ဂကောံသၟတ်ဝုတ်ဗၠာဲမန်ဍုၚ်ၜၚ်ကံက်တအ် က္ဍိုက်က္ဍိုပ်ပၠတရဴတုဲ အသေအဟာန် တ္ရဲကောန်ဂကူမန် မန်ဍုၚ်သေံ ဗဟဵု မရနုက်ကဵု (၇၉) ဝါဂှ် ကၠောန်ဗဒှ်အာ ပ္ဍဲဘာကၟာဒကှ်ထဝ် လ္တူဍုၚ်သုဖါန်ၜုရဳဂှ်ရောၚ် ဂွံတီကေတ်ရ။
တ္ရဲကောန်ဂကူမန် မန်ဍုၚ်သေံ မရနုက်ကဵု (၇၉) ဝါဏံဝွံ ရန်တၟအ်ကဵု သၟာကမၠောန်ဆုဲပြံၚ်ကောန်ဂကူမန်တအ် ဂွံအာစိုပ်ဗွဲမလောဲသွာတုဲ ဂွံတိုန်စိုပ်မာန်ကီု ရန်ကဵုဂွံဒှ်အာတ္ရဲသၠးပွးမကၟာတ်ရုၚ်ဂှ်ကီုတုဲ ကၠောန်ဗဒှ်အာ ပ္ဍဲကဵု ဂိတုမာ် ၁၄ မံက် ကဵု ၁၅ မံက် မဒှ်တ္ရဲသ္ရိသဝ် ကဵု တ္ရဲအဒိုတ် (စၟတ်တ္ရဲ 31-01-2026 ကေုာံ 01-02-2024) ဂှ်ရောၚ်။
နကဵုအစဳဇန်မ္ဂး ပ္ဍဲကဵု ဂိတုမာ် ၁၄ မံက်တ္ရဲစေၚ်ဂှ်မ္ဂး သ္ပဟိုတ်ကဵု မိအံက်ဨကရာဇ် ပစ္စုပ္ပန် ကၟိန်ဍုၚ်သေံ တၠညးဂၞကျာ်ဇၞော် သၟိင်ဗြဴသိရိကိတ္တိ မဒးဟောံဗြီုအာဂှ်တုဲ ကၠောန်သ္ပအာအစဳဇန် ဇၟန်လျးလၞီ မသ္ပတဴဂါရဝ ဗှ်ဗၞုဟ်လၞဳစိုတ်ဂှ်နွံရ။
ပ္ဍဲကဵုအခိၚ်ဗ္တံပၠန်မ္ဂး နူကဵုဌာန်ဒတန်ယေန်သၞာၚ် ကောန်ဂကူမန် ဍုၚ်ဝၚ်ကကီု ဂကောံယေန်သၞာၚ်မန် နူဍုၚ်တၞဟ်ခြာကီု ဂကောံယေန်သၞာၚ်မန် ဂကူသေံတအ်ကီု လှ်ေထ္ၜးအာပျးအာ နကဵု လှ်ေဒယှ်ေနာနာရောၚ် ဂွံတီကေတ်ရ။
“အစဳဇန်ဂှ်တှ်ေ တ္ရဲသဝ်တ္ရဲစေၚ်ဂှ် စပံက်အာ အသေအဟာန်ဏောၚ်။ သၟာန်ကမၠောန်မန်ဆုဲပြံၚ်နူမန်ဍုၚ်မန်ပိုဲတေံကီု မန်ဍုၚ်သေံခရိုၚ်ဇဳဂှ်လေဝ် တ္ရဲသ္ရိသဝ်အခိၚ်သဝ်တ္ရဲဂှ်ကၠုၚ်စိုပ်ဏောၚ်။ တ္ရဲသဝ်ညိဂှ် စအာ အစဳဇန်လဴထ္ၜးပျးအာအခိုက်ကၞာယေန်သၞာၚ်ဏောၚ်” သာ်ဝွံ ညးတာလျိုၚ် ဂကောံသၟတ်ဝုတ်ဗၠာဲမန်ဍုၚ်ၜၚ်ကံက်မွဲတၠဂှ် ဟီုရ။
ပ္ဍဲကဵုတ္ရဲဒုတိယ ဂိတုမာ် ၁၅ မံက် အခိၚ်နူခိၚ်နူဂယးပပ္တံနူ (၆) နာဍဳဂှ် မန်ဍုၚ်နာနာ ဒေသညးကုညးတံ သွက်ဂွံဇက်တိုန်အာ ပ္ဍဲကဵုအသေအဟာန် တ္ရဲဂကူမန် မရနုက်ကဵု (၇၉)ဝါနွံတုဲ အကြာ (၇) နာဍဳဂှ် ရှ်ေသှ်ေအာ အလာံၜိုပ်ထဝ်ရောၚ်။
“ဇၟာပ်ကောန်ဂကူမန် သၞာံလဵုစိုပ်စိုပ် ဗှ်ဗၞုဟ်နကဵုစၚ်ဇၞော်ဇၞော်ဟွံမာန်ကီုလေဝ် အဓိကဍေံတ္ရဲကောန်ဂကူမန်မွဲတ္ရဲဂှ် လ္ပဝိုတ်စညိ။ မွဲပၠန်ဂှ် ပိုဲတအ်ဂှ် အလဵုမံၚ်မံၚ် ဒၞါဲလဵုစိုပ်စိုပ် ကဏ္ဍကလောန်လဵုကၠောန်ကၠောန်လ္တူစိုတ် လ္ပပကဵုဗၠေတ်မှာညိ။ ဥပမာဍေံ မၞိဟ်တံဏံ ကၠောန်မံၚ်ဂှ် ဟိုတ်နူတ္ရဲဍေံဟွံသေၚ် ကောန်မံၚ်ပရေၚ်ဂကူဟွံသေၚ်ပုဟ် ဗီုဂှ်လေဝ် လ္ပညာတ်ညိ။ ရံၚ်ကဵုသၟာကမၠောန်မန်ဆုဲပြံၚ်တအ် ဂွံပြေပြံၚ်တုဲ ဒးကၠောန်မံၚ်ရ” သာ်ဝွံ စပ်ကဵု တ္ရဲကောန်ဂကူမန်တုဲ ညးတာလျိုၚ် ဂကောံသၟတ်ဝုတ်ဗၠာဲမန်ဍုၚ်ၜၚ်ကံက်မွဲတၠဂှ် ဟီုဆဝ်မ္ရုဟ်လဝ်ရ။
ဂကောံသၟတ်ဝုတ်ဗၠာဲမန်ဍုၚ်ၜၚ်ကံက်တအ်ဝွံ မွဲသၞာံ မွဲဒေသ ကၠောန်သ္ပကၠုၚ်မံၚ်တ္ရဲကောန်ဂကူမန်ပ္ဍဲဍုၚ်သေံတုဲ တုဲကၠုၚ်တ္ရဲကောန်ဂကူမန် မန်ဍုၚ်သေံ မရနုက်ကဵု (၇၈) ဝါဂှ် ကၠောန်ဗဒှ်ကၠုၚ်လဝ် ပ္ဍဲကဵုလာမန် ဖုထဃေန် ပွိုၚ်ဍုၚ်သာဲယျော် ခရိုၚ်ကမ္မရဳဂှ်ရောၚ် ဂွံတီကေတ်ရ။
ဗီုရုပ်- ဂကောံသၟတ်ဝုတ်ဗၠာဲမန်ဍုၚ်ၜၚ်ကံက်
