ပ္ဍဲတွဵုရးဍုၚ်မန်ဝွံ စိုပ်ကၠုၚ်အခိၚ်မုတ်သုန်ဗြဲကျာ စလုပ်ရဒှ်တုဲ ဒးစွံသတိကဵု အန္တရာဲဘဲဒဏ်သဘာဝ က္တဵုဒှ်ရောၚ် ဌာနဗြဲကျာတအ် ကဵုလဝ်သတိရ။

ဒေသဍုၚ်မန်ဂှ် စတမ်နူ ပသာ်စွေက် (မေ ၁၂) တုဲ မုတ်သုန်ဗြဲကျာ စလုပ်ဒၟံၚ်တုဲ မတ်ဗြဲဂၠုက္တဵုဒှ်ကီု ဒၞာဲဒေသမတ်ဗြဲဂၠုဂှ် ဗြဲလေဝ်ဂူတရိုပ်စှေ်မာန်ကီုဂှ်ရ အခိၚ်ဗြဲဂူတရိုပ်ဖျေံဏံ ဒးစွံသတိကဵု အန္တရာဲဘဲဒဏ်သဘာဝ မပ္တံကဵု ဂဂဵုတးပန်ကီု၊ ကျာထတ်ကီု၊ တိလာ်ဍာ်ဇၞော်ကီု သာ်ဝွံ ကဵုလဝ်သတိရ။

အတိုၚ်နူကဵုဌာနက္ဍိုက်ပ်ဗြဲကျာတအ် တော်ခယျ ဓမံက်ပ္တိတ်လဝ် ပ္ဍဲမုက်လိက် (မိုးလေဝသနှၚ့် ဇလဗေဒညႊန်ကြားမှု ဦးစီးဌာန) တ္ၚဲဏံ ပသာ် (၂) စွေက် (မေ ၁၃) နူဂယး (၇) နာဍဳဏံမ္ဂး နေပျဳဒဝ်၊ ရးမာန္တလေဝ်၊ ရးမကွေ၊ ရးသေတ်ကိုၚ်၊ တွဵုရးကယာကဵု တွဵုရးရခေၚ်ဂှ် ဗြဲဂူညိညိမာန်တုဲ ရးသှေ် ကေုာံ တွဵုရးတၞဟ်တၞဟ်ဂမၠိုၚ်တအ်ဂှ် ဗြဲဂူတရိုပ်ဖျေံမာန်ကီု၊ ပ္ဍဲရးတနၚ်သဳဂှ် ဒေသ-သရုၚ် ဗြဲဇၞော်မာန်တုဲ ဂူမ္ဂး တၟံကၠံပေၚ်ပေၚ်ရောၚ် ချူဓမံက်လဝ်ရ။

ဂတဏံပွိုၚ် (၂) တ္ၚဲ တော်ခယျလဝ်ဂှ် ဒေသမွဲဒမြိပ်ပြၚ်ၜဳဩၚ်ဂၚ်(မြစ်ဝကျွန်းပေါ်)ဂမၠိုၚ် အကာဲအရာဗြဲ သွက်ဂွံဂူတရိုပ်ဖျေံမာန်ရောၚ် ချူဓမံက်လဝ်ရ။

စတမ်နူပသာ်ပေၚ် (မေ ၁၀)၊ ပသာ် (၁) စွေက် (မေ ၁၁)၊ (၂) စွေက် (မေ ၁၂) တုဲကၠုၚ်ဏံဂှ် ပ္ဍဲဒေသရးဍုၚ်မန် ပွိုၚ်ဍုၚ်ဗွဲမဂၠိုၚ်ဂှ် ဗြဲစဂူတရိုပ်ဖျေံအခိၚ်အောန် အောန်က္တဵုဒှ်ရ။ မွဲကရောံဂှ်ဝွံ ဂဂဵုတးဂရိၚ်ကီု ကျာလဝိၚ်လပိုက်ထတ်ကၠုၚ်တုဲ ဒေသလ္ၚဵု တၞံဆုဒေါမ်ကၟိုၚ်အာကီု သတ်ဆုဂမၠိုၚ် ပြဟ်ဒတုံစှေ်အာကီု ကတဵုဒှ်ကၠုၚ်နွံရ။