ဒူရေန် (ဆက်မတ်) စတိတ်တၟိတၟိကဵု ဒူရေန်တိတ်လဇုဲဂှ် ၚုဟ်ခြာဒၟံၚ်ကဝက်တုဲ ကၠအ်ဒူရေန်တိတ်ပြဟ်တအ်ဂှ် ဒှ်ပရေၚ်ပိုန်ဒြပ်ခိုဟ်ခိုဟ်မွဲရောၚ် တၠကၠအ်ဒူရေန်မွဲတၠဂှ် ဟီုရ။
ဒူရေန်စတိတ်တၟိတၟိတေံဂှ် ၚုဟ်ဖံက်သေဝ် မွဲကဳလိုဝ် ဗၞတ် (၂) လက်တုဲ လၟုဟ်မ္ဂး မွဲကဳလိုဝ်သှေ်မံၚ် သၟဝ် (၁) လက်ဓဝ်ရောၚ် တၠကၠအ်ဒူရေန် နာဲသာန်ခေန် နူပွိုၚ်ဍုၚ်ဇြပ်ဗုဂှ် ဟီုရ။
“ဒူရေန်ဂှ် ကၠာကၠအ်ညးတၞဟ်ဟွံတိတ် ယဝ်ဇကုပတိတ်မာန်ခ္ဍၚ်တှေ် ဂွံၚုဟ်ခိုဟ်ချိုတ်ပၠိုတ်ရ၊ ယဝ်တိတ်လဇုဲတှေ် ၚုဟ်ယအ်ကဝက်ဒှ်ဏောၚ်၊ ဗီုဏံ အရိုဟ်သၞာံရ၊ ဆဂး သၞာံဏံဂှ် ဒူရေန်ၚုဟ်ခိုဟ်မံၚ်တှေ် ကၠအ်ဒူရေန်တအ် ဒှ်သေဌဳရ” သာ်ဝွံ ညးဟီုရ။
ဒူရေန်ဆက်မတ်ဂှ် ဂကူလေဝ်ခိုဟ်ကီု၊ အယျဲသတ်ဍေံလေဝ် ခိုဟ်ကီု၊ ယဝ်ရ တိတ်ပြဟ်ကီုမ္ဂး ကၠအ်ဒူရေန်ဂှ် နွံၚုဟ်နူကဵုကၠအ်ထ္ၜိုတ်ဂၠိုၚ်ကဵုဆရောၚ် တၠကၠအ်ဒူရေန်တၞဟ်မွဲတၠဂှ် ဟီုပၠန်ရ။
“ကၠအ်အဲ တိတ်အလန်ကၠာအိုတ်ဂှ် ၜှ်ဏာ ၜိုတ် (၃၀၀) ကဳလိုဝ်၊ ဂွံမွဲကဳလိုဝ် (၁) လက်ကဵု (၈) လ္ၚီ၊ လ္တုန်အဒေါဝ်ဂှ် ထပ်ၜှ်ဏာ ၜိုတ် (၂၀၀) ကဳလိုဝ်ပၠန်ဂှ် ဂွံၚုဟ် (၁) လက်ကဵု (၃) လ္ၚီ၊ လၟုဟ်သှေ်မံၚ်အလန်လက္ကရဴဏံ ၜိုတ် (၂၀၀) ကဳလိုဝ်ပၠန်ဂှ် မွဲကဳလိုဝ် အကြာ (၉၀၀၀) ရ ဍေံကေတ်၊ ယဝ်သ္ပတၠကၠအ်ဒူရေန်တှေ် ဒူရေန်ညံၚ်ဂွံသတ်ပြဟ် ညံၚ်ဂွံၜှ်ပြဟ် ယဝ်ဂစာန်သ္ပကဵုမာန်တှေ် ဒှ်ပိုန်ဒြပ်ပြဟ်” သာ်ဝွံ တၠကၠအ်ဒူရေန် နူမုဟ်ဍုၚ် နာဲကိုဝ်ဥု ဟီုရ။
အခိၚ်ဒူရေန်စတိတ်တၟိတၟိတေံ ဒူရေန်ဆက်မတ်ဇၞော်ဇၞော်မွဲမ (၄) ကဳလိုဝ်ပြၚ် (၅) ကဳလိုဝ်ဂှ် ဂွံၚုဟ်မွဲမ (၁) ကိုဋ်တုဲ ဍောတ်ညိမ္ဂး မွဲမ (၅) လက်ပြၚ် သၟဝ် (၅) လက်နွံဒၟံၚ်ရ။
ဗွဲကြဴနူကဵု ဒူရေန်ဆက်မတ် ဂွံၚုဟ်မးခိုဟ် ဒှ်ဒၟံၚ်ပရေၚ်ပိုန်ဒြပ်ဇၞော်ဇၞော်မွဲရောၚ်ဂှ်တုဲ ကၠအ်သတ်ဆုတၞဟ်တအ်ကီု၊ ကၠအ်ထ္ၜိုတ်လ္ၚဵုတအ်ကီု ဓဗိုၚ်တုဲ တဵုကၠုၚ်တၞံဒူရေန်ဆက် မတ် ဂၠိုၚ်ကၠုၚ်ဒၟံၚ်ရောၚ် ဂွံတီကေတ်ရ။
