ဂကောံလိက်ပတ်ယေန်သၞာၚ်မန် တက္ကသဵုကွတ်နဲပညာ(မတ်မလီု)ဝွံ ရန်တၟအ်ကဵုသ္ဂောံဗဂဵုလဟဵုပတိုန်လိက်ပတ်မန်ရောၚ်ဂးတုဲ ချဳဓရာၚ်ဗ္တောန်ကၠုၚ်မံၚ် လိက်မန်အဆက်ဆက်နွံရောၚ် ဂွံတီကေတ်ရ။
ပ္ဍဲကဵုဂိတုဝှိတ်ဝှတ်ရဳ ၁၇ဂှ် နကဵုဂကောံလိက်ပတ်ယေန်သၞာၚ်မန် တက္ကသဵုကွတ်နဲပညာ(မတ်မလီု)တအ် က္ဍိုက်က္ဍိုပ်ပၠးတရဴတုဲ ကၠောန်ကၠုၚ်လဝ် သ္ဘၚ်သၟာန်လိက် တန်ပဌမကဵု တန်ကၠာဲဘာသာမန်တအ် နွံရ။
သွက်ကွးဘာညးမအံၚ်ဇၞးအာလဝ် နူမသၟာန်သွဟ်လိက်ၜါတန်ဏံဂှ် ကာလကၠောန်သ္ပသဘၚ် ဂကောံလိက်ပတ်ယေန်သၞာၚ်မန် တက္ကသဵုကွတ်နဲပညာ(မတ်မလီု) ပေၚ်(၄၀)သၞာံ ပ္ဍဲဂိတုအဝ်ဂေတ်တေံမ္ဂး ကဵုအာလာပ်တဆိပ်ကြာရောၚ် လလောၚ်တြးလဝ်ကီုရ။
နကဵု ဂကောံလိက်ပတ်ယေန်သၞာၚ်မန်ဝွံ မွဲသၞာံမွဲဝါ ပ္ဍဲဂိတုဇန်နဝါရီ ဟွံသေၚ်မ္ဂး ဂိတုဇူလိုၚ် ပံက်ဗ္တောန်ကၠုၚ်မံၚ်တန်ဗ္တောန်လိက်မန် မပ္တံကဵုတန်ဗ္တောန်သ္ဇိုၚ်လိက်ပတ်မန်၊ တန်ပဌမ ကေုာံ တန်ကၠာဲဘာသာ ကုကွးဘာသၞာံပဌမတအ်နွံတုဲ တန်ဗ္တောန်တအ်ဝွံ ရံင်အာအကာဲအရာကွးဘာ ကေုာံ လၟိုဟ်ကွးဘာတအ်တုဲ ပံက်ဗ္တောန်ကၠုၚ်ဒၟံၚ်ရောၚ် ဂွံတီကေတ်ရ။
＂ကၠာတေံဂှ် ပိုဲတအ် ဖျေံမံၚ်တန်ဗ္တောန် ၜါတန်ဗ္တောန် သ္ဇိုၚ်လိက်မန်ကဵု တန်ကၠာဲဘာသာမန်နွံမံၚ်၊ ဆ္ဂးတှ်ေ သၞာံတုဲကၠုၚ်ဏံဂှ် ဟိုတ်နူအခိၚ်အောန် ဗ္တောန်ကဵုကၠုၚ်လဝ်အောန်တုဲ သၞာံဏံ ကွးဘာတအ် ညံၚ်ဂွံလေပ်အာ မွဲကဆံၚ်ပၠန်ဂှ် ပိုဲတအ် ပံက်ကၠုၚ်လဝ် တန်ပဌမနွံရ။ တန်ဗ္တောန်တအ်ဏံဂှ် အရိုဟ်တွဵုတှ်ေ ပိုဲတအ် ဗ္တောန်မံၚ်ပ္ဍဲကဵု First Semesterရ၊ ဆ္ဂး သၞာံတုဲဏံ ဟိုတ်နူဟွံပြေပြံၚ်ကဵုအခိၚ်တုဲ ဒးဗ္တောန်ကၠုၚ်လဝ် Second Semesterရ၊ သၞာံဏံလေဝ် ပိုဲဗ္တောန်ကဵုမံၚ် ပ္ဍဲ First Semesterရ” သာ်ဝွံ ညးတာလျိုၚ်ဂကောံလိက်ပတ်သၞာၚ်မန် တက္ကသဵုကွတ်နဲပညာ(မတ်မလီု)မွဲတၠ ဟီုးလဴလဝ်ရ။
ဆဂှ်သၟးဟွံက ပွမလှ်ေဒယှ်ေ ပ္ဍဲတ္ၚဲစၟတ်သမ္တီဂကူမန်တံလေဝ် ချဳဓရာၚ်ပါလုပ်ကၠုၚ်ဒၟံၚ်နွံတုဲ ပရေင်ရီုဗၚ်ဒဒိုက်သၞာမန်တအ်ဂှ်လေဝ် ရေၚ်တၠုၚ်ကၠောန်ကၠုၚ်မံၚ် အဆက်ဆက်နွံရ။
တုဲကၠုၚ်သၞာံ ၂၀၂၄ ဂိတုဇူလိုၚ်ဂှ်မဂး ပံက်ကၠုၚ်လဝ် တန်ဗ္တောန်သ္ဇိုၚ်လိက်ပတ်မန် ကေုာံ တန်ကၠာဲဘာသာမန်ဂှ်တုဲ သွက်သၞာံဏံဂှ်တှ်ေ တုဲကၠုၚ်ဂိတုဇါန်နဝါရီဂှ် ပံက်ဗတောန်လဝ်ရ။
ဂကောံလိက်ပတ်ယေန်သၞာၚ်မန် တက္ကသဵုကွတ်နဲပညာ(မတ်မလီု)ဝွံ ပပ္တံနူသၞာံ ၁၉၈၄-၁၉၈၅ ဂှ် ဒက်ပ္တန်ကၠုၚ်လဝ်တုဲ ခေတ်အဆက်ဆက်ဗ္တောန်ကၠုၚ်ဒၟံၚ် လိက်မန် ပ္ဍဲဘာတြေံ ကွာန်ရောဂေါဂှ်တုဲ ပ္ဍဲသၞာံ ၂၀၁၈-၂၀၁၉ဂှ် ဂွံကၠုၚ်အခေါၚ်ဗ္တောန်လိက်မန် ပ္ဍဲဘာက္ကသဵုကွတ်နဲပညာ(မတ်မလီု)ဂှ်ရောၚ် ဂွံတီကေတ်ရ။
