လဂွံကဵုတမ်ရိုဟ်ပရိုင် ဌာန်ပရိုင်ဗၠးၜးမန် မဟီုလဴကၠုင်လဝ်မ္ဂး ပြဟ်ဟ်ဏအ် နူကဵုဒပ်ကံင်ဇြဳပၞာန်တအ် လုပ်စိုပ်ကၠုင်မံင် ပ္ဍဲလ္တူဍုင်ကျာ်ပိပြဳပြဳနွံတုဲ ပ္ဍဲကဵုဂှ်မ္ဂး ကောန်သ္ဂံင်၊ ညးတာလျိုင်တအ်  ပါလုပ်မံင်ရောင် ဂးရ။

ဒပ်ပၞာန်ကံင်ဇြဳပၞာန် မလုပ်စိုပ်ကၠုင်လ္တူဍုင်ကျာ်ပိတအ်ဂှ်ဝွံ လွဟ်ဟွံပါမွဲသာ် အဆံင်ညးတာလျိုင်တအ်မ္ဂး နူဂၠံင်ဍာန်ဍုင်သေံမွဲအဆံင်ကီု၊ အဆံင်ကောန်ပၞာန်ဓမ္မတာမ္ဂး နူဂၠံင်အပ္ဍဲဍုင်မွဲအဆံင်ကီု လုပ်စိုပ်ကၠုင်လဝ် လ္တူဍုင်ကျာ်ပိ ဇြဟတ် ၜိုတ် (၇၀၀) တၠနွံရောင် တမ်ရိုဟ်ပရိုင် နူဒေသကျာ်ပိတအ် ဟီုလဴကၠုင်ရ။

“ကောန်ပၞာန်ဍေံတဂှ်တှ်ေ လုပ်ကၠုင်လဝ်အပြောံရ၊ ဍေံဂွံလုပ်ကၠုင်ကဵုဇြဟတ် နူဍာန်တိုက် ကဵုကွဳစက်တအ် မုတအ်ဏောင်တှ်ေ ရဲပၠန်ဂတးတဏအ်ဂှ် ဒုင်ဒၞါလဝ်ဍာန်ဇၞော် ဍေံတီကၠးမံင်၊ အေဂှ်ရ နဲဂွံဂှ် ဍေံပၠောပ်နင်လဝ်မၞိဟ်ဍေံကၠာ” သာ်ဝွံ သ္ဂးရ။

မွဲလ္ပာ်ပၠန်ဂှ် သွက်ဂွံက္လေင်ဂ္ဇအ် ဍုင်ကျာ်ပိမွဲဝါပၠန်ဂှ် နူကဵုဂိတုဨဗရဴမတုဲတေံရ လ္ပာ်ဒပ်ကံင်ဇြဳပၞာန် တအ် ဟီုဂးကၠုင်လဝ်ကဵု ဂကောံရပ်လွဟ်မမင်မွဲထိင်ဒဝ် ဍုင်ကျာ်ပိလၟုဟ်တအ်နွံ ပရိုင်မံက်ဒၟံင်ကၠာလေဝ် လ္တူဏအ် ဌာန်ပရိုင်ဗၠးၜးမန် သ္ပဒ္တန်တၞဟ်ခြာဟွံမာန်ဏီရ။

“ပ္ဍဲဍုၚ်ကျာ်ပိဏံဂှ်တှ်ေ အလဵုအသဳပၞာန်ဗၟာကဵု အလဵုအသဳသေံတံဂှ် ဍေံပြေပြံၚ်မံၚ်ညးသ္ကံဏောၚ်၊ ဟိုတ်ဂှ်ရ ဂကောံရပ်လွဟ်ဒဳကေဗဳအေကီု၊ ကေန်အေန်ယူကီု မံင်ပ္ဍဲကဵုပယျဵုဏံဂှ်တှ်ေ ဒးပဓါန်ဒၟံၚ်ကဵု ဍုၚ်သေံရ၊ ကပေါတ်နာနာသာ်တံဖအိုတ်ဂှ် ဒးကေတ်ဒၟံၚ်ဓရ်ကၠိုဟ်ခၠၚ်ကဵု ညးတာလျိုၚ်သေံတံတုဲ သေံတံ ကဵုဇြဟတ်ဓရိုဟ် ဆုတ်ထောံနူပယျဵုဏောၚ်ဟီုတှ်ေ ရမျှာၚ်လွဟ်ဗြု ဍေံဒှ်အာမာန်ဏောၚ်” သာ်ဝွံ ညးဆက်သ္ဂးရ။

ပြဟ်ဟ်ဏအ် ပ္ဍဲဍုင်ကျာ်ပိဂှ် နူကဵုဗော်ကေအေန်ယူ မဟာဒပ် (၆) ကေုာံ ဒဳကေဗဳအေတအ် ထိင်ဒဝ်အုပ်ဓုပ်လဝ်ဟီုကၠာလေဝ် လ္ပာ်ဒပ်ကံင်ဇြဳပၞာန်တအ်ဂှ် တမ်ဒပ် ခမရ – ၂၈၄ ဆက်နွံမံင်ဖိုဟ်တုဲ ရေင်တၠုင်ဆက်ဆောံမံင်ကဵု အလဵုအသဳသေံ ဆေင်ကဵုပရေင်ဂီုကၠီုဒေသပယျဵုဖိုဟ်ရ။

ယဝ်ရဒပ်ကံင်ဇြဳပၞာန်တံ ကလေင်လုပ်ဂ္ဇံဂွံဍုင်ကျာ်ပိပၠန်မ္ဂး ပရေင်ဘပဠ၊ ပရေင်ကြံကြ လ္တူညးဍုင်ကွာန်တံ ဂၠိုင်တိုန်နူအခိင်တြေံတေံမာန်ဏောင် ညးဒေသတအ် ဒှ်မံင်ဂဝိင်အိုတ်ရ။

နူဂိတုဨဗရဴတုဲကၠုင်တေံဂှ်လေဝ် ပေါဲဗ္တိုက်ဟွံဒှ်မွဲသာ် နူကဵုဒပ်ကံင်ဇြဳပၞာန်တအ် ဂြာတ်ဖျေံလဝ် မခတိုဟ်ကဵုက္ၜင်ကျာပၞာန် ဗၞတ် (၃၅) မ မ္ၚးဍုင်ကျာ်ပိ ဒၞါဲကၠောန်မိုင်ဒကောဝ် ပ္ဍဲတိဍာ်ထိင်ဒဝ် ဗော် KNU တအ်နွံကၠုင်ရ။

“မုပရူပရာလေဝ်ဟွံမွဲ မွဲသာ် သက်က်ရ ဍေံ (ကံင်ဇြဳပၞာန်) တအ် ကၠုင်ထောံဗမ်၊ တုဲတှ်ေ ဍေံထောံဂှ်လေဝ် မၞိဟ်မွဲမှ ဒးအာလဝ်ဟၟဲပုဟ်၊ အယာံမာတ်ရုင် (အဆောက်အဦ) တအ်ရ ဒးအာညိည၊ ကိစ္စဂှ်ဂှ် ဍေံ (ကံင်ဇြဳပၞာန်) တအ် မိက်ဂွံထ္ၜးစ ဒၞါဲဇိုင်ကၠရ အဲညာတ်ကေတ်” သာ်ဝွံ ညးမင်ရံင်ဒၟံင် အကာဲအရာဍုင်ကျာ်ပိမွဲတၠ ဟီုရ။

တုဲပၠန် အကြာဏအ်လေဝ် လ္တူဍုင်ကျာ်ပိဂှ် ပရိုင်ဟွံခိုဟ်မံင်တုဲ နကဵုညးဍုင်ကွာန်တအ် အာကၠုင်မ္ဂး ညံင်ဂွံစွံသတိညိဂှ်လေဝ် ညးစုက်လုက်မံင်ကဵု ဗွိုင်ဂကောံရပ်လွဟ်ဒေသကျာ်ပိ မွဲတၠ ဟီုဂးလဝ်နွံရ။

ပ္ဍဲဒေသကျာ်ပိဂှ် ဂကောံရပ်လွဟ်ဂမၠိုင် ဗော်သွးကောန်ဂကူကရေင်ကေအေန်ယူ၊ ဒဳကေဗဳအေ၊ ကေအေန်ယူ/ကေအေန်အေလ်အေ-ပဳဇြဳ၊ ဒပ်မင်ပယျဵုကရေင် ကေုာံ ဗော်ဍုင်မန်တၟိစတမ် တအ် ဖျေံသ္ဇိုင်ချဳဒရာင်ဒၟံင်နွံရောင် ဂွံတီကေတ်ရ။