ပ္ဍဲကဵုသဘၚ်စှ်ေဘာဥတုက္ညၚ် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ဏံဂှ် ဒှ်မာန်မ္ဂး လ္ပက္ညအာကဵု ကွဳစက်လာၚ်ဇြေန်ဟွံမွဲ (Without) ညိဂှ် နူကဵုညးတာလျိုၚ်တအ် ပ္တိတ်လိက်ကဵုသတိ။

“ယွံတၠဳပိုန်သၚ် ညးမက္ညပြာပ်ကၠုၚ် အခန်ကၞာကဵုလာဘ် (အလုံဒေသရးမန်) ပ္ဍဲကဵုကွာန်သာံလှေဝ်တအ် ညးဂမၠိုၚ် ကျာ်၊ တၠဳပိုန်သၚ် မက္ညကၠုၚ် နကဵုကွဳစက်ကာ (Without) တအ်ညးဂမၠိုၚ် အခိၚ်အခါကာလလၟုဟ်ဏံ ဟိုတ်နူအကာဲအရာ ပရေၚ်စေဝ်ပၞောန်ရပ်ကွဳစက်ကာ (Without) ကြေပ်ဂြတ်သ္ကာတ်မြဟ်ဒၟံၚ်တုဲ ဒှ်မာန်မ္ဂး လ္ပအာကၠုၚ်နကဵုကွဳစက်ကာ (Without) အိုတ်ညိဂှ် မ္ဒးဂရၚ်ပ္တီဏာသၟဝ်ဂၠးဂတာဇိုၚ် တၠဳပိုန်သၚ်မန်ပိုဲတအ်ညးဂမၠိုၚ် ဗွဲမရှ်သှ်ေရေဴဂဴရကျာ်” ရဴသာ်ဝွံ နူကဵုဂအုပ်ရုၚ် (ရုၚ်ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်) ထ္ပက်စၟတ်တဲတုဲ ချူလလောၚ်တြးလဝ်ရ။

ပ္ဍဲကဵုတွဵုရးဍုၚ်ကရေၚ် ပွိုၚ်ဍုၚ်ဘာအၚ်ဂှ် စတမ်နူဇှ်ေ (၆) မံက် (ဂျောန် ၁) မ္ဂး သွက်ဂွံစၟဳစၟတ်ရပ်စပ်အာ ကွဳလိုန်ဓာတ်၊ ကွဳစက်ဟွံမွဲကဵုလာၚ်ဇြေန် (Without) ရောၚ်ဂှ် ညးတာလျိုၚ်အလဵုအသဳကံၚ်သဳပၞာန်တအ် ဗက်လလောၚ်တြးလဝ်ကဵု စက်သမၠဲရမျာၚ်ရ။

သဘၚ်စှေ်ဘာ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ဝွံ သွက်ဂွံကၠောန်ဗဒှ်အာ ပ္ဍဲဂိတုဇှေ် (၆) မံက် (ဂျောန် ၁) ဒၞာဲဘာရာမညနိကာယ ဘာကွာန်သာံလှေဝ်၊ ပ္ဍဲတွဵုရးဍုၚ်ကရေၚ် ပွိုၚ်ဍုၚ်ဘာအာၚ်ရ။

ဟိုတ်နူကံၚ်သဳပၞာန်တအ် ကရေပ်ဓရတ်စၟဳစၟတ် ရပ်ကွဳလိုန်ဓာတ်၊ ကွဳစက်ဟွံမွဲကဵုလာၚ်ဇြေန် တေၚ်တေၚ်ဂြတ်ဂြတ်တုဲ သၟတ်ကွးဘာ သွက်ဂွံအာသဘၚ်စှေ်ဘာဂှ်ကီု ညးဍုၚ်ကွာန်ဂမၠိုၚ်တအ်ကီု ခမဳသၚ်ညးမဒးလဝ်တာလျိုၚ် သွာၚ်နာနာတအ်ကီု အာကၠုၚ်သွက်ဂွံခက်ခုဲနွံရောၚ် တၠဂုဏ်အ္စာ ကေတ်လဝ်တာလျိုၚ် နူပွိုၚ်ဍုၚ်မုဟ်ဍုၚ်မွဲဇကုဂှ် ဟီုမြော်သာ်ဝွံရ။

“ဍေံ (ကံၚ်သဳပၞာန်) တအ် ရပ်ကွေံကွေံဏောၚ်တှေ် ကွးဘာတအ်ဂွံအာကီု၊ သွက်ခမဳသၚ်တအ်ကီု ဂွံအာဂှ် ခက်ဍာံဍာံရောၚ်” ဂှ် ဟီုမြော်ဏာရ။

ဗွဲကြဴနူကံၚ်သဳပၞာန်သီအဝဵုတုဲ စဵုတ္ၚဲဏံဂှ် ကၟာတ်လဒဵုလဝ် ပရေၚ်ကၠောန်ပ္တိတ် လာၚ်ဇြေန်ကွဳလိုန်ဓာတ်၊ ကွဳစက်ဂှ်တုဲ ပ္ဍဲဒေသရးဍုၚ်မန်ကီု ကရေၚ်ကီုဂှ် ကွဳလိုန်ဓာတ်၊ ကွဳစက် ဟွံမွဲကဵုလာၚ်ဇြေန် (Without) ဂှ် ညးဍုၚ်ကွာန်ဗွဲမဂၠိုၚ်ဂၠၚ်ကီု ခမဳသၚ်ဂမၠိုၚ်ကီု သုၚ်စောဲအာကၠုၚ်မံၚ်ဂၠိုၚ်ကွေံကွေံရ။

ပ္ဍဲကဵုသဘၚ်စှေ်ဘာ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် မရနုက်ကဵု (၂၆) ဝါဏံဂှ် ကွးဘာတန်အဘိဓရ် (၁၆၃၃) တၠ၊ တန်ဝၚ်ဟံသာဝတဳ (၈၂၀) တၠ၊ တန်မုတ္တမ (၄၀၂) တၠ၊ တန်သုဝဏ္ဏဘုမ္မိ (၃၂၁) တၠ၊ တန်ဝၚ်လိက်ပတ်မန် (၁၈၄) တၠ ကေုာံ တန်ဝၚ်အခိုက်ကၞာမန် (၁၃၁) တၠတအ် အံၚ်ဇၞးကၠုၚ်လဝ်တုဲ ပ္ဍဲသဘၚ်စှ်ေဘာဏံမ္ဂး သွက်သ္ဂောံဒုၚ်ကေတ်အာလာပ်နွံရောၚ် ဂွံတီကေတ်ရ။