လိက်ပရေင်လညာတ်၊ ယက္ခဂုမ္ဘဏ်

ဂလာန်မ္ဂး “အဒါတ်ဗက်ဗျ ကောန်တုပ်ဗက်မိမ” ဂှ် ဒှ်ဂလာန်တၠပညာ ညးတမၠာတံရ။ ဗွိုင်လဵုပိုဲရံင်င် တၠုင်လအာတုပ်ဒၟံင်သာ်ဂှ် ကြပ်သီုဖအိုတ်ရ။ ဟီုကၠးကၠးမ္ဂး သီုဖအိုတ်ရဂှ်ဟွံသေင် ဗွဲတၟေင်ကၠာဲအာညိညိနွံရ။ ပ္ဍဲဂြောဝ်ဂတာမွဲမွဲ တၞဟ်ခြာနူမဇ နွံမွဲတွဵုရ။ ဂလာန်သာ်ဏံလေဝ်နွံရ။ ဍာံပြတဴဗွဲမလောန်ရ။ ပရေင်ပရောတံဏံ ယဝ်သ္ဒးချူဗွဲတြးမ္ဂး ပြးသၠဲတိတ်အာ ဗွဲမဂၠိုင်မာန်တုဲ လိက်ပရေင်ဏံ ချူပတဝ်ဏာကဵု သၟိင်အုပ်ဓုပ်ဍုင်ဗၟာတံ ကဵု ကောန်ညးဍုင်ကွာန် ကောန်ဍုင်ဗၟာတံ ဒဒှ်ကာလပစ္စုပ္ပန် လၟုဟ်ဏံရ။

“ကွဳစက်၊ ကွဳလိုန်ဓာတ်၊ စက်ယာန်ဟွံလုပ်သၞောဝ် (ဟၟဲကဵုလာင်ဇြေန်) တံ ရပ်စပ် ကေတ်ဒုဟ် ကဵုဒုဟ်ဒဏ်ညိ” နကဵုအသမ်ပါင် ညးအုပ်ဓုပ်ဍုင် ညးမၞုံကဵုအဝဵုသၠုင်အိုတ် ကၟိန်ဍုင်ဗၟာ မေန်အံင်လှာင် ဟီုပတိတ်ဏာတုဲဗက် ကောန်ရဲညးတေံ ကေမ်ၛာပ်ကေတ် အခေါင်အရာခိုဟ် သွက်ညးတံတုဲ စရပ်စပ် ကေတ်ဒုဟ်၊ ကေတ်သြန်၊ ကေတ်ကၠေံကွဳစက်၊ ကွဳိလိုန်ဓာတ် နူကောန်ညးဍုင်ကွာန်တံအိုတ်ရ။

ကၟိန်ဍုင်လဵုမွဲဟွံဟီု ပ္ဍဲလ္တူဂၠးတိဏံ နွံကဵုသၞောဝ်ဥပဒေ ဆေင်စပ်ကဵုပိုင်ပြဳ ကွဳစက်၊ ကွဳလိုန်ဓာတ်၊ စက်ယာန်ဖအိုတ်ရ။ ညးမပတၠပိုင်ပြဳလဝ်တံဂှ် ဒးနွံကဵုအခေါင်ပိုင်ပြဳ နကဵု (လာင်ဇြေန်) အတိုင်သၞောဝ်ဥပဒေဖအိုတ်ရ။ တိတ်ဗၠးအာနူသၞောဝ်ဥပဒေတုဲ ယြဴညးလဵုမွဲလေဝ် အခေါင်ပတၠ ပိုင်ပြဳစက်ယာန် ဟၟဲကဵုအခေါင် (လာင်ဇြေန်) တံဂှ်ရောင်ဂှ် ဇၟာပ်ပ်ကၟိန်ဍုင် သၞောဝ်နွံသာ်ဏံ အလုံလိုက်မွဲရ။

ဒှ်သာ်ဂှ်မ္ဂး အခိင်လၟုဟ် ကောန်ရဲမေန်အံင်လှာင်တံ ဗက်ရပ်စပ် ကေတ်ဒုဟ်၊ ကေတ်သြန်၊ ကေတ်ကၠေံကွဳစက်၊ ကွဳိလိုန်ဓာတ် နူကောန်ညးဍုင်ကွာန်တံဂှ် ညးတံဗၠေတ်ဟာ? ညးတံဒးဟာ?ဂှ် ပိုဲကောန်ညးဍုင်ကွာန်တံ ထေက်ကဵုဒးဗ္စာရဏာဒးရောင် မိက်ဂွံထံက်ထ္ၜးဏာရ။ ပိုဲကောန်ညးဍုင်ကွာန်တံ သ္ပလဝ်တၠ ပိုင်ပြဳလဝ် ကွဳစက်၊ ကွဳလိုန်ဓာတ်၊ စက်ယာန်တံ ယဝ်ဟၟဲကဵု လိက်အခေါင်ဍာံပြ (လာင်ဇြေန်) မ္ဂး ပိုဲတံဗၠေတ်ဒၟံင်နူသၞောဝ်ဥပဒေ တုဲတုဲရောင်ဂှ် ပိုဲတံသ္ဒးကၠးလဝ်ရောင်။ ဒှ်သာ်ဂှ်မ္ဂး ကောန်ရဲမေန်အံင်လှာင်တံ ဗက်ရပ်စပ် ကေတ်ဒုဟ်၊ ကေတ်သြန်၊ ကေတ်ကၠေံကွဳစက်၊ ကွဳိလိုန်ဓာတ် နူကောန်ညးဍုင်ကွာန်တံဂှ် ညးတံဟွံဗၠေတ်ဟေင် သာ်ဏံ ပိုဲတံသ္ဒးကၠးလဝ်ရောင်။

ကောန်ညးဍုင်ကွာန်တံ ဂွံဗၠေတ် ဒ္ဂေတ်ဂွံလီုကၠုင်ဂှ် တမ်ရိုဟ်ဍေံကၠုင်နူလဵုရော? ယဝ်ပိုဲက္လေင်ဂၠိုက်ဂၠာဲတမ်ရိုဟ်ဍေံမ္ဂး ကၠုင်နူသၟိင်အုပ်ဓုပ်ဍုင်ပိုဲတံရ။ ကွဳစက်၊ ကွဳလိုန်ဓာတ်၊ စက်ယာန်ဟၟဲကဵု လိက်အခေါင်ဍာံပြ(လာင်ဇြေန်)တံဂှ်ကၠုင်နူလဵုရော? ကၠုင်နူကောန်ရဲ(သၞာဲဒဴ) သၟိင်အုပ်ဓုပ်ဍုင်တံ ဒ္ဂေတ်လီု ဂွံမံင်သြန်တှ်ေတုဲ ဟွံဒ္ဂေတ်ဗက်အတိုင်သၞောဝ်ဥပဒေရ။ ဒးထံက်ထ္ၜး သက်သဳကြပ်ကဵုမန်ပိုဲတံမ္ဂး စက်ယာန်ပဠတ်တံ နူတိပယျဵုသေံ ဗြဝတဳ-မာဲဆံက်တေံ ဂွံစိုပ်ဍုင်မတ်မလီုဂှ် ကောန်ရဲ(သၞာဲဒဴ) သၟိင်အုပ်ဓုပ်ဍုင်တံ ကၠတ်စလဝ်လာဘ်ပူဇဴ သၞေဟ်ကင်လုပ်လၟိဟ်ကဵုစှ်ရ။

စက်ယာန်တံ စိုပ်ဍုင်မတ်မလီုတုဲ ၚုဟ်မးစက်ယာန်ပဠတ် ကဵု စက်ယာန်လုပ်သၞောဝ်တံဂှ် ၚုဟ်မးတၞဟ်ခြာဒၟံင် ညံင်ရဴသၟိင်ဂိတုကဵုဂၠးတိရ။ ပိုဲကောန်ညးဍုင်ကွာန်တံ ဗွဲမဂၠိုင်ဂှ်လေဝ် နကဵုလောဘစိုတ် ကတဵုဒှ်တုဲ ပွဇကုဗၠေတ်ဂှ်ဟွံညာတ် ညာတ်လ္ပာ်သာ ၚုဟ်မးသဝ်တုဲ ဒ္ဂေတ်လီုဗက်အာ ညံင်ရဴကောန်ရဲ(သၞာဲဒဴ) သၟိင်အုပ်ဓုပ်ဍုင်တံဂှ်ကီုရ။ ဂလာန်ညးဟီုစ “ကျာ်ဇၞော်ထဍိင်ထၟာဲတဲ” ဂှ် ပိုဲမန်တံ ကေင်မိင်ကၠုင်ဒၟံင်ဖအိုတ်ရ။ ကျာ်ဇၞော်ထဍိင်ထၟာဲတဲမ္ဂး ကွးဘာဒးလေအ် ဟိုတ်နူစွံလဝ်ထၟာဲတဲကြာန်န်၊ ကာလကွးဘာထဍိင်ဒးထၟာဲတဲလေဝ် “မတ်ၝဟွံညာတ်ဟာ စွံလဝ်ထၟာဲတဲဂှ်” ကွးဘာဒးလေအ်ပၠန်ရ။

လၟုဟ်လေဝ် တၠုင်လအာညံင်ရဴသာ်ဂှ်ကီုရ။ ကောန်ရဲ(သၞာဲဒဴ) သၟိင်အုပ်ဓုပ်ဍုင်တံ ဒ္ဂေတ်လီုဂှ် ပိုဲကောန်ညးဍုင်ကွာန်တံ က္လေင်ကေတ်ဒုဟ်လ္တူညးတံဟွံဂွံ၊ ပွကောန်ညးဍုင်ကွာန်တံ ဗၠေတ်လဝ်ဂှ်ရ ညးတံက္လေင်ကေတ်ဒုဟ်ဂွံ ဒှ်ဒၟံင်သာ်ဂှ်ရ။ သာ်ဏံ ယဝ်ရပိုဲကောန်ညးဍုင်ကွာန်တံ တော်တၟော် ချပ်စင်ခြင်လဝ်ဟၟဲမ္ဂး သွက်ပိုဲသ္ဂောံဒှ်ဒဒိုက် အနာဂတ်ဂတတေံရ။ မၞိဟ်ညးချပ်စင်ခြင် နကဵုညာဏ် မၞုံကဵုစရိုတ်ယျဵုလ္ဂူတပ်တးတံဂှ် နကဵုလောဘစိုတ် ညးတံ ဟွံကေတ်အခေါင်အရာတၟေင်တုဲ ညးတံဟွံစှ်ေစးကဵုသၞောဝ်ဥပဒေ ညးတံဟွံပတၠ ကွဳစက်၊ ကွဳလိုန်ဓာတ်၊ စက်ယာန်ဟၟဲကဵု လိက်အခေါင်ဍာံပြ(လာင်ဇြေန်)တံဂှ်ရ။

ချူလိက်ပရေင်ဏံ ချပ်စိုပ်အာလ္ပာ်သြန် “မိကျေဝ်လာဲ” ပ္ဍဲဍုင်လၟိုင် လောန်ကၠုင်အကြာ ၇/၈ သၞာံတေံရ။ စုတ်သြန်ကဵုမိကျေဝ်လာဲ (၁၀၀)ကိုဋ် လအ်မွဲသတ္တာဟမ္ဂး က္လေင်ဂွံ(၁၅၀)ကိုဋ်ရောင်ဂးတုဲ ပိုဲမၞိဟ်နွံကဵုဓရ်လောဘ ဗွဲမသ္ကာတ်မြဟ်တံ သွံထဝ် သွံတိ သွံကၠအ် စုတ်သြန်ကဵုမိကျေဝ်လာဲအိုတ်ရ။ ကမၠောန်ဟၟဲကဵုတင်ဒုင်လျိုင် လိက်ကသုက်လေဝ်ဟၟဲ အနာဂတ် မုဍေံကတဵုဒှ်မာန် ဟွံချပ်ဗ္စာမွဲသာ် ဟိုတ်နူလောဘစိုတ် သၟိက်မိက်ဂွံဂွံသြန်ညးတၞဟ်လောဲလောဲတုဲ အိုတ်ကၞောတ် တိဍာ်ကၠအ်သွဝ် ပိုန်ဒြပ်ဆောံလေင် ဘဝဒးလီုအာ ဟွံအောန်လးလး ဂွံဆဵုကေတ်တုဲရ။

သၟိင်အုပ်ဓုပ်ဍုင် ဟွံမင်မွဲသၞောဝ်ဓရ်တုဲ ညးဍုင်ကွာန်တံလေဝ် ဟွံတီသၞောဝ်ဓရ်အိုတ်ရ။ သၟိင်အုပ်ဓုပ်ဍုင်ယုတ်ကြာန် ဟွံမင်မွဲသၞောဝ်ဓရ်ဂှ် ညးတံဟွံတီသၞောဝ်တုဲ ဟွံမင်မွဲဟွံသေင် အတိုင်တီတီဂှ်ရ ဒ္ဂေတ်လီုဒၟံင်အိုတ်ရ။ ညးဍုင်ကွာန်ပိုဲတံလ္ၚဵုဂှ် ဟွံတီသၞောဝ်တုဲ မင်မွဲဟွံဒးရ။ ကာလဒးဒုင်ရပ်မှ အဲဟွံတီသၞောဝ်ဟီုဂှ် ညးတံက္လင်ဟွံသေင်ရ။ မွဲသာ်ပၠန် ဗၠာဲသၟိင်ကၠုင်ရပ် ကွဳကမၠတ်ပ္ဍဲတဲပိုဲဂှ် ဍိုက်ကၠုင်ကွဳကမၠတ်ဖိုဟ်ဂှ် “ဇကုတံလေဝ် ဍိုက်လဝ်ကွဳကမၠတ်ရ” သာ်ဏံ အခေါင်ဂွံက္လေင်ဟီုကဵု ညးတံဟၟဲရောင်။

သရုပ်ကၠေံမ္ဂး သၟိင်ဍုင်ယုတ်ကြာန်မ္ဂး ကောန်ညးဍုင်ကွာန်လေဝ် စရိုတ်သဝ်ကီုရ။ ဆ္ဂး အလုံကောန်ညးဍုင်ကွာန်ဖအိုတ်ဟွံသေင် ကၟိန်ဍုင်ပိုဲဂှ် ဟိုတ်နူဒှ်ဍုင် ရှ်ေသှ်ေဗုဒ္ဓသာသနာဂၠိုင် ဒုင်ဂိုင်ကေတ်သြဝါဒဒၠောံဗ္တောန်ကျာ်ဂၠိုင်တုဲ ဒ္ဂေတ်ကီု စရိုတ်ကီု ဟွံလီုဗက်သၟိင်တၠယုတ်ကြာန်တံ သီုဖအိုတ်ရ။ လက္ကရဴအိုတ် မိက်ဂွံဗတိုက်ဖအောဝ် ကောန်ညးဍုင်ကွာန်မန်ပိုဲတံဂှ် ဗီုသၟိင်တၠအဝဵုယုတ်ကြာန် သ္ပမာန်ပ္ဍဵုပ္ဍိုက်ညးဍုင်ကွာန်၊ ဒ္ဂေတ်လီုလာ် စာ်ထောင်ဒၟံင်ဂှ် လ္ပကဵုတုပ်ဗက်ညိ။ ပိုဲမန်တံ နွံကဵုဘာသာခိုဟ်ပြဲ ဒၠောံဗ္တောန်တၠဳပိုန်ကျာ်တြဲဂှ် မင်မွဲစရိုတ်မာန်မ္ဂး ဒဒိုက်သာညိရောင်။

ReplyReply allForwardAdd reaction