ကၠာသၞာံဟွံအိုတ်ဏံ သွက်ဂွံကၠောန်အာပေဲါရုဲမာဲနွံတုဲ သၟာကမၠောန်ဆုဲပြံင်တအ် ဂွံကဵုမာဲပ္ဍဲဒေသမန်ဂွံဂှ် ဂစာန်ကၠောန်ပ္တိတ်ဒၟံင်ကဵု ကာတ်ကောန်ဍုင်မန်ဖိုဟ်ရောင် ပရိုင်ကြပ်ကဵု ကမ္မေယှန်ပေဲါရုဲမာဲမွဲတၠဂှ် ဟီုလဴထ္ၜးရ။
နကဵုသၟာကမၠောန်ဆုဲပြံင်တအ်ဂှ် ဒှ်ဇြဟတ်ထံက်ဂလာန် ဗော်ကျဖောအ် မိတ်သဟာဲဒပ်ပၞာန်တအ်တုဲ ပေဲါရုဲမာဲဒှ်မ္ဂး မမာဲသၟာကမၠောန်ဆုဲပြံင်တအ် သွက်ဂွံဒှ်မမာဲညးတအ်ဂှ် ဖန်ဇန်ဒၟံင်နွံရောင် ညးကြပ်ကဵု ကမ္မေယှန်ပေဲါရုဲမာဲ ဍုင်မန်မွဲ တၠ ဟီုဗီုဏံရ။
“သၟာကမၠောန်ဆုဲပြံင်တအ် ညံင်ဂွံဒှ်အာ ကောန်ဍုင်မန်တုဲတှ်ေ ဂွံစုတ်အာမာဲ ပ္ဍဲဍုင်မန်ဂွံဂှ်တှ်ေ ၜိုတ်နွံ နူကဵု (လဝက) တအ် ဒးကၠောန်ကဵုကာတ်ကောန်ဍုင် ဍုဘမန်ဏံဏောင်၊ ဍေံတအ် ကၠောန်မံင်သေဲသေဲဖိုဟ်ဏောင်၊ မမာဲနူသၟာ ကမၠောန်ဆုဲပြံင်တအ်ဖအိုတ်ဂှ်တှ်ေ ဒးဒှ်ဇြဟတ်မမာဲ သွက်ဍေံ (ဗော်ကျဖောအ်) တအ်ဖအိုတ်ဏောင် ရန်လဝ်ဗီုဂှ်” သာ်ဝွံ ညးဟီုရ။
ဂိတုဒဳဇြေမ်ဗာ သၞာံ ၂၀၂၅ ဏံ သွက်ဂွံကၠောန်အာ ပေဲါရုဲမာဲနွံရောင် က္ဍိုပ်သ္ကိုပ်ကံင်သဳပၞာန်တအ် ဟီုကၠုင်ထပ်ကဵုထပ်နွံကီုလေဝ် သွက်ဗော်ပရေင်ဍုင်ကွာန်တအ်ဂှ် စပ်ကဵုပေဲါရုဲမာဲတုဲ ဟီုစၞောန်ပညုင်ကၠုင်လဝ် ဟွံမွဲဏီရ။
ပ္ဍဲဒေသဍုင်မန်ဂှ် စပ်ကဵုသၟာကမၠောန်ဆုဲပြံင်တအ် ဂၠိုင်ကဵုကိုဋ်နွံတန်တဴဒၟံင်ဂှ် ညံင်ဂွံဒှ်မမာဲ ဇြဟတ်ဒပ်ပၞာန် ဗော်ကျဖောအ်တအ်တုဲ ကၠတ်ကဵုဒၟံင်စၞောန် သွက်ဂွံပြံင်သၠာဲ ကာတ်ကောန်ဍုင် ဍုင်မန်နွံရ။
“ပ္ဍဲဍုင်မန်ဂှ် ယဝ်ရယျေယျေလ္ဂူလ္ဂူရတှ်ေ မန်ဇၞးမာဲတွဵုရ၊ လၟုဟ်ဂှ် ဗီုဂှ်ဟွံသေၚ်ပုဟ်၊ လက်ထက်အေန်အေလ်ဒဳလေဝ် ညံင်အေန်အေလ်ဒဳ ဂွံဇၞးရ ဍေံတအ်ဂစာန်၊ လက်ထက်ဒပ်ပၞာန်လေဝ် ညံင်ဗော်ကျဖောအ်ဂွံဇၞးရ ဍေံတအ်ဒးဂစာန်၊ ကေတ်ဇြဟတ်ကဵု သၟာကမၠောန်ဆုဲပြံင်တအ်တုဲတှ်ေ ညံင်ဂွံဇၞးမာဲ၊ ဗော်မန်ဂှ် ဍေံဖန်တွဵုရ ဣဏံဂှ် အခိုက် ဍေံတအ်ရ” သာ်ဝွံ ကမ္မတဳဗဟဵုဗော်ညဳသၟဟ်မန် ဟွံမိက်ဓမံက်ယၟုမွဲတၠ ဟီုရ။
ပ္ဍဲဒေသဍုင်မန်ဂှ် ညးဍုင်ကွာန်ဂကူမန်ထတ်ယုက်တအ် အာကၠောန်စဍုင်သေံတုဲ စၞးဂှ် သၟာကမၠောန်ဆုဲပြံင်တအ် ဇွောဝ်လုပ်စိုပ်ကၠုင် ဇၟာပ်ဒေသ၊ ဇၟာပ်ပွိုင်ဍုင်တုဲ သၟာကမၠောန်ဆုဲပြံင်တအ် နွံတန်တဴဒၟံင်ပ္ဍဲဒေသဍုင်မန် လၟိဟ်ဂၠိုင်ကဵုကိုဋ်နွံဒၟံင်ရောင် ညးဂမၠိုင်ချိင်ဆလဝ်ရ။
ကာလပေဲါရုဲမာဲ သၞာံ ၂၀၁၅ ကဵု ၂၀၂၀ တုဲကၠုင်တေံလေဝ် သွက်သၟာကမၠောန်ဆုဲပြံင်တအ်ဂှ် ကၠောန်ပတိတ်လဝ်ကဵု ကာတ်ဒၟံင်ယာယဳ သွက်ဂွံကဵုမာဲ ပ္ဍဲဒေသမန်ဂှ်တုဲ ဗော်ပရေင်ဍုင်ကွာန်မန်တအ် ပတိုန်ထ္ၜး ဒစဵုဒစးကၠုင်ကီုလေဝ် ကမ္မေယှန်ပေဲါရုဲမာဲတအ် ကဵုကၠုင်လဝ်အခေါင်စုတ်မာဲနွံဂှ် ဂွံတီကေတ်ရ။
