ပေါဲရုဲမာဲ သၞာံ ၂၀၂၅ ဒကုတ်ပထမ မရန်လဝ် ပ္ဍဲဂိတုဒဳဇြေမ်ဗါ စၟတ်တ္ရဲ ၂၈ တေံဂှ် ကဵုဖျုန် လ္တူဍုင်ဂမၠိုင်တုဲ ကၠောန်ဗဒှ်အာဗွဲကိုပ်ကၠာဏောင် သ္ကိုပ်ပၞာန် မေန်အံင်လှာင် ဟီုရ။

နူကဏေံတေံ (ဂိတုအဝ်ဂါတ် စၟတ်တ္ရဲ ၁၉) အခိင်ကၠောန်သ္ပပေါဲဆဵုဂဗကဵု သၞာဲဒဴဌာန ဆက်စပ်ဂမၠိုင်၊ မိမညးဍုင်ကွာန်ဂမၠိုင် ပ္ဍဲဍုင်ချံက် ကေုာံ ဍုင်ယျေနံင်ချံင် မၞုံရးဒေသမဂွေဂှ် ဥက္ကဌ ကမ္မယှေန်ပၞာန်လေဝ်ဒှ် က္ဍိုပ်သ္ကိုပ်ပၞာန်လေဝ်ဒှ် မေန်အံင်လှာင် ဟီုဓမံက်လဝ်ရ။

ကၠောန်ဗဒှ်ပေါဲရုဲမာဲဂှ်တုဲ သၠဲပအပ်ကဵုအဝဵုဍုင် ကုဗော်မဇၞးမာဲတအ်ဏောင်ဂှ်လေဝ် က္ဍိုပ်သ္ကိုပ်ပၞာန် မေန်အံင်လှာင် ဆက်ဟီုလဝ်ရ။

ပေါဲရုဲမာဲ ကမ္မယှေန်ပၞာန်တအ် မဖန်ဇန် ဂ္စာန်ဓမံက်ဒၟံင်ရုပ်ရဴအလန်ဏအ်ဝွံ ဒုင်သ္ဇိုင်ကဵုသၞောတ် ညးဂွံမာဲဂၠိုင်အိုတ် ညးဇၞး (FPTP) ကေုာံ သၞောတ်မသ္ပစၞး နကဵုဗၞတ် ပြံက်နှဴ (MMP) တုဲ ကၠောန်အာရောင် လလောင်တြးလဝ်ရ။

လဂွံကဵုစရင်လၟိဟ်ဒၞါဲဆန္ဒမာဲ ကမ္မယှေန်ပၞာန်တအ် မလလောင်တြးလဝ်ဂှ်မ္ဂး ပ္ဍဲဒေသ ဂကောံပၠန်ဂတးတအ် မထိင်ဒဝ်လဝ်ကီု ပ္ဍဲဒၞါဲဒေသပေါဲပၞာန် မသ္ကာတ်မြဟ်တအ်ကီု ပါလုပ်ဒၟံင် အလုံဍုင်မွဲဂှ် ဂွံဆဵုကေတ်ရ။

ဒှ်သာ်ဂှ်ရ ဍုင်လ္ရဵု စိုပ်မံင်သၟဝ်တဲရဲပၠန်ဂတးတအ်ဂှ် သွက်ဂွံက္လေင်ထိင်ကေတ်မာန်ပၠန် ကာလပြဟ်ဟ်ဏအ် ဒပ်ကမ္မယှေန်ပၞာန်ဗၟာတအ် ဂ္စာန်ဍိုက်ထ္ပက်ဒၟံင်ပၞာန် နကဵုဇြဟတ်နွံကၠုင်ရောင် ဂွံတီကေတ်ရ။