ထ္ၜိုတ်ဂတှ်ေအဆံၚ်သၠုၚ် မုက်ဂၞန် (၁) ဂှ် ပရဲပရၚ်ဂၠိုၚ်ကီုလေဝ် ဟိုတ်နဒူးပ္တိတ်တမ်ရိုဟ်ဂၠိုၚ်လောန်ဂှ်တုဲ တၠကၠအ်ထ္ၜိုတ်တအ် ကၠောန်ပ္တိတ်ဟွံမာန်ဏီရောၚ် တၠကၠအ်ထ္ၜိုတ်မွဲတၠ ဟီုရ။

ထ္ၜိုတ်ဂတှ်ေအဆံၚ်သၠုၚ် မုက်ဂၞန် (၁) ဂှ် တၠဓနတမ်ရိုဟ်ဂၠိုၚ်ဂၠိုၚ်တအ်ဂှ်ဟေၚ် သိုၚ်ပ္တန်မာန်တုဲ တၠကၠအ်ထ္ၜိုတ်ဓမ္မတာတအ် သိုၚ်ပ္တန်ဟွံမာန်ဏီဂှ်ရ ဒးဗုတ်ထ္ၜိုတ်ဂတှေ် အဆံၚ်ဓမ္မတာဂှ် ဂွံၚုဟ်ဟွံခိုဟ်ရောၚ် သ္ဂးရ။

“ဂွံဗုတ်ပ္တိတ်ထ္ၜိုတ်အဆံၚ်သၠုၚ် ဒဵုကဵုစိုပ်အဆံၚ်မုက်ဂၞန် (၁) ဂှ် တၠကၠအ်ဓမ္မတာတအ် သ္ပဟွံမာန်ဏီဂှ်ရ တၠဓနတၠတမ်ရိုဟ်နွံတအ်မှ သိုၚ်ခၞံမာန်၊ ဗီုဂှ်ဟွံသေၚ်တှေ် တၠကၠအ်ဂလိုၚ်ပံၚ်ပကောံတုဲ သိုၚ်ပ္တန်မာန်ဟာ၊ အဵုဗီုဂှ်တှ်ေ ဍေံဒှ်မာန်ကီုလေဝ်ဂှ် တော်ကဵုတၠကၠအ်မန်ပိုဲလၟုဟ်တှ်ေ ဗီုဂှ်လေဝ် ဟွံဆဵုဏီပုဟ်” သာ်ဝွံ တၠကၠအ်ထ္ၜိုတ်ဂှ် ဟီုရ။

ထ္ၜိုတ်အဆံၚ်သၠုၚ် မုက်ဂၞန် (၁) RSS.1 ဂှ် ၚုဟ်ထ္ၜိုတ်သၠုၚ်အိုတ်တုဲ တၠဓနကၠောန်ပရေၚ်ပိုန်ဒြပ်လ္ၚဵုတအ် ဓလိုက်တမ်ရိုဟ်တုဲ သိုၚ်ပ္တန်ရုၚ်စက်ဗုတ်ထ္ၜိုတ်အဆံၚ်သၠုၚ် ဒေသညးကဵုညး နွံကၠုၚ်ရ။

“ထ္ၜိုတ်အဆံၚ်မုက်ဂၞန် (၁) ဏံဂှ် ပရဲဍေံဂၠိုၚ်ဂှ်ဍာံ၊ ဆဂး တၠကၠအ်ဓမ္မတာတအ် ကၠောန်ဟွံမာန်ပုဟ်၊ ရုၚ်စက်ဗုတ်ထ္ၜိုတ်၊ ရုၚ်ဂဒဵု၊ ရုၚ်ဓုပ် ရုၚ်ဍေံကဵုဍေံ ဒးကၠောန်အဆံၚ်ဆံၚ်တုဲမှ ဍေံဂွံဒှ်ထ္ၜိုတ်အဆံၚ်သၠုၚ် No.1 ၊ အောန်အိုတ်တှေ် ကိုဋ် (၁၀၀၀) ကဵု ကိုဋ် (၂၀၀၀) အိုတ်ဏောၚ်၊ သေဌဳလ္ၚဵုဂှ်တှေ် ဖအိုတ်ကိုဋ် ဗဒါဲလက်တုဲတှ်ေ ညးတအ်ကၠောန်ပ္တိတ်မွဲတ္ၚဲ ပံၚ်မွဲလက် ဗုတ်မံၚ်နွံ” သာ်ဝွံ တၠရုၚ်စက်ဗုတ်ထ္ၜိုတ် အဆံၚ်သၠုၚ် နူဇြပ်ဗုမွဲတၠ ဟီုထ္ၜးရ။

ၚုဟ်ထ္ၜိုတ်အဆံၚ်သၠုၚ် မုက်ဂၞန် (၁) No.1 (RSS.1) ဂှ် လၟုဟ်ဏံ မွဲပံၚ် ၚုဟ်နွံမံၚ် အကြာ (၃၀၀၀) ဒ္ကေဝ်တုဲ ထ္ၜိုတ်အဆံၚ်သၟဝ်ဂှ် မွဲပံၚ်တှေ် နွံအကြာ (၂၇၀၀) ဒ္ကေဝ် တန်တဴကဵု အဆံၚ်ထ္ၜိုတ်အဆံၚ်ဆံၚ်တုဲ အဆံၚ်သဝ်အိုတ်ဂှ် မွဲပံၚ် ဒဵုကဵု (၂၀၀၀) ဒ္ကေဝ်လေဝ် နွံမံၚ်ရ။

အခိၚ်ခွါတ်ထ္ၜိုတ်လိုက်ဝှ်တိကှ် သၞာံတုဲကၠုၚ်တေံ ထ္ၜိုတ်တီုတီု (မှိုၚ်း) ဂှ် မွဲပံၚ် ၚုဟ်နွံအကြာ (၂၁၀၀) ဒ္ကေဝ်၊ ထ္ၜိုတ်ကြဳကြဳ Local-3 ဂှ် အကြာ (၂၅၅၀) ဒ္ကေဝ်၊ ထ္ၜိုတ်မုက်ဂၞန် (၁) RSS – 1 မွဲပံၚ်ဂှ် အကြာ (၃၄၀၀) ဒ္ကေဝ် ၚုဟ်နွံမံၚ်ဂှ် ဂွံတီကေတ်ရ။