အခိင်ဗြဲတမ်သၞာံဏံဂှ် ဒှ်အခိင်ပရေင်သွံရာန်ကွဳလိုန်ဓာတ်ပရေံကီုလေဝ် ဟိုတ်နူကေတ်ဖျေံနူပယျဵုဝါတ်တုဲ ၚုဟ်ကွဳလိုန်ဓာတ်က္ဍင်သၠုင်အာရောင် တၠဆေင်သွံရာန်ကွဳတအ် ဟီုရ။
“ဟိုတ်နူပေါဲဗတိုက်ဒှ်မံင် အကြာကအ်ကြိက် အကြာကြုင်ဒဵုတုဲတှ်ေ ဖျေံကွဳလိုန်ဓာတ်ကျာတ်ကွေံကွေံမွဲတဲ၊ ဒးခပဝ် ဍာန်ဂြိုပ်ဏောင်၊ ဂေတ်မံင်အကြာဂြိုပ်ကၠးကၠးဂှ် အခိင်အိုတ်လအ်၊ အကံက်ဂကောံတေံ ဂကောံဏံလေဝ် ဂၠိုင်ကွေံကွေံ၊ ဟိုတ်နူဂှ်ရ ၚုဟ်ကွဳလိုန်ဓာတ်ဂှ် က္ဍင်တိုန်ဗက်အာ” သာ်ဝွံ ညးကၠောန်ရေင်တၠုင်ဒၟံင် ပရေင်ဖျေံကွဳလိုန်ဓာတ် နူဗြဝတဳ ဖျေံဍုင်မန်မွဲတၠ ကိုဝ်မျအေ ဟီုရ။
လၟုဟ်မ္ဂး ကွဳလိုန်ဓာတ်မၞိဟ်ဍောတ်ဍောတ် ရာန်ဒးစိုတ်ဂၠိုင်အိုတ် ဂကူကလေတ် Click 160 Model 2025 မွဲဖ္ဍိုက်မ္ဂး ဒှ်အာ ၁၀၀ ကိုဋ်တုဲ ဂကူဝေပ် အာင် Wave i 125 Model 2025 ဂှ် ၚုဟ်အကြာ ၈၀ ကိုဋ် အတိုင်တြေံရ။
“နူကဵုဂိတုတုဲကၠုင်တေံဏောင်ဟီုတှ်ေ ၚုဟ်တိုန်အာၜိုတ် ရ ကိုဋ်၊ ကွဳတဏံဂှ် ကေတ်ဖျေံနၚ်နူသေံဏောင်တှ်ေ ရံင်ကဵုၚုဟ်ဩန်သေံကီု၊ တုဲတှ်ေ ဗီုဟီုဂှ်ရ ဖျေံဝါတ် ဒးအာဂၠံင်ဂြိုပ်၊ ဒးပါဲပေါဲပၞာန် သၞေဟ်ကင်အကြာဂြိုပ်လေဝ်နွံ၊ ၚုဟ်စရိတ်နာနာသာ်ဂှ် ဒၞာဲဒးအိုတ်ဟွံသေင် ဒးအိုတ်ဂှ်ရ ၜိုန်ရအခိင်ၚုဟ်ကွဳတိုန်ဟွံသေင်လေဝ် တိုန်အာ” ရဂှ် ညးဆက်ဟီုထ္ၜးရ။
အခိင်ဏံဂှ် ရဲကၠုင်နူဍုင်သေံတံ ဗွဲမဂၠိုင်ဂှ် ဒှ်အခိင်အာသေံအိုတ်တုဲ ကွဳလိုန်ဓာတ်ရာန်ဍိုက်လဝ် မွဲကာလစဴကၠုင်ဂှ် ဒှ် အခိင်ကလေင်သွံကဵု ဆေင်သွံရာန်ကွဳတံပၠန်ရ။ ၜိုန်ရ ဒှ်အခိင်သွံရာန်ကွဳလိုန်ဓာတ်ဂြိပ်ဟွံသေင်ကီုလေဝ် ၚုဟ်ကွဳဂှ် သၠုင်တိုန်မံင်ဖိုဟ်ရ။
ကွဳလိုန်ဓာတ် သွံရာန်ခိုဟ်အိုတ် ဂကူကလေတ် (Click 160) Model 2025 ဂှ် တုဲကၠုင်ဂိတုအေဗရဴဏံ ၚုဟ်နွံမံင် အကြာ ၉၃ ကိုဋ်တုဲ ကွဳလိုန်ဓာတ်ဂကူဝေပ်အာင် Wave i 125 Model 2025 ဂှ် အကြာ ၈၀ ကိုဋ်ရ။
