အခိင်ဗြဲကြပ်စိုပ်ကၠုင်ဏံဂှ် ၜဵုၚုဟ်ခိုဟ်တိုန် ကဝက်ပြင်ဒၟံင်တုဲ အခိင်ၚုဟ်ၜဵုခိုဟ်ဏံဂှ် ပ္ဍဲတဲ ၜဵုဟွံမွဲရရောင် တၠကမၠောန်ၜဵု နူပွိုင်ဍုင်ဇြပ်ဗုမွဲတၠ ဟီုထ္ၜးရ။
ၚုဟ်ၜဵုအခိင်လိုက်ဝှ်တၟိတၟိတေံဂှ် မွဲပသာမ္ဂး နွံအကြာ ၂၀၀ ဒ္ကေဝ်တုဲ လၟုဟ်မ္ဂး ဒှ်အာမွဲပသာ ၅၀၀ ပြင်ဒှ်ကၠုင်ရ။ ဆဂး ဂှ် ၜိုန်ရၚုဟ်ၜဵုခိုဟ်ကီုလေဝ်ဂှ် ပ္ဍဲတဲတၠကမၠောန်ၜဵုတံ ၜဵုဟွံမွဲရရောင် တၠကမၠောန်ၜဵုမွဲတၠ ဟီုသာ်ဝွံရ။
“နူစအခိင်လိုက်ဝှ်ၜဵုတိတ်တၟိတၟိတေံဟီုတှ်ေ ၚုဟ်ၜဵုဂှ် မွဲပသာနွံအကြာ ၂၀၀ ဓဝ်ရ၊ ဂွံမွဲအံင် ၚုဟ်သၠုင်တိုန်ညိ ဒှ်အာ အကြာ ၃၀၀ နူဂှ်တုဲတှ်ေ အကြာကၠာအေပရဴဟွံအိုတ်ဏံကဵု မေမံက်ဏံ ၚုဟ်ၜဵုဂှ် ထလာ်တိုန်အာ ၅၀၀ ကဵု ၅၀၀ ပြင်ဒှ်ကၠုင်၊ ဆဂးဂှ်တှ်ေ ပ္ဍဲတဲတၠကမၠောန်ၜဵုတအ်ဂှ် ၜဵုဟွံမွဲရပုဟ်” တၠကမၠောန်ၜဵု ပွိုင်ဍုင်ဇြပ်ဗု မွဲတၠဂှ် ဟီုရ။
တၠကမၠောန်ၜဵုဂမၠိုင်တအ်ဂှ် စရိတ်တမ်ရိုဟ်နာနာသာ်ကီု၊ စရိတ်သၟာကမၠောန်ဂမၠိုင်ကီုဂှ် က္ဍင်ဗက်တိုန်အာ ဗၞိက်ဖျာ အိုတ်ဂှ်ရ သွက်ဂွံပတိတ်တမ်သွာင်နာနာဂှ်ကီု သွက်စရိတ်သၟာကမၠောန်တံကီုဂှ် ပရဲပရင်သွံဂွံၜဵုဂှ်ဟေင် ဖန်ဗ္ဂေတ်မံင် ကမၠောန်ၜဵုအိုတ်ရ။
ဆက်တုဲ တၠကမၠောန်ၜဵုမွဲတၠပၠန်ဂှ် “တၠကမၠောန်ၜဵုတအ်ဂှ် ညးဂလိုင်ဟွံတီတှ်ေ သေဌဳၜဵုရ ဟီုကော်မံင် ဠကွေံကွေံဂှ် တှ်ေ ကမၠောန်ဂွံဂေတ်ပွိုင်မွဲမွဲသၞာံဏံဂှ် စရိတ်တမ်ကမၠောန်လေဝ် ကၠုင်နူဩန်ၜဵုဂှ်ရ၊ စရိတ်သၟာကမၠောန်လေဝ် ကၠုင်နူဩန်ၜဵုဂှ်ရ ဂွံဗ္ဂေတ်ကမၠောန်သွာင်နာနာဂှ်တှ်ေ သွံအာၜဵု ဖန်အာကမၠောန် ဗီုဂှ်ရ၊ လၟုဟ်ဗြဲလေဝ် ကြပ်စိုပ်ရ က မၠောန်ၜဵုလေဝ် ကြပ်ရုပ်သီဂှ် ၜဵုကြိုင်စွံလဝ်လေဝ် အိုတ်၊ ၚုဟ်ဖျာတေံလေဝ် တိုန် တီမံင်ဖိုဟ်ဖိုဟ်ရ ဆဂး ဩန်သွက် ဂွံဗ္ဂေတ်ကမၠောန်ဂှ် ဩန်အပဵုပ္ဍဲတဲဇကုဟွံမွဲ မုလေဝ်သက်သ္ပဟွံမွဲ” တၠကမၠောန်ၜဵုတၞဟ်မွဲတၠပၠန်ဂှ် ထပ်ဟီုရ။
ၚုဟ်ၜဵုဂွံသၠုင်တိုန်အာလၟုဟ်ဂှ် ဟိုတ်နူၜဵုအောန်စှ်ေအာကီု၊ ဗက်ဗၞိက်ဗွဝ်ဖျာတၞဟ်တၞဟ်ကီု၊ အခိင်ကၠောန်ၜဵုဂှ် အိုတ်အာကီုတုဲ လ္ပာ်သွံရာန်နွံကီုလေဝ် လ္ပာ်ကၠောန်ပတိတ်ၜဵုဂှ် အောန်စှ်ဂှ်ေရ ၚုဟ်ၜဵုက္ဍင်သၠုင်တိုန်အာ တၠကမၠောန် ၜဵုဂမၠိုင်တအ်သ္ဂးရ။
အလုံမွဲတွဵုရးဍုင်မန်ဝွံ တိကၠောန်ၜဵု ၄၀၀၀ ဨက ကဵု အကြာ ၅၀၀၀ ဨကနွံတုဲ ပ္ဍဲဂှ်မ္ဂး ပွိုင်ဍုင်ဇြပ်ဗု ကွာန်ပ္ၚ၊ ကွာန်ကြုက်ပိ၊ ကျာ်ခၟဳ၊ စက်စာဲ၊ ပွိုင်ဍုင်ပံင်နွံညိညကဵု ပွိုင်ဍုင်ရေဝ်နွံညိညကီုရ။
