အ္စာဘာစှ်ေနူကဝ်လိက်ကောန်ဂကူမန်တုဲတအ်ဂှ် ဒးတိုန်ဘာပၞာန်သ္ဇိုၚ်တုဲ ပ္ဍဲဘာကောန်ဂကူဂမၠိုၚ် ဒှ်ဒၟံၚ်ပရေၚ်ခက်ခုဲကဵု အ္စာရောၚ် ဂကောံကေၚ်ကာအ္စာဘာနူပွိုၚ်ဍုၚ်မွဲတၠ ဟီုလဴထ္ၜးရ။

ညးမတိုန်ကတ်လ္ၚတ်လဝ် ပ္ဍဲကဝ်လိက်ကောန်ဂကူမန် သွာၚ်သ္ပအ္စာဘာဂမၠိုၚ် စှ်ေနူဘာတုဲမ္ဂး ဒးယိုက်ဂၠေၚ်သ္ပအ္စာဘာ ပွိုၚ်ၜါသၞာံဂှ် နူကဵုဗော်ဍုၚ်မန်တၟိ ပ္တိတ်ကၠုၚ်စၞောန် ဒးတိုန်ဘာပၞာန်သ္ဇိုၚ်တုဲ ပ္ဍဲဘာကောန်ဂကူမန်ဂမၠိုၚ် ဒှ်ဒၟံၚ်ပရေၚ်ခက်ခုဲရောၚ် သ္ဂးရ။

“ပ္ဍဲဘာတအ်ဂှ် အ္စာဗ္တောန်ဒၟံၚ်လိက် အတန်ညး အတန်ညးဂှ် ပံက်ဘာတုဲဂှ် ပိုဲကဵုပိုဲသဳကၠဳ ဖျေံလဝ်ဗီု ဗီုပြၚ်ဗ္တောန် တာလျိုၚ်ဗ္တောန်တုဲဒှ်အိုတ်ရ၊ စၞောန်ကၠုၚ် အ္စာစှ်ေနူကဝ်လိက်တအ်ဂှ် ဒးတိုန်ဘာပၞာန်ရောၚ်ဟီုဂှ် ဗ္တောန်လိက်ခက်ခုဲ၊ ဂွံထပ်ဂၠာဲအ္စာတၟိဂှ်လေဝ် ခက်ကဵုဘဏ္ဍာ၊ အ္စာၜိုတ်သှေ်ဏံဂှ် ဗ္တောန်ဗ္ဂေတ်မံၚ် ၜိုတ်ဆဒးဂစပ်ရတှေ် ဒၞာဲအ္စာယအ်အာဏံ မၞိဟ်သှ်ေဂှ် ဒးလုပ်ဗ္တောန်ရောၚ်ဟီုတှ်ေ အခိၚ်ဟွံရုမ် ကွးဘာတအ်ခက် ဘာအ္စာနူကဝ်လိက်ဖျေံလဝ်ဂှ်တှ်ေ ခက်ဖအိုတ်ရ” သာ်ဝွံ ကေၚ်ကာအ္စာဘာကောန်ဂကူ အဆံၚ်ပွိုၚ်ဍုၚ်မွဲတၠ ဟီုလဴထ္ၜးရ။

ဘာကောန်ဂကူဂှ် ဟိုတ်နူစရိတ်ဩန်ဂိတုအောန်တုဲ နူတမ်ဝါဒိ ဂၠာဲအ္စာဝါတ်မံၚ်ရဂှ် အ္စာစှ်ေနူကဝ်လိက်ကောန်ဂကူမန်တအ် အဃောကေတ်မံၚ်တာလျိုၚ်သ္ပအ္စာဘာ ပ္ဍဲဘာကောန်ဂကူ အကြာပွိုၚ်ဍုၚ်ဂမၠိုၚ်ဂှ် ဒးတိုန်ဘာပၞာန်သ္ဇိုၚ်တုဲ ဂွံထပ်ဂၠာဲအ္စာတၟိဂှ် ခက်ကဵုဘဏ္ဍာကီု၊ ဂွံထပ်ဗပေၚ်အ္စာတၟိဂှ် ဒှ်အခိၚ်ကဝက်ကဝုဲ (၃ ဂိတုဓဝ်) ကီုတုဲ ဘာ ကောန်ဂကူမန် ကေတ်လဝ် အ္စာဘာနူကဵုကဝ်လိက်ကောန်ဂကူမန်ဂမၠိုၚ် ဒှ်ဒၟံၚ်ခက်ခုဲအိုတ်ရ။

“နကဵုဗော်ဂှ် ညးဒးကေတ်တှ်ေ တာလျိုၚ်ညး ညးဒးဖန်ဂှ်ဒး၊ ဌာနပညာဂှ် ဗော်ဒးကေတ်ဏောၚ်ဗီုဏတှ်ေ ဌာနပညာဂှ် ဂွံထပ်စၞးအ္စာဒးတိုန်ဘာပၞာန်ဂှ် တာလျိုၚ်ဌာနပညာတအ်၊ ဌာနပညာတအ် ဟွံကေတ်တာလျိုၚ်မွဲသာ် ဘာညးကဵုညး ဒးကေတ်တာလျိုၚ် ဖန်စကေတ်ကေတ်ဏောၚ်ဟီုတှေ် ဒှ်ခက်ခုဲအိုတ်ရ” သာ်ဝွံ ကမ္မတဳရေၚ်တၠုၚ်ဖဵုဘာကွာန် နူပွိုၚ်ဍုၚ်မုဟ်ဍုၚ်မွဲတၠ ဟီုရ။

စနူသၞာံ (၂၀၂၄) တုဲကၠုၚ်တေံတုဲ ကွးဘာတိုန်ကတ်လ္ၚတ်လဝ် ပ္ဍဲကဝ်လိက်ကောန်ဂကူမန် ကတ်လ္ၚတ်လဝ် သွာၚ်သ္ပအ္စာဘာဂမၠိုၚ်တအ်ဂှ် စှ်ေနူကဝ်လိက်တုဲမ္ဂး ဒးကေတ်တာလျိုၚ်သ္ပအ္စာဘာ ပွိုၚ် (၂) သၞာံတုဲ လၟုဟ်မ္ဂး အ္စာဘာ စှ်ေနူကဝ်လိက်ကောန်ဂကူမန်ဂမၠိုၚ်ဂှ် အဃောကေတ်ဒၟံၚ်တာလျိုၚ် ပ္ဍဲကဵုဘာကောန်ဂကူ အကြာပွိုၚ်ဍုၚ်ဂမၠိုၚ်ရ။

အ္စာဘာကောန်ဂကူ စှေ်နူကဝ်လိက်ကောန်ဂကူမန်တအ် ဒးတိုန်ဘာကွတ်ပၞာန်သ္ဇိုၚ် ပ္ဍဲဗော်ဍုၚ်မန်တၟိလၟုဟ်ဏံဂှ် ဒှ်အလန်ကိုပ်ကၠာအိုတ်ရောၚ် ဂွံတီကေတ်ရ။