင်ပၞာန် တေင်ကၠုင်မံင်ရ။
ပွိုင်ဍုင်ရေဝ်ဒိုဟ်ဇဳဂှ် နူကဵုဒပ်ပၞာန်ၜါလ္ပာ်တံ ထ္ၜးကၠုင်ဒၟံင်အယောၚ်အလာ ပေါဲပၞာန်ဇၞော် သွက်ဂွံဒှ်နွံကၠုင်ဂှ်တုဲ ညးဍုင်ကွာန်လ္ၚဵု ပါဲဓလေတ်ပြံင်အာမံၚ်လတူဍုင်လေဝ် နွံကၠုင်ကီုရောင် ဂွံတီကေတ်ရ။
0 Comments