လိက်ပရေင်၊ မယံင်(ဍုင်မန်)

ဂကောံပၠန်ဂတးဂမၠိုင်တအ် ဒၟာနူပရေင်ဝေင်ပၞာန် နကဵုဒရုင် Drone မာန်ဂှ်တုဲ ဍုင်မၞုံဒေသသေံသၟဝ်ကျာဂမၠိုင် ကံင်သဳ ပၞာန်-ကမ္မယှေန်ပၞာန်ဗၟာတအ် ဒးဗလးကၠုင်တဲ ဍုင်ဗွဲမဂၠိုင်ရ။

ဒၟါနူအသိင်ဘဲပၞာန်ဒရုင် Drone လ္ပာ်ဂကောံပၠန်ဂတးတအ်ဂှ်တုဲ ကမ္မယှေန်ပၞာန်ဗၟာတအ် ကျကၠုင်ပၞာန်မွဲဒမြိပ် ဒေသတွဵုရးသေံသၟဝ်ကျာ၊ ဒေသတွဵုရးရခေင်၊ ဒေသရးသေတ်ကိုင် ကေုာံ ဒေသရးတွဵုရးလ္ၚဵုလ္ၚဵုတအ်ဂှ် သွက်ဂွံကလေင်ပလန် ထ္ပက်ပၞာန်ပၠန်ဂးတုဲ စတမ်နူသၞာံ ၂၀၂၄ ဂိတုမေဂှ် ဒပ်ပၞါန်ဗၟာတအ် ဒက်ပ္တန်ကၠုင် ဒပ်ဒရုင် Drone ရ။

ပရေင်ထ္ပက်ပၞာန် ၁၀၂၇ လပှ်ဒုတိယ ပွိုင် ၆ ဂိတုတုဲ ပ္ဍဲသၞာံ ၂၀၂၅ ကဝက်သၞာံဂှ် သုင်စောဲကၠုင် ကွတ်ဒရုင် Drone တုဲ တိဍာ်ဒးဒုင်ဆောံလေင်လဝ်လ္ၚဵုဂှ် ကလေင်ဗတိုက်သီမာန်ကၠုင်ရ။

ဒပ်ဒရုင် Drone ကံင်သဳပၞာန်-ကမ္မယှေန်ပၞာန်ဗၟာတအ် သာ်လဵုရေင်တၠုင်ဗ္ဂေတ်မံင်စက်ယန် ဒပ်ဒရုင် Drone ညးတအ်ရောဂှ် ၜိုတ်လ္ၚတ်လဝ် ဆက်ပတိုန်ထ္ၜးကဵုအာရောင်။

ဒပ်ဒရုင် Drone ကဳသဳပၞာန်-ကမ္မယှေန်ပၞာန်ဗၟာတအ်ဂှ် ဒက်ပ္တန်လဝ် ၅ ဌာနမဒှ်ရ။

၁) ဌာန ကောပ်ကာဲကလေင်ပလန်ပၞာန် ဒရုင် Drone

၂) ဌာန ပကတ်ပကေင် ဒရုင် Drone

၃) ဌာန ရာန်ဒရုင် Drone ကဵု ပရေင်သမၠုင်အဆံင် ဒရုင် Drone

၄) ဌာန ပလေဝ်ဒရုင် Drone

၅) ဌာန လ္ၚတ်ဂၠိုက်ဂၠာဲ ပညာနဲကဲဗျူဟာ ဒရုင် Drone တအ်မဒှ်ရ။

ဒပ်ဒရုင် Drone ဝွံ လစှ်ေနူသၟဝ်တဲ ဌာန်ဂအုပ်ဒပ်ပၞာန်တိုက်မွဲဌာန စွံပ္တန်လဝ်တၞဟ်ခြာတုဲ ကောပ်ကာဲဗ္ဂေတ်ဒၟံင် စက်ယန်ရ။ ဂအုပ်ဗိုလ်မွဲတၠကေတ်လဝ်တာလျိုင် သကိုပ်စၞောန်ပညုင်တုဲ စဳရေင်ကောပ်ကာဲပြုပြေင်ဒၟံင်ရ။

ရုင်သကိုပ်စၞောန်ပညုင် စဳရေင်ကောပ်ကာဲပြုပြေင်ဒပ်ဒရုင် Drone ဝွံ တောဲဖက်လဝ်ကဵု ဒပ်ကောပ်ကာဲ စဵုဒၞာဘဲပၞာန် ကျာတုဲ စွံပ္တန် ရေင်တၠုင်ဒၟံင်ရ။

ဒပ်ပၞာန်ဗၟာဝွံ နူလက်ထက်အလဵုအသဳ ဥူတိင်သိင် သၞာံ ၂၀၁၂ တေံ သွက်ဂွံသုင်စောဲဒရုင် Drone ပ္ဍဲဒပ်ပၞာန်ဗၟာမာန်ဂှ် ဗလးဏာလဝ် အဆံင်ညးတာလျိုင်ဗိုလ်လ္ၚဵုတအ် ဗလးအာကတ်လ္ၚတ်ကွတ်ပညာဒရုင် Drone ပ္ဍဲရုယှာ၊ ကြုက်၊ ပါကေဿတာန်၊ ဗေဝ်ဠာရုသ်တအ်နွံကီုလေဝ် ပ္ဍဲအခိင်ပရေင်အစဳဇန်ထ္ပက်ပၞာန် ၁၀၂၇ ဒကုတ်ပထမဂှ် နကဵုဒရုင် Drone ဒပ်ပၞာန်ဗၟာတအ် သုင်စောဲဟွံမာန်ကၠုင်ဏီရ။

ဟိုတ်သာ်ဝွံတုဲ ပ္ဍဲကိုန်အစဳဇန်ထ္ပက်ပၞာန် ၁၀၂၇ ဒကုတ်ပထမဂှ် ဒးဒုင်ဘဲဒရုင် Drone ဂကောံပၠန်ဂတးဂမၠိုင်တအ်တုဲ ဍုင်ဗွဲမဂၠိုင် ဒပ်ပၞာန်ဗၟာတအ် ဒးဗလးဏာတဲရ။

∆ ညးလဵုကဵုဒၟံင်တန်ဗ္တောန် ကုဒပ်ဒရုင် Drone ဂှ်ရော

ဗိုလ်ပၞာန်လ္ၚဵု အာတိုန်ကတ်လဝ်တန်ဗ္တောန် ဒရုင် Drone နူဍုင်သ္အာင်တအ်ဂှ် ကလေင်ကဵုဒၟံင်တန်ဗ္တောန် ကု ကောန်ဒပ် ဒရုင် Drone ပ္ဍဲဒပ်ပၞာန်တအ်ရ။

ဗိုလ်ပၞာန်ဂွံလဝ်ကွတ်ပညာဒရုင် Drone ဂှ် ဒပ် သုတေသန ကဵု သိပ္ပံ၊ ဒပ်စဵုဒၞာဘဲပၞာန်ကျာ၊ တုဲပၠန် နူကဵု ကုမ္ပဏဳရာန် လဝ်ဒရုင် Drone တအ်ဂှ်လေဝ် ဗလးနင်ညးနွံလျိုင်တအ်တုဲ ကဵုကၠုင်ကွတ်နဲကဲပညာ ဗီုရပ်စကာဒရုင် Drone ကု ဗိုလ် ပၞာန်တအ်နွံကီုရ။

ပါဲနူဒပ်ဒရုင် Drone တုဲ ဂကောံဒပ် နူဒပ်တိုက်ဗတိုက်တၟေင်(ခြေလျှင်တိုက်ခိုက်ရေးတပ်)တအ်ကီု၊ နူကဵု ဒပ် ဘာ ကမ် ပျူတာ ကဵု နဲကဲပညာ အဆံင်တာလျိုင် အကြာပ်ဂမၠိုင်၊ နူကဵုဘာတက္ကသိုလ်ပၞာန်လၟေင် ညးနွံလျိုင်ဂမၠိုင်၊ နူကဵုဒပ် ကၠောန်ပတိတ်ကပေါတ်စဵုဒၞာပၞာန် ညးနွံကဆံင်တာလျိုင်ဂမၠိုင် ကဵုဒၟံင်တန်ဗ္တောန် ကွတ်ပညာဒရုင် Drone ရ။ တုဲပၠန် ကုသ္ဂံင်ပၞာန်တၟိလ္ၚဵု ညးနွံကဵုပရေင်ဆဵုဂဗစပ်ကဵုကွတ်ပညာ လ္ၚဵုတအ်ဂှ်လေဝ် နူကဵုဒပ်ဒရုင် Drone တအ်ရုဲစှ်တုဲ ကဵုဒၟံင် တန်ဗ္တောန်လေဝ်နွံရ။

ဒၞာဲကဵုဒၟံင်တန်ဗ္တောန်ကွတ်ပညာဒရုင် Drone ဂှ် နေပျဳတဝ်၊ ဘာပ္တတ်ပ္ကေင်ပရေင်စဵုဒၞာဘဲပၞာန်ကျာ(တောင်ညိုလေ ကြောင်းရန်ကာကွယ်ရေးသင်တန်းကျောင်း)၊ ရးမာန္တလေဝ် ပ္ဍဲပွိုင်ဍုင်(ရမည်းသင်း) စၟတ် ၃ ဘာပ္ကတ်ပ္ကေင်ကွတ်ပၞာန် သဇိုင် ၃ ဌာန ဗ္တောန်ကဵုဒၟံင်ပညာဒရုင် Drone နွံရ။

ပ္ဍဲကဵုဒပ် စၟတ် ၃ ဂှ်မ္ဂး အ္စာတန်ဗ္တောန်ကီု ပၞာန်တၟိတအ်ကီု လၟိဟ်ၜိုတ် ၂၀၀ ဂှ် ဒရုင် Drone နူဍုင်ရုယှာ၊ နူဍုင်ကြုက် ကီု ဒရုင် Drone ဗတိုက်ဂကူဇဳဂှ် သီုလိက် သီုနတဲကီု ဗ္တောန်ထ္ၜးဒၟံင်လၟေင်တ္ၚဲနွံရ။

∆ ဒပ်ပၞာန်ဗၟာတအ် သုင်စောဲဒၟံင် ဂကူဒရုင် Drone ဂမၠိုင်

ဒပ်ပၞာန်ဗၟာဂှ် နူအကြာသၞာံ ၂၀၀၀ တေံ ရာန်လဝ် ဒရုင် Drone ကင် (ကင်းထောက်ဒရုန်း) နူရုယှာ ကဵု ကြုက်ရ။ ကြဴနူသီအဝဵုတုဲ ဒရုင် Drone ကင်ကီု သီုဒရုင် Drone ဗတိုက်ကီု ဗွဲမဂၠိုင်ဂှ် ထပ်ရာန်ကၠုင် နူကြုက်တုဲ သၠုင်သုင်စောဲကၠုင် ပ္ဍဲအရာဒပ်ဗတိုက်ဒရုင် Drone ဗွဲမပြာကတ်ရ။

ပ္ဍဲကဵုအစဳဇန်ထ္ပက်ပၞာန်တအ်ဂှ် ဒရုင် Drone ကင် ကၠုင်နူ ကြုက် ၆ ဂကူ ကဵု ဒရုင် Drone ဗတိုက် ၃ ဂကူ ဗွဲမဂၠိုင် သုင်စောဲကၠုင် ဂွံဆဵုကေတ်ရ။

ဒရုင် Drone ကင်ဂမၠိုင်တအ်ဂှ်- DJI Mavic – Autex Evo Max 4T – Autex Alpha – Fixed Wing UAU – S115 ‌သုင်စောဲ ဂၠိုင်တုဲ ပ္ဍဲဂှ်မ္ဂး VTOL ကဵု S115 ၜါဂကူဂှ် နူကဵု ၆၀ ကဳလိုဝ်မဳတာ ကဵု ဒဵုစိုပ် ၁၀၀ ကဳလိုဝ်မဳတာဂှ် သၠုင်သၠုင် ဗွဲမဂၠိုင် မင်ရံင်လတူဍုင်ဂၠိုင်ရ။

DJI ကဵု Autex ၜါဂကူဏံဂှ် ၁၀ ကဳလိုဝ်မဳတာဟေင် ပဝ်တိုန်မာန်တုဲ ဗွဲမဂၠိုင် သုင်စောဲ ပ္ဍဲပေါဲဗတိုက်ဂၠိုင်ရ။ ဆဂးဂှ် ဒရုင် ၜါဂကူဏံဂှ် တောဲလဇံက်လဝ် ကေမ်မရာအဆံင်သၠုင် သွက်ဂွံရံင်ဗတမ်တုဲ ပရေင်ချဳဒရာင်ဗတမ်တအ်ဂှ် သုင်စောဲ ဂၠိုင်ရ။

မွဲဂကူပၠန်ဂှ် မိုက်ခရဵု (Micro Drone) ဒရုင် Drone ဍောတ်တ်ရ။ မိုက်ခရဵုဒရုင်ဂှ် မၞုံအယဲမွဲဂတာတဲဓဝ်တုဲ ဗရုရမျှာင်လေဝ် သာဓဝ် ရ။ ဒၞာဲအစဳဇန်သွက်ဂွံလုပ်ဗတိုက်ဂှ် ဗလးဏာဒရုင်မိုက်ခရဵုဏံတုဲ ဇြဟတ်လၟိဟ်နွံဂလိုင်လဵု၊ ကပေါတ်လွဟ်လက်နက်၊ ဗီုပြင်ဗဒိုပ် တမ်ဒပ်နွံဗီုလဵု တီညာတ်ကေတ်ကၠးကၠးမာန်တုဲ ထပ်ဗလးစကာ ဒရုင် Drone ဗတိုက်ပၠန်ရ။

ဒရုင် Drone ဗတိုက်ဂမၠိုင်ဂှ် Quadcopter M870 – Hex copter M1650 – Quadcopter M 1770 – Suicide Drone ဒရုင်ဂစိုတ်ဇကု တအ်မဒှ်ရ။ ဒရုင်ဂစိုတ်ဇကဂှ် နူရုယှာတုဲ သှ်ေဒရုင်ဂမၠိုင်တအ်ဂှ် နူကြုက်ဖအိုတ်ရ။

ဒရုင် Quadcopter M870 ဂှ် ဗမ်(မခတိုဟ်)နွံလျိုင် ၁ ကိုဝ်လိုဝ်ဘာ် ၁ မ တိုန်မာန်ရ။

ဒရုင် Hex copter M1650 ဂှ် ဗမ်နွံလျိုင် ၆ ကဳလိုဝ် ၁ မ ဟွံသေင်မ္ဂး ဗမ်နွံလျိုင် ၁ ကဳလိုဝ်ဘာ် ၄ မ ယိုက်တိုန်မာန်ရ။

ဒရုင် Quadcopter M 1770 ဂှ် ဗမ်နွံလျိုင် ၆ ကဳလိုဝ် ဒဵု ၄ မ ယိုက်တိုန်မာန်တုဲ ပ္ဍဲကဵုဒရုင်ဂမၠိုင်မ္ဂး ဒရုင်ဂကူဏံ နွံလျိုင် ဇၞော်အိုတ်တုဲ ပ္ဍဲကဵုလုပ်ပေါဲဗတိုက်ပၞာန်မ္ဂး စိုပ်တရဴဂၠိုင်အိုတ်ရ။

ဒရုင်ဂစိုတ်ဇကု ကော် Suicide Drone ဂှ် လ္ပာ်ဒပ်ပၞာန်ဗၟာတအ်ကီု သီုလ္ပာ်ဂကောံပၠန်ဂတးဂမၠိုင်တအ်ကီု သုင်စောဲကၠုင် နွံရ။

∆ သာ်လဵု ဒပ်ပၞာန်ဗၟာတအ် ဗတိုက်ဒၟံင်ပၞာန်လတူဗလးတိဏံရော

သ္ဂံင်ပၞာန်စှ်ေလဝ်နူကဵု တန်ဗ္တောန်ဒရုင် Drone တုဲတအ်ဂှ် ဒက်ပ္တန်လဝ် ဒပ်ဗတိုက်နကဵုဒပ်ကောံတုဲ ပလံင်ဏာပ္ဍဲ ဌာန်ဂအုပ်ၝောံဒပ် ကဵု ဌာန်ဂအုပ်ကောပ်ကာဲထ္ပက်ပၞာန်(စစ်ဆင်ရေးကွပ်ကဲရေးဌာနချုပ်)တအ်ရ။ နူဏံမွဲအဆံင် ဗလးဏာ ပ္ဍဲဗလးတိမုက်ပၞာန်ဒေသနာနာတုဲ ကဵုဇန်ပတိုန်ဗဒှ်ပေါဲဗတိုက်အိုတ်ရ။

ဒေသသေံသၟဝ်ကျာဂှ် နူကဵု ဒပ်တအာင်ပလံင် တအ်သီထိင်လဝ် ဍုင်နံင်ချိုဝ်ဂှ် လအ်ပွိုင် ၁၁ ဂိတုထ္ပက်ပၞာန်တုဲ ဒပ်ပၞာန်ဗၟာ တအ် ကလေင်ထိင်သီဂွံပၠန်ရ။ ပ္ဍဲပေါဲဗတိုက် နံင်ချိုဝ် ဂှ် သုင်စောဲကၠုင် ကွတ်ဗတိုက်ဒရုင် Drone ကဵု ကပေါတ် စဵုဒၞာကြတ်ဒရုင် ဂျမ်ဗာ Jammer ‌သုင်စောဲမာန်ကၠုင်ဂှ်ရ လ္ပာ်ဂကောံပၠန်ဂတးတအ် ဒုင်ဒဝ်ဝါတ်ကၠုင်ရ။

အဓိက ဒပ်ပၞာန်ဗၟာတအ် ဗလးဏာ ဒရုင်ကင် တုဲ ကလေင်ဗလးဒရုင်ထောံဗမ် နကဵုကွတ်ပညာအဆံင်သၠုင်မာန်ဂှ်ရ လ္ပာ်ဂကောံပၠန်ဂတးတအ် စဵုဒၞာဟွံမာန်ကၠုင်ရ။

တၠုင်လအာသာ်ဂှ်ကီု လ္ပာ်ဒေသကရေင်ဍာဲ ဂကောံပၠန်ဂတးတအ်ထိင်သီလဝ် ဍုင်(မိုးဗြဲ)ဂှ်လေဝ် လအ်ပွိုင် ၆ ဂိတု ဗတိုက်တုဲ ဒပ်ပၞာန်ဗၟာတအ် ကလေင်သီထိင်မာန်ကၠုင်ရ။ ပေါဲဗတိုက် ဍုင်(မိုးဗြဲ)ဂှ်လေဝ် လ္ပာ်ဒပ်ပၞာန်ဗၟာတအ် ဗ တိုက်သုင်စောဲ ဒရုင် နဲကဲဇဳ ဂကူဇဳ သၠဲသၠဲလးလးမာန်ဂှ် လ္ပာ်ဂကောံပၠန်ဂတးတအ် ကၞောတ်တဲဒးဆုတ်တိတ်အာရ။

ပ္ဍဲတွဵုရးကချေင် ဍုင်ဗာန်မဝ် ဂှ်လေဝ် လအ်ပွိုင် ၆ ဂိတုဂှ် ဟိုတ်နူ ဒပ်ဒရုင်ဒပ်ပၞာန်ဗၟာတအ် နကဵုကွတ်နဲကဲအဆံင်သၠုင် သၠုင်မာန်ကၠုင်ဂှ်ရ ဒဵုတ္ၚဲဏံ သီဟွံမာန်ကၠုင်ဏီဖိုဟ်ရ။

ပ္ဍဲတွဵုရးရခေင် ဍုင်ကျံက်ဖျူ ဂှ်လေဝ် တုပ်သာ်ဂှ်ကီု လ္ပာ်ဒပ်ပၞာန်ဗၟာတအ် သၠုင်လဝ်ကွတ်ပညာဒရုင် Drone အဆံင် သၠုင်သၠုင် သီုဒရုင် ကင် ကီု ဒရုင်ဗတိုက်ကီု သုင်စောဲသၠဲသၠဲလးလးမာန်ဂှ်ရ လ္ပာ်ဂကောံပၠန်ဂတးတအ် ဆိုအ်ဗကၠုင်ဒှ်ရ။

သီုဖအိုတ်ရံင်သရောပ်ကေတ်မ္ဂး စတမ်နူ ဒပ်ပၞာန်ဗၟာတအ် သၠုင်ပ္တိုန်လဝ် ကွတ်ပညာဗတိုက် နကဵု ဒရုင်၂၀၂၅ ဏံတုဲ လ္ပာ်ဂကောံပၠန်ဂတးဂမၠိုင်တအ် ပရေင်ထ္ပက်ပၞာန်ကီု၊ ပရေင်ဒုင်ပၞာန်ကီု ဒှ်တင်ကော်ဆဴ ဇၞော်ကဵုဇြဟတ် ကတဵုဒှ်ကၠုင် ရ။

လ္ပာ်ဒပ်ပၞာန်ဗၟာတအ် ဟိုတ်နူသုင်စောဲဗတိုက်နကဵုကွတ်ဒရုင် Drone သၠဲသၠဲလးလးမာန်၊ သၠုင်ပ္တိုန်အဆံင်မာန်ဂှ်တုဲ လ္ပာ်ဂကောံပၠန်ဂတးတအ် သုင်စောဲဗတိုက် နကဵုကွတ်ပညာဒရုင် Drone သၠဲလးဟွံမာန်၊ သၠုင်ပ္တိုန်အဆံင်ဟွံမာန်မ္ဂး ဒှ်တင်ဆိုအ်ဗပေါဲပၞာန်ဇၞော်ဇၞော်မွဲရောင်။