ပ္ဍဲသၞာံ ၂၀၂၅ စနူကဵုဂိတုဂျူလာင်ဏံမံက်တုဲဂှ်ဝွံ ဗၠာဲသၟိင်သေံ၊ ဒပ်ပၞာန်မင်ဂီုကၠီုဒေသပယျဵုတအ် ရပ်စပ်ဂွံလဝ်ကောန်ဍုင်ဗၟာ ရဲညးကၠတ်လုပ်ဍုင်သေံတအ် နွံလၟိဟ် (၉၆) တၠယျရောင် ဂွံတီကေတ်ရ။

တုဲကၠုင်ပ္ဍဲဂိတုဂျူလာင် စၟတ်တ္ၚဲ (၄)ဂှ် ရပ်ဂွံညးကၠတ်လုပ်ဍုင် နကဵုကွဳစက်လာင်ရိုဝ်တိုဝ် (၃၅) တၠ၊ ဂိတုဂျူလာင် ၇ ဂှ် (၂၇) တၠ၊ ဂိတုဂျူလာင် ၈ ဂှ် ၁၂ တၠ၊ နူတနေံဏံ ဂိတုဂျူလာင်စၟတ်တ္ၚဲ ၁၄ ဂှ် (၁၂) တၠ ကဵု လ္ပါ်ပယျဵုသေံ-ဗၟာ ဗြဝတဳဂှ် (၁၀) တၠ အဆက်က်ရပ်ဂွံကၠုင်လဝ်နွံရ။

ကောန်ဍုင်ဗၟာလုပ်တိတ်ဍုင်သေံတအ်ဗွဲမဂၠိုင်ဂှ်ဝွံ လုပ်စိုပ်ကၠုင်မံင် လ္ပါ်ကဵုပၞော်ဂၠံင်လုပ်ဒေသပယျဵုကျာ်ပိ ပွိုင်ဍုင်သၚ်္ခဠၜူရဳ ကွာန်ဝၚ်္ကဂှ်ကဵု ဂၠံင်တိုန်ဍုင်ကမ္မရဳ ကွာန်ထံက်ခၞောန်ဏံသၟးနွံဂၠိုင်တုဲ သွက်ရဲညးကၠတ်လုပ်ဍုင်တအ်ဂှ်မ္ဂး ပရေင်ဒးဒုင်ရပ်စၟဳစၟတ်ကဵုဗၠာဲသၟိင်သေံတအ် သာတုဲနွံဂၠိုင်ကၠုင်ရ။

နူတနေံဏံ ဂိတုဂျူလာင် ၁၄ ပၠန်ဂှ်လေဝ် သၟာကမၠောန်ကောန်ဍုင်ဗၟာ (၁၀) တၠ သွက်ဂွံစဴဍုင်ကွာန် ဌာန်ဇကု စဴကၠုင်နူကဵုတရဴဍုင်ၜင်ကံက် ဂှ်ကဵု ရယံင်တေံဂှ် ဟိုတ်နူကွဳစက်လုပ်ဇီုဒးတၞံဆုသ္ကဲဂၠံင်ဇၞော် ခရိုင်ကာန်ဖာန်ဖေတ်ဂှ်တုဲ သၟာကမၠောန်ကောန်ဍုင်ဗၟာ မပါဗက်ကၠုင်ပ္ဍဲကွဳစက်လာင်ရိုဝ်တိုဝ်ဂှ် ပရေင်ဒးဘဲဝပ်နွံညိညကီုလေဝ် မၞိဟ်ဗြဴမွဲတၠဂှ် ဒးလဝ်ဘဲဝပ်အဆံင်ဒးဒှ်ဓဝိင်နွံဂှ်ရ ပလံင်ပစိုပ်ဏာရုင်ဂဥုဲဍုင်ခလံင်ခလောင်တေံရောင် ဂွံတီကေတ်ရ။

ဟိုတ်နူပရေင်ဍုင်ကွာန်ကၟိန်ဍုင်ဗၟာဟွံၜိုဟ်ဩဟ်တုဲ ညးအဝဲသၟတ်တအ် စၞးတိတ်အာကၠောန်စ ကမၠောန်ဇရေင်ဍုင်သ္အာင် ဍုင်ဇိုင်ဝုတ်ဒိုဟ် သာတုဲဂၠိုင်ကၠုင်ကီု အကြာခက်ခုဲကြေပ်ဂြတ်မံင်ဂှ် ဒးကဵုကၠုင်လဝ်စရိတ် ကုဃံင်ထပၠုပ်မၞိဟ်တအ် ညးမွဲတၠမ္ဂးတှ်ေ အကြာဩန်သေံ ဗၞတ် (၁၅,၀၀၀) ၝာတ် ကဵု (၂၀,၀၀၀) ၝတ်နွံကၠုင်ရ။

ပ္ဍဲဂိတုဂျူလာင် ပွိုင်ၜါသတ္တဟဏံသၟးဂှ်ဝွံ နူကဵုဗၠာဲသၟိင်သေံ ဒပ်ပၞာန်မင်ဂီုကၠီုဒေသပယျဵုတအ် ဟိုတ်မပတေင်ကၠုင်လဝ်ပရေင်စၟဳစၟတ်နွံဂှ်ရ ရပ်စပ်ဂွံလဝ်ကောန်ဍုင်ဗၟာရဲညးကၠတ်လုပ်ဍုင်သေံတအ် နွံလၟိဟ် (၉၆) တၠရောင် ဂွံတီကေတ်ရ။