ဌာန်ပရိုၚ်ဗၠးၜးမန်၊ ဂိတုမာ် (၆) မံက်၊ ၁၃၈၇ သၞာံ။

ဂကောံဂိုဏ်ဝိနယသဒ္ဓမ္မာလင်္ကာရ ပွိုင်ဍုင်လှာဒကှ် သ္ကိုပ်သ္ကတုဲ ကၠောန်သ္ပအသေအဟာန်သဘင်ကလေင်လိက် သွဟ်လိက် မရနုက်ကဵု (၅၂) ဝါ ပ္ဍဲဌာန – ရာမညနိကာယ ဘာကျာ် ကွာန်သၞေဟ်သြောံရောၚ် ဂွံတီကေတ်ရ။

၁၃၈၇-သၞာံ နေအ်တေံ ဂိတုမာ် (၅) မံက် အခိင်နူ ဂယးပြဟ် ၆ နာဍဳ ကဝက်ဂှ် ကျာ်ဇၞော်အ္စာမဟာနာယက ကေုာံ သင်အ္စာလိက် ကောန်သ္ဂံင်ပရိယတ်တအ်ညးဂမၠိုင် စပံက်လဝ် အသေအဟာန်တုဲ (၇) နာဍဳ ဗာနူဂယး စဵုစိုပ် (၁၀) နာဍဳဂှ် မွဲဗဂါပ်၊ (၁) နာဍဳ လ္ဒေါဝ်တ္ရဲ စဵုစိုပ် (၄) နာဍဳတ္ရဲစေၚ်ဂှ် မွဲဗဂါပ် သွဟ်လိက်ကလေၚ်လိက်အိုတ်ရ။

ထပိုဲကေုာံ ခမဳသၚ်မလုပ်သွဟ်လိက်တအ်ဂှ် အပံၚ်သီုဖအိုတ် နွံတဴ ၁၆၅ ဇကုတုဲ ကလေင်လိက်ဂှ် ၃၆ ဇကု၊ တန်ဇၞော်ဂှ် ၁၅ ဇကု၊ တန်ဒေါဝ်ဂှ်  ၃၂ ဇကု၊ တန်ဍောတ်ဂှ် ၃၆ ဇကု၊ တန်မူလဂှ် ၅၅ဇကု ကေုာံ တန်ဥပစာဂှ် ၂၇ ဇကု လုပ်သွဟ်လိက်ရ။

ထပိုဲခမဳသင်သွဟ်လိက်ဂမၠိုၚ်တအ်ဂှ် နူပွိုင်ဍုင်လှာဒကှ်ကီု သီုကဵုနိမန်လဝ်သင် ပွိုင်ဍုင်မုဟ်ဍုင်ဇြပ်ဗု ကေုာံ မတ်မလီုတအ်ကီု ပါလုပ်ရောၚ် ဂွံတီကေတ်ရ။

အသေအဟာန်ကလေၚ်လိက်ဏံဝွံ ပပ္တံနူ ဂိတုမာ် (၅) မံက် စဵုစိုပ် (၇) မံက် သွဟ်အာလိက်တုဲ ပ္ဍဲကဵု ဂိတုမာ် (၇) မံက်မွဲတ္ၚဲ ဂှ် သီုသွဟ် သီုကလေင်လိက်ကီု ဂိတုမာ် (၈) မံက်ဂှ် အပ်ပြာပ်ဇိုန်ဏှင်တဆိပ်ကြာအံင်ဇၞး ကုသ္ဂံင်အာဇာနဲပရိယတ် အံင်လိက်တအ်မဒှ်ရ။

ကၠောန်သ္ပသ္ဘင်ကလေင်လိက်-သွဟ်လိက် ဂကောံဂိုဏ်ဝိနယသဒ္ဓမ္မာလင်္ကာရ ပွိုင်ဍုင်လှာဒကှ်ဝွံ ပ္တံနူသက္ကရာဇ် ၁၃၃၅ သၞာံတေံ ကၠောန်ဗဒှ်ကၠုၚ် ဌာနကွာန်ကုန်မိပ်ဇြိပ် ကိုပ်ကၠာအိုတ်တုဲ သ္ပသ္ကိုပ်သ္ကကဵု ကျာ်ဇၞော်အ္စာတၠ ၆ ဇကုတုဲ ကၠောန်ကၠုင်အဆက်ဆက်ရ။ သဘၚ်ကလေၚ်လိက် သွဟ်လိက်ဂကောံဝိနယသဒ္ဓမ္မာလင်္ကာရ မရနုက်ကဵု (၅၁) ဝါဂှ် ကၠောန်ဗဒှ်ကၠုၚ်လဝ် ဌာန-ရာမညနိကာယ ဘာပလိုတ် ကွာန်လိုၚ်ကၞုဲ ပွိုၚ်ဍုၚ်လှာဒကှ်ရောၚ် ဂွံတီကေတ်ရ။

ဂကောံဂိုဏ်ဝိနယသဒ္ဓမ္မာလင်္ကာရဂှ် လၟိဟ်ဘာ (၃၈) ဘာနွံတုဲ ကျာ်ဇၞော်အ္စာနွံပိုန်ဘာဂိုဏ်ဝိနယသဒ္ဓမ္မာလင်္ကာရဂမၠိုင် သွက်သာသနာကျာ် ပွိုင်ဍုင်လှာဒကှ် ဂွံဇၞော်မောဝ်တဴတက် အဓာန်မဂၠိင်သ္ၚောဲမာန်တုဲ စိုပ်ဂိတုမာ် (၄.၅.၆.၇.၈) မံက်မ္ဂး လၟေင်သၞာံ ဟွံဂွံသ္ကုတ်ခြာ ဆက်ကၠောန်အာ သဘင်ကလေင်လိက် သွဟ်လိက် လၟေင်သၞာံရောင် ဂွံတီကေတ်ရအဴ။

ဗီုရုပ်-ဂကောံသၚ်သၟတ်မန်သဒ္ဓမ္မာလင်္ကာရ ပွိုၚ်ဍုၚ်လှာဒကှ်