လညာတ်ပါ်ပါဲ၊ ယက္ခဂုမ္ဘဏ်

ကောံဓရီုပရေင်ဂကူမန် သၞာံ ၂၀၂၅ မကၠောန်ဗဒှ် ပွိုင် (၄) တ္ၚဲ ပ္ဍဲဌာနဘာဓာတုမာလာ အရာပ်သေဂျိုဝ် ဍုင်မတ်မလီု တုဲဒှ်အာ ၜိုဟ်ဟ်သိုဟ်ဟ်ရ။ မၞိဟ်စၞးတိုန်စိုပ် အကြာ (၂၅၀) တၠနွံရောင် ဂွံတီကေတ်ရ။ ကောံဓရီုဂှ် ဗော်ဍုင်မန်တၟိ က္ဍိုက်ပ်တုဲ ကၠောန်လဝ်ရောင် နူကဵုလိက်လလောင်တြး ကောံဓရီုပတိတ်လဝ်လလောင်တြးရ။

ကောံဓရီုပရေင်ဂကူမန်ဂှ် ဗွိုင်ဗော်ဍုင်မန်တၟိ၊ ဗွိုင်ဗော်ညဳသၟဟ်မန်၊ ဗွိုင်သင်မန်၊ ဗွိုင်မှာဇန်မန်၊ ညးစၞးဂကောံလိက်ပတ် ကေုာံ ယေန်သၞာင်မန်၊ ညးစၞးပွိုင်ဍုင် ကေုာံ ညးစၞးဘိက်ထေက်တံ တိုန်စိုပ်လဝ်ကောံဓရီုဂှ်ရ။ ပ္ဍဲကောံဓရီုဂှ် ပတဝ်လဝ်က္ဍိုပ် သွက်သ္ဂောံသ္ပဒတန် သဇိုင်သၞောဝ် ဒက်ပတန်ဍုင်မန်ရာမည ကေုာံ မူသဇိုင်ကၟိန်ဍုင်ဖေတ်ဒရာရောင်ဂှ် လလောင်တြးလဝ်ရ။

ၜိုန်လလောင်တြးလဝ်သာ်ဂှ်ကီုလေဝ် သ္ဂုတ်သွာတ်ကောံဓရီုတိတ်ကၠုင်ဂှ် သဇိုင်သၞောဝ် ဒက်ပတန်ဍုင်မန်ရာမည ကေုာံ မူသဇိုင် ကၟိန်ဍုင်ဖေတ်ဒရာဂှ် ဒှ်အာဆၜိုတ် သ္ပစၟတ်သမ္တီဓဝ်တုဲ ဒက်ပတန်အာ ဂကောံပံင်ကောံဂကူမန်ရောင်ဂှ်ဏောင် ဒှ်အာဒတန်ဇၞော်ဇၞော်ရ။ သ္အာင်နူဂှ် ဒှ်အာတင်သ္ဂုတ်သွာတ် သောဲသောဲဗြောဲဗြောဲရောင် ကၠိုဟ်ကေတ်ရ။

 ဂကောံပံင်ကောံဂကူမန်ဂှ် နူကဵုဂကောံပံင်ကောံပရေင်ဂကူမန် ရောအ်ရေင်လီုလာ်အာတုဲ ချပ်ဇန်ကၠုင်မံင် သွက်သ္ဂောံဒက်ပတန်တၟိဂှ် နူကဵုကောံဓရီုဇၞော်ပရေင်ဂကူမန် သၞာံ ၂၀၁၆ မကၠောန်ဗဒှ်လဝ် ပ္ဍဲကဵုဘာကွာန်ကအ်ပှ်လှ် ပွိုင်ဍုင်လှာဒကှ် ခရိုင်မတ်မလီုတေံရ။ ဆ္ဂး ဟိုတ်နူသၞောဝ်သဇိုင် ဗီုပြင်ဒက်ပတန်တုဲ ဟွံအံင်ဇၞးကၠုင်ရ။ ဂကောံပံင်ကောံပရေင်ဂကူမန် လောန်ကၠုင်တေံ ဂွံရောအ်ရေင်လီုလာ်အာဂှ် ဒၟါနူက္ဍိုပ်သ္ကိုပ်ဗော်ဍုင်မန်တၟိ ကေုာံ က္ဍိုပ်သ္ကိုပ်ဗော်ဒဳမဵုကရေဇြဳမန်တံ ကဵုက္ဍိုပ်ကဵုဂကောံမှာဇန်တံ ဟွံမာန်ရောင် ဂွံတီကေတ်ရ။

ဂကောံပံင်ကောံပရေင်ဂကူမန် လောန်ကၠုင်တေံဂှ် ဗွိုင်လဵုဟွံရုဲ အစောန်စရာဲနွံမ္ဂး ကေတ်တာလျိုင် ဥက္ကဌ၊ ညးအုပ်ကာမာန်ရောင်။ ဟိုတ်နူဗီုပြင်ဒက်ပတန်နွံသာ်ဂှ်တုဲ က္ဍိုပ်သ္ကိုပ် ဗော်ဍုင်မန်တၟိ (အဓိက ဥက္ကဌဇၞော်နာဲထဝ်မန်) ကေုာံ က္ဍိုပ်သ္ကိုပ်ဗော်ဒဳမဵုကရေဇြဳမန် (အဓိက ဥက္ကဌ နာဲဒေန်အံင် ကော် နာဲတၠနန်) တံ ဟွံဒုင်တဲရ။ ပၟိက်ဆန္ဒညးတံဂှ် ဂကောံပံင်ကောံ ပရေင်ဂကူမန် ဒှ်ဂကောံသၠုင်အိုတ် ပ္ဍဲဂကူတုဲ ပ္ဍဲဂကောံဂှ် သ္အာင်အာနူကဵုဗွိုင်ဗော်ဍုင်မန်တၟိ ကဵု ဗွိုင်ဗော်ဒဳမဵုကရေဇြဳမန်တုဲ ညးလဵုမွဲလေဝ် ကေတ်ဒၞါဲ ညးအာက္ဍိုပ် အဆံင်ဥက္ကဌ အဆံင်ညးအုပ်ကာဟွံဂွံ ညးတံသုင်စောဲဗဳဒိုဝ်အာဏာဂှ်ရ ဂကောံမှာဇန်တံ ဒုင်တဲဟွံမာန်တုဲ ဂကောံပံင်ကောံပရေင်ဂကူမန်ဂှ် ရောအ်ရေင်လီုလာ်အာရ။

ဟိုတ်နူဂှ်တုဲ ဂကောံပံင်ကောံပရေင်ဂကူမန်ဂှ် ဒက်ပတန်ကၠုင်ဟွံမာန် စဵုကဵုစိုပ် ကောံဓရီုဇၞော်ပရေင်ဂကူမန် သၞာံ ၂၀၂၂ မကၠောန်ဗဒှ်လဝ် ပ္ဍဲဌာနဗဒိုပ်ညဳသာရ။ ပ္ဍဲကောံဓရီုဂှ်လေဝ် ဟိုတ်နူအကာဲအရာနာနာသာ်တုဲ က္လေင်ပလေဝ်ဒက်ပတန်ကၠုင်ဟွံမာန်တုဲ ဒက်ပတန်လဝ် ဂကောံပညဳပညပ်ဂကူမန် နကဵုဗွိုင် (၃) ဗွိင် ဗွိုင်ဗော်ဍုင်မန်တၟိ(၃)တၠ၊ ဗွိုင်ဗော်ညဳသၟဟ်မန်(၃)တၠ ကေုာံ ဗွိုင်မှာဇန်မန်(၅)တၠ စဵုကဵုလၟုဟ်ရ။

ကောံဓရီုပရေင်ဂကူမန် သၞာံ ၂၀၂၅ ဏံ ဖျေံလဝ်သ္ဂုတ်သွာတ် ဒက်ပတန်အာ ဂကောံပံင်ကောံဂကူမန်တၟိမွဲတုဲ လဇုဲအိုတ် သၞာံ ၂၀၂၅ ဂိတုမေ ပထမသတ္တာဟဏံ ဗွိုင်ညးကဵုညး ညံင်သ္ဂောံပလံင်ယၟုညးစၞးမာန်ဂှ် ကဵုလဝ်စၞောန်တုဲ ဒက်ပတန်အာရောင် သာ်ဏံ ဖျေံလဝ် သ္ဂုတ်သွာတ်ရ။ ဂကောံဏံ ဒက်ပတန်တုဲဒှ်အာဗက် ဂကောံပညဳပညပ်ဂကူမန် ဒက်လဝ် နူကောံဓရီုညဳသာ သၞာံ ၂၀၂၂ တေံဂှ် အလဵုလဵုလီုအာရောင် သ္ဂးလဝ်ရ။

ဂကောံပံင်ကောံဂကူမန်ဂှ် ဒက်ဂှ် ဒက်ထေက်ဒၟံင်ရ။ ဆ္ဂး ဗီုပြင်ဒက်ပတန် မချူဓဇက်လဝ်လၟုဟ်ဂှ် ဟွံဓဝ်ယာ ဟွံတပ်တးရောင် သ္ဒးဟီုရ။ မိက်ဂွံထံက်ထ္ၜးဏာ တင်ဟွံဓဝ်ယာ ဟွံတပ်တးတံဂှ်တုဲ ဒှ်ချူလိက်ပရေင်ဝွံရ။ တင်(၁)ဂှ် ဒက်ပတန်အာ နကဵုဗွိုင်(၃)ဗွိုင်ရောင်ဂှ် ၜိုန်ဒးမံင်ကီုလေဝ် တင်လဝ်ယၟုဗွိုင်(၂)ဗွိုင် ဗွိုင်ဗော်ဍုင်မန်တၟိ၊  ဗွိုင်ဗော်ညဳသၟဟ်မန်ဂှ် ဟွံဒးရးဟွံဓဝ်ယာရ။ သာ်လဵုဂွံတင်ယၟုဗွိုင်ရောမ္ဂး ဗွိုင်ဗော်ပရေင်ဍုင်ကွာန်ရပ်လွဟ်၊ ဗွိုင်ဗော်ပရေင်ဍုင်ကွာန်သၟဝ်သၞောဝ် အလဵုအသဳ (အုပ်ဓုပ်လဝ်ဍုင်) မှ ဒးရး ဓဝ်ယာရောင်။

မုဟိုတ်ရောမ္ဂး ဂကောံပၠန်ဂတးရပ်လွဟ်ဂှ် ဗော်ဍုင်မန်တၟိ မွဲဂကောံဓဝ်ဟွံသေင် ဂကောံရပ်လွဟ်မန်တၞဟ်ဟ် မပ္တံဗော်ဍုင်မန်တၟိ (အေဒဳ)၊ ကံင်ဇြဳဖေဝ်ဒရေဝ်ဍုင်မန်၊ ဒပ်ပၠန်ဂတးဍုင်မန်၊ ဒပ်ဗၠးၜးဍုင်မည် စတမ်တအ် နွံဒၟံင်ဏီရောင်။ တၠုင်လအာညံင်ရဴသာ်ဂှ်ကီု ဗော်ပရေင်ဍုင်ကွာန် သၟဝ်အုပ်ဓုပ်အလဵုသဳပၞာန်ဂှ် ဗော်ညဳသၟဟ်မွဲဓဝ်ဟွံသေင် မပ္တံဗော်တောတက်မန်၊ ဗော်ညးဗြဴမန်တံနွံမံင်ဏီရောင်။ (ဟီုမွဲနဲပၠန်မ္ဂး) ရံင်ကဵုအကာဲအရာ ပရေင်ဍုင်ကွာန် ကာလဒေသတုဲ နကဵုယၟုဂကောံတိုက်ရိုက် ပံက်ဟီုပတိတ်ဟွံဂွံကီုလေဝ် မွဲနဲမွဲဗီုဂကောံတံဂှ် ညံင်သ္ဂောံပါလုပ်အာ ပ္ဍဲဂကောံပံင်ကောံဏံဂှ် ကၠောန်ဂှ် သ္ဒးကၠောန်ဟေင် ရောင်ဂှ် မိက်ဂွံထံက်ထ္ၜးဏာရ။

ညံင်ရဴသာ်ဂှ်ကီု ဗွိုင်မှာဇန်တံလေဝ် သၠဲသၠဲလးလး ဒးရုဲစှ်ကေတ် နူကဵုညးစၞးနူဂကောံလိက်ပတ်၊ ညးစၞးနူပွိုင်ဍုင်၊ ညးစၞးနူညးပါလုပ်ထေက်တံရောင်။ ဗန်တ္ၚေတ်လဝ် ဂကောံဗွိုင်မှာဇန် မပါလုပ် ပ္ဍဲဂကောံပံင်ကောံမှာဇန်တံသၟးဂှ်ဒှ်ဟွံထေက် မၞိဟ်မၞုံကဵုလညာတ်ပရေင်ဍုင်ကွာန် ပရေင်ဂကူ သၠဲသၠဲလးလးတံ နွံဒၟံင်ဟွံအောန်ရောင်ဂှ် ညးက္ဍိုက်ပ်ဂကောံပံင်ကောံမှာဇန်တံ ကဵုသ္ဂောံချပ်ဂွံညိ။ တင်(၂)ဂှ် မိက်ဂွံထံက်ထ္ၜးအတိုင် ဂကောံမှာဇန်တံ ဒစဵုဒစးကၠုင်တြေံတေံရ။ ညးက္ဍိုက်ပ်ဂကောံဂှ် မၞိဟ်နွံကဵုအစောန်စရာဲဍိုက်ပေင်နာနာသာ်မ္ဂး နူဗွိုင်မှာဇန်တံလေဝ် ဒးကဵုက္ဍိုပ်ထေက်ရောင်။

သရုပ်ကၠေံမ္ဂး ဂကောံပံင်ကောံဂကူမန်ဂှ် ရံင်ကဵုယၟုတုဲ ညံင်သ္ဂောံဍိုက်ပေင်ကဵု လက်သန်ဂကောံပံင်ကောံဂှ် ဒက်ပတန်မ္ဂး ခိုဟ်ရောင်။ ဓဝ်ယာရောင်။ ဇၟာပ်ဂကောံကၠောန်ပတုဲမံင်ဖဵု သွက်ဂကူမန်ဂှ် ဒးပါလုပ်ဖအိုတ်မှ ဂကောံဏံတန်ကြန်အာမာန်တုဲ ဒှ်စၞးဂကူမာန်ရောင်။ နကဵုပူဂဵုဇကု၊ နကဵုဂကောံဇကု လ္ပဗန်လဝ်ဂကောံ လ္ပဟန်ကေတ်လဝ်ဒၞါဲညိဂှ် ထံက်ထ္ၜးအာတ်မိက်ဏာ ညးက္ဍိုက်ပ်ဒက်ပတန်ဂကောံပံင်ကောံဂကူမန်တံရ။