ပ္ဍဲကဵုတ္ၚဲဏံ ဂိတုဖရဂိုန် (၈) စွေက်၊ အခိင်နူဂယး (၂) နာဍဳသေံဂှ် နူကဵုဗၠာဲသၟိင်သေံသၚ်္ခဠဗူရဳ (ကွာန်ဝၚ်္က) တံ ထပ်ကလေင်ရပ်ဂွံဏာလဝ် ကောန်ဍုင်ဗၟာရဲညးကၠတ်လုပ်ဍုင်သေံတံ လၟိဟ် (၂၃) တၠပၠန်တုဲ အပ္ဍဲဂှ်တှေ် သီုပါလုပ်ကောန်ၚာ် (၆) တၠကီုရောင် ဂွံဆဵုကေတ် ပ္ဍဲဌာန်ပရိုင်သေံဂမၠိုင်ရ။
အပ္ဍဲကဵုမရပ်ဂွံလဝ်ကောန်ဍုင်ဗၟာ (၂၃)ဂှ် တၠ မၞိဟ်တြုံ (၄) တၠ ကဵု မၞိဟ်ဗြဴ (၁၃) သီုကဵုကောန်ၚာ် (၆) တၠပါလုပ်ဒၟံင်ရောင်တုဲ ဗၠာဲသၟိင်သေံတံ ဗက်အာရပ်ဗဒေါံစၟဳစၟတ်ဂှ် ရပ်ဂွံရဲညးကၠတ်လုပ်တံတုဲ ညးတၠဒဳကွဳစက်ဂှ် ဂြိပ်ဗၠးတိတ်အာရ။
ကောန်ဍုင်ဗၟာတဏံဂှ်ဝွံ နူကဵုဍုင်မတ်မလီု၊ တွဵုရးဍုင်မန်တေံ သွက်ဂွံအာကၠောန်ကမၠောန် ပ္ဍဲဍုင်သေံ၊ ဍုင်ၜင်ကံက် ခရိုင်သမုတ်သဃန်တေံဂးတုဲ လုပ်ကၠုင်နကဵုပၞော်ဂၠံင်ဒေသပယျဵုကျာ်ပိဂှ် ဒးကဵုကၠုင်လဝ်သြန် ကုညးပၠုပ်မၞိဟ် ဃံင်စအကြာတံ ညးမွဲတၠမ္ဂးတှေ် သြန်သေံ အကြာ (၁၀၀၀၀) ၝာတ် ကဵု (၁၂၀၀၀) ၝာတ်နွံရောင် ဂွံတီကေတ်ရ။
ပြဟ်ဟ်ဏံ ကောန်ဍုင်ဗၟာကၠတ်လုပ်ဍုင် (၂၃) ဏံဂှ် ရပ်ထိင်လဝ် အပ္ဍဲကဵုရုင်ဗၠာဲသၟိင်သေံ ပွိုင်ဍုင်သၚ်္ခဠဗူရဳ (ကွာန်ဝၚ်္က) ဂှ်တုဲ စၟဳစၟတ်ကေတ်မံင်အရေဝ်ရောင် ဂွံတီကေတ်ရ။
ပ္ဍဲဂိတုမာတ်ဏံသၟးဂှ်ဝွံ ဗၠာဲသၟိင်သေံသၚ်္ခဠဗူရဳ (ကွာန်ဝၚ်္က) တံ ကဵု ဗၠာဲသၟိင်သေံဍုင်ကမ္မရဳ (ကွာန်ထံက်ခ္ဍောန်) တံ ရပ်ဂွံဒၟံင်ကောန်ဍုင်မန်ဗၟာ ရဲညးကၠတ်လုပ်ဍုင်သေံ အဆက်က်နွံကၠုင်တုဲ လၟိဟ်ဗ္ဒါဲ (၃၀၀) တၠနွံကၠုင်ဒၟံင်ယျရောင် ဂွံတီကေတ်ရ။
