လိက်ပရေင်၊ ဂကောံပရိုင်ဒေသမန်
စပ္တံနူ အခိင်ဂယးပြဟ် ညးမကျိုင်လဝ် ကယျိုင် ဗုဍာဲတအ် ရံင်ဆာဲမံင် အိုတ်ရ။ အဝယ်ဇၞော်ဗျု၊ ဍောတ်သွတ်၊ တြုံဗြဴ စုင်လေင် ဗီုညးကဵုညး ဇက်ဂၠောဲအာမံင် ဇရေင် ကောန်ဓရီု ပရေင်ဂကူရ။ အသိင် ပသာန်ကရာန် ကတဴ ဥတု ကညာင် ဂှ်လဝ် ကတဴ ကတာန်မံင် ဗွဲမသ္ကာတ်မြဟ်ရ။ မွဲကရောံ ဂိမာန် ကညင်ဏအ်ကတဴ သွက်တရဴ ပရေင် ချဳဓရာင် ဂကူမန်ဂှ် သင်တအ်ကီု၊ က္ဍိုပ်သ္ကိုပ် ဂကူတအ်ကီု၊ ပူဂဵု ဆာန်ဂကူတအ် မွဲကရောံ မွဲစွံ ဇက်ဂၠောဲအာမံင် ကောံဓရီုဂှ်လေဝ် ရံင်ဆာဲ ကွေံရ။ ညးစၞး၊ ညးလ္ၚတ် ကေုာံ ညးမဘိုင်ရေင်တၠုင် ကၠောန်ၜိုတ်မံင် ဂမၠိုင်တအ် ဂြုဂြုဂြီဂြီ ဇက်ဂၠောဲ အာမံင်ဂှ် ဒှ်တဴပီတိ ဗွဲမလောန်ရ။
ကောံဓရီု ပရေင်ဂကူမန်ဂှ် စပ္တံနူ စၟတ်တ္ၚဲ ဂိတုအေပရာယ် (၂) ဒဵုစိုပ် အေပရယ် (၅) ကၠောန်ဗဒှ်မံင် ပ္ဍဲဍုင်မတ်မလီု၊ ဘာဓါတုမာလာရ။ ကောံဓရီု ပရေင်ဂကူ ဏအ်ဂှ် နူဗော် ဍုင်မန်တၟိ သ္ကိုပ်သ္က၊ ပညဳပညပ်ကဵု ဗော်ပရေင်ဍုင်ကွာန် မန်ဂမၠိုင်၊ သင်တအ် ဂမၠိုင် ကေုာံ ဂကောံ နာနာတအ် ဂမၠိုင်တုဲ ဒးကၠောန် ဂပ်ဝ် ကၠောန်ၜိုတ်ထေက် နကဵု လညာတ်ဏအ် မံက်တိတ်ကၠုင်ရ။
နူကဵုဗော်ဍုင်မန်တၟိ သ္ပသ္ကိုပ်သ္ကတုဲ စွံပ္တန်လဝ် တင်ရန်တၟအ် (၄) တင် ကၠောန်ဗဒှ်မံင် ကောံဓရီု ပရေင်ဂကူမန် သၞာံ ၂၀၂၅ ဂှ် ကၠောန်ဗဒှ်မံင် ပ္ဍဲလ္တူဍုင် မတ်မလီု ဘာဓါတုမာလာရ။ စပ္တံနူ ဂိတုအေပရာယ် စၟတ်တ္ရဲ(၂) ဒဵုစိုပ် စၟတ်တ္ရဲ(၅) ကၠောန်ဗဒှ် သဳကၠဳအာ ပွိုင် (၄) တ္ရဲ သွက်ဂွံ ကၠောန်အာ နွံရောင် ဂွံတီကေတ်ရ။ ရန်တၟအ် သွက်ဂွံ ဒက်ပ္တန်အာ ဓဝ်ညဳသာ ဂကူကီု၊ သွက်ဂွံ သ္ရဳဂၠိပ်အာ သ္ဇိုင်မူ ကၟိန်ဍုင် ပံင်ကောံ ဖေက်ဒရာ မာန်ကီု၊ သွက်ဂွံ သ္ရဳဂၠိပ်အာ သ္ဇိုင်သၞောတ်ဥပဒေ ဒက်ပ္တန် ဍုင်မန်ရာမည မကိတ်ညဳကဵု ကၟိုန်ဍုင် ပံင်ကောံ ဖေတ်ဒရာ မာန်ကီု ကေုာံ သွက်ဂွံ သ္ရဳဂၠိပ် သ္ပအာဒတန် မူဝါဒဆေင် စပ်ကဵု ပရေင်ကောန်ဂကူ သွာင်နာနာမာန် ရန်တုဲ ကၠောန်ဗဒှ်မံင် ကောံဓရီု ပရေင်ဂကူမန် မဒှ်ရောင် ပ္ဍဲလိက်ဘိက် ကောံဓရီုဂှ် ဓမံက်ထ္ၜးလဝ် နွံရ။
ၜိုန်ရ ကၠောန်ဗဒှ်မံင် ကောံဓရီု ပရေင်ဂကူမန် ပ္ဍဲဍုင်မတ်မလီု နတင်ရန်တၟအ် မထံက်ထ္ၜးလဝ် ဗွဲလတူတေံ နွံမံင် ကီုလေဝ် မွဲလပါ် ပၠန်ဂှ်မဂး ပ္ဍဲအကာဲအရာ အခိင်အခါ တ္ၚဲဏအ်ဂှ် ဂပ်ဝ်ကၠောန်ဗဒှ် ကောံဓရီု ပရေင်ဂကူ ထေက်၊ ဟွံထေက်ဂှ် လညာတ် ဟွံသၟဟ်ရတ၊ ဟွံဒှ်မံင် မွဲလညာတ် နွံမံင်ဂှ်လေဝ် ဂွံညာတ်ရ။
ဗွဲတၟေင် စပ်ကဵု ကၠောန်ဗဒှ် ကောံဓရီု ပရေင်ဂကူ ဏအ်တုဲ ပ္ဍဲစၟတ်တ္ၚဲ ဂိတုမာတ် (၃၁) သၞာံ၊ ၂၀၂၅ ဂှ် နူဗော်ဍုင်မန်တၟိ (ဗ္တိုက်သရိုဟ် တၠအဝဵုပၞာန်) ဂှ် ပ္တိတ်ကၠုင် လိက်လစွံစိုတ်တုဲ ကဵုကၠုင်လညာတ် ထေင်င်လဵုလဵု နွံကၠုင်ရ။ ဒးကံက်နုက် ပ္တိုန်ထ္ၜး တင်အဓိက ပ္ဍဲလိက် လစွံစိုတ်ဏအ် ဓမံက်ထ္ၜး လဝ်ဂှ်မ္ဂး
(၁) ကောံဓရီု ပရေင်ဂကူမန် မကၠောန်သ္ပ ပ္ဍဲဍုင်မတ်မလီုဝွံ ဟိုတ်နူ ညးစၞး ဗွိုင်ဇဳ တိုန်စိုပ် ဟွံဂွံတုဲ ဂွံသ္ပစၞး ရမျှာင်အလုံ ကောန်ဂကူမန် မွဲမာန်ဂှ် ဒှ်ဟွံမာန်ရောင်။
(၂) လၟေင်ကမၠောန် သ္ၚဳဂၠိပ် ပ္တိုန်ထ္ၜး စပ်ကဵု မူဝါဒဂမၠိုင် စတံနူ သ္ဇိုင်မူသၞောဝ်ဥပေဒ ဒက်ပ္တန်ကၟိန်ဍုင် ဖေတ်ဒရာ ကေုာံ သၞောဝ်ဥပဒေသ္ဇိုင် ဒက်ပ္တန်ဍုင်မန်ရာမည တအ်ဂှ် ပ္တိုန်ထ္ၜးကဵု ပ္ဍဲကောံဓရီု သ္ပစၞးကဵု ဗွိုင်ဇဳလေဝ် ဟွံမာန်ဏီတုဲ ပွမပ္တိုန်ထ္ၜး သ္ၚဳဂၠိပ် ပ္ဍဲကောံဓရီု ပရေင်ဂကူမန် လ္တူဍုင်မတ်မလီုဂှ် ဒှ်ဟွံထေက်။ မူဝါဒ ဆေင်စပ်ကဵု ပရေင်ကောန်ဂကူမန် သွာင်နာနာ တအ်လေဝ် သ္ပဏာဒတန် ပ္ဍဲကောံဓရီု ပရေင်ဂကူဏအ် ကၠောန်သ္ပ ဟွံဂွံရောင်။
(၃) အကာဲအရာ ပရေင်ဂကူပိုဲ ကာလၟုဟ်ဝွံ ပ္ဍဲအရာရုန်ဂစာန် လုပ်မံင် ပေါဲဗတိုက် သွက်အခေါင် ကံကုသဵု ဇကုဇကု ဖန်ဖက်ကေတ်မာန်ဂှ် ပ္ဍဲဗွိုင်ကောန်ဂကူမန်ပိုဲ နကဵုလညာတ်ပရေင်ဍုင်ကွာန် ဒှ်မံင်ၜါလွးရောင်တုဲ နကဵုလညာတ် မွဲလ္ပာ်ဓဝ် ပ္တဝ်ဏာမံင် လၟေင်ပရေင်ကမၠောန်ဂကူ ပ္ဍဲကောံဓရီု ပရေင်ဂကူဂှ် သာတုဲပရေင်ညဳသၟဟ်ဂကူ လီုလာ်မာန်ရောင် ညာတ်ရ။
(၄) ဒုင်သ္ဇိုင်ကဵု အကာဲအရာ ဍုင်ပိုဲတုဲ နူကောံဓရီုပရေင်ဂကူမန်ဏအ် မွဲကဆံင် နကဵု ကောန်ဂကူမန်ပိုဲ ဖျေံဏာ သ္ဂုတ်သွာတ် အရာကံင်ဇြဳပၞာန်တအ် သ္ဂောံဒှ်အာ ပၞော်ယီုမာန်ဂှ်လေဝ် ဒှ်ဓဝိင် ဇၞော်ကဵုဇြဟတ်ရ။
(၅) ကောံဓရီုဇၞော် ပရေင်ဂကူ (ဝါ) ကောံဓရီု ပရေင်ဂကူမန်ဝွံ အကာဲအရာကဵုမ္ဂး ဟွံသေင်သာ်ဂှ် ဖန်ဗဒှ်ကေတ် ညံင်ညးစၞး ဗွိုင်ဇဳတအ် ဂွံတိုန်စိုပ် မာန်မ္ဂးဟေင် ကၠောန်သ္ပထေက်ရောင် ညာတ်ရ။
ထံက်ထ္ၜးလဝ် သာ်ဏအ် ဂွံညာတ် ကေတ်ရ။
သရောပ် ဒးသ္ၚဳဂၠိပ် လိက်လစွံစိုတ် ဏအ်မ္ဂး တင်ဒှ်ဓဝိင် စပ်ကဵု ပရေင်ညဳသၟဟ် ဂကူတုဲ ဖေက်လညာတ် ကောန်ဂကူမန်ပြး သီုကဵုလဝ် ကသပ် လညာတ် လစွံစိုတ် ကောံဓရီု ပရေင်ဂကူမန်ဂှ် ပ္ဍဲအကာဲအရာလဵု ကေုာံ ဗီုပြင်လဵု ဂပ်ဝ် ဒးကၠောန်ၜိုတ် ထေက်ဂှ် ထံက်ထ္ၜးလဝ် နစေတနာရောင် သ္ၚဳဂၠိပ် ညာတ်ကေတ် သာ်ဏအ်ရ။
စပ်ကဵု မူဟိုတ် ဒးကၠောန်သ္ပ ကောံဓရီု ပရေင်ဂကူမန် သၞာံ၂၀၂၅ ဏအ်ရော၊ သၟာန်ဏအ် ဒးကလေင် သှ်မ္ဂး ကောံဓရီု ပရေင်ဂကူမန် မကၠောန်သ္ပမံင် ပ္ဍဲလတူဍုင် မတ်မလီုဏအ်ဝွံ သွက်ဂွံ ဓမံက်ရုပ်ရဴ တင်သ္ဂုတ်သွာတ် ဒးကၠောန် ပြဟ်ဟ် (၃) တင် မဖျေံ စွံလဝ် နူကောံဓရီုဇၞော် ပရေင်ဂကူမန် ပ္ဍဲဗဒိုပ် ညဳသာ ပ္ဍဲသၞာံ ၂၀၂၂ တေံတုဲ ဒးကော်ကၠုင် မဒှ်ရောင် ပ္ဍဲမုက်လိက် ပရိုင်ဗော်ဍုင်မန်တၟိ ဓမံက်ထ္ၜး သှ်ကလးလဝ် နွံရ။
ကောံဓရီုဇၞော် ပရေင်ဂကူဂှ် ၜါသၞာံ မွဲဝါ ညံင်ဂွံကၠောန်အာမံင် ဗွဲလၟေင်င်ဂှ်လေဝ် အကြာက္ဍိုပ်သ္ကိုပ် ကောန်ဂကူမန်၊ သင်မန်၊ ဂကောံနာနာ တအ်တုပ်လဝ်စိုတ် နွံမံင်ရောင်ဂှ်လေဝ် ကေင်ကာဗဟဵု ဗော်ဍုင်မန်တၟိ နာဲအံင်မ္ၚဵု ဟီုမြော်လဝ် ပ္ဍဲဂလာန် ပံက်ကောံဓရီု ပ္ဍဲစၟတ်တ္ၚဲ အေပရယ် (၂) ဂှ်ရ။
ကလေင်ရံင်အာဝင် မွဲဒမြိပ် စပ်ကဵု ပရေင်ကၠောန်ဗဒှ် ကောံဓရီု ပရေင်ဂကူမန်မ္ဂး သၞာံ ၂၀၂၅ ဏအ် ကၠောန်ဗဒှ်မံင် ပ္ဍဲလ္တူဍုင် မတ်မလီုတုဲ၊ ကၠာဏအ် သၞာံ ၂၀၂၂ ဂှ် ကၠောန်ဗဒှ်ကၠုင် ပ္ဍဲဗဒိုပ် ညဳသာ၊ ပ္ဍဲသၞာံ ၂၀၁၈ ဂှ် ကောံဓရီု ပရေင်ဍုင်ကွာန် ဂကူမန် ပ္ဍဲဍုင်ရေဝ်၊ ပ္ဍဲသၞာံ ၂၀၁၆ ဂှ် ကောံဓရီု ကအ်ပှ်လှ်၊ ပ္ဍဲသၞာံ ၂၀၁၃ ဂှ် ပ္ဍဲမှောံခန် တွဵုရးဍုင်မန် ဗွဲလၟေင်င် ကၠောန်ကၠုင် နွံရောင် ဂွံညာတ်ကေတ်ရ။ ကောံဓရီု ပရေင်ဂကူမန် မွဲဝါ တုဲဒှ် အာမဂး ဖျေံစွံလဝ် လၟေင်ကမၠောန် ဒးဓမံက်ရုပ်ရဴ သွာင်ညး ကဵုညး လေဝ်ကီု၊ သွာင်ဂမၠိုင် ပံင်ကောံဓမံက် ရုပ်ရဴ လေဝ်ကီု သာ်ဏအ် ဖျေံကၠုင်တုဲ ဓမံက်ကၠုင် ရုပ်ရဴနွံရ။
ပ္ဍဲအခိင်တေံဂှ် အကာဲအရာ ပရေင်ဍုင်ကွာန် ကၟိန်ဍုင်ဗၟာ ကေုာံ လညာတ် ပရေင်ဍုင်ကွာန် အပ္ဍဲဂကူမန်ဂှ် ဟွံပါ်ခြာ ဇၞော်ကဵု ဇြဟတ်ဏီ၊ သီုကဵု ဆိုင်မုက် ဆဵုညာတ် ညးသကအ် မွဲစွံ မွဲဒၞါဲ အာကၠုင်လေဝ် ၜိုတ်သြိုဟ် ပြေပြံင်မံင်တုဲ ပရေင်ပညဳပညပ် ဆဵုဂဗ ရေင်သ္ကအ်ဂှ် ဟွံလအ် ဟွံလအ် ကၠောန်သ္ပကၠုင် ဂွံရ။
ဆဂး စပ္တံနူ ပၞာန်သဳအဝဵု သၞာံ ၂၀၂၁ တုဲ တင်ဒတူလိုင် ပရေင်ဍုင်ကွာန် အကြာ ကောန်ဂကူ မန်ပိုဲဂှ် တၞဟ်ခြာကၠုင် ဇၞော်ကဵု ဇြဟတ်ကၠုင် ဂွံညာတ်ကၠုင်ရ။ ကြဴအိုတ် ဟိုတ်နူ တင်ဒတူလိုင် ကေုာံ လညာတ်ပရေင်ဍုင်ကွာန် ပညဳညးသ္အက် ဟွံဂွံ ဒဵုကဵု ဗော်ဍုင်မန်တၟိ ဒှ်အာ ၜါလွးဂှ် ဂွံဆဵု ကေတ်ရ။
ဟိုတ်နူဏအ်တုဲ အကြာ ညးဍုင်ကွာန်မန်ကီု၊ အကြာ ဒပ်ရပ်လွဟ် မန်တအ်ကီုဂှ် စပ်ကဵု ဂွံပညဳလညာတ် ဂွံဇိင်တပ် စပ်ကဵု ပရေင်ပရော ဂကူမန်ဂှ် ဗွိုက်က္ဍန်ကၠုင် ဇၞော်ကဵု ဇြဟတ်ရ။
ၜိုန်ရ ဒၞါဲဆဵုဂဗ သဳကၠဳ ပညဳပညပ် သွက်ပရေင်ဂကူမန်ဂှ် က္ဍန်ဂြက်ကၠုင် ဟီုမာန်ကီုလေဝ် ပွလၟေင်ကမၠောန် စပ်ကဵု လၟေင်ကမၠာန် ဇိင်တပ် ပညဳပညပ် သွက်ဂွံကော် ကောံဓရီုဇၞော်ဂှ် ပ္ဍဲကာလဏအ်ရ မံက်ကတဵုကၠုင် ဟွံသေင်၊ ဗွဲတၟေင် ကမၠောန် ဓမံက်မံင် ရုပ်ရဴ စပ်ကဵု ပရေင်ကမၠောန် ကောံဓရီု ပရေင်ဂကူမန် တအ်ဂမၠိုင်ဂှ် နူတမ်ဝါဒိတေံ မဒှ်အရာ ပကောံပကေဝ်လဝ် လညာတ် နူဗွိုင်ဇဳနွံရ။ ပ္ဍဲကာလဏအ်ရ ဟိုတ်နူ အကာဲအရာ အခက်အခုဲနာနာ ကတဵုဒှ်မံင်တုဲ ကောံဓရီု ပရေင်ဂကူမန်ဂှ် သီုဗွိုင်ဇဳ ဂွံပါလုပ် ဂွံသ္ပစၞး ရမျှာင်ဂကူမန်ဂှ် ဒှ်ဟွံမာန်ဏီရ။
“ပရေင်ကမၠောန် စပ်ကဵု ကောံဓရီု ပရေင်ဂကူမန်ဂှ် နူစတမ်တေံ၊ အခိင်တေံဂှ် မၞိဟ်စုင် ဗွိုင်စုင် ပါလုပ် ကၠုင်မံင်ရ။ ဆဂး စိုပ်ကာလ လၟုဟ်ဏံ ပၞာန်သီအဝဵုတုဲ ပိုဲတအ် ဟွံဂွံ ဆဵုညးသကအ် ဟွံဂွံ သဳကၠဳ ညးသကအ် လေဝ်နွံ။ ဆဂး တမ်မ ဍေံ နူစတေံဂှ် ပါလုပ်ကၠုင်မံင် သီုဖအိုတ်ရ” သာ်ဏအ် ညးမၞုံအခေါင်ဟီုဂး ကောံဓရီု ပရေင်ဂကူမန် နာဲအံင်ထူး ဟီုလဴ စပ်ကဵု ဝင်အတိက် ကောံဓရီု ပရေင်ဂကူမန်ရ။
ၜိုန်ရ ပရေင်ခိုအ်ဗ ခက်ခုဲနာနာ နွံမံင် ကီုလေဝ် ပ္ဍဲအခိင် ကာလ လၟုဟ်ဏအ် ပ္ဍဲဗွိုင်ကောန်ဂကူ မန်ပိုဲဏအ် စပ်ကဵု လၟေင်ကမၠောန် ပရေင်ချီဓရာင် ဂကူမန်ဂှ် ညံင်ဟွံဂွံ ဒေါအ်ဒေင်မံင်တုဲ၊ ဒးဆက် ဂါံအာမံင် သိုက်သိုက် မွဲလ္ဂာံတုဲ ဒးအာမံင် လၟေင်င်ထေက်ရောင် သာ်ဏအ် ညးမၞုံ အခေါင်ဟီုဂး ကောံဓရီု ပရေင်ဂကူ နာဲအံင်ထူး ကဵုလညာတ်နွံရ။
“ဂၠံင်တရဴ ပိုဲရုန်ဂစာန်မံင် ဏံဂှ် အခိင်လဵု ပိုဲဂွံ အံင်ဇၞးမာန် ပိုဲတီကေတ် ဟွံမာန်ပုဟ် ပရေင်ဍုင်ကွာန်ဏံ ပိုဲဟီုစ ကြာတ်မံင်။ ဆဂး အကြာ ကာလဏံ ပ္ဍဲကဵုဗွိုင်ပိုဲ ပ္ဍဲဏအ် အာဂွံ မွဲဂါံတှ်ေ ညံင်ပိုဲ ဂွံဂါံအာ သိုက်သိုက် မွဲဂါံဂွံ၊ အာၜါဂါံဂွံ တှ်ေညံင်ဂွံအာ ၜါဂါံ ဗီုဏံ လဂါံဇိုင် ပရေင်ချီဓရာင် ဂကူပိုဲ ဒးကေတ် အခေါင်အရာ ပိုဲဒးဂါံအာ မံင်ရ။ ကာလ စိုပ်အခိင်တှ်ေ ပိုဲကလေင် ပံင်ကောံ ညးသကအ်မာန် ပိုဲတက်ကျာ မွဲဝိုင် ဂွံပၠန်တှ်ေ ကမၠောန်ဏံ ပိုဲဆက် ယိုက်အာ ရေင်တၠုင်အာ ဏောင်တှ်ေ သွက်ပိုဲ ဒှ်ဂုဏ်ဖဵု တၟာဂလိုင်ရ” သာ်ဏအ် နာဲအံင်ထူး ကဵုလဝ် လညာတ်ရ။
စပ်ကဵု လညာတ် လစွံစိုတ် ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်)(NMSP-AD) ဟီုလဝ်ဂှ် ပိုဲဒုင်မံင်တုဲရ၊ ကောံဓရီု ပရေင်ဂကူမန် ဏံဂှ် ပိုဲတအ် သွက်ဂွံ ပတိတ်သွဟ် ပရေင်ဍုင်ကွာန် ဟွံသေင်၊ ဗွဲတၟေင် သွက်ပိုဲတအ် ဂွံပကောံအာ လညာတ်ကောန်ဂကူမန် ဒှ်အဓိက ရောင်ဂှ် ညးမၞုံ အခေါင်ဟီုဂး ကောံဓရီု ပရေင်ဂကူမန် သၞာံ ၂၀၂၅ နာဲသြကောရတ် ဟီုလဴ သာ်ဏံရ။
“စပ်ကဵု လညာတ် မဓမံက်ထ္ၜးလဝ် ကောံဓရီုဏအ်၊ ပစၞး ကောန်ဂကူမန် မာန်ဟွံသေင်ပုဟ်ဂှ် ဂပ်ပ်ဂဝ်ဝ် ဒးဒုင်တၠုင်ရ။ ကောံဓရီု ကၠောန်မံင် လၟုဟ်ဂှ်၊ ပိုဲသွက်ဂွံ ပတိတ်သွဟ် ဟွံသေင်၊ ပိုဲသွက် ပကောံလညာတ်၊ ပိုဲပကောံ တင်နင် နဲကဲ ဗီုလဵု ပိုဲဂွံဆက်အာ ဂတဏအ် နကဵု တင်ရန်တၟအ်ဏံ ပိုဲကၠောန်ဗဒှ်မံင်ရောင် မိက်ဂွံကဵု လညာတ်ဗီုဂှ် ” သာ်ဏအ် ညးဟီုရ။
ပ္ဍဲကောံဓရီု ပရေင်ဂကူ ကၠောန်ဗဒှ်မံင်ဏအ် သွက်ဂွံသ္ရဳဂၠိပ် မူဝါဒ သွာင်နာနာ တအ်ဂှ်၊ ဂွံသ္ပစၞးရမျာင် အလုံ ကောန်ဂကူမန်မွဲ ဟွံမာန် ဒှ်ကီုလေဝ် သဇိုင်သၞောဝ် ဥပဒေ သွက်ကောန်ဂကူမန် ပိုဲဂှ် ဒးပကောံပကေဝ်လဝ် ထေက်ရောင် သာ်ဏအ် မၞိဟ်တိုန်စိုပ် ကောံဓရီု ပရေင်ဂကူမန် နူဗွိုင် ပူဂိုလ် ဘိက်ထေက် မွဲတၠ ဟီုရ။
“ညးစၞး ဗွိုင်ဇဳ တိုန်စိုပ် ဟွံမာန် ကီုလေဝ်၊ ကောံဓရီု သ္ရဳဂၠိပ်ဏံဂှ် ဒှ်ထေက်မံင်ရ။ မူဟိုတ်ရော ဟီုတှ်ေ ပိုဲဒက်ပ္တန် ကၟိန်ဍုင် ဖေတ်ဒရာဏောင် ဟီုတှ်ေ ပိုဲဒး သ္ရဳဂၠိပ် ပကောံပကေဝ်လဝ် သဇိုင်သၞောဝ်ဥပဒေ ထေက်ဏောင်။ တုဲပၠန် မွဲလပါ်တေံ ၜိုန်ရ တိုန်စိုပ် ဟွံမာန် ဒှ်ကီုလေဝ် အခါမွဲတ္ရဲ ပိုဲဒး ပတဝ်မုက် ညးသကအ်တှ်ေ မူဝါဒ သ္ရဳဂၠိပ် လဝ်ဏံဂှ် ပိုဲတအ် ပကောံထောံ ဂွံမံင်။ မူဟိုတ်ရော ဟီုတှ်ေ ကာလ ပိုဲဒးတက် ကျာကဵု အလုံ ကၟိုန်ဍုင်တှ်ေ သဇိုင်မူ ဝါဒပိုဲ ဒးနွံလဝ် ထေက်ရောင်” သာ်ဏအ် ညးကဵုလဝ် လညာတ်ရ။
သွက်သွာင် ညးတိုန်စိုပ်ကၠုင် ဟွံမာန် တအ်ဂှ်လဝ် စပ်ကဵု ကောံဓရီုဏအ် မုသဳကၠဳ ဂွံလဝ် ၊ မုပညဳဂွံလဝ် တအ်ဂှ် ပကောံပကေဝ်တုဲ ပလံင်ဗစိုပ်ကဵု ထေက်ရောင် ညးစၞး နူဗွိုင် ပူဂဵု ဘိက်ထေက် တိုန်စိုပ်ကၠုင် ကောံဓရီု မွဲတၠ ဟီုလဴ လညာတ်ညးရ။
“ယဝ်ရ ဗွိုင်စုင် ပါလုပ်မာန်တှ်ေ ပဵုဍေံ ခိုဟ်ဏောင် မုဟိုတ်ရောတှ်ေ ရမျာင်ဗွိုင်စုင် ဍေံပါဏောင်။ ပရေင်ညဳသၟဟ်ပိုဲ ပ္ဍဲကဵု ပၞာန်သီအဝဵုဏံ ဗီုလဵု ပိုဲတအ် ဂွံစန်ပကောံဂွံ။ ပိုဲတအ်ဒးဂၠာဲ နဲကဲ။ ဟိုတ်ပ ကောံဓရီုဏံတှ်ေ စန်ပကောံ ညးသကအ် စၟဳစ အနာဂတ်ဂကူ ဍေံဂွံ မာန်ဏောင်။ မွဲသာ် ပၠန်ဂှ်တှ်ေ ရဲကၠုင်စိုပ် ဟွံမာန် ဂှ်တှ်ေ ပ္ဍဲကဵု ဗွိုင်ဇကု ဗီုလဵု နွံရောဂှ် မိက်ဂွံကဵု ပတိုန်ထ္ၜးကီု၊ ပတိုန်ထ္ၜး ပ္ဍဲဏံ ဟွံဂွံ ကီုလေဝ် နကဵု လိက်စံင် ကီုဒှ် ယဝ်ရ ပလံင်ဗစိုပ် ကဵုမာန်တှ်ေ ဍေံခိုဟ်ဏောင်” သာ်ဏအ် ညးကဵု လညာတ်ရ။
တ္ၚဲဏအ် စၟတ်တ္ၚဲ ဂိတုအေပရယ် (၃) ဏအ် နတ္ၚဲ ဒုတိယ ဆက်တုဲ ကၠောန်ဗဒှ်မံင် ကောံဓရီု ပရေင်ဂကူမန် ပ္ဍဲဍုင်မတ်မလီုဖိုဟ်ရ။ အကြာ ဥတု ကညင် ကတဴကရာန်ဂှ် ညးဗျု၊ ညးထဴ၊ ညးဍောတ်၊ ညးသွတ် ၊ ညးတြုံ၊ ညးဗြဴ ကောန်ဂကူမန် ညးဆာန်ဂကူတအ် ကတဴကတာန် ဟွံဟီု ဇက်အာမံင် ကောံဓရီု ဂြုဂြုဂြီဂြီ ဖိုဟ်ရ။ လညာတ် ပါ်ပါဲ နာနာတအ် ဟီုကၠုင် ထံက်ထ္ၜးကၠုင် နွံကီုလေဝ်၊ သွက်ဂၠံင်တရဴ ပရေင်ချီဓရာင် ဂကူမန်ဂှ် ဟွံယှဇ်အဲ ဟွဒေါံဒေင် ဆက်ကွာ်ဂါံ အာမံင် ဖိုဟ်ရ။ စပ်ကဵု လညာတ်နွံ ဟွံသၟဟ်ရထ စပ်ကဵု ကောံဓရီု ပရေင်ဂကူ ဝွံလေဝ် သွက်ဂွံ ပညဳ၊ ဇိင်တပ်အာဂှ် က္ဍိုပ်သ္ကိုပ် ညးဆန်ၜန် ကၠောန်ဗဒှ် ကောံဓရီုတအ် ယဵုယိုက်ကေတ်လဝ်တုဲ သီုကဵု ပံက်လဝ်ကဵုတြင် ဂွံသဳကၠဳ ပညဳပညပ်ရ။
ကောံဓရီု ပရေင်ဍုင်ဂကူမန် သၞာံ ၂၀၂၅ ဏံဝွံ သွက်ဂွံ သ္ၚဳဂၠိပ် သဳကၠဳ၊ သွက်ဂွံ ပကောံ လညာတ် ကေုာံ သွက် ဂွံဒက်ပတိုန် ဓဝ်ညဳသၟဟ် ဂကူမန် ရန်တၟအ် ကၠောန်ဗဒှ်မံင်ရ။ လတူ လညာတ် တၞဟ်ခြာမံင် တအ်ဂှ်လေဝ် နူသ္ၚောဲ ညံင်ဂွံကြပ် ၊ နူ လညာတ်ဟွံတုပ် ညံင်ဂွံဒုင်တဲ ပရေင်တၞဟ်ခြာ ရေင်သ္ကအ်တုဲ ပံက်လဝ်တြင် သွက်ဂွံ သဳကၠဳ ပညဳပညပ် အာမ္ဂး သွက်ကောန်ဂကူမန်ပိုဲ ကတဵုဒှ် ဂုဏ်ဖဵု ဇၞော်ကဵု ဇြဟတ်မာန်ရ။
ကဵုသမ္တီ။ ။ လိက်ပရေင် “ဝိရောဓိ ကောံဓရီု ပရေင်ဂကူမန် ကေုာံ လညာတ်ပံက်တြင်
” ဝွံ ကံက်နုက်နင် နူကဵုမုက်လိက် Mon Region News (https://www.facebook.com/
0 Comments