နူကဵုဌာနပရေၚ်ထတ်ယုက်ကောန်ဂကူမန်(ဗဟဵု) ဗော်ဍုင်မန်တၟိ သ္ပသ္ကိုပ်သ္ကတုဲ သၞာံဏအ် ပ္ဍဲဂိတုအံက်တဝ်ဗာတေံမ္ဂး သွက်ဂွံပံက်အာဘာ တန်ဗ္တောန်သ္ဇိုၚ်ပါ်ဓါတ် (Basic Laboratory Training) ပွိုၚ်(၃)ဂိတုနွံတုဲ လလောင်တြး ကော်ဘိက်ဒၟံင်ကွးဘာတအ်ရောင် ဂွံတီကေတ်ရ။
လဂွံကဵုမုက်လိက် Facebook ဌာနထတ်ယုက် ဗဟဵု လလောင်တြးလဝ် စပ်ကဵုကဆံင်ဍာ်ဒ္ကေဝ် ညးနွံအခေါင်တိုန်ဘာမာန်တအ်ဂှ်မ္ဂး အဝဲခန္ဓကာယ မ္ဒးဍိုက်ပေၚ်တုဲ သ္ဒးဒှ်အကြာအာယုက် (၁၈ – ၃၅) သၞာံရောၚ် ဂးလဝ်ရ။ တုဲပၠန် ညးဟွံမွဲကဵုယဲဍာ်ဇမၠိၚ် ယဲကၠောံထၞာန်တံကီု၊ ဆေင်ကဵုပရေင်ပညာဘာတန်မ္ဂး သ္ဒးကေင်သွဟ်လဝ် ၁၀ တန် သၞောတ်တြေံတုဲ သၞောတ်တၟိမ္ဂး မ္ဒးအံင်လဝ် Grade 11 ကီု၊ ယဝ်ဒှ်နူသွာင်ပရိယတ်မ္ဂး မ္ဒးအံင်လဝ် ကဆံင်တန်ဇၞော်ရောင် ချူဓမံက်လဝ်ရ။
“ဘာဂှ် ၜိုန်ရဟီုလဝ် ပွိုင် ၃ ဂိတုကၠာလေဝ် ကာလဒးဗ္တောန်ကွေံကွေံတေံဏောင်တှ်ေဒးကေတ်အခိင် ၜိုတ် ၄ ဂိတု ၅ ဂိတု ဒှ်စလေပ်မံင်ရ၊ အလန်ဏအ်ဂှ်တှ်ေ ပိုယ်သၠုင်ပ္တိုန်လဝ်အဆံင်ဍာ်ဒ္ကေဝ်ပညာကွးဘာတအ်ညိရ၊ သၠုင်တိုန်ဟီုဂှ်လေဝ် သွက်ဍေံတအ် ဂွံဗက်လိက်မာန်ရောင်” ညးတာလျိုင် နူဌာနထတ်ယုက် ဗဟဵု ဗော်ဍုင်မန်တၟိမွဲတၠ လဴထ္ၜးလဝ်ရ။
မွဲသာ်ပၠန်ဂှ် ညးမအာတ်မိက်တိုန်တန်ဗ္တောန်တအ်ဝွံ ဆေင်ကဵုအမှုအရာဂဗုတ်မ္ဂး မဒးသောင်အးမံင် တုဲ သီုဒးမၞုံကဵုသ္ဇိုင်ဘာသာအေဂႅလိက် ၜိုတ်ထေက်ကြိုက်ကီု ဆေင်ကဵုလိက်ဘာသာမန်၊ ဗၟာတအ်ဂှ်လေဝ် မ္ဒးချူဒး ဗှ်ဒးကီုရောင် ခုတ်ဗ္ၜတ်လဝ် စရာဲဍာ်ဒ္ကေဝ်ကွးဘာဂမၠိုင်နွံရ။
ကုညးမပ္တိုန်လဝ်စရင်တအ်ဂှ် ဂိတုဂျူလာင် စၟတ်တ္ရဲ ၃၀ ဏအ်မ္ဂး ကၠောန်သ္ပအာ ပရေင်သၟာန်သှ် Interview ပ္ဍဲကဵုရုင်ဆက်ဆောံ ဍုင်ရေဝ်၊ ရုင်ထတ်ယုက် ဍုင်မတ်မလီု၊ ရုင်ဂဥုဲပၞင်ဗိုန်၊ ရုင်ဂဥုဲ ပလိုင်ဂျပါန်တအ်တုဲ အံင်ဇၞးတတ်ၜက် အဆံင် Interview တုဲမှလေဝ် ဂွံအခေါင်တိုန်ဘာတန်ဗ္တောန်သ္ဇိုင်ပါ်ဓါတ်ရောင် ဂးလဝ်ရ။
“ဘာအလန်ဏအ်ဂှ်တှ်ေ တန်တဴကဵုအကာဲအရာတုဲ ရန်လဝ် ၂ ဒၞါဲရ၊ အဓိက ဒၞါဲလဵု ဂွံပၟတ်ခိုဟ်ရော၊ တုဲတှ်ေ သွက်အ္စာ၊ အ္စာၝောံတအ်လေဝ် ဂွံအာကၠုင်ပြေပြံင်ကီုတှ်ေ ဝါဇြေန် ဟွံသေင် ပၞင်ဗိုန်ရ၊ ဝါဇြေန် ပၟတ်ဟွံပြေပြံင်တှ်ေ ဒးက္လေင်ပံက် ပ္ဍဲပၞင်ဗိုန်ပၠန်ရောင်” သာ်ဝွံ ညးဆက်ဟီုလဝ်ရ။
အခိင်ကာလကၠုင်သွဟ် Interview မ္ဂး မ္ဒးကေတ်နင် လိက်ထံက်ဂလာန် နူဂကောံအုပ်ဓုပ်ကွာန်၊ နူရုင်ပွိုင်ဍုင်၊ နူရုင်ခရိုင် မဆေင်စပ်တအ်ဏောင်တုဲ မိမ ဟွံသေင် ညးအုပ်ဓုပ်မွဲမွဲတၠ ဒးပါကၠုင်ကီု၊ ယဝ်ဒှ်ရဲနူဌာန၊ ဒပ်တအ်မ္ဂး လိက်ထံက်ဂလာန် နူဌာန၊ ဒပ် မဆေင်စပ်ကဵုဇကုတအ်ဂှ် ဒးကေတ်နင်လဝ်ရောင် ဂွံတီကေတ်ရ။
လုပ်သွဟ် Interview တုဲ ဂွံဒုင်ရုဲစှ်အာမ္ဂး ဂွံအခေါင်တိုန်ဘာတန်ဗ္တောန်သ္ဇိုင်ပါ်ဓါတ် ပွိုင် ၃ ဂိတုရ၊ တန်ဗ္တောန်ဂှ်တုဲဒှ်မ္ဂး ဒးဆက်ကေတ်တာလျိုင် ပ္ဍဲဌာနထတ်ယုက်ကောန်ဂကူမန် MNHC ပွိုင် ၃ သၞာံရောင် ဂွံတီကေတ်ရ။
