ပ္ဍဲအခိၚ်ဗြဲတမ်သၞာံဏံ မၞိဟ်ဇၞော်၊ မၞိဟ်ဍောတ် က္တဵုဒှ်ယဲမနက် (တုပ်ကွေး) ဂၠိုၚ်တုဲ ပ္ဍဲရုၚ်ဂဥုဲတအ်လေဝ် မၞိဟ်ယဲပေၚ်ဒၟံၚ်ရောၚ် ညးတာလျိုၚ်ရုၚ်ဂဥုဲပုဂ္ဂလိက လ္တူဍုၚ်မတ်မလီုမွဲတၠ ဟီုရ။

စတမ်နူဂိတုမေမံက်ဏံတုဲ ဗြဲဂူတရိုပ်ဒၟံၚ် လၟေၚ်ဒဒှ်တ္ၚဲတုဲ မၞိဟ်ဇၞော်၊ မၞိဟ်ဍောတ် ကောန်ၚာ်ဟွံသှ်ေ က္တဵုဒှ်ယဲမနက် (တုပ်ကွေး) ဂၠိုၚ်တုဲ ပ္ဍဲရုၚ်ဂဥုဲဇၞော်လ္တူဍုၚ်တအ်ကီု၊ ရုၚ်ဂဥုဲပုဂ္ဂလိက လ္တူဍုၚ်ဂမၠိုၚ်တအ်ကီု မၞိဟ်ယဲပေၚ်ထာတ်ဒၟံၚ်ရောၚ် သ္ဂးရ။

“မွဲၜါတ္ၚဲဏံ မၞိဟ်ယဲဂၠိုၚ်တိုန်မံၚ်၊ မၞိဟ်ဇၞော် မၞိဟ်ဍောတ် ကောန်ၚာ် ခ္ဍက်ဒးချာမ်ဂၠိုၚ်မံၚ်၊ နူဂှ်မွဲကဆံၚ် က္တဵုဒှ်ယဲမနက် (ယဲချာမ်)၊ ယဲမနက် (ချာမ်) ဓမ္မတာရတှ်ေ မုဟွံဒးဂွိၚ်၊ ဆဂး ဒှ်စိုပ်အာကဆံၚ် ယဲမနက် (ချာမ်) (သွေးလွန်တုပ်ကွေး) တှ်ေ ဒးထ္ၜးပ္ဍဲရုၚ်ဂဥုဲတွဵုရ” သာ်ဝွံ အ္စာသဝ် (သမားတော်) နူရုၚ်ဂဥုဲပုဂ္ဂလိက ဍုၚ်မတ်မလီုမွဲတၠဂှ် ဟီုရ။

ယဲမနက် (ယဲချာမ်) (တုပ်ကွေး) ဂှ် ဇၟာပ်စိုပ်အခိၚ်ဗြဲတမ်သၞာံကီု၊ လဒေါဝ်ကသီု အခိၚ်ဗြဲတရိုပ်ဂၠိုၚ်ကီု ကောန်ၚာ်ဍောတ်ဍောတ် အကြာသၟဝ်အာယုက် (၁၄) သၞာံ က္တဵုဒှ်ဂၠိုၚ်တုဲ မၞိဟ်ဇၞော် ပရေၚ်ထတ်ယုက်ဆုတ်စှ်ေလ္ၚဵုတအ်လေဝ် က္တဵုဒှ်လေပ်ရ။

ယဲမနက် (ယဲချာမ်) ဂှ် ခ္ဍက်၊ ဇကုဂမ္တဴ၊ ဒးချာမ်၊ ဒှ်ယဲဝေဒနာ ဥတုရာသဳ ဓမ္မတာကီုလေဝ် လွဳလွတ်လဇုဲအာမ္ဂး ဇြဟတ်ပိုတ်မာန်တုဲ ဒးဂွိၚ်ကဵု ဘဲအန္တရာဲလမျီုမာန်ရောၚ်ဂှ်လေဝ် အ္စာသဝ်ဂှ် ဟီုရ။

“ယဲမနက် (တုပ်ကွေး) ယျေယျဂှ် ဍေံကၠောံစိုပ်အာ (သွေးလွန်တုပ်ကွေး) ဓမ္မတာနွံ၊ ဗွဲတၟေၚ်နွံ၊ ရံၚ်ကေတ်သာ်ဏံတှေ် တီကေတ်ဟွံမာန်ပုဟ်၊ ဟိုတ်ဂှ်ရ ခ္ဍက်၊ ဇကုဂမ္တဴ၊ ဒးချာမ်ဗက်ဂှ်တှ်ေ အာထ္ၜးကဵုရုၚ်ဂဥုဲ ဗွဲမပြဟ်ဂှ်တှ်ေ ဟွံဒးဂွိၚ်ပုဟ်” သာ်ဝွံ အ္စာသဝ်ဂှ် ထပ်ဟီုရ။

မၞိဟ်ခေတ်တ္ၚဲဏံဂှ် ကောန်ၚာ်ကီု မၞိဟ်ဇၞော်ကီု က္တဵုဒှ်ယဲဝေဒနာ ပရေၚ်ထတ်ယုက် ဆောတ်ယောၚ်မွဲမွဲသာ်မ္ဂး ဗွဲမဂတာပ်အခိၚ် အာထ္ၜးယဲ ပ္ဍဲရုၚ်ဂဥုဲ၊ ဗဒမ်ဂဥုဲတအ်တုဲ အခိၚ်ဥတုရာသဳပြံၚ်လှာဲကၠုၚ်မ္ဂး မၞိဟ်တအ် ကောံလွဳလွတ်ဒၟံၚ် ပ္ဍဲရုၚ်ဂဥုဲလတူဍုၚ်တအ် ပေၚ်ဍတ်ဒၟံၚ်ရ။