ဒုင်သ္ဇိုင်ကဵုပရေင်ပရူ အခိင်မဂစိုတ်ချောဲ အပ္ဍဲကၠအ် သီုဒးအာတၞံသၞေဝ်ဂးတုဲ ညးကဵုစၞောန်ပၟိင် ရပ် ၜုင်တက်လဝ် သၟတ်ကွာန်ဒဵုထောင်မွဲတၠ ကုနာဲအံင်ကျဳ (ကမ္မတဳပွိုင်ဍုင်ပွိုင်ဍုင်လှာဒကှ်) ဂှ် ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) NMSP-AD ဖျေံသ္ဂုတ်သွာတ် ကဵုဒုဟ်ဒဏ် ပလေဝ်စရိုတ် ကေုာံ ကမၠောန်ဇြိုင်င် ပွိုင် (၆) ဂိတု သီုကဵုပ္တိတ်ထောံနူဗော်ရောင် ဂွံတီကေတ်ရ။
သွက်သၟတ် ဒးဒုင်ၜုင်တက်တုဲ ထ္ၜးလဝ်ရုင်ဂဥုဲဂှ် နူကဵုရုင်ပွိုင်ဍုင်လှာဒကှ် ညံင်ဂွံကဵုထံက်ပင်သြန် စှ်ကိုဋ်ဒ္ကေဝ်ရောင် နူကဏေံတေံ (သေပ်တေမ်ဗါ စၟတ်တ္ရဲ ၃) ဂှ် နူရုင်ဌာန်ဂအုပ် NMSP-AD ဖျေံလဝ် သ္ဂုတ်သွာတ်ရ။
“ကိစ္စလ္ၚဵုဂှ် ပသောၚ်ကဵုအရေဝ်လေဝ် ဂွံမံၚ်ရ၊ ဆ္ဂး ထေဲတုဲ ကဵုၜုင်တက်ဗီုဏံဂှ် ဒုဟ်ဇၞော်ဒၟံၚ်လေဝ်၊ လ္တူဒုဟ်နွံဂှ်တှ်ေ ညးလျိုၚ်ကဆံၚ်ပွိုၚ်ဍုၚ်ဂှ်တှ်ေ ကဵုဒုဟ်ဒန်လ္ပာ်ဗဟိုပိုယ် ရုၚ်ဌာန်ဂအုပ်ပိုယ်ဏံလေဝ်၊ ကဵုဒုဟ်ပွိုၚ် ၆ ဂိတု၊ တုဲတှ်ေ ပတိတ်ထောံနူဒပ်ပိုယ်ဏံဏောၚ်၊ သ္ဂံၚ်ၜုင်တက်လဝ်ဂှ်လေဝ် က္လၚ်ဒၟံၚ်အမိင် ဖိုဟ်ရလေဝ် ဆ္ဂး ဒၞာဲလ္ၚဵု တဲလောန်အာနွံတအ်ဂှ်တှ်ေ ကဵုတိုန်ကၠုၚ်ဌာန်ဂအုပ်တုဲ ကဵုသတိလေဝ်နွံ၊ မွဲပၠန်ဂှ်တှ်ေ လ္တူတၠခန္ဓဒးဒုၚ်ဂိလဝ်ဂှ်လေဝ် စရိတ်ဂဥုဲၜိုတ်ညးတအ်အိုတ်လဝ်ဂှ် နူကဵုဗော်ထံက်ပၚ်လဝ် နွံဏောၚ်” သာ်ဝွံ ညးမၞုံအခေါၚ်ဟီုဂး နူကဵု NMSP-AD/RMA နာဲဂံၚ်သ္ကာ ဟီုရ။
စပ်ကဵုပရူဒဒှ် သၟတ်ဒးဒုင်ၜုင်တက်လဝ် ပ္ဍဲဂိတုအဝ်ဂေတ် စၟတ်တ္ရဲ ၂၈ ဏအ်ဝွံ နူကဵု NMSP-AD ပံက်ပ္တိုန်ကမ္မယှေန် ဂၠိုက်ဂၠာဲသၟာန်သၟုက်လဝ် သီုတၠခန္ဓၜါလ္ပာ်တုဲ ပ္တိတ်လဝ်လိက်လလောင်ပၟိင်ဖျေံဒုဟ်ဂှ် ဌာန်ပရိုင်ဗၠးၜးမန် ဂွံဒုင်ကေတ်တဲကီုဂှ်ရ ဂွံဗှ်လ္ရတ်ကေတ်မာန် ပ္တိုန်လဝ်ကဵုကရောံဗီုရုပ်သၟဝ်တေံရ။
ကမ္မတဳပွိုင်ဍုင် နာဲအံင်ကျဳဝွံ အရာဒးသောင်က္လးဟီုဂးကေတ်ခိုဟ်ဟ်ဂှ် ဟွံကၠောန်သ္ပမွဲသာ် သ္ပမာန်ကေတ်အဝဵု ကဵုစၞောန်ပၟိင် ၜုင်တက်ပျဲပျာံ ဍဵုဍိုက်လ္တူညးဍုင်ကွာန်ဗီုဏအ်ဂှ် ဗၠေင်မံင်ကုသၞောတ်ဝ်ဗော်ရောင် ဂကောံကဝ်မယှေန်တအ် ဓမံက်ထ္ၜးလဝ် ပ္ဍဲတင်သ္ရဳဂၠိပ်ကီုရ။
“ပိုယ်တအ်ဂှ်တှ်ေ ဒပ်တၠအဝဵုဟွံသေၚ်ပုဟ်ဏး၊ ညးဗတိုက်သရိုဟ်တၠအဝဵု၊ လ္ဆောဝ်ဝ် ပြသၞာဗီုဏံ ဗီုပြၚ်တုပ်သၟဟ်ဗီုဏံ ဒးဒုၚ်ဍဵုဍိုက် ဒးဒုၚ်ဂိအာလဝ်နွံဒၟံၚ်တှ်ေလေဝ် အဆံၚ်ဆံၚ်ညံၚ်ဂွံပတိုန်ထ္ၜး၊ ညံၚ်ဂွံလဴထ္ၜးညးသ္ကအ်၊ လ္တူပတိုန်ထ္ၜးဏံတှ်ေလေဝ် ဒုဟ်နွံတှ်ေ ပိုယ်တအ်ရပ်စပ်ဒၟံၚ်နွံမံၚ်ရ။ လ္တူဗော် ပိုယ်လေဝ် လ္ပဖေက်လကိုတ်အိုတ်ညိ၊ ဗော်ဂှ် သွက်ဂွံဍဵုဍိုက်ညးဍုၚ်ကွာန်ဟွံသေၚ်၊ ညးဍဵုဍိုက်လ္တူ ညးဍုၚ်ကွာန်လေဝ် ပိုယ်ကေတ်ဒၟံၚ်အရေဝ်ပေၚ်ပေၚ်ရ၊ ဗော်ဂှ် သွက်ဂွံပတုဲဖိုဟ်ညးဍုၚ်ကွာန်ဏောၚ်” သာ်ဝွံ ညးပါလုပ် ပ္ဍဲဂကောံကမ္မယှေန် နာဲဂံၚ်သ္ကာဂှ် ဆက်ဟီုရ။
ဆက်စပ်ကဵုပရူဒဒှ် ကေုာံ လိက်လလောင်ပၟိင်ဖျေံဒုဟ်ဂှ်တုဲ နူကဵုဌာန်ပရိုင်ဗၠးၜးမန် ကေတ်အဆက်သၟာန်ဏာ တၠခန္ဓ လ္ပာ်ညးဒးဒုင်ၜုင်တက်တအ်ကၠာလေဝ် ဟွံမိက်ဟီုမွဲသာ်ဏီရောင် က္လေင်သွဟ်လဝ်ရ။
ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်) မပါ်တိတ်ကၠုင်နူဗော်ဍုင်မန်တၟိဝွံ စမံက်ဒှ်ကၠုင်နူဂိတုဖေဖဝ်ဝါရဳ စၟတ်တ္ရဲ ၁၄၊ သၞာံ ၂၀၂၄ တေံတုဲ ချဳဒရာင်ဒၟံင် ပ္ဍဲဒေသဍာ်ဗု၊ ရေဝ်၊ ဇြပ်ဗု၊ မုဟ်ဍုင်၊ လှာဒကှ်၊ ကျာ်မြဟ်၊ ကအ်ကြိက် ကေုာံ ကျာ်ပိတအ်နွံရ။
“ညံင်ဂွံဒှ်သ္ဂံင်ခိုဟ် သ္ဂံင်စန္ဒက်ခိုဟ် သ္ဂံင်ညးဍုင်ကွာန်ဆာန်မွဲဂှ် ပိုဲဒးမံင်လေပ်ဏောင်၊ ယဝ်ရညးဍုင်ကွာန်မန်ပိုဲ ဆာန်ပိုဲ ထံက်ဂလာန်ကဵုပိုဲတှ်ေ ပိုဲမုအန္တရာဲဟွံမွဲရ၊ ပိုဲမံင်ခိုဟ်ကွေံကွံမှ၊ ညးဆဵုဇကု ညးက္ဍုဟ်မၠေံမံင်တှ်ေ အလံင်ဟွံမွဲပုဟ်” သာ်ဝွံ ပ္ဍဲအသေအဟာန်ဖျေံဘာကွတ်ဗ္တောန်ပၞာန်သ္ဇိုင်လၟေင် ၄ ဂှ် ဥက္ကဌ NMSP-AD နာဲဇဲယ ဟီုဂးလဝ်ဂလာန်ဗ္ကန်ကုသ္ဂံင်ဂမၠိုင်နွံရ။
