မယံၚ်(ဍုၚ်မန်)၊ လိက်လညာတ်

ကိုန်စဳဇန်ရပ်စပ်ကွဳစက်ယာန်တ္ၚဲဏံဂှ် ညးဍုၚ်ကွာန်တအ် ကေမၠာန်ကၟိတ်လီု၊ အာကၠုၚ်ဒှ်ခက်ခုဲ၊ ဒးဒုၚ်ရပ်ပၠန်လေဝ် ဒးနုက်ဩန်အိုတ်ဟွံသာ၊ လ္ၚဵုဂှ် သီုဒးဒုၚ်စုတ်ထံၚ်တုဲ ညးဍုၚ်ကွာန်တအ် က္တဵုဒှ်ဒဒိုက် ဇၞော်ကဵုဇြဟတ်အိုတ်ရ။

ပ္ဍဲဂိတု (ဂျောန် ၈) တွဵုရးဍုၚ်မန်သကုတ်လ္ပာ်လတူ ဒဒှ်ပ္ဍဲပွိုၚ်ဍုၚ်ကျာ်ထဝ်မွဲဒၞာဲ အဃောဂကောံစၟဳစၟတ်တအ် စၟဳစၟတ် ရပ်ဒၟံၚ်ကွဳစက်ယာန်လတူဂၠံၚ်မွဲဒၞာဲဂှ် ဂကောံပၠန်ဂတးတအ် ကၠုၚ်ပန်ဗတိုက်နကဵုကွဳလိုန်ဓာတ်တုဲ ဒုၚ်စၟဳစၟတ်ရ။ အဃောဒုၚ်စၟဳစၟတ်ဒၟံၚ်ဂှ် ပန်ဏာကၞေၚ် ဒုသ္ကိုပ်ဗၠာဲသၟိၚ် မၞုံယၟု ဝေန်ကျာၚ် တုဲ ချိုတ်အာလဝါဲဂှ်ရ။

ဂကောံပၠန်ဂတးတအ် ပ္တိတ်ဇြဟတ်အစောန်စရာဲတုဲ လုပ်စဵုဒၞာ အခေါၚ်အရာ ညးဍုၚ်ကွာန်တအ်သာ်ဏံဂှ် သွက်ညးဍုၚ်ကွာန်တအ် ဒှ်ဇြဟတ်သၟးဟွံက သီုကဵုဂွံအထိုၚ်အသးမၞိဟ်ဂလိုၚ်တအ်ရ။ ဂွံအထိုၚ်အသးညးဍုၚ်ကွာန်ဂမၠိုၚ်ဗက်ဟွံဂ တာပ် ညးဍုၚ်ကွာန်တအ်ပူဗိုၚ် သ္ပကၠုၚ်ဇြဟတ်ကဵု ပရေၚ်ပၠန်ဂတးဇကုတအ် ဇၞော်ဇၞော်မာန်ရ။

အစဳဇန်ရပ်ကွဳလိုန်ဓာတ်၊ ရပ်ကွဳစက်ကာဂှ် နူလတူဍုၚ်ဂှ် စိုပ်ကၠုၚ်ကွာန်ရးတုဲ ညးဍုၚ်ကွာန်တအ် ဒးဒုၚ်ရပ်ဂၠိုၚ်၊ ဒးဒုၚ်တက်ဒန်ဩန်ကဵုစှော်ကိုဋ်၊ ဒးဒုၚ်ရပ်စုတ်ထံၚ် ဘဲဒဒိုက်နာနာသာ် ညးဍုၚ်ကွာန်တအ် ဒးဆဵုဂဗဒၟံၚ်ရ။

ဘဲဒဒိုက်ညးဍုၚ်ကွာန် ဒးဒုၚ်ဆဵုဂဗဗီုဗီုဏံဂှ် ဂကောံပၠန်ဂတးဂမၠိုၚ်တအ် ကၞပ်သ္ၚိတ်ဒၟံၚ်ဗီုညးကဵုညးတုဲ ဂကောံလဵုလေဝ် ဂွံအာရီုတုဲ ဂွံဗတိုက်ပလီုအစဳဇန် ရပ်ကွဳစက်ယာန်ဏံဂှ် ဟွံဆဵုရ။

ဒုၚ်ယၟု ဒပ်စဵုဒၞာညးဍုၚ်ကွာန်ဂးတုဲ အခိၚ်ညးဍုၚ်ကွာန်တအ် က္တဵုဒှ်ဒၟံၚ်ဒဒိုက်ဂလိုၚ်ဏံဂှ်မှ ဂကောံပၠန်ဂတးလဵုလေဝ် တိတ်ဂတတုဲ ဂွံပ္တိတ်ဇြဟတ် ဘိုၚ်စဵုဒၞာကဵုဂှ် ဟွံမွဲ၊ ဂွံဗ္တိုက်ပလီုကၠေံ ကိုန်စဳဇန် ပရေၚ်ရပ်စပ်ကွဳလိုန်ဓာတ်၊ ကွဳစက်ကာဂှ် ဂကောံလဵုလေဝ် ဟွံဗြုပ္တိတ်ရမျာၚ်ရ။

ပ္ဍဲကဵုဒေသဍုၚ်မန်ဂှ် မတ်မလီု သကုတ်လ္ပာ်လတူကီု၊ သ္ကုတ်လ္ပာ်သၟဝ်ဏံဂှ်ကီု ဇၟာပ်ပွိုၚ်ဍုၚ်ဂှ် ဂကောံပၠန်ဂတးဂမၠိုၚ် ဒပ်စဵုဒၞာညးဍုၚ်ကွာန်ဂမၠိုၚ်တအ် ဖျေံလဝ်သဇိုၚ် ဂၠိုၚ်ကဵုဒၞာဲနွံဒၟံၚ်ရ။

ရံၚ်အာသကုတ်လ္တူမ္ဂး ပံၚ်၊ သဓီု၊ ကျာ်ထဝ်၊ ၜဳကလေၚ်၊ လ္ပာ်သၟဝ်ဏံပၠန်လေဝ် ကျာ်မြဟ်၊ မုဟ်ဍုၚ်၊ ဇြပ်ဗု၊ ရေဝ် ဖအိုတ်ဂှ် ဂကောံပၠန်ဂတးတအ် ဒပ်စဵုဒၞာညးဍုၚ်ကွာန်တအ် ဖျေံလဝ်သဇိုၚ်တုဲ ချဳဒရာၚ်ဒၟံၚ်ဖအိုတ်ရ။

ဆဂးဂှ် ပ္ဍဲကာလ တၠအဝဵုပၞာန်တအ် ဓမံက်ကၠုၚ်ရုပ်ရဴ ကိုန်စဳဇန် ရပ်စပ်ကွဳလိုန်ဓာတ်၊ ကွဳစက်ကာဏံဂှ် ဂကောံပၠန်ဂတးဂမၠိုၚ် ဒပ်စဵုဒၞာညးဍုၚ်ကွာန်ဒုၚ်လဝ်ယၟုဂမၠိုၚ်တအ် ကၞပ်သ္ၚိတ်ဒၟံၚ်ဖအိုတ်ဂှ် ညးဍုၚ်ကွာန်တအ် ဟွံဒှ်ဇြဟတ်ရ။ ဟွံဒှ်ဇြဟတ်ဗက်ဟွံဂတာပ် ပရေၚ်ပူဗိုၚ်ထံက်ဂလာန်လေဝ် အသိၚ်အောန်စှေ်အာမာန်ရ။

ပရေၚ်ပၠန်ဂတး ဇြဟတ်ဂွံဇၞော် ညးဍုၚ်ကွာန်ဂွံပူဗိုၚ် ဂွံပါဗက်ဟီုဂှ် ပရေၚ်ဒတုဲဖဵုကုညးဍုၚ်ကွာန်တအ် ဂလိုၚ်လဵုရေၚ်တၠုၚ်ကဵုမာန်ဂှ် ညးဍုၚ်ကွာန်တအ် မၚ်ရံၚ် မၚ်အခါတ်အကာဲ မၚ်ဇွိတ်သပေါတ်ဒၟံၚ် ကမၠောန်ပၠန်ဂတးတအ်လၟိုန်ရောၚ်ဂှ် ရဲပၠန်ဂတးတအ် ဒးဂွံသတိထေက်ရ။

ဒုၚ်ယၟုကမၠောန်ပၠန်ဂတးတုဲ ကမၠောန်ဒှ်ဂုန်ဖဵုကုဗော်ဇကု၊ ကမၠောန်ဂွံဂုန်ဖဵုကုဂကောံဇကု ဂွံဟေၚ် စွံအာရီုရေၚ်တၠုၚ်တုဲ ပရေၚ်ကမၠောန်ဒတုဲဖဵု ကုညးဍုၚ်ကွာန်၊ ပရေၚ်ဒးရီုဗၚ်ဘဲဒဒိုက်ညးဍုၚ်ကွာန်၊ ပရေၚ်စဵုဒၞာ ဘဲအန္တရာဲညးဍုၚ်ကွာန် ဟွံစွံအာရီု ဟွံရေၚ်တၠုၚ်မ္ဂး ဗော် ကေုာံ ဂကောံဂှ် အာဍာ်ဇမၠိၚ်မာန်ဟွံသေၚ်။

ပ္ဍဲပ္ၚံက်ပၠန်ဂတးတမ်ကညၚ် ကြဴနူ (၂၀၂၁) ဏံတုဲဂှ် ဟိုတ်နူရမျာၚ်ကမြေဲ ဗတိုက်သရိုဟ်တၠအဝဵုပၞာန်တအ်တုဲ ညးဍုၚ်ကွာန်တအ် ဍိုက်ပါဗက်ကၠုၚ်ဟွံအောန် ဟီုမာန်ရ။ ပ္ဍဲကဵုညးဍုၚ်ကွာန်တအ် ဍိုက်ပါဗက်ကၠုၚ်မွဲကရောံ ကုကမၠောန်ပၠန် ဂတးဂမၠိုၚ်တအ်ဂှ် ဂွံဖ္ဍိုက်ဗပေၚ်ကဵု ပရေၚ်ရေၚ်တၠုၚ်ဘဲဒဒိုက်သၞာ ညးဍုၚ်ကွာန်တအ်ဂှ် နွံအောန်ကွေံကွေံရ။

ဟိုတ်နူအသိၚ်အလိုန်ပၠန်ဂတး ပေဲါဗတိုက်က္တဵုဒှ်တုဲ ညးဍုၚ်ကွာန်အဝဲနာနာ ဒးဒုၚ်အိုတ်လမျီု၊ က္တဵုဒှ်ဒဒိုက်ကၠောဝ်ဗျဵု၊ ဒးဂြိပ်ဒဴနူဍုၚ်ကွာန်သ္ၚိဌာန်ဒေသ ဂၠိုၚ်ကဵုလက်ကိုဋ်ဂှ် ပ္ဍဲကဵုဒေသဇဳဒိုဟ် က္တဵုဒှ်ကၠုၚ်ရ။

ဟိုတ်နူဒပ်ပၠန်ဂတးတအ် ချဳဒရာၚ်ဖန်ဗဒှ်ပေါဲဗတိုက်တုဲ မွဲလ္ပာ်တေံ ကံၚ်သဳပၞာန်ဗၟာတအ် ကၠဟ်ဖျေံကဵုအမၠံက်၊ ထောံဖျေံကဵုဗမ်နကဵုက္ၜၚ်ကျာရ။ ဒးဟီုမ္ဂး ဟိုတ်နူဖန်ဗဒှ်ပၠန်တးပန်ဗတိုက်တုဲ လ္ပာ်ကံၚ်သဳပၞာန်တအ် ကလေၚ်ပန်ထောံဖျေံ အမၠံက်ဇၞော်၊ အမၠံက်ဍောတ်၊ သီုကဵုထောံဖျေံဗမ် နကဵုက္ၜၚ်ကျာဟီုဂှ် တၟေၚ်ဟွံသေၚ် မိက်ဂွံဟီုရ။

ဟီုအရေဝ်အရာပ်မ္ဂး ပၞာန်ကဵုပၞာန် က္တဵုဒှ်ပၞာန်မ္ဂး ၜိုတ်ဇြဟတ်အစောန်ညးနွံ ညးဖန်တွဵုရ။ ဗီုဇြဟတ်ညးနွံဂှ် ဂစာန်ပ္တိတ်ဇြဟတ်တုဲ ညံၚ်ဂွံဇၞး ညံၚ်ဂွံဒှ်ပရဲဖဵု လ္ပာ်ညးဂှ် ညးဒးဖန်တွဵုရ၊ ဣဏံဂှ် ဓမ္မတာဒးဟီုရ။

ပရေၚ်ကမၠောန်ကိုန်စဳဇန် ရပ်စပ်ကွဳစက်ယာန်လၟုဟ်ဏံလေဝ် လ္ပာ်ကံၚ်သဳပၞာန်ဂှ် အစဳဇန်ဍေံ ဍေံဇန်ကၠောန်ပ္တိုန်ဂွံတှေ် ဍေံကၠောန်ဖန်တွဵုရ။ အစဳဇန်ရပ်ကွဳစက်ယာန်ဏံဂှ် ဂွံသီရပ်ကွဳလိုန်ဓာတ်၊ ကွဳစက်ရောၚ်၊ ဩန်လုပ်ရောၚ်၊ ဂွံဘဏ္ဍာ သွက်သွာၚ်နာနာရောၚ်၊ ဒှ်ဂုန်ဖဵုညးတှေ် လ္ပာ်ညး ညးကၠောန်ဂှ် တၠအဝဵုတအ် ဍေံဖန်ကၠောန်ကမၠောန်ဍေံရ။

လ္ပာ်ဂကောံပၠန်ဂတးတအ်ဂှ်ရော ကမၠောန်တၠအဝဵုတအ် ကၠောန်ကရေပ်ဂရတ် ညးဍုၚ်ကွာန်တအ် ပရေၚ်ရပ်စပ်ကွဳစက်ယာန် ဇၟာပ်ဒေသဏံဂှ် မုဟိုတ် ဟွံဖျေံအစဳဇန် ဗ္တိုက်ပလီုရောဂှ် တၚ်သၟာန်နူညးဍုၚ်ကွာန် သွက်ဒးပ္တိတ်နွံကၠုၚ်ရ။

သရောပ်တုဲမိက်ဂွံဟီုဂှ် ကိုန်အစဳဇန်တၠအဝဵုကံၚ်သဳပၞာန်တအ် ရပ်စပ်ကွဳစက်ယာန် တေၚ်တေၚ်သ္ကာတ်သ္ကာတ် ဗီုတ္ၚဲဏံဂှ် ဂၠံၚ်တရဴပၠန်ဂတးဇကု မိက်ဂွံဇၞော်မောဝ်ဍာံဍာံ၊ မိက်ဂွံအံၚ်ဇၞးဍာံဍာံမ္ဂး ကမၠောန်စဵုဒၞာရီုဗၚ်ညးဍုၚ်ကွာန်ဂှ် စွံအာရီုဂစာန်ကၠောန်ကဵုဂၠိုၚ်ဂၠိုၚ် မာန်ခ္ဍၚ် ကမၠောန်ရန်တၟံပၠန်ဂတးဂှ် စိုပ်ပြဟ်ခ္ဍၚ်ရောၚ် မိဂ္ဂး။