ပ္ဍဲတွဵုရးဍုၚ်မန်ဝွံ ဟိုတ်နူပေဲါပၞာန်သိၚ်ဂှ်တုဲ ဗော်ပရေၚ်ဍုၚ်ကွာန်နူရးတၞဟ်တၞဟ်တအ် ပလေဝ်ပလေတ်ကၠုၚ် သွက်ဂွံလုပ်ပေဲါရုဲမာဲနွံဂၠိုၚ်မံၚ်ရောၚ် ညးတာလျိုၚ်ဗော်ညဳသၟဟ်မန် မွဲတၠ ဟီုရ။

“တွဵုရးဍုၚ်မန် သကုတ်သၠုၚ်ကျာသၟးရ ဗော်ပလုၚ် (ဗော်နူရးတၞဟ်တၞဟ်) တအ် ကၠုၚ်ပံက်ရုၚ် ချဳဒရာၚ်ပလေဝ်ပလေတ်ကၠုၚ် သွက်ပေါဲရုဲမာဲနွံဂၠိုၚ်၊ လ္ပာ်တေံဂှ် ဗော်မန်လေဝ် ဩဇာဓလီုမာန် နွံအောန်မံၚ်ကီု၊ ဠတုဲတှ်ေ တော်ကဵုတွဵုရးတၞဟ်တၞဟ်တှ်ေ ရးမန်ဂှ် ပေါဲပၞာန်လေဝ် ဍေံသာမံၚ်ညိတှ်ေ ဒၟာနူဂှ်ရ ဗော်ပလုၚ်တအ် ကၠုၚ်ချဳဂၠိုၚ်” သာ်ဝွံ ကေၚ်ကာဗဟဵုမွဲတၠဂှ် ဟီုရ။

ပ္ဍဲတွဵုရးဍုၚ်မန်ဂှ် အဆံၚ်တွဵုရးမ္ဂး အဓိကဂှ် ဗော်ညဳသၟဟ်မန် ဒှ်ဗော်ဇြဟတ်ဇၞော်အိုတ်မွဲတုဲ အဆံၚ်ကၟိန်ဍုၚ်မ္ဂး ပ္ဍဲပေါဲရုဲမာဲအလန်ဏံ ဗော်အေန်အေလ်ဒဳ ဟွံမွဲတုဲ ဗော်ကျဖောအ်ဂှ် ဒှ်ဗော်ဇြဟတ်ဇၞော်မွဲရ။

“ဒှ်မံၚ်ဒေသဍုၚ်မန်တှ်ေ ဗော်တၞဟ်တၞဟ်ဂှ် သာမညဓဝ်ရ၊ ကဆံၚ်တွဵုရးတှ်ေ ဗော်မန်ဂှ် ဒှ်ဗော်ဇြဟတ်ဇၞော်အိုတ် ဟီုဂွံ၊ ယဝ်ဗော်ကဆံၚ်ကၟိန်ဍုၚ်တှ်ေ ဗော်ကျဖောအ်ဂှ် ဒှ်ဗော်ဇြဟတ်ဇၞော်အိုတ် ဟီုဂွံလေဝ်၊ ဗော်ညဳသၟဟ်မန်ဂှ် လုပ်/ဟွံလုပ်ဂှ် ဟွံလလောၚ်ပ္တိတ်ဏီ၊ ယဝ်ဒှ်လုပ်ပေါဲရုဲမာဲဏောၚ်တှ်ေ ဗော်ကျဖောအ်ကဵု ဗော်ညဳသၟဟ်မန် သွက်ဂွံဒှ်ပြိုၚ်ဇၞော်ကဵုဇြဟတ်နွံ” သာ်ဝွံ ကေၚ်ကာဗဟဵုဂှ် ဆက်ဟီုရ။

အခိၚ်ကမ္မေယှန်ပၞာန်ဗၟာတအ် ဖန်ပလေဝ်ပလေတ်ကၠုၚ် သွက်ဂွံကၠောန်ဗဒှ်ပေါဲရုဲမာဲ ပ္ဍဲ သၞာံ (၂၀၂၅) ကၠာဟွံအိုတ်ဏံဂှ် ပ္ဍဲဒေသတွဵုရးဍုၚ်မန်ဂှ် ဗော်ဖောအ်ဗြေဝ်ခိုၚ်ကၠိုက်(ကျဖောအ်)၊ ဗော်ပျဳတု(ပြည်သူ့ပါတီ)၊ ဗော်(ပြည်သူ့ရှေ့ဆောင်ပါတီ)၊ ဗော်သေံကၠဗု(ရှမ်းနှင့် တိုင်းရင်းသားများ ဒီမိုကရေစီပါတီ)၊ ဗော်(အမျိုးသားတိုးတက်ရေးပါတီ)၊ ဗော်ညးဗြဴ (မန်)၊ ဗော်ညဳသၟဟ်မန် စတမ် ပတန်ဗော်ပံက်ရုၚ်တုဲ ချဳဒရာၚ်ပလေဝ်ပလေတ်ကၠုၚ် သွက်ဂွံလုပ်ဒုၚ်ရုဲမာဲရ။

ပေါဲရုဲမာဲတုဲတုဲကၠုၚ်တေံမ္ဂး ဗော်အေန်အေလ်ဒဳ၊ ဗော်ကျဖောအ်၊ ဗော်ညဳသၟဟ်မန်၊ ဗော်ညးဗြဴ (မန်) ပိဗော်ဟေၚ်နွံတုဲ ပေါဲရုဲမာဲအလန် (၂၀၂၅) ဏံဂှ် ဟွံအောန်နူ (၇) ဗော် ချဳဒရာၚ်ကၠုၚ်နွံရ။