ဂကောံလိက်ပတ်ယေန်သၞာၚ်မန် တက္ကသဵုကွတ်နဲပညာ(မတ်မလီု)ဝွံ သ္ပသမ္တီကဵုအယုက်ဂကောံပေၚ်(၄၀)သၞာံတုဲ သွက်ဂွံကၠောန်ဗဒှ်အာသဘၚ်ရတုမၞိက်နွံရောၚ် ဂွံတီကေတ်ရ။

အသေအဟာန်သဘၚ်ရတုမၞိက် ဂကောံလိက်ပတ်ယေန်သၞာၚ်မန် တက္ကသဵုကွတ်နဲပညာ(မတ်မလီု)ဝွံ သွက်ဂွံကၠောန်ဗဒှ်အာပ္ဍဲကဵု ၝောံခန်အပ်ပြာပ်တဆိပ်ကြာ တက္ကသဵုကွတ်နဲပညာ(မတ်မလီု)၊ ပ္ဍဲကဵုသက္ကရာဇ်ဍုၚ် ၁၃၈၇သၞာံ၊ ဂိတုဘတ် ၂ မံက် (ဂိတုအဝ်ဂေတ် စၟတ်တ္ရဲ ၂၄၊ တ္ရဲအဒိုတ်)၊ ပပ္တံနူ ၉ နာဍဳ အခိၚ်နူဂယး စဵုစိုပ် ၃ နာဍဳသဝ်တ္ရဲရောၚ်မဒှ်ရ။

“ပိုဲကၠောန်ဗဒှ်ပ္ဍဲဘာ တက္ကသဵုကွတ်နဲပညာ(မတ်မလီု)ဏံရ ၊ ဘသၚ်ရတုမၞိက်ဏံဟီုတှ်ေ နူကဵုဂကောံဏံ ဒက်လဝ်ဂကောံ နူကဵု၁၉၈၅တေံ စဵုကဵုစိုပ် ၂၀၂၅ဏံတှ်ေ ပေၚ်အာ(၄၀)သၞာံရ၊ ဟိုတ်ဂှ်ရ ပိုဲတအ် သ္ပသမ္တီကဵုအယုက်ဂကောံပေၚ်(၄၀)သၞာံတုဲ ကၠောန်သ္ပသဘၚ်ရတုမၞိက်ရ” သာ်ဝွံ ညးတာလျိုၚ်ဂကောံလိက်ပတ်သၞာၚ်မန် တက္ကသဵုကွတ်နဲပညာ(မတ်မလီု)မွဲတၠ ဟီုးလဴလဝ်ရ။

ပ္ဍဲကဵုသဘၚ်ဝွံ ပွမဖါပ်သၚ်ပ္တုဲဒါန်ကုခမဳသၚ်ဂမၠိုင်ကီု ပွမထ္ၜးပျးလိက်ပတ်ယေန်သၞာၚ်အခိုက်ကၞာမန် ကေုာံလှ်ေဒယှ်ေဂမၠိုၚ်တအ်ကီု ပွမပ္တိုန်ဂုဏ်စရာဲက္ဍိုပ်သ္ကိုပ်ဂမၠိုၚ်ညးမကေၚ်ယိုက်ဂၠေၚ်လဝ်တာလျိုၚ်ဂကောံတအ်ဂှ်ကီု ပွမဒုၚ်တၠုၚ်ကွးဘာမန်သၞာံတၟိ ကေုာံ ပ္တိုန်ဂုဏ်စရာဲကွးဘာမန်သၞာံလက်ကရဴအိုတအ်ကီု မပ္တံကဵုအစဳဇန်နာနာသာ် ကၠောန်သ္ပအာရောၚ်။

ဆဂှ်သၟးဟွံက သွက်ကွးဘာညးမအံၚ်ဇၞးအာလဝ် နူမသၟာန်သွဟ်လိက်တန်ပထမကေုာံ တန်ကၠာဲဘာသာမန် သၞာံ ၂၀၂၅တအ်ဂှ်လေဝ် ပတိုန်ဂုဏ်စရာဲကဵုအာလာဘ် ပ္ဍဲကဵုအသေအဟာန် သဘၚ်ရတုမၞိက်ဏံရောၚ် သ္ဂးရ။

“ပ္ဍဲကဵုသၞာံဏံဂှ် ပိုဲဗ္တောန်ကဵုလဝ်လိက်နွံမံၚ်ဏောၚ်တှ်ေ သွက်ကွးဘာတအ်ဂှ် ပိုဲကဵုအာလာဘ်နွံမံၚ်ဏောၚ်၊ ဆေၚ်ကဵုလှ်ေဒယှ်ေလေဝ်ပါလုပ်ဏောၚ်၊ မၞိဟ်ကဵုလဝ် sponsorတအ်ဂှ် ပိုဲကဵုအာ လိက်တၞးပတိုန်ဂုဏ်စရာဲလေဝ်နွံဏောာၚ်၊ တုဲပၠန်ပိုဲတအ် သီုရုဲအာ King ကဵု Queenသွက်ကွးဘာသၞာံတၟိတအ်ဏောၚ်” ညးတာလျိုၚ်ဂကောံလိက်ပတ်ယေန်သၞာၚ်မန် တက္ကသဵုကွတ်နဲပညာမလီုဂှ် ဆက်ဟီုရ။

ဟိုတ်ဒှ်သာ်ဂှ်ရ ပ္ဍဲကဵုသဘၚ်ဏံမ္ဂး နကဵုကွးဘာမန် တက္ကသဵုကွတ်နဲပညာ(မတ်မလီု)တအ် ပါလုပ်ချဳဒရာၚ်အာ ဗွဲမကတိုၚ်ကၟိုဟ်တုဲ နကဵုမိမကလောကောဒေံကောန်ဂကူမန်တအ်ဂမၠိုၚ်လေဝ် ပြာပ်အာဗိုၚ်ကဵုဇြဟတ်အိုတ်ညိဂှ် နူကဵုဂကောံလိက်ပတ်ယေန်သၞာန်မန် တက္ကသဵုကွတ်နဲပညာ(မတ်မလီု)တအ် ဟီုဆဝ်မ္ရုဟ်လဝ်ရ။

ဂကောံလိက်ပတ်ယေန်သၞာၚ်မန် တက္ကသဵုကွတ်နဲပညာ(မတ်မလီု)ဝွံ ပပ္တံနူသၞာံ ၁၉၈၅ ဂှ် ဒက်ပ္တန်ကၠုၚ်လဝ်တုဲ နကဵုယၟု”ဂကောံလိက်ပတ်ယေန်သၞာၚ်မန် ကွတ်တဲကွတ်စက်သိပ္ပံ(GTI)”ဂှ် ဗ္တောန်ကၠုၚ်ဒၟံၚ်လိက်ပတ်မန်တန်သ္ဇိုၚ်လိက်ပတ်မန်၊ တန်ပထမကေုာံ တန်ကၠာဲဘာသာမန်တအ်အဆက်ဆက်နွံကၠုၚ်ရ။

နကဵုဂကောံဝွံ ကိုပ်ကၠာတေံမ္ဂး ဗ္တောန်ကၠုၚ်မံၚ်လိက်မန် ပ္ဍဲဘာတြေံ ကွာန်ရောဂေါနွံကီုလေဝ် ပ္ဍဲသၞာံ ၂၀၁၈-၂၀၁၉ဂှ် ဂွံကၠုၚ်အခေါၚ်ဗ္တောန်လိက်မန် ပ္ဍဲဘာက္ကသဵုကွတ်နဲပညာ(မတ်မလီု)ဂှ်ရောၚ်။

မွဲလ္ပာ်ပၠန်မ္ဂးလေဝ် ပွမလှ်ေဒယှ်ေထ္ၜးပျးယေန်သၞာၚ်မန် ပ္ဍဲတ္ၚဲစၟတ်သမ္တီဂကူမန်တံ ချဳဓရာၚ်ပါလုပ်ကၠုၚ်ဒၟံၚ်နွံတုဲ စပ်ကဵုပရေင်ရီုဗၚ်ဒဒိုက်သၞာမန်တအ်ဂှ်လေဝ် ရေၚ်တၠုၚ်ကၠောန်ကၠုၚ်ဒၟံၚ် အဆက်ဆက်နွံရောၚ်ဂှ် ဂွံတီကေတ်ရ။