လိက်ပရေင်၊ မယံင် (ဍုင်မန်)
ပ္ဍဲစင်အသေအဟာန်တ္ၚဲကောန်ဂကူမန် လ္ဒောဝ်တပ်တပ်ဂှ် ဒးပစူသၠုင်လဝ်အလာံကၟိန်ဍုင်ရောင် ဂျာန်နဝါရဳ ၃ တုဲ ကၠုင်ဂှ် နူကမ္မတဳကၠောန်ဗဒှ်တ္ၚဲကောန်ဂကူမန် ဗဟဵုတအ် ပတိတ်ကၠုင်လိက်စေဝ်ပၞောန် စပ်ကဵုအလာံတုဲ မၞိဟ်လ္ၚဵုဟွံ ပေင်စိုတ်ရ။
ရံင်ကဵုကောန်ဂကူမၞုံပ္ဍဲကၟိန်ဍုင်မွဲမွဲမ္ဂး အရာကေင်ကာမွဲလဵုဟွံဟီု ဆေင်စပ်ကဵုအလာံမ္ဂး အလာံသုင်စောဲဍုင် အလာံ ကၟိန်ဍုင်၊ အလာံကောန်ဂကူ ပါ်ခြာလဝ်နွံရ။
ပ္ဍဲကဵုကၟိန်ဍုင်ဗၟာတ္ၚဲဏံဂှ် အလဵုအသဳအဆက်ဆက်တအ် ပကင်ရင်အုပ်ဓုပ်ကၠုင်လဝ် ဗီုပြင်သၞောတ်ဂကူဇၞော် အုပ်ဓလီု ဂကူဍောတ်တုဲ ပ္ဍဲကဵုသၞောဝ်ဥပဒေဒက်ပတန်ဍုင် (ကၟိန်ဍုင်)ဂှ် ရး ကေုာံ တွဵုရး ပံင်တုဲ (၁၄) ဒေသပါ်တုဲ ဒက်ပတန် ကၟိန်ဍုင်ရ။
ပ္ဍဲကဵုရး ကေုာံ တွဵုရး ပံင် (၁၄) ဒေသဂှ် ရးဂှ် ဒက်ပတန်ဒုင်လဝ်သဇိုင်ဒေသတုဲ တွဵုရး(၇) တွဵုရးဂှ် ဒုၚ်သဇိုင်ကောန်ဂ ကူ ကောန်ဍုင်အရင်ဂမၠိုင်ရ။
အဓိပ္ပါဲမံက်မံင်ဂှ် ရး (၇) ရးဂှ် တုပ်ပၟာဒုင်လဝ်သဇိုင်သ္ပစၞးဂကူဗမာတုဲ တွဵုရး (၇) တွဵုရးဂှ် ဒုင်လဝ်သဇိုင် မပတံကဵု မန်၊ ချေင်၊ ကရေင်၊ ရခေင်၊ သေံ၊ ကယာ (ကရေင်ဍာဲ)၊ ကချေင် (၇)ဂကူရ။ ဂကူဗမာဂှ် ဒုင်လဝ်သဇိုင်ကဵုတွဵုရးဟွံမွဲတုဲ ရး (၇) ရးဂှ် သ္ပလဝ်ဗီုပြင်သ္ပစၞးဂကူဗမာရ။ ပ္ဍဲကဵုသၞောဝ်ဥပဒေဒက်ပတန်ဍုင်လေဝ် စၞးဂကူဗမာဂှ် ဓမံက်ထ္ၜးလဝ် ဟွံမွဲရ။
ဟိုတ်နူဏံတုဲ နကဵုယၟုဍုင် (ပြည်ထောင်စုမြန်မာနိုင်ငံတော်) ဂှ် က္ဍိုပ်သ္ကိုပ်ရပ်လွဟ်ပၠန်ဂတးဂမၠိုင် စနူဥက္ကဌ ဗော်ဍုင် မန်တၟိ လၟုဟ် နာဲဟံသာ သဳကၠဳပတိုန်ထ္ၜးကၠုင် ပ္ဍဲသဘင်သဳကၠဳ ပေန်လုင် ကော် သဘင်သဳကၠဳကောန်ဂကူပရေင်ၜိုဟ် လလမ် (၂၁ ဗွဝ်ကၠံ ၂၀၁၆) တုဲကၠုင်တေံ ညးပတိုန်ထ္ၜးကၠုင်ဂှ် အစာပရိုင်တအ်ဂမၠိုင် ကောံဗိုင်သၟာန်ကလး ညးအိုတ်ရ။
နာဲဟံသာဟီုဂှ် “ကၟိန်ဍုင်ဗမာတ္ၚဲဏံဂှ် ကောန်ဂကူဂလိုင် ပိုင်ပြဳလဝ်ရောင်၊ ဂကူဗမာတအ်မွဲဓဝ် အုပ်ဓုပ်ဖန်ဖက် ကေတ်တ်မံင်ဂှ် ဟွံဒးပုဟ်၊ ယၟုဍုင်လေဝ် ဗီုဂှ် မျာန်မာ ဟီုဂှ် ဂကူဗမာတုပ်တုပ်ရ၊ ဍုင်ဏံဂှ် ဍုင်ဗမာမွဲဓဝ်ဟွံ သေင်ပုဟ်၊ ကောန်ဂကူကောန်ဍုင်အရင်ဂလိုင် ပံင်ပကောံလဝ်တုဲ ဒက်ပတန်လဝ်ဏောင်၊ ဂကူဇၞော်မွဲဂကူဓဝ် ကေမ်ၛာပ်လဝ်အဝဵုတုဲ ဗီုပၟိက်စိုတ်ဇကုဖန်ဗ္ဂေတ်မံင်ဂှ် ဟွံဒးပုဟ်၊ စတမ်နူဍုင်ဂှ် ကောန်ဂကူကောန်ဍုင်အရင်ဂလိုင် ဒုင်တဲဂှ် ဒးပြံင်သၠာဲရောင်” ညးဟီုကလးကဵုအစာပရိုင်ဂမၠိုင်တအ်ရ။
တင်ဂလာန် နာဲဟံသာ (ဥက္ကဌဗော်ဍုင်မန်တၟိ) ဟီုသဳကၠဳသောင်ကလးဏာဂှ် ပ္ဍဲအခိင်ဂှ် သွက်ကောန်ဂကူဗမာဂမၠိုင် ဒှ်ဂလာန်မိင်ကိုပ်ကၠာအိုတ်ကီုလေဝ် သွက်ဂကူကောန်ဍုင်အရင်ဂမၠိုင်တအ်ဂှ် စှ်ေမံင်သဘာဝတုဲ ဟွံတၟေင်မွဲသာ်ရ။ ၜိုန်ဟွံတၟေင်မွဲသာ်ကီုလေဝ် နာဲဟံသာ ဂွံဟီုစင်ပတဝ်ဏာ ကောန်တၟအ် က္ဍိုပ်သ္ကိုပ်ဗမာ ဂကူဗမာတအ် လ္ဒောဝ်ဝိုင်ဇၞော်ဇၞော်ဗီုဏံဂှ် သွက်ဒးဂိသ္ကေဝ်အာကျေဝ်ကျေဝ်ရ။
ဟိုတ်နူသၞောဝ်ဥပဒေဗီုပြင်ဒက်ပတန်ဍုင် (ကၟိန်ဍုင်) ဟွံစှ်ေကဵုသၞောတ်ဂှ်တုဲ ကောန်ဂကူကောန်ဍုင်အရင်ဂမၠိုင် တအ် လုပ်ကၠုင်ဒၟံင်ပေါဲဗတိုက် လအ်ပွိုင် (၇၀) သၞာံပြင်တုဲရ။ တ္ၚဲဏံလေဝ် သီုဂကူဗမာ ရဲဟွံစှ်ေကဵု တၠအဝဵုဂကူဗမာ တအ် ထပ်လုပ်ပေါဲဗတိုက်ပၠန်တုဲ ကောန်ဍုင်အရင် သီုဂကူဗမာဘဝတုပ်ကဵု ကောန်ဍုင်အရင်ဂမၠိုင်တအ် လုပ်မံင် ပေါဲဗတိုက် သွက်ဂွံဗတိုက်သရိုဟ်ဖျေံ ဇြဟတ်တၠအဝဵုဗမာတအ်ရ။
အခိင်ကာလပေါဲဗတိုက်ထတ်သ္ကာတ်ဒၟံင်တ္ၚဲဏံဂှ် နူကဵုကမ္မတဳကၠောန်ဗဒှ်တ္ၚဲကောန်ဂကူမန် မရနုက်ကဵု (၇၈) ဝါတအ် ပတိတ်ကၠုင်လိက်စေဝ်ပၞောန် သွက်ဒးဒ္ဂေတ်ဗက် စပ်ကဵုအလာံဂှ် ဗၠေတ်ဗၠေင်ဟွံသေင်လေဝ် ဟိုတ်နူဒှ်အခိင် ညးဍုင် ကွာန်ဂမၠိုင် က္ဍုဟ်မၠေံဇအိုန်ဇရဒၟံင် တၠအဝဵု ကေုာံ သၞောတ်တၠအဝဵုတအ်ဂှ်တုဲ ဟီုဂရိုဟ်ပါ်ပါဲကၠုင် ညးအာက္ဍိုပ်ကမ္မ တဳကၠောန်ဗဒှ်တ္ၚဲကောန်ဂကူမန်တအ် မံက်ကတဵုဒှ်ကၠုင်ရ။
ကၟိန်ဍုင်ပံင်ကောံမွဲမွဲဟီုဂှ် အလာံကၟိန်ဍုင်၊ အလာံတွဵုရးဍုင် သ္ပစၞးကဵုဂကူညး ဂကူညး သ္ဒးနွံဟေင်ရ။ ဗီုကဵု ကၟိန်ဍုင် ဗမာ ဒက်ပတန်လဝ်တ္ၚဲဏံဂှ် သ္ပဟိုတ်နူကဵု အလာံကၟိန်ဍုင်ဂှ် သ္ပလဝ်ဗီုပြင် အလာံသ္ပစၞးဂကူဗမာ (မျာန်မာ) ဂှ်တုဲ ညး ဍုင်ကွာန် ကောန်ဂကူကောန်ဍုင်အရင်ဂမၠိုင် ဟွံဒုင်တဲဂှ်ရ ရမျှာင်ဟီုဂရိုဟ်ပါ်ပါဲထတ်သ္ကာတ်ကၠုင် ပ္ဍဲကာလတ္ၚဲဏံရ။
အတိုင်ဂလာန်နာဲဟံသာ (ဥက္ကဌဗော်ဍုင်မန်တၟိ) သဳကၠဳပတိုန်ထ္ၜးကၠုင်လဝ် ပ္ဍဲသဘင်သဳကၠဳကောန်ဂကူပရေင်ၜိုဟ်လ လမ် (၂၁ ဗွဝ်ကၠံ) တုဲကၠုင်တေံဂှ်ရ ပ္ဍဲကၟိန်ဍုင်ဏံဂှ် ဂကူဗမာလေဝ် ဒှ်ဂကူကောန်ဍုင်အရင်မွဲဂကူကီုတုဲ ဗီုကဵုဒေသ တွဵုရးကောန်ဂကူကောန်ဍုင်အရင်တအ်မၞုံဂှ် ဂကူဗမာတအ်လေဝ် တွဵုရးဍုင်ဗမာ မွဲသ္ဒးစၟတ်ဒက်ပတန်ရ။
ဗီုဒမၠုလဝ်မတ် ကောန်ဂကူကောန်ဍုင်အရင်ဂမၠိုင်တ္ၚဲဏံဂှ် အလာံကၟိန်ဍုင်ဂှ် အလာံဂကူဗမာ၊ အလာံဂကူဗမာဂှ် အလာံကၟိန်ဍုင် ဒှ်ဂွံဟွံသေင်လးလးရ။ တုပ်သာ်ဂှ်ကီု ရးဇၞော် (၇) ရးဂှ် သ္ပလဝ်ဗီုပြင် စၞးဂကူဗမာဂှ် သာ်လဵုလေဝ် ဒှ်ဟွံ မာန်၊ ကောန်ဂကူကောန်ဍုင်အရင်လဵုလေဝ် ဒုင်တဲဟွံသေင်ရ။
ကၟိန်ဍုင်ဖေဝ်ဒရေဝ်မဍာံပြမွဲဟီုဂှ် ဗီုကဵုတွဵုရးဂကူမွဲမွဲ တွဵုရးဂကူဗမာ သ္ဒးဒက်ပတန်၊ သ္ပစၞးဂကူဗမာတုဲ အလာံဂကူ ဗမာ သ္ဒးစၟတ်ပတိုန်ဟေင်ရောင်။
ဗီုဟွံပေင်စိုတ် ကယျာန်ဓဝါတ်ကၠုင် စပ်ကဵုလိက်စေဝ်ပၞောန် ကမ္မတဳကၠောန်ဗဒှ်တ္ၚဲကောန်ဂကူမန် ဗဟဵုတအ် ပတိတ်ကၠုင် ဇၟာပ်စင်တ္ၚဲကောန်ဂကူမန်ဂှ် ဒးပစူအလာံ ကၟိန်ဍုင်ရောင်ဟီုဂှ် ဂကူမန်တအ်ညးဂမၠိုင် စှ်ေလဝ်စိုတ် အလာံဂကူဗမာဂှ် ဟွံဒုၚ်တဲ ဒစဵုဒစးမံင်အိုတ်ရောင် ပတိုန်ထ္ၜးဏာရ။
