လိက်လညာတ်၊ မယံင် (ဍုင်မန်)

ခြာဟွံလအ်မ္ဂး စိုပ်ကၠုင်တ္ၚဲကောန်ဂကူမန် မရနုက်ကဵု (၇၉) ဝါပၠန်ရ။ အသေအဟာန်တ္ၚဲကောန်ဂကူမန်ဂှ် ဗွဲဓမ္မတာ လၟေင်င်မ္ဂး ရှ်ေသှ်ေအလာံ ရှ်ေသှ်ေက္ဍိုပ်သ္ကိုပ် ကေုာံ သ္ဂံင်ဆာန်ဂကူပြဟ်လလုဲ၊ တုဲမ္ဂး ညးတာလျိုင်တအ်ဟီုဂလာန်တုဲ အာရ။

စိုပ်အာအခန်ကဏ္ဍလဟိင်စိုတ်ဂှ်ပၠန်လေဝ် တိင်တက်လှ်ေဒယှ်ေ လ္ၚဵုဂှ် ပြိုင်ထ္ၜးမိယေန်သၞာင် မပ္တံသာ်ဏံ ကၠောန်ကၠုင် ဒၟံင်လၟေင်င်သၞာံဆၜိုတ်ဏံရ။ ဒေသလ္ၚဵုဂှ် ပေါဲပြိုင်သွဟ်လိက်မန်၊ လ္ၚဵုဂှ် ပေါဲပြိုင်ဝေင်ဒြဟတ်လေဝ် နွံကီုရ။

တ္ၚဲကောန်ဂကူမန်တုဲကၠုင် ၃၀ သၞာံလ္ပာ်တေံမ္ဂး ပကောံဒြဟတ်ဂကူမန်တုဲ ဂွံဇက်ဂၠောဲရှ်ေသှ်ေအလာံဂှ် တၠအဝဵုတအ် ဗက်ရပ်စုတ်ထံင် စောဲဒုဟ်နာနာသာ်ရ။ တုပ်သာ်ဂှ်ကီု အခိင်ကၠာတေံ ဂွံတိင်တိုက် လှ်ေဒယှ်ေဒွက်မန် လတူစင်ဂှ် နွံကဵု ၚုဟ်မးဂကူဗွဲမဇြိုဟ်နက်တုဲ ဒှ်အရာပရေင်သၠုင်ပတိုန်စိုတ်ဓာတ်ဂကူ ဇၞော်ဇၞော်မွဲရ။ ဟိုတ်နူသာ်ဝွံတုဲ ပ္ဍဲတ္ၚဲကောန် ဂကူမန်ဂှ် ဟီုစကာကၠုင်ဂလာန် “ဆီဇာတိ မာန်ဇာတိ” ဒဵုတ္ၚဲဏံရ။

ညးအာဂတကၠောန်တ္ၚဲကောန်ဂကူမန်အခိင်ကၠာတေံဂှ် ဒးကၠောန်အာအကြာ ပရေင်ကရေပ်ဂရတ်နာနာသာ်တုဲ အကြာအကြာဂှ် ဒးဒုင်ဘပဠ၊ ဒးဒုင်ၜုင်တက်၊ ဒးဒုင်ရပ်စုတ်ထံင် နွံလၟိဟ်ဗွဲမဂၠိုင်ဂၠင်ရ။

ဟိုတ်နူဒးကၠောန်အကြာပရေင်ကရေပ်ဂရတ်နာနာသာ်ဂှ်တုဲ တ္ၚဲကောန်ဂကူမန် အခိင်ကၠာတေံ နွံၚုဟ်မး ကြက်ရှ်သာ သၠုင်ပြဲဗွဲမလောန်ဒးဟီုရ။

တ္ၚဲကောန်ဂကူမန် ကၠောန်ဗီုပြင်အခိင်တုဲကၠုင်တေံဂှ် ဒးမံင်ရဟီုကၠာလေဝ် တ္ၚဲကောန်ဂကူမန်အခိင်လၟုဟ်ဂှ် ကၠောန် မံင်သၞောတ်တြေံတေံဖိုဟ်ဂှ် ဟွံကိတ်ညဳကဵုအခိင်အခါရရောင် ညာတ်ရ။

အခိင်အခါဟွံတုပ်၊ အကာဲအရာဟွံတုပ်၊ ပ္ၚံက်ပရေင်ဍုင်ကွာန်ပြံင်သၠာဲ တၞဟ်ခြာအာကဵု အခိင်တုဲတုဲကၠုင်တေံ တၟာဂ လိုင်ရ။ အခိင်အခါ အကာဲအရာ ပ္ၚံက်ပရေင်ဍုင်ကွာန်ပြံင်သၠာဲအာတၟာဂလိုင်ရဂှ် လၟေင်အစဳဇန် တ္ၚဲကောန်ဂကူမန် ဟွံ ပြံင်သၠာဲအစဳအဇန်မွဲသာ် ဆက်ကၠောန်အာမံင်ဗီုပြင်တြေံတေံဖိုဟ်ဂှ် ဒှ်ဟွံထေက်ရ။

အခိင်တုဲတုဲကၠုင်တေံဂှ် ဟီုဆဝ်ဗ္ၚုဟ်ပရေင်စိုတ်ဓာတ်ဆာန်ဂကူ၊ ဟီုပရေင်ပတိုန်စိုတ်ဓာတ်ဆာန်ဂကူ ဂပ်ဂဝ်ဒးရး ဟီုကၠာလေဝ် အခိင်တ္ၚဲဏံဂှ် ဟိုတ်နူအခိင်ပၠန်ဂတးတုဲ ဟီုဆဝ်ဗ္ၚုဟ်မံင် စိုတ်ဓာတ်ဆာန်ဂကူသၟးဟွံရုမ်ဂပ်ရ။ တုပ်သာ် ဂှ်ကီု ဒွက်ဒယှ်ေကၠုင်မံင် ပရေင်ဆာန် ပရေင်ဓမ္မာတာတုဲတုဲကၠုင်တေံဂှ် ဒယှ်ေမံင်အတိုင်တြေံတေံ ဟွံရုမ်ဂပ်ရ။

အခိင်လၟုဟ်ဏံဂှ် ဒှ်အခိင်ပၠန်ဂတးတုဲ ဗွိုင်ပ္ဍဲဍုင်မ္ဂး ဗီုအကာဲရာဗွိုင်ပ္ဍဲဍုင်၊ ဗွိုင်တိဍာ်ပၠန်ဂတးမ္ဂး အကာဲအရာတိဍာ်ပၠန်ဂ တး၊ ဗွိုင်မ္ၚးဍုင်မ္ဂး ဗီုအကာဲအရာဗွိုင်ဍုင်မ္ၚး ပရေင်ဟီုဂလာန်ဆဝ်ဗ္ၚုဟ် ဒးတၞဟ်ခြာနူတုဲတုဲကၠုင်တေံရ၊ ဒွက်ဒယှ်ေ ကၠုင်မံင် တုဲတုဲကၠုင်တေံဂှ် ဒးပြံင်သၠာဲဒယှ်ေထေက်ရ။

အစဳဇန်ကၠောန်ကၠုင်မံင် မွဲအခိင်တုဲကၠုင်တေံဂှ် အခိင်ကာလပၠန်ဂတးတ္ၚဲဏံလေဝ် ကၠောန်မံင်အတိုင်အစဳဇန်တြေံဖိုဟ် ဂှ် သဘာဝဟွံစှ်ေလးလးရ။

ဒွက်ဒယှ်ေကၠုင်လဝ် “သၠဆုလှာပ်ပ် ဒးကျာဗယာပ်ချဳ-ကျာၜဳပိုက်မံင် ရံင်အကးလေဝ် ကေဝ်ဇြုင်- စိုပ်ကၠုင်ဒၞာဲလဵုရော” ဒွက်တရဴတုဲ ဒွက်တရဴပၠန်ဂှ် ဒယှ်ေဟွံဂပ်ဂဝ်ရ။

တ္ၚဲကောန်ဂကူမန် မရနုက်ကဵု (၇၉) ဝါသၞာံဏံဂှ် ဗွိုင်ပ္ဍဲဍုင်၊ ဗွိုင်တိဍာ်ပၠန်ဂတး၊ ဗွိုင်မ္ၚးဍုင် ဗီုပြင်ညးကဵုညး ဖန်ပလေဝ် ဒၟံင်ဗီုအကာဲအရာညးကဵုညးဂှ် သ္ဒးဒှ်ဒြဟတ်စန်ဒက်ဂကူ သွက်ရုန်ဂစာန်ဗၠးၜးဂကူ ဗွဲမဍာံပြထေက်ရ။

ကၠုင်မွဲသၞာံလေဝ် ဟီုလဴဝေင်ဝင် သၟိင်သမ္မလ ဝိမာလ ပ္တန်ဍုင်၊ စိုပ်မွဲသၞာံလေဝ် မန်တအ် ကေင်ဂ္ဇအ်ကၠုင်လဝ်နန် ကေင် ပိုင်ပြဳကၠုင်လဝ် ဟံသာဝတဳ ၃၂ ဍုင်၊ ဖာသီ ၃၂ ဍုင်၊ မုတ္တမ ၃၂ ဍုင် ဟီုရိုဟ်လဴဒၟံင်ပုံဟွံတုဲ ပွမရုန်ဂစာန်ပရေင်ဗၠးၜးဂ ကူတ္ၚဲဏံ ဒးပတဝ်က္ဍိုပ်ထေက်ရ။

တ္ၚဲကောန်ဂကူမန်မွဲသၞာံလေဝ် ဟီုလဴဝေင်ပုံ၊ လှ်ေဒယှ်ေ မိပ်လှ်ေညာန်၊ တက်ပတိုန်ဗီု တုဲအာမွဲသၞာံ၊ သၞာံဂတလေဝ် ဗီု ဂှ်ပၠန် သၞာံဂတလေဝ် ဗီုဂှ်ပၠန် “ဟီုဖဲစဴအာ ရှ်သာဟွံမွဲ” ဂၠိုင်ကဵုသၞာံတုဲကၠုင်ရ။

ရံင်သ္ၚဳဂၠိပ်အာ ပကတိရုပ် တ္ၚဲကောန်ဂကူမန်တ္ၚဲဏံဂှ် ပရေင်ကြက်ရှ်သာတ္ၚဲကောန်ဂကူဂှ် ဂစာန်အောန်စှ်ေတုဲ စပ်ကဵု ပရေင်သဘင်လှ်ေဒယှ်ေမိပ်လဟိင်ဂှ်ရောင် ဂွံကၠုင်ဒၞာဲဂၠိုင်ညာတ်ရ။

နကဵုကြက်ရှ်သာတ္ၚဲကောန်ဂကူမန်ဝွံ သွက်ဂွံထ္ၜးဆီဇာတိ မာန်ဇာတိဂကူဂှ် ပ္ဍဲအခိင်သမ္မယပၠန်ဂတးရပ်လွဟ် တဝ် စၞေဟ်ဒၟံင်ကဵု တၠအဝဵုပၞာန်တအ်တ္ၚဲဏံဂှ် သၠုင်ပ္တိုန်ထ္ၜးဆီဇာတိ မာန်ဇာတိဂကူတုဲ အလုံကောန်ဂကူကောန်ဍုင်အရင်၊ အလုံကောန်ဂကူမန် ညံင်ဂွံပရံင်သၠုင်ပတိုန်စိုတ်ဓာတ် ပါဲနူဂၠံင်တရဴပၠန်ဂတးရပ်လွဟ်တုဲ ဂၠံင်တၞဟ်ဟွံမွဲရောင်ဂှ် ဇၟာပ်ကမ္မတဳကၠောန် ဗဒှ်တ္ၚဲကောန်ဂကူမန် အလုံလိုက်ဂၠးတိတအ် ဒးလးထ္ၜးဂၠံင်၊ ဒးကၠောန်ပရံင်ပ္တိုန်ကဵုစိုတ်ဓာတ် ကု အလုံဂကူမန်တအ်ရောင် ပတိုန်ထ္ၜးဏာရ။