မွဲဒမြိပ်ဂၠံၚ်ဇၞော်စၟတ် (၈) ပွိုၚ်ဍုၚ်ဇြပ်ဗုကဵု ရးတနၚ်သဳဂှ် ဂကောံဒပ်ပၠန်ဂတးဂမၠိုၚ်တအ်ကဵု ဒပ်ကံၚ်သဳပၞာန်တအ် ဗီုညးကဵုညး ဂစာန်ၜေတ်လုပ်ဖျေံသဇိုၚ်နွံကၠုၚ်ဂှ်တုဲ ညးဒေသတအ် ဒှ်ဂဝိၚ် ဂွိၚ်ဖေက်ပေါဲဗတိုက်က္တဵုဒှ်ကၠုၚ် သ္ဂးရ။
စနူပယျဵု အကြာပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်ကီု၊ နူပွိုၚ်ဍုၚ်ရေဝ်ကဵု အကြာရးတနၚ်သဳ ပွိုၚ်ဍုၚ်ဂမၠိုၚ်ဂှ်ကီု ဂကောံဒပ်ပၠန်ဂတးဂမၠိုၚ်ကဵု ဒပ်ကံၚ်သဳပၞာန်တအ် ဗီုညးကဵုညး ဂစာန်ၜေတ်လုပ်ဖျေံသဇိုၚ်နွံဂှ်တုဲ ပေါဲဗတိုက်ဆာၚ်မုက် သွက်ဂွံက္တဵုဒှ်နွံဂှ်ရ ညးဒေသလ္ၚဵုတအ် ပြံၚ်ဆုဲဒၟံၚ်နွံ ဂွံပရိုၚ်ရ။
“ဒေသတၟံကၞေၚ်ဂှ်တှ်ေ လ္ပာ်ဂၠံၚ်ကာဂှ် ကွာန်တၟိကုန်ဗဴကဵု ကွာန်ကျာ်ဂှ် ပၞာန်ဗၟာတံနွံ၊ ပလိုတ်ဍာန်ကာ လၟိုၚ်၊ တံၚ်ပရၚ်၊ ကအ်ဍောတ်တေံလေဝ် ပၞာန်ဗၟာတံ ဂေတ်မံၚ်နကဵုကရောၚ်ပၞာန်ဍေံနွံ၊ သၚ်လ္ပာ်ဗၟံက်ဍာန်ကာဏံတှ်ေ ဂကောံပၠန်ဂတးတံနွံမံၚ်၊ ဗီုညးကဵုညးဂှ် ၜေတ်တိတ်မံၚ်ဍာန်ကာဏံနွံမံၚ်၊ ရံၚ်ကေတ်တှ်ေ လ္ပာ်ပၞာန်ဗၟာတံလေဝ် ဍေံဘိုအ်ဂွံၜေတ်လုပ်တိုန် လ္ပာ်ဍာန်ကာဏံနွံမံၚ်၊ မၚ်ကေတ်မံၚ်ဂွန်ညးသ္ကအ် ဘိုအ်ဂွံဒှ်ညးကအ်နွံ” သာ်ဝွံ ညးဒေသတၟံကၞေၚ်မွဲတၠ ဟီုရ။
ဒေသလၟိုၚ်၊ တၟံကၞေၚ် ရေဝ်သၟဝ်ကျာဂှ်ဝွံ စတမ်နူသၞာံ (၂၀၂၅) မံက်ဏံရ နူလ္ပာ်ဒပ်ကံၚ်သဳပၞာန်တံ ဂလိုၚ်ဗပေၚ်လဝ်ဇြဟတ်တုဲ ဂေတ်ချဳဒရာၚ်ဒၟံၚ် နကဵုကရောၚ်ပၞာန် ပလိုတ်ဂၠံၚ်ကွဳစက်ဇၞော်ဂှ်တုဲ လတူဂၠံၚ်ကွဳစက်ဇၞော်ဂှ် ဂကောံပၠန်ဂတး ဂမၠိုၚ်တံ ချဳဒရာၚ်ဒၟံၚ်နကဵုကရောၚ်ပၞာန်နွံရ။
တၠုၚ်လအာတုပ်ကဵုရေဝ်သၟဝ်ကျာဂှ်ကီု ဒေသပွိုၚ်ဍုၚ်ဇြပ်ဗု ဆက်စပ်ကဵု ဒေသပယျဵုရေဝ်သၟဝ်ကျာ လ္ပာ်ပလိုတ်ဂၠံၚ်ကွဳစက်ဇၞော် (စၟတ် ၈) ဂှ် ဒပ်ကံၚ်သဳပၞာန်တံ ဂလိုၚ်ဖျေံလဝ်ဇြဟတ်တုဲ ဂစာန်ၜေတ်ထပက်မံၚ် လ္ပာ်ဂၠံၚ်ကွဳစက်ဇၞော်တေံနွံမာန်ရောၚ် ညးဒေသမွဲတၠ ဟီုဗီုဏံရ။
“လ္ပာ်ဒေသပယျဵုရေဝ်သၟဝ်ကျာကဵု ဇြပ်ဗု ပလိုတ်ဂၠံၚ်ဇၞော် ကွာန်အနေၚ်၊ ကွာန်ပြဳ တံမွဲဒမြိပ်ဂှ်တှ်ေ ဒပ်ကံၚ်သဳပၞာန်တံ ချဳဒရာၚ်နွံကၠုၚ်၊ သၚ်လ္ပာ်ဗၟံက်ဂှ်တှ်ေ ဂကောံပၠန်ဂတးတံ အကြာဂၠံၚ်ကွဳစက်ကဵု ဂၠံၚ်ကွဳပၟတ်၊ အဒေါဝ်ဂှ်တှေ် ပၞာန်ဗၟာလေဝ်စိုပ်၊ လ္ပာ်ဒပ်ပၠန်ဂတးတံလေဝ်စိုပ်မံၚ်၊ ညးၜေတ်လုပ် အဲၜေတ်အာ ဒှ်မံၚ် ဘိုအ်ဂွံဒှ်ပေါဲဗတိုက်နွံမံၚ်၊ ညးကွာန်တံဂှ် ဆဵုမံၚ် ဒပ်ပၞာန်သီုၜါလ္ပာ်တှေ် လ္ၚဵုဂှ် ကပှ်လဝ်ကပေါတ်နွံ၊ လ္ၚဵုဂှ်တှ်ေ ပြံၚ်ပဆုဲလဝ်ကပေါတ်နွံ၊ လ္ၚဵုမွဲစွံဂှ်တှ်ေ သီုမၞိဟ်ပြံၚ်ဆုဲအာမံၚ်သ္ၚိမသကောဒေံလေဝ်နွံမံၚ်” ရဂှ် ညးဒေသကွာန်ပယျဵုဇြပ်ဗုကဵု ရေဝ် မွဲတၠ ဟီုထ္ၜးရ။
လ္ပာ်ဒပ်ကံၚ်သဳပၞာန်တံကီု လ္ပာ်ဒပ်ဂကောံပၠန်ဂတးဂမၠိုၚ်ကီု ချဳဒရာၚ်ဒၟံၚ် အကြာပယျဵုရေဝ် ကဵု ဇြပ်ဗုဂှ်တုဲ က္ၜၚ်ကျာပၞာန်သၞေၚ်ဝဲကီု က္ၜၚ်ကျာပၞာန်ဂျေက်ကီု ချဳဒရာၚ်ပဝ်ကၠုၚ်ဒၟံၚ် အရိုဟ်ဒဒှ်တ္ၚဲနွံဂှ်လေဝ် ညးဒေသတံ ဟီုရ။
နကဵုကံၚ်သဳပၞာန်တံဂှ် သွက်ဂွံဓမံက်အာရုပ်ရဴ ကိုန်စဳဇန် ပရေၚ်ပိုန်ဒြပ်ဇဳ (စီးပွားရေးစုံ) ပ္ဍဲထဝဲါဂှ်တုဲ မွဲဒမြိပ်ဂၠံၚ်ဇၞော်စၟတ် (၈) နူမတ်မလီု စိုပ်ရးတနၚ်သဳတေံ သွက်ဂွံက လေၚ်ထိၚ်ဒဝ် ဖျေံအာဒပ်ဂီုကၠီုဂှ် ကံၚ်သဳပၞာန်တံ ဂိုတ်ဂစာန်ဒၟံၚ်တုဲ လ္ပာ်ဂကောံပၠန်ဂတး ဂမၠိုၚ်တံလေဝ် ကိုန်အစဳဇန်ပရေၚ်ပိုန်ဒြပ်ဇဳ ထဝဲါ ညံၚ်ဟွံဂွံဒှ်ဂှ် ကြတ်တာဒၞာ ဖျေံဂလိုၚ် လဝ်ဇြဟတ်နွံဂှ်ရ ဒၞာဲလ္ၚဵု ဆာၚ်မုက်တုဲ ပေါဲဗတိုက်က္တဵုဒှ်မံၚ်လေဝ်နွံရောၚ် ဂွံတီကေတ်ရ။
