ရုၚ်စက်ဆုထ္ၜိုတ်တအ် ဟိုတ်နူဒးကဵုအကံက်ဂၠိုၚ်တုဲ ဆုထ္ၜိုတ်ဂှ် ၚုဟ်ယအ်စှ်ေအာ မွဲတာန် မွဲကိုဋ်ပြၚ်မံၚ်ရောၚ် ရဲကုတ်ထဗိုၚ်ဆုထ္ၜိုတ်တအ် ဟီုရ။
ရုၚ်စက်ဆုဒေသဍုၚ်မန်ဗွဲမဂၠိုၚ်ဂှ် ဒးဒုၚ်ကဵုမံၚ်အကံက်ကဵု ဂကောံပၠန်ဂတးဂၠိုၚ်တုဲ ရုၚ်စက်ဆုတအ်တော်ဟွံကိတ်ဂှ်ရ ပရေၚ်ကမၠောန်ကုတ်ထဗိုၚ်ဆုထ္ၜိုတ်ဂှ် ကြပ်ဒေါံဒေၚ်အာနွံရောၚ် ညးလိၚ်ကုတ်ဆုထ္ၜိုတ် နူဍုၚ်ဇြပ်ဗုမွဲတၠ ဟီုရ။
“ရုၚ်စက်ဆုတအ် ဍေံတအ် ဒးကဵုအကံက်ကဵု ဂကောံရဲမ္ၚး (ဂကောံပၠန်ဂတး) တအ်ဂၠိုၚ်မံၚ်၊ ပရဲဍေံတအ်ဂွံအောန်တုဲတှ်ေ ဍေံဖအောန်ဖျေံကမၠောန်နွံ၊ ဆုရာဗာလေဝ် ဍေံဍဵုရာန်ဖျေံၚုဟ် မွဲတာန် မွဲကိုဋ်ပြၚ်မံၚ်၊ ဒၟာနူဂှ်ရ ၚုဟ်ဆုရာဗာဂှ် အခိၚ်ဏံ ၚုဟ်ပရေံကွေံကွေံမွဲတဲ” သာ်ဝွံ ညးလိၚ်ဓဗိုၚ်ဆုထ္ၜိုတ်ဂှ် ဟီုရ။
ဆုထ္ၜိုတ်တဲဇၞော်အိုတ် (၃၁) ၝောံတဲ ကၠာတေံ မွဲတာန် ပန်ကိုဋ်ဘာ်ဂှ် လၟုဟ်သှ်ေ အကြာ ပိကိုဋ်ဘာဓဝ်ရ၊ ဒု (ဆု) ဍောတ်အိုတ် ၚုဟ်သဝ်အိုတ်ဂှ် နကဵု မွဲတာန်မွဲကိုဋ်ပြၚ်ဂှ် လၟုဟ်မ္ဂး သှ်ေမံၚ်အကြာ (၉) လက်ဓဝ် သ္ဂးရ။
ဍုၚ်မန်ဂှ် ကၠအ်ထ္ၜိုတ်မတၞံအရိုၚ် တဵုလဝ်နူမွဲအခိၚ်တုဲကၠုၚ်တေံဂှ် ဓဗိုၚ်သွံတၞံဂၠိုၚ်တုဲ ကလေၚ်တဵုတၞံထ္ၜိုတ်မဆက်မတ် နွံဂၠိုၚ်ရ။
“လၟုဟ်ဂှ်တှ်ေ ဇၟာပ်ဒေသရ ကၠအ်တၞံမအရိုၚ်တဵုလဝ်တြေံတုဲကၠုၚ်တေံဂှ် သွံတုဲတှ်ေ ဓဗိုၚ်သွံမံၚ်ဖအိုတ်ရ၊ မၞိဟ်သွံတၞံဂှ်ဂၠိုၚ် လ္ပာ်ကမ္ပဏဳဆုတအ်ဂှ်တှ်ေ အဃောဍေံတအ်ကြေပ်ဂြတ်မံၚ်၊ ဒၟာနူဂှ်ရ ဍေံတအ်ရာန်ဍဵုဖျဝ်ဖျေံၚုဟ်ဆု၊ မၞိဟ်ဂွံ ထိၚ်ကဵုလေဝ်ဟွံမွဲတှေ် ရဲကၠအ်တအ်ရဂိ” သာ်ဝွံ မၞိဟ်လိၚ်ဓဗိုၚ်ဆုထ္ၜိုတ်ဂှ် ထပ်ဟီုရ။
အခိၚ်ပရေၚ်ဍုၚ်ကွာန် ပရေံမံၚ်တ္ၚဲဏံဂှ် ဟိုတ်နူပရေၚ်ဗွဝ်ဖျာထ္ၜိုတ် ၚုဟ်စှ်ေတုဲ ကမ္ပဏဳရာန်ထ္ၜိုတ် ကြုက်တအ် ဍဵုၚုဟ်တုဲ ရာန်မံၚ်နွံရ။ တုပ်သာ်ဂှ်ကီု ရုၚ်စက်ဆုထ္ၜိုတ်ဂှ် ဟိုတ်နူပၞော်ဩန်လ္ပာ်တိတ်ဂၠိုၚ်ကၠုၚ်ဂှ်ရ ဍဵုဖအောန်ဖျေံၚုဟ်ဆုထ္ၜိုတ်ပၠန်ရ။
လတူကမ္ပဏဳကြုက်တအ် ရာန်ဍဵုဖျေံၚုဟ်ထ္ၜိုတ်ဂှ်ကီု၊ ရာန်ဍဵုဖျေံၚုဟ်ဆုထ္ၜိုတ်ဂှ်ကီု တၠကၠအ်ထ္ၜိုတ်တအ် ဒးဒုၚ်ဂိမံၚ်နာနာသာ်ဏံဂှ် ညးကေတ်လဝ်တာလျိုၚ်အုပ်ဓုပ်ဍုၚ် တအ် သ္ပလဝ်မဇ္ဒျဟ် လတူရဲတၠကၠအ်ထ္ၜိုတ်တအ်ရောၚ် ဂကောံတၠကမၠောန် ကၠအ်ထ္ၜိုတ်ဍုၚ်မန်မွဲတၠ ဟီုလဝ်ဂှ် ဂွံတီကေတ်ရ။
