ဂကောံညဳသၟဟ်ရာမည ဖျေံသ္ဇိုၚ်ဍုၚ်ဖူကေတ် ကၟိန်ဍုၚ်သေံဝွံ ရန်ကဵုကောန်ဂကူမန်မၞုံဍုၚ်သေံတအ် ဂွံညဳသၟဟ်၊ ဂွံဒှ်မွဲဂကောံမွဲဇြဟတ်ရောၚ်ဂးတုဲ သွက်ဂွံရေၚ်တၠုၚ်ချဳဒရာၚ်ပံၚ်အာတောဲကု ဂကောံမှာဇန်မန် မၞုံဍုၚ်သေံဂမၠိုၚ်နွံရောၚ်ဂှ် ညးတာလျိုၚ်ဂကောံညဳသၟဟ်ရာမညတအ် သ္ဂးလဝ်ရ။

နကဵုဂကောံညဳသၟဟ်ရာမညဝွံ  ရံၚ်ကဵုပရေၚ်ညဳသာသၟဟ်သၟန်ကောန်ဂကူမန် မၞုံဍုၚ်သေံတအ်တုဲ ပ္ဍဲဒေသဖူကေတ်သၟးဟွံသေၚ် သီုကဵုဒေသတၞဟ်တၞဟ်တအ်လေဝ် သွက်ဂွံချဳဒရာၚ်အာနွံရ။

အခိၚ်လၟုဟ်ဏံမ္ဂး နကဵုညးတာလျိုၚ်ဂကောံညဳသၟဟ်ရာမညတအ် စှ်ေမံၚ်ပရေၚ်စန္ဒက်ပ္ဍဲခရိုၚ်ဖူကေတ်နွံတုဲ ပရေၚ်ရီုဗၚ်ကောန်ဂကူမန်တအ် ဗွဲမညဳသၟဟ်ဂွံကၠောန်သ္ပအာဂှ် နွံပၟိက်မံၚ်ကဵု ဇြဟတ်ပံၚ်တောဲ ဂကောံမန်ဍုၚ်သေံတအ်ရောၚ် သ္ဂးလဝ်ရ။

“နူကဵုဂကောံမွဲဂကောံကဵုမွဲဂကောံ မွဲဒေသကဵုမွဲဒေသဂှ် နူကဵုဂကောံညဳသၟဟ်ရာမညပိုဲဏံ နွံပၟိက်မံၚ်ကဵုဇြဟတ်ပံၚ်တောဲဗွဲမဂၠိုၚ်ရ။ နူကဵုဂကောံညဳသၟဟ်ရာမညပိုဲတအ်လေဝ် မၚ်ဒုၚ်တၠုၚ်မံၚ်ဂကောံညးတအ် သွက်ဂွံပံၚ်တောဲမွဲဂရောံဂှ် နွံပၟိက်မံၚ်ဏောၚ်” သာ်ဝွံ ကမ္မတဳက္ဍိုက်က္ဍိုပ်ဂကောံညဳသၟဟ်ရာမညမွဲတၠ နာဲသၠုၚ်မန်ဂှ် ဟီုရ။

မွဲလ္ပာ်ပၠန်မ္ဂး နကဵုကောန်ဂကောံညဳသၟဟ်ရာမညတအ် ဒှ်ကၠုၚ်ဒဒိုက်မွဲနဲမွဲဗီုမ္ဂး နကဵုညးတာလျိုၚ်တအ် သွက်ဂွံဘိုၚ်ရီုဗၚ်ရေၚ်တၠုၚ်အာမာန်ဂှ် စဳဇန်မံၚ်နွံရောၚ် ဂွံတီကေတ်ရ။

ဆဂှ်သၟးဟွံက ပရေၚ်ရီုဗၚ်ဒဒိုက်သၞာကောန်ဂကူမန်တအ်ဂမၠိုၚ် မပ္တံကဵု ရီုဗၚ်ညးဒးဘဲဒဏ်သဘာဝ၊ ညးဒးဘဲပၞာန်၊ ညးပါဲဒဴဘဲပၞာန် ကေုာံ ဒဒိုက်သၞာတၞဟ်တၞဟ်တအ်ဂှ်လေဝ် သွက်ဂွံရီုဗၚ်ထံက်ပၚ်အာနွံရ။

“သွက်ဂွံထံက်ပၚ်ကဵုကောန်ဂကူပိုဲတအ်ဂှ်ဏောၚ်တှ်ေ ဆေၚ်စပ်ကဵုပရေၚ်ကောန်ဂကူပိုဲတအ် ဒးဘဲဒဏ်သဘာဝကီု ဆေၚ်စပ်ကဵုကောန်ဂကူပိုဲတအ် ဒးဓလေတ်ပါဲဘဲပၞာန်ကီုဏောၚ်တှ်ေ ရံၚ်အာကဵုဇြဟတ်ဂကောံပိုဲတုဲတှ်ေ ၜိုတ်လဵုပိုဲတအ် ထံၚ်ပၚ်မာန်ဂှ်တှ်ေ ပိုဲတအ် ထံက်ပၚ်ပူဗိုၚ်အာဏောၚ်။ ဆ္ဂးတှ်ေ ဂကောံပိုဲ ပြဟ်ပြဟ်ဏံ ပံက်လဝ်တၟိတၟိဏောၚ်တှ်ေ ဆေၚ်စပ်ကဵုပရေၚ်ထံက်ပၚ်ဟီုဂှ်တှ်ေလ္ပာ်လဵုလေဝ် ဟွံဂွံထံက်ပၚ်ဏီ” သာ်ဝွံ နာဲသၠုၚ်မန် ဆက်ဟီုလဝ်ရ။

တုဲကၠုၚ် ဂိတုဂျောန်စၟတ်တ္ရဲ (၁၀)ဂှ် နူကဵုညးတာလျိုၚ်ဂကောံမန် မၞုံပ္ဍဲဍုၚ်ဖူကေတ်တအ်ဂမၠိုၚ် ရန်တၟအ်ကဵုကောန်ဂကူမန်တအ် ဂွံဒှ်မွဲဂကောံ မွဲစွံရောၚ်ဂးတုဲ ဂကောံသၟတ်မန် ဍုၚ်ဖူကေတ်ဂမၠိုၚ်(၅)ဂကောံဂှ် ပံၚ်တောဲတုဲ ပံက်လဝ် “ဂကောံညဳသၟဟ်ရာမည” နဒဒှ်မွဲဂကောံရောၚ် ဂွံတီကေတ်ရ။