ဟိုတ်နူအသိၚ်ရပ်ကွဳစက်ယာန်ဏံတုဲ ဒေသလ္ၚဵုဂှ် ခၞေဝ်ကေဝ်၊ ကဖျုန်တအ် ၚုဟ်က္ဍၚ်တိုန်ကြပ်ကဝက်ဒှ်ရောၚ် ဂွံတီကေတ်နူညးဒေသလ္ၚဵုတအ်ရ။
ပရေၚ်စၟဳစၟတ်ရပ်ကွဳစက်ယာန်ဂှ် နူကဵုအဆံၚ်လ္တူတေအ် သီုကဵုလဝ်စၞောန် တမ်ဒပ် ကေုာံ ဗဒိုပ်ဗၠာဲသၟိၚ် အဆံၚ်ဒေသကွာန်တအ်တုဲ ပ္ဍဲအကြာဂၠံၚ်လုပ်တိတ်ကဵုကွာန်တအ်ဂှ်လေဝ် ပၞာန် (ဗၟာ) ကေုာံ ဗၠာဲသၟိၚ်တအ် စၟဳစၟတ်ရပ်မံၚ်နွံရ။
“အကြာကွာန်ပိုဲဏံတှ်ေ ကောန်ကွာန်ပိုဲရရဂှ် ပၞာန်တအ်ကီု ဗၠာဲသၟိၚ်တအ်ကီု ဍေံဟွံရပ်၊ မၞိဟ်ကၠုၚ်နူကွာန်ပလုၚ်တှ်ေ ဍေံရပ်၊ ကာ သွံခၞေဝ်လေဝ် ဗီုဂှ်ရ ကၠုၚ်နူကွာန်တၞဟ်တၞဟ် တှ်ေ ဍေံရပ်မံၚ်၊ ဟိုတ်နူဂှ်ရ ခၞေဝ်ကေဝ်ကီု ကဖျုန်ကီု ၚုဟ်က္ဍၚ်တိုန်အာ ကြပ်ကဝက်မွဲတဲ” သာ်ဝွံ ညးဒေသ အကြာပယျဵုပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ် မွဲတၠ ဟီုထ္ၜးရ။
ဒေသကွာန် သ္ၚောဲကဵုဍုၚ်လ္ၚဵုလ္ၚဵုဂှ် နူကၠာဟွံရပ် ကွဳစက်ယာန်မ္ဂး ခၞေဝ်ကေဝ် မပ္တံကဵု ကဒါတ်မွဲစန် ဗၞတ် (၅၊ ၆) တၞုၚ်မ္ဂး ဗၞတ် (၂၀၀၀) ပြၚ်ညိတုဲ လၟုဟ်မ္ဂး ဒှ်အာ မွဲစန် (၅၀၀၀) ကီု၊ ကဖျုန်မွဲပသာ နူကဵု (၂) လက်ပြၚ်ညိဂှ် ဒှ်အာ (၄) လက်ပြၚ်ရ။
“ဍေံရပ်ကာ၊ ကွဳလိုန်ဓာတ်လၟုဟ်ဏံဂှ် ညးဍုၚ်ကွာန်တအ် ဂွံစ၊ ဂွံသုၚ်၊ ဂွံရာန်စ ခၞေဝ်ကေဝ် ကဖျုန်လေဝ် ဒးပတှ်ေ မံၚ် ကွဳလိုန်ဓာတ်၊ ကာ ဖျာတအ်ဖအိုတ်ရတှ်ေ ကွဳ၊ ကာတဂှ် အာကၠုၚ်ဝါတ်ဂှ်ရ ခၞေဝ်ကေဝ်၊ ကဖျုန်တအ်ဂှ် ၚုဟ်က္ဍၚ်တိုန်အာ” သာ်ဝွံ ညးဒေသဂှ် ဆက်ဟီုရ။
အစဳဇန်ရပ်ကွဳစက်ယာန်ဂှ် လၟုဟ်မ္ဂး လတူဍုၚ်ကီု၊ ဂၠံၚ်လုပ် တိတ်ဍုၚ်သၟးဟွံက၊ ဒေသပၞာန် (ဗၟာ) ကေုာံ ဗၠာဲသၟိၚ်တအ် ဖျေံလဝ်သဇိုၚ်ဂှ်မ္ဂး ပါၚ်ဂၠံၚ်လုပ်တိတ်ကွာန်ကီု၊ အကြာဒေသကွာန်ဆက်စၠောံ အကြာမွဲကွာန်ကဵုမွဲကွာန်ဂှ်ကီု မၚ်စၟဳစၟတ် ရပ်မံၚ်နွံရ။
အသိၚ်ရပ်ကွဳစက်ယာန်တ္ၚဲဏံဂှ် ၚုဟ်စရိတ်ကောန်ကေမၠာန်ကီု၊ ၚုဟ်ခၞေဝ်ကေဝ် ကဖျုန်ကီု၊ ၚုဟ်စရိတ်ယိုက်ပလံၚ် မၞိဟ်ဂိယဲက္တဵုဒှ်ဒဒိုက်ကီု အိုတ်သီုဂှ် စရိတ်ယိုက်ပလံၚ်တအ် က္ဍၚ်တိုန်အာဖအိုတ်ရ။
ပရေၚ်ရပ်ကွဳလိုန်ဓာတ်၊ ရပ်ကွဳစက်ဏံဂှ် လလအ်အခိၚ်ဂွံအိုတ်အာဂှ်မ္ဂး ညးဍုၚ်ကွာန်တအ် အာကၠုၚ်ကိစ္စကေၚ်ကာမွဲမွဲကီု၊ ဂိယဲကီု၊ ကၠောန်ပရေၚ်ပိုန်ဒြပ် ဗပေၚ်ဗုၚ်ဂၞဴကီု ဒှ်အာပရေၚ်ခက်ခုဲ ဇၞော်ကဵုဇြဟတ်ဖအိုတ်ရောၚ် ဂွံတီကေတ်ရ။
