ဌာန်ပရိုင်ဗၠးၜးမန်၊ မာ် (၄) မံက်၊ ၁၃၈၇ သၞာံ။

ပ္ဍဲသၞာံ ၂၀၂၆ ဂိတုမာတ်ဏအ်မ္ဂး စကော်အာကောံဓရီုကၠတ်ထဝ်တုဲ သၠဲပအပ်တာလျိုင် ကုအလဵုအသဳဇၞးမာဲတအ်ဏောင် အခိင်ကၠောန်ပေါဲသောင်က္လးဗ္ဒိုပ် ပ္ဍဲဌာန်ဂအုပ်ပၞာန် မၞုံတွဵုရးသေံဂှ် ညးမဒှ်သ္ကိုပ်ပၞာန် မေန်အံင်လှာင် ဟီုပ္တိတ်ရ။

ဂိတုဂျာန္နဝါရဳ စၟတ်တ္ရဲ ၂၀ အခိင်ကွာ်တရဴစိုပ်မံင်တွဵုရးသေံဂှ် က္ဍိုပ်သ္ကိုပ်ပၞာန် မေန်အံင်လှာင် ကၠောန်သ္ပဏာလဝ် ပေါဲသောင်က္လးဗ္ဒိုပ် ပ္ဍဲဌာန်ဂအုပ်ပၞာန် (အရှေ့အလယ်ပိုင်းတိုင်းစစ်ဌာနချုပ်-ရလခ) ဖျေံသ္ဇိုင်ဍုင်ဃောဠာမ်ဂှ်ရ။

ဂလာန်သာ်ဏအ်ဂှ် ပ္ဍဲဂိတုဂျာန္နဝါရဳ နူစၟတ်တ္ရဲ ၁၁ တေံဂှ်လေဝ် ညးမၞုံအခေါင်ဟီုဂး ဒပ်ပၞာန်ဗၟာ ဗိုလ်ပၞာန်ဇြဝ်မေန်ထောန် ကေင်ဟီုပ္တိတ်လဝ်တုဲမံင်ကီုရ။

“ဂိတုမာတ်တေံ စကော်အာကောံဓရီုကၠတ်ထဝ်တုဲ ဂိတုဨဗရဴဂှ်တှ်ေ အလဵုအသဳတၟိတအ် ဒးစကေတ်တာလျိုင်ဏောင်” သာ်ဏအ် ဗိုလ်ပၞာန်ဇြဝ်မေန်ထောန် ဟီုဂးလဝ်တုဲတုဲနွံရ။

က္ဍိုပ်သ္ကိုပ်ပၞာန် မေန်အံင်လှာင်ဂှ် ပြဟ်ဟ်ဏအ် ကေတ်လဝ်တာလျိုင် နဒဒှ်ဥက္ကဌ ကမ္မယှေန်ပၞာန်၊ ယာယဳသမ္မတ ကေုာံ ညးဂအုပ်က္ဍိုက်ပ်ပၞာန်တုဲ ကာလပံက်အလဵုအသဳတၟိတေံမ္ဂး သွက်ဂွံတိုန်ကေတ်ဒၞါဲသမ္မတနွံမာန်ရောင် ပရိုင်ဂမၠိုင် ချူဓမံက်လဝ်အိုတ်ရ။ 

ပေါဲရုဲမာဲ ကမ္မယှေန်ပၞာန်ဂှ် ကၠောန်တုဲဒှ်အာ (၂) သ္ကုတ်တုဲ သှ်ေမံင် သ္ကုတ် (၃) မွဲဏီဂှ် ဂိတုဂျာန္နဝါရဳ စၟတ်တ္ရဲ ၂၅ ဏအ် ဆက်ကၠောန်အာပၠန်ဏောင် ဂွံတီကေတ်ရ။

လဂွံကဵုသွဟ်ပေါဲရုဲမာဲ မတိတ်ဒၟံင်ကာလပြဟ်ဟ်ဝွံမ္ဂး ဗော်ကျဖောအ် USDP ဇၞးလဝ်ဒၞါဲဂၠိုင်အိုတ် သွက်ဂွံပံက်အာအလဵုအသဳနွံတုဲ နကဵုဗော်ညဳသၟဟ်မန် လုပ်ပြိုင်လဝ် ပ္ဍဲတွဵုရးဍုင်မန်ဂှ် ဂွံဇၞးလဝ် ဗၞတ် ၁၇ ဒၞါဲကီုရ။