ပ္ဍဲအခိၚ်ကိုန်စဳဇန် ရပ်စပ်ကွဳစက်ယာန်ဏံ ပရေၚ်ဇက်ပလံၚ်ကပေါတ်သတ်ဆုနာနာဂှ် ဒှ်ပရေၚ်ခက်ခုဲတုဲ သတ်ဒူရေန်လေဝ် ၚုဟ်အောန်စှ်ေအာ ကြပ်ကဝက်ဒှ်ရောၚ် တၠကၠအ်ဒူရေန်တအ် ဟီုရ။
နူကဵုဒူရေန်မွဲကဳလိုဝ် (၂) လက်ဂှ် ဟိုတ်နူဇက်ပလံၚ်ဒှ်ခက်ခုဲတုဲ လၟုဟ်မ္ဂး သှ်ေမံၚ်မွဲကဳလိုဝ် အကြာ (၁) လက်၊ သၟဝ် (၁) လက်ရရောၚ် တၠကၠအ်ဒူရေန် နူဍုၚ်ဇြပ်ဗုမွဲတၠ ဟီုရ။
“တိတ်တဲကၠာအိုတ် ဂိတုကၠာတေံဂှ်တှ်ေ ပိုဲၜှ်သွံ မွဲကဳလိုဝ် (၂) လက်၊ သၟဝ် (၂) လက်ညိ၊ နူကဵုဍေံရပ်ကာ၊ ကွဳလိုန်ဓာတ်ဏံတုဲဂှ်တှ်ေ လၟုဟ်ဍေံရာန် မွဲကဳလိုဝ် (၁) လက်၊ သၟဝ် (၁) လက် ၚုဟ်အောန်စှ်ေကြပ်ကဝက်ဒှ်အာ” သာ်ဝွံ နာဲသိုဝ် တၠကၠအ်ဒူရေန်ဂှ် ဟီုရ။
ဒူရေန်ဆက်မိတ် ဂိတုကၠာတဲတေံမ္ဂး မွဲကဳလိုဝ် (၂) လက်၊ (၂) လက်ပြၚ်နွံတုဲ ဒူရေန်အရိုၚ်မ္ဂး ဇၞော်ညိ (၂) လက် ၊ ဍောတ် (၁) လက်ပြၚ်ညိရ။
ဗွဲကြဴနူကဵု ပရေၚ်ရပ်စပ်စၟဳစၟတ် ကွဳစက်ယာန်တေၚ်ကၠုၚ်ဏံတုဲ ဒူရေန်မဆက်မတ် ၚုဟ်ဖံက်သေဝ်ဂှ် မွဲကဳလိုဝ် အကြာ (၁) လက်ကဵု သၟဝ် (၁) လက်တုဲ ဒူရေန်အရိုၚ်မ္ဂး ဇၞော်ဂှ် အကြာ (၁) လက်၊ ဍောတ်ဂှ် (၇၀၀၀၊ ၅၀၀၀) နွံအဆံၚ်ဆံၚ်ရ။
“နူကဵုဍေံရပ်ကွဳလိုန်ဓာတ်၊ ကာဏံတုဲတှ်ေ ပလံၚ်သွံဒူရေန် ဒှ်ခက်ခုဲတၟာဂလိုၚ်၊ ဒၟာနူဒှ်ခက်ခုဲဂှ်တုဲတှ်ေ ရဲရာန်တအ်လေဝ် ဖအောန်ဖျေံၚုဟ်ကြပ်ကဝက်ဒှ်မံၚ်၊ အခိၚ်ဒူရေန်တိတ်ဏံမှ ဒှ်အာဗီုဏံဂှ် တၠကၠအ်ဒူရေန်တအ် ဂိအာတၟာဂလိုၚ်” သာ်ဝွံ ညးတၠကၠအ်ဒူရေန် ပွိုၚ်ဍုၚ်ရေဝ် (သၟဝ်ကျာ) မွဲတၠပၠန်ဂှ် ဟီုရ။
အသိၚ်ကိုန်စဳဇန် ပရေၚ်ရပ်စပ်ကွဳစက်ယာန်တ္ၚဲဏံဂှ် သတ်ဆုတိတ်ပ္ဍဲရာသဳလၟုဟ်ဏံကီု၊ ကပေါတ်ဗွဝ်ဖျာ ဒးဇက်ပလံၚ်နာနာသာ်တအ်ကီု၊ ဆေၚ်သွံကပေါတ်နာနာတအ်ကီု၊ ဆေၚ်စသုၚ်နာနာတအ်ကီု မၞိဟ်အာကၠုၚ်အောန်စှ်ေတုဲ ကမၠောန်နာနာသာ်တအ် ဒှ်အာ ပရေၚ်ခက်ခုဲဖအိုတ်ရ။
ဟိုတ်နူအသိၚ်ရပ်စပ်ကွဳစက်ယာန်လၟုဟ်ဏံဂှ်တုဲ လတူဍုၚ်ကီု၊ မွဲဒမြိပ်လတူဂၠံၚ်ဇၞော် တအ်ဂှ်ကီု မၞိဟ်အာကၠုၚ်အောန်စှ်ေတုဲ ပ္ဍဲဆေၚ်ဖျာ သွံဒူရေန်တအ်လေဝ် ဂွံသွံအောန်စှ်ေ အာ ၜိုတ်ကဝက်ဒှ်ရောၚ် တၠဖျာတအ်ဟီုထ္ၜးလဝ်ဂှ် ဂွံတီကေတ်ရ။
