မယံင် (ဍုင်မန်)

ပေါဲရုဲမာဲ ၂၀၂၅-၂၀၂၆ ဏံ ညးစၞးဗော်ညဳသၟဟ်မန် ဂွံဒုင်ရုဲစှ်ဏာ (၁၇) တၠဟီုဂှ် ညးလဵုလေဝ်ဟွံရန်တော်လဝ်မွဲသာ်ရ။ ရံင်သ္ၚဳဂၠိပ်ကဵုအကာဲအရာဇဳဒိုဟ်တုဲ ဗၞတ်ၜိုတ် (၁၀) တၠ ဂွံဒုင်ရုဲစှ်မာန်ရောင်ဂှ် အလံင်အမာတ်ဒုင်ရုဲမာဲလ္ၚဵုတအ် စၟဳတော်လဝ်နွံရ။

ကာလပေါဲရုဲမာဲသကုတ် ၂ တုဲ သွဟ်မမာဲတိတ်ကၠုင်ဂှ် ပွိုင်ဍုင်ပံင် ၂ ဒၞာဲ၊ ပွိုင်ဍုင်မုဟ်ဍုင် ကဵု ပွိုင်ဍုင်ဇြပ်ဗု ၅ ဒၞာဲ၊ ပွိုင် ဍုင်ရေဝ် သီု ၃ ဒၞာဲ ဂွံဒုင်ရုဲစှ်ရ။

ပံင်သရောပ်သီုပေါဲရုဲမာဲ သကုတ် ၁ ကဵု သကုတ် ၂ ဏံမ္ဂး ညးစၞးကၠတ်ထဝ်ကောန်ဂကူ ၅ တၠ၊ ညးစၞးကၠတ်ထဝ်ညးဍုင် ၅ တၠ ကဵု ညးစၞးကၠတ်ထဝ်တွဵုရး ၇ တၠ ပံင် ၁၇ တၠ ညးစၞးဗော်ညဳသၟဟ်မန် ဂွံဒုင်ရုဲစှ်မာဲရ။

အခိင်ပရေင်ဍုင်ကွာန်ကြေပ်ဂြတ်ဒၟံင်တ္ၚဲဏံ အခိင်ဒးဒုင်ကဵုဒြဟတ်ဓရိုဟ်လ္ပာ်တေံ လ္ပာ်ဏံ တေင်တေင်ဂြတ်ဂြတ်တ္ၚဲ ဏံဂှ် ညးမွဲဟွံထေင်ခယျလဝ်မွဲသာ် ညးစၞးအလံင်အမာတ် ဗော်ညဳသၟဟ်မန် ဂွံဒုင်ရုဲစှ် ဒဵုကဵု ၁၇ တၠဏံဂှ် မုဟိုတ်သာ်လဵု ရော ပိုက်တမ်ဂၠာဲရိုဟ် လ္ၚတ်ဂၠိုက်ဂၠာဲစမ်ရံင်မ္ဂး-

၁။ ဗော်ပရေင်ဍုင်ကွာန် ဒြဟတ်ဒဳမဵုကရေဇြဳ ဗော်ဂအုပ်ဒဳမဵုကရေဇြဳကောန်ဂကူ(အေန်အေလ်ဒဳ)ဟွံဒုင်ရုဲမာဲတုဲ ကောန်ဗော်ဒဳမဵုကရေဇြဳတအ်ကီု၊ ဒြဟတ်ပူဗိုင်ထံက်ဂလာန်ကုဗော်ဒဳမဵုကရေဇြဳတအ်ကီု စုတ်ကဵုမာဲ ကု ညးစၞးအလံင် အမာတ် ဗော်ညဳသၟဟ်မန် နွံရ။

ရံင်အာလတူဍုင်ဇၞော် ဗီုကဵုလတူဍုင်မုဟ်ဍုင်၊ လတူဍုင်ဇြပ်ဗု၊ လတူဍုင်ရေဝ်မ္ဂး ဒြဟတ်ဗော်မန်ဍိုန်လျနူကဵု ဗော်ဒဳ မဵုကရေဇြဳဏီရ။ ပေါဲရုဲမာဲတုဲတုဲတေံမ္ဂး ဒြဟတ်မမာဲဗော်မန် ဂွံဂၠိုင်နူ ဒြဟတ်ဗော်ဒဳမဵုကရေဇြဳတအ် ဟွံမွဲ-မွဲလှ်ေရ။

အလန်ပေါဲရုဲမာဲ ၂၀၂၅-၂၀၂၆ ဏံဂှ် ဗော်ဒြဟတ်ဒဳမဵုကရေဇြဳဟွံလုပ်ပေါဲရုဲမာဲတုဲ ကောန်ဗော်ညးတအ် ဂကူမန်ကီု၊ ဂကူ မန်ဟွံသေင်ကီု ဗဝ်စုတ်မာဲကဵု အလံင်အမာတ် ဗော်ညဳသၟဟ်မန် နွံဂၠိုင်ရ။

“တၟေင်ပေါဲရုဲမာဲအလန်ဏံဂှ် မမာဲလတူဍုင်တအ်ဂှ် မာဲမန် ဟွံကေင်ဇၞးလဝ်မွဲလှ်ေဂှ် အလန်ဏံ ဇၟာပ်အရာပ်ဂှ် မာန်ဇၞး မံင် ဗော်ကျဖောအ်ဇၟာပ်ရုင်မာဲဖအိုတ် ပိုဲတော်ကေတ်တှ်ေ မမာဲ ဒြဟတ်ဗော်အေန်အေလ်ဒဳတအ် ကၠုင်စုတ်မာဲကဵု ညး စၞးဗော်မန် ပိုဲစှ်ေစိုတ်” ညးမင်ရုင်မာဲ စၞးအလံင်အမာတ်ဗော်ညဳသၟဟ်မန် နူပွိုင်ဍုင်ဇြပ်ဗုမွဲတၠ ဟီုလဴထ္ၜးရ။

ပၞောဝ်ကဵုပွိုင်ဍုင်ဂလိုင်မ္ဂး ပွိုင်ဍုင်ရေဝ်ဂှ် တၟေင်အိုတ်ဟီုမာန်ရ။ မုဟိုတ်ရောဟီုမ္ဂး ပ္ဍဲပွိုင်ဍုင်ရေဝ်ဂှ် လတူဍုင်ရေဝ်၊ လတူဍုင်ခေါဇာ၊ လတူဍုင်လၟိုင် ကဵု တ္ကအ်သ္ကုတ် ဆ ၄ ဒၞာဲဟေင် ညးဍုင်ကွာန်ဂမၠိုင် ဂွံအခေါင်ကဵုမာဲရ။ ပ္ဍဲကဵု ၄ ဒၞါဲဏံ ရံင်သ္ၚဳအာမ္ဂး ကောန်ဗော်ဒြဟတ်ဇၞော် ဗော်ဒဳမဵုကရေဇြဳ (အေန်အေလ်ဒဳ) ကဵု ဗော်ကျဖောအ် ဂၠိုင်တုဲ ဒြဟတ်ဗော်မန်ဂှ် အောန်ကြဳမံင်ရရ။

ပေါဲရုဲမာဲ ၂၀၂၅ ဏံဂှ် ဗော်ဒဳမဵုကရေဇြဳ (အေန်အေလ်ဒဳ) တအ် ဟွံမွဲတုဲ ကောန်ဗော်ဒဳမဵုကရေဇြဳတအ် ဒြဟတ်ပူဗိုင်ဒဳမဵု ကရေဇြဳတအ် ယဝ်ဟွံအာစုတ်မာဲ ဗကပ်ဗဗေင်ကဵု ပေါဲရုဲမာဲဏံမ္ဂး ဒှ်ဂဝိင်ဖေက်ဒးဒုင်ဘဲအန္တရာဲကုပၞာန်(ပၞာန်ဗၟာ)တုဲ ဒး အာကဵုမာဲရ၊ ဒးအာကဵုမာဲတုပ်တုပ်မ္ဂး ညးတအ် စုတ်ကဵုမာဲ ကုညးစၞးအလံင်အမာတ် ဗော်ညဳသၟဟ်မန်တအ်ရ။

အတိုင်ညးမင်ရုင်မာဲ ညးစၞးနူအလံင်အမာတ် ဗော်ညဳသၟဟ်မန်တအ် ဟီုထ္ၜး၊ အဃောရိုဟ်ဒၟံင်မမာဲပ္ဍဲရုင်ကမ္မယှေန်လ တူဍုင်တအ် အခိင်ဗတမ် (ဂျာန်နဝါရဳ ၁၁ ဗတမ်) ဂှ် ညးစၞးဗော်ကျဖောအ်တအ် မုက်မတ်ကှ်သရိုဟ်အာအိုတ်ရ။ အဓိပ္ပါဲဂှ် ဒြဟတ်ထံက်ဂလာန် နူဗော်ဒဳမဵုကရေဇြဳတအ် ကၠုင်ကိုဟ်ဆာဲစုတ်မမာဲ ပ္ဍဲဗော်မန်တအ်ဖအိုတ်ဟာဂှ် ညးစၞး ဗော်မန် ညးစၞးဗော်ကျဖောအ်တအ် တၟေင်ဒှ်တိုန် ပ္ဍဲစိုတ်အိုတ်ရ။

ရံင်ကေတ်သွဟ်မာဲဏံမ္ဂး ဒြဟတ်ဒပ်ပၞာန် (ဗၟာ) ကဵု ဒြဟတ်ကောန်ဗော်ကျဖောအ် ပံင်ဂှ် ဟွံမာန် ဒြဟတ်ဗော်မန်ကဵု ဒြဟတ်ဒဳမဵုကရေဇြဳတအ်ရောင် သွဟ်ပေါဲရုဲမာဲ ၂၀၂၅ ဏံ ကၠးခၠေဲကၠုင်ရ။

၂။ ကမ္မယှေန်ပၞာန်တအ် ထ္ၜးဟိုတ်ကဵု ပရေင်ဂီုကၠီုတုဲ ကုတ်ကၟာတ်ထောံ ကွာန်မ္ၚးဍုင် ဟွံကဵုအခေါင်ညးဍုင်ကွာန် တအ် စုတ်မာဲဗွဲမဂၠိုင်ဂၠင်ရ။ ဒၞာဲဒေသညးဍုင်ကွာန် ဟွံဂွံအခေါင်စုတ်ကဵုမာဲဂှ် မမာဲ ဗော်မန်တအ် ဖအိုတ်ရ။

အဓိပ္ပါဲဂှ် စန်လဝ်ဇိုင်တဲ ဗော်မန်တုဲ ကဵုပြိုင်တက်စာဲကဵု ဗော်ကျဖောအ်တအ်ရ။ လတူဏံဂှ် ညးဍုင်ကွာန်မန် ဗော် မန်တအ် ဒးဒုင်စသိုင်ဇၞော်ကဵုဒြဟတ်နွံရ။

မွဲသာ်ပၠန်ဂှ် အခိင်ပ္ၚံက်ပရေင်ဍုင်ကွာန်ကြေပ်ဂြတ်ဒၟံင်တ္ၚဲဏံ အသိင်ပေါဲဗတိုက်ပၠန်ဂတးရပ်လွဟ်အသိင်သၠုင်ဒၟံင်တ္ၚဲ ဏံဂှ် ညးဍုင်ကွာန်ဗွိုင်ပ္ဍဲဍုင်တအ်ဗွဲမဂၠိုင်ဂှ် မိက်ဂွံဗတိုက်သရိုဟ်ဖျေံတၠအဝဵုပၞာန်တအ်နွံမံင်ပေင်ပေင်ဂှ်ရ ပ္ဍဲကဵုပ္ၚံက်ပေါဲ ရုဲမာဲ ၂၀၂၅ ဏံ ညးဍုင်ကွာန်တီကၠိုဟ် ပရေင်ဍုင်ကွာန်ဗွဲမဂၠိုင်တအ် ဂွံအခေါင်သွက်ဂွံလုပ်ပေါဲဗတိုက် နကဵုဆန္ဒမာဲဂှ် တုဲ တိတ်အာကဵုမာဲ ကုညးစၞးဗော်မန်အိုတ်ရ။

ညးဍုင်ကွာန်ဂွံအခေါင်ကဵုမာဲတအ် ဗွဲမဂၠိုင်ဂှ် ရန်တၟံမိက်ဂွံပြိုင်ပ္ကာန် လုပ်ပေါဲဗတိုက် သွက်ဂွံပလှ်သရိုဟ်ဖျေံ တၠအဝဵု ပၞာန်မွဲသာ်ကီု စှ်ေစိုတ်တုဲ တိတ်အာကဵုမာဲ ကုညးစၞးအလံင်အမာတ်မန်တအ်ရ။

သရောပ်မ္ဂး-ဟိုတ်နူဗော်ဒြဟတ်ဇၞော် ဗော်အေန်အေလ်ဒဳတအ် ဟွံလုပ်ပေါဲရုဲမာဲဏံတုဲ မမာဲနူဒြဟတ်ဗော်အေန် အေလ်ဒဳတအ် ဗွဲမဂၠိုင် ကောံကလောံကၠုင် ပ္ဍဲညးစၞးဗော်မန်ဂှ်မွဲတင်၊ မွဲတင်ပၠန်ဂှ် ညးဍုင်ကွာန်ဍုင်မန်တအ် မိက်ဂွံ တိတ်ဗၠးနူ သၞိင်ဃယံက် တၠအဝဵုပၞာန်တအ်တုဲ ဗီုဒှ်မာန် ဗီုအကာဲအရာကဵု ဗီုဂွံ ဗီုကေတ် လုပ်ပေါဲဗတိုက်နကဵုဆန္ဒမမာဲ အာစုတ်ကဵုမာဲရ။

ရံင်ကေတ်ဝင်ပေါဲရုဲမာဲပ္ဍဲပ္ၚံက်ပစ္စုပ္ပန် ပေါဲရုဲမာဲ ၂၀၁၀ ကီု၊ ပေါဲရုဲမာဲ ၂၀၁၅ ကီု၊ ပေါဲရုဲမာဲ ၂၀၂၀ ဂှ်ကီု မွဲအလန်လေဝ် ဂွံ ဒုင်ရုဲစှ်လၟိဟ်ညးစၞးဂလိုင်ဏံ ဟွံမွဲကၠုင်ရ။

ဟိုတ်နူတင်ဗွဲလတူတေံၜါတင်ဂှ်တုဲ ညးစၞးအလံင်အမာတ်ဗော်ညဳသၟဟ်မန် ဒဵုကဵုဂွံဒုင်ရုဲစှ်ဏာ ညးစၞးကၠတ်ထဝ်ညးဍုင် ၅ တၠ၊ ညးစၞးကၠတ်ထဝ်ကောန်ဂကူ ၅ တၠ၊ ညးစၞးကၠတ်ထဝ်တွဵုရး ၇ တၠ ပံင် ၁၇ တၠရောင်။