ကိစ္စလိုၚ်လပှ်ကျာ သဵုယှေဝ်မဳဒဳယာ Social media ဟွံညိၚ်မံၚ်တ္ၚဲဏံဂှ် ကမ္မယှေန်ပၞာန်တအ် စမ်ၜတ်မံၚ် သွက်ဂွံကၟာတ်ကၠေံ ဝဳပဳအေန် VPN ဖအိုတ်နွံရောၚ် တၠကွတ်သွာၚ်အာၚ်တဳ ဆက်စပ်မံၚ်ကဵု ကမ္မယှေန်ပၞာန် ပ္ဍဲဍုၚ်မန်မွဲတၠ ဟီုထ္ၜးရ။
“တၠအဝဵုပၞာန်တအ် ညံၚ်ဂွံကၟာတ်ကၠေံထောံ ဝဳပဳအေန် ဖအိုတ်ဂှ် ဂစာန်ကၠုၚ်မံၚ် သၞာံလအ်ကွေံရ၊ စမ်ၜတ်မံၚ်လေဝ် တၟာလအ်ကွေံရ၊ ပိုဲဂွံပရိုၚ်လက္ကရဴအိုတ်ဏံဂှ်တှေ် သၞာံ (၂၀၂၅) ဏံအိုတ် သၞာံ (၂၀၂၆) မံက်လ္ပာ်တေံတှေ် ညးဍုၚ်ကွာန် ညံၚ်သုၚ်စောဲ ဝဳပဳအေန် ဟွံဂွံဂှ် ဍေံကၟာတ်ကၠေံရောၚ် မိၚ်မံၚ်ဗီုဂှ်နွံ” သာ်ဝွံ မၞိဟ်ဆက်စပ်ဂှ် ဟီုရ။
ပရေၚ်တာဒၞာ ကၟာတ်ကၠေံ လိုၚ်လပှ်ကျာ သဵုယှေဝ်မဳဒဳယာ Social media ဂှ် ကံၚ်သဳပၞာန်-ကမ္မယှေန်ပၞာန်တအ် လိၚ်လဝ်တၠကွတ်ပညာ နူဍုၚ်သအာၚ်တုဲ ဖျေံကၠုၚ်ဒၟံၚ် အစဳဇန် သွက်ဂွံကၟာတ်ကၠေံ ဝဳပဳအေန် သၞာံလအ်ကွေံရ။
“ဂွံကၟာတ်ကၠေံ ဝဳပဳအေန် ဖအိုတ်ဂှ် ဍေံတအ်သုၚ်စောဲလဝ်လှုဲ ဟွံသာပုဟ်၊ ဍေံကၟာတ်လ္ပာ်တေံ ထောၚ်ပြိုဟ်လ္ပာ်ဏံ၊ ဟိုတ်နူဂှ်ရ လိုၚ်လပှ်ကျာ Social media ပ္ဍဲဍုၚ်ဂှ် ဟွံညိၚ် ဂွံမွဲလစုတ်၊ ပရေံမွဲလစုတ်၊ ခိုဟ်မွဲလစုတ်၊ ဍေံကၟာတ်ဂွံချိုတ် ပၠိုတ်ဗက်ဂှ်တှေ် ဍေံဖျေံအစဳဇန်တုဲတှေ် ဍေံကၟာတ်ဖအိုတ်ရ” သာ်ဝွံ မၞိဟ်ဂှ် ဆက်ဟီုထ္ၜးရ။
သဵုယှေဝ်မဳဒဳယာ Social media ဗွဲမဂၠိုၚ်၊ ဂကောံပရိုၚ်ဗွဲမဂၠိုၚ်ဂှ် ဒှ်မံၚ်ဇြဟတ်အထံက်အရီု လ္ပာ်ဂကောံပၠန်ဂတးတအ်တုဲ ပ္ဍဲကဵုဗတိုက်သရိုဟ် သၞောတ်တၠအဝဵုပၞာန်ဗၟာဂှ် သွာၚ်မဳဒဳယာပရိုၚ် Social media ဂှ်လေဝ် တၠအဝဵုပၞာန်တအ် ဒးဒုၚ်ဗတိုက်ဒၟံၚ် နကဵုကွတ်မဳဒဳယာပရိုၚ်ဇၞော်ဇၞော်မွဲရ။
ညးဍုၚ်ကွာန်ဗွိုၚ်ပ္ဍဲဍုၚ်တအ် ဂွံသုၚ်စောဲ သဵုယှေဝ်မဳဒဳယာ Social media လၟုဟ်ဂှ်လေဝ် ဒးသၠာဲဒၟံၚ် ဝဳပဳအေန် VPN မွဲဂကူတုဲမွဲဂကူဂှ်ရ ညးလ္ၚဵုဂှ် လိုၚ်ဂွံညိၚ်ခိုဟ်ဂးတုဲ သီုကဵုရာန်ဖ အိုတ်ကေတ် နကဵုဩန်လေဝ်နွံရ။
ဆဂှ်သၟးဟွံက အခိၚ်ကမ္မယှေန်ပၞာန်တအ် ကၟာတ်တာဒၞာလဝ်ညးဍုၚ်ကွာန် ညံၚ်သုၚ်စောဲ သဵုယှေဝ်မဳဒဳယာဟွံဂွံဂှ် တၠကွတ်ပရေၚ်ပိုန်ဒြပ် ပတိတ်စပရဲလ္ၚဵုတအ် ဗစလဝ်လာပ် ကု ကမ္မယှေန်ပၞာန်တုဲ သွံတြးဒၟံၚ် ဝဳပဳအေန်ဂှ်လေဝ် ဒှ်မံၚ်ကမၠောန်ပိုန်ဒြပ်မွဲရောၚ် ဂွံတီကေတ်ရ။
