ဂကောံရာမညလောဟိတ (ဗဟဵု) က္ဍိုက်က္ဍိုပ်ပၠတရဴတုဲ ဗွဲလၟေၚ်သၞာံ စိုပ်ဂိတု ပုဟ် (၈) စွေက်မ္ဂး ကၠောန်သ္ပစၟတ်သမ္တီကၠုၚ်ဒၟံၚ် “တ္ရဲကဵုဒါန်ဆီဂကူမန်” နွံရ။

တ္ၚဲကဵုဒါန်ဆီဂကူမန်ဝွံ သက္ကရာဇ်ဍုၚ် ၁၃၈၇ သၞာံ၊ ဂိတုပုဟ် (၈) စွေက်၊ တ္ရဲသ္ရိသဝ် (ဂိတုဂျာန်နဝါရဳ စၟတ်တ္ရဲ ၁၀) ဏံမ္ဂး ပေၚ်ကၠုၚ် မရနုက်ကဵု (၁၅) ဝါရမဒှ်တုဲ ဂကောံရာမညလောဟိတ (ဗဟဵု) ကော် ဂကောံကဵုဒါန်ဆီဂကူမန်တအ် ဆက်ကၠောန်သ္ပအာ အသေအဟာန်စၟတ်သမ္တီ လ္တူဍုၚ်မတ်မလီု ပ္ဍဲဌာနဘာဗ္ဂောပရိယတ္တိ အရာပ်ကုန်သီဂှ်ရောၚ်။

နကဵုဂကောံရာမညလောဟိတဝွံ သွက်ဂွံထ္ၜးစရာဲ ဂကူမန် မၞုံကဵုစိုတ်ဓာတ်သၠးပွး ကဵုဒါန်ဆီ သွက်ဂွံရီုဗၚ်လမျီုမၞိဟ်ကီု၊ သွက်ဂွံဗိုန်ဗတ်ကၠုၚ် စိုတ်ဓာတ်ညဳသၟဟ် အကြာခမဳသၚ်ကီု သီုသဳလ ကေုာံ ကွးဘာ၊ ညးဍုၚ်ကွာန်တအ်ကီု၊ သွက်ဂွံပခိုၚ်ပတိုန် ဗဟုသုတ ပရေၚ်ထတ်ယုက် ပ္ဍဲကဵုဂကူမန်တအ်ကီုတုဲ ရေၚ်တၠုၚ်ကၠောန်ကၠုၚ်မံၚ် အသေဟာန် တ္ရဲကဵုဒါန်ဆီမန်ဂကူမန်ရ။

“တ္ရဲကဵုဒါန်ဆီဂကူမန်ဂှ် သ္ပဟိုတ်နူကဵု တၠဂုဏ်အ္စာဥက္ကံသ(က) တၠဂုဏ်အ္စာအဇ္ဇ ဒးဒုၚ်ရပ် စုတ်ထံၚ် ပ္ဍဲဂိတု ဂျာန်နဝါရဳ (၇) ၂၀၁၀ သၞာံ (၁၃၆၈ ဂိတုပုဟ် ၈ စွေက်) ဂှ်တုဲ စၟတ်သမ္တီကၠုၚ် တ္ၚဲကဵုဒါန်ဆီမန်ရောၚ်” ခမဳညးတာလျိုၚ်ဂကောံရာမညလောဟိတမွဲဇကုဂှ် ဟီုမြော်ရ။

တ္ရဲကဵုဒါန်ဆီဂကူမန်ဂှ်  ဗီုလဵုစစၟတ်သမ္တီကၠုၚ်ရော။

ပ္ဍဲသၞာံခရေတ်(၂၀၀၅)ဂှ် တၠဂုဏ်အ္စာဥက္ကံသ(က) တၠဂုဏ်အ္စာအဇ္ဇ မွဲဟာန်ကေုာံ သၚ်ကောန် ပရိယတ္တိဂမၠိုၚ် ဗီုညးကဵုညး နကဵုအလဵုပူဂဵု ကဵုကၠုၚ်မံၚ်ဒါန်ဆီ ဇရေၚ်ရုၚ်ဂဥုဲမတ်မလီုရ။ 

တၠဂုဏ်အ္စာ ဥက္ကံသ ဆဵုဂဗးကဵု ညးမဂိယဲကောန်ဂကူမန်မွဲတၠ မနွံပၟိက်ဒၟံၚ်ကဵုဆီတုဲ ၜိုန်ရဆန္ဒမံက် မိက်ဂွံကဵုဒါန်ဆီကီုလေဝ် ဟိုတ်နူဇကုကဵုလဝ်ဒါန်ဆီ ဂွံလဝ်မွဲဂိတုဓဝ်ဟေၚ်တုဲ ဟွံဂွံအခေါၚ်ကဵုကၠုၚ်ရ။ ညးမဂိယဲလေဝ် ဟိုတ်နူသြန် သွက်ဂွံရာန်ဆီဟွံမွဲတုဲ ဒးက္လေၚ်စဴအာနူရုၚ်ဂဥုဲရ။

ပပ္တံနူအခိၚ်ဝွံတုဲ တၠဂုဏ်အ္စာ ဥက္ကံသ ဆာန်ဍူတဴကောန်ဂကူမန် ညးဒှ်ဒဒိုက်နွံပၟိက်ကဵုဆီတအ်တုဲ သွက်ဂွံဒက်ပ္တန်ဂကောံကဵုဒါန်ဆီပ္ဍဲဂကူမန်ပိုဲဂှ် ကသပ်စိုတ်က္တဵုဒှ်ကၠုၚ်ရောၚ်။

နူဂှ်မွဲကဆံၚ် က္ညအာစိုပ်ဘာဗ္ဂော ပရိယတ္တိတုဲ ချပ်ဂၞန်သဳကၠဳကုတၠဂုဏ်သ္ကအ်မိတ်သဟာဲဂမၠိုၚ် မပ္တံ တၠဂုဏ်အာလောက (လၟိုၚ်) မွဲဟာန်ကေုာံ မိတ်သဟာဲ တန်တဴဒၟံၚ် ပ္ဍဲဘာမန်အံၚ်ဇၞး(ကွာန်နာၚ်သၠုၚ်)တုဲ သွက်ဂွံဒက်ပ္တန် ဂကောံကဵုဒါန်ဆီရ။

သက္ကရာဇ်သာသနာ-၂၅၅၀ သၞာံ၊ ဍုၚ်-၁၃၆၈ သၞာံ၊ ဂိတုဒ္ဂိုန်(၇)မံက်၊ ခရေတ်( 01-07-2006)ဂှ် တၠဂုဏ်အ္စာဥက္ကံသ၊ တၠဂုဏ်အ္စာအာလောက(လၟိုၚ်) မွဲဟာန်ကေုာံ သၚ်ကတ်လိက်ကဵုဒါန်ဆီ ဗၞတ်(၁၅)တၠတအ် စဒက်ပ္တန်ဂကောံကဵုဒါန်ဆီဂကူမန် နကဵုယၟု “ဂကောံ ရာမညလောဟိတ” ပ္ဍဲအရှာံဘာဗ္ဂောပရိယတ္တိ၊ ဍုၚ်မတ်မလီုရောၚ် ဂွံတီကေတ်ရ။

“ဂကောံရာမညလောဟိတ” ဟီုဂှ် ဗီုလဵုပံက်လဝ်အဓိပ္ပါယ်ရော။

“ဂကောံရာမညလောဟိတ” ဟီုဂှ် = (ရာမညဂှ်-ဂကူမန်၊ လောဟိတဂှ်-ဆီ) ဆီဂကူမန် မဂွံအဓိပ္ပါယ်ရောၚ်။

ဒုၚ်သ္ဇိုၚ်ကဵုတၚ်ရန်တၟံဂကောံ (၃)တၚ်မတွံဂး (၁) နွံပၟိက်ဆီမ္ဂး ပလံၚ်ဗစိုပ်ဏောၚ်၊ (၂) ဂကူဘာသာဟွံရုဲ ကဵုဒါန်ဆီဏောၚ်၊ (၃) သွက်ဂွံထံက်ပၚ် ညးဂိယဲဝါတ်ဂါတ် မပ္တံသာ်ဏံတုဲ ဂကောံရာမညလောဟိတ ချဳဓရာၚ်ကၠုၚ် အကြာဒေသမန်ရ။

ဟိုတ်ဂှ်ရ ခမဳသၚ် ကေုာံ ညးဍုၚ်ကွာန်ဂကူမန်တအ် ကဵုကၠုၚ်ဒါန်ဆီအိုတ်တုဲ ဆီမဂွံလဝ်တအ်ဂှ်   သွက်မၞိဟ်ဒိုက်ဝါတ်ယဲ သြန်ဟွံမွဲတံ အခိၚ်ဟွံရုဲ သွက်ဂွံသုၚ်စောဲဆီမာန်ကီု သွက်ဂွံဒှ်စရာဲဂုဏ်ဖဵု အလုံဂကူမန်တံကီုတုဲ ကဵုကၠုၚ်ဒါန်ဇရေၚ်ရုၚ်ဂဥုဲဇၞော်မတ်မလီု (General Hospital) ကေုာံ တိုက်ဆီ (Blood Bank) ပ္ဍဲဍုၚ်မတ်မလီုတအ်ရ။

ပ္ဍဲသၞာံခရေတ်(၂၀၁၀)ဂိတုပုဟ်(၈)စွေက်ဂှ် ဗၠာဲသၟိၚ်ဗၟာတံ ရပ်ထောံ ညးက္ဍိုက်က္ဍိုပ်ဂကောံ တၠဂုဏ်အ္စာဥက္ကံသ နကဵုပရေၚ် ဒစဵုဒစး ပေါဲရုဲမာဲ ၂၀၁၀ ကီု နကဵုအမှု အဳလက်ထရောနေတ်တုဲ  ဒးဒုၚ်ဖျေံထံၚ်ရ။

ၜိုန်ဂှ်ကီုလေဝ် ကောန်ဂကောံရာမညလောဟိတ မသှ်ေသၟေဟ်ဂမၠိုၚ်တအ်ဂှ် သီုကဵုဟွံယှအ်ဇဲမွဲသာ် ကောန် ဂကောံသၚ်ကတ်လိက်ဂမၠိုၚ် ပံၚ်တောဲကဵုသၟတ်ပွိုၚ်ဍုၚ်နာနာတုဲ ဆက်ချဳဒရာၚ်ကၠုၚ်ရ။

ပ္ဍဲကဵုခရေတ် (၂၀၁၁) ဂှ် ဘိက်ကော်သဳကၠဳချပ်ဂၞန် ကု ဂကောံသၚ်လိက်ကၞပ်မဂ္ဂဇြေန်တအ်တုဲ ရန်တၟံ ကဵုညးက္ဍိုက်က္ဍိုပ်ဂကောံ ဒးဒုၚ်သ္ၚိစာတ် ပ္ဍဲဂိတု ဂျာန်နဝါရဳ (၇) ၂၀၁၀ သၞာံ (၁၃၆၈ ဂိတုပုဟ် ၈ စွေက်) ဂှ် သ္ပဏာစၟတ်သမ္တီ “တ္ၚဲကဵုဒါန်ဆီဂကူမန်” ရောၚ် ဂွံတီကေတ်ရ။

ပပ္တံနူတ္ရဲဝွံတုဲ ဒဵုကဵုအခိၚ်လၟုဟ် ဂကောံရာမညလောဟိတတအ် နကဵုဇြဟတ်သၚ်၊ ဇြဟတ်သဳလ၊  ဇြဟတ်သၟတ် က္ဆံၚ်ပွိုၚ်ဍုၚ်ကီု၊ က္ဆံၚ်လ္တူဍုၚ်ကီု ပံၚ်ကောံညဳသာ ဒှ်မွဲစွံတုဲ  ဆက်ရေၚ်တၠုၚ်ကၠောန်ကၠုၚ်မံၚ် တ္ရဲကဵုဒါန်ဆီဂကူမန် ပေၚ်ကၠုၚ် မရနုက်ကဵု (၁၅) ဝါရ။

ပ္ဍဲတ္ၚဲစၟတ်သမ္တီ တ္ၚဲကဵုဒါန်ဆီဂကူမန် ပေၚ် (၁၅) သၞာံဂှ် မုချီဒရာၚ်ကၠောန်အာရော။

လၟိဟ်ညးကဵုဒါန်ဆီ ပ္ဍဲပွိုၚ်မွဲသၞာံမ္ဂး  ကဵုဏာဒါန်ဆီ ကုညးမဂိယဲတအ် လၟိုဟ်နွံအကြာ ၂၀၀ တၠ၊ ၃၀၀ တၠ နွံတဴရ။

ပ္ဍဲကဵုအသေအဟာန်စၟတ်သမ္တီ တ္ရဲကဵုဒါန်ဆီဂကူမန် ပေၚ် (၁၅) ဏံလေဝ် ပူဂဵုညးမကဵုလဝ်ဒါန်ဆီပေၚ်စပ္တံနူ(၅)ဝါတအ် မပ္တံကဵု ခမဳသၚ်၊သဳလ ၅၀-ဇကုပြၚ်ပြၚ်၊ သၟတ်ခရှ်တအ် လၟိုဟ်(၁၈၀)ပြၚ်ပြၚ်တအ်ဂှ် နူကဵုဂကောံရာမညလောဟိတတအ် ညးသ္ပစၟတ်သမ္တီ ပ္တိုန်အာဂုဏ်စရာဲ နကဵုတဆိပ်ကြာရောၚ်။

ပါဲနူဂှ်ပၠန်  တ္ရဲစေၚ်အခိၚ်(၁)နာဍဳဂှ်မ္ဂး ညးမပြာပ်တိုန်တ္ၚဲကဵုဒါန်ဆီတအ်သီုဖအိုတ် ဇက်ဂၠောဲအာပ္ဍဲရုၚ်ဂဥုဲဇၞော်မတ်မလီု သွက်ဂွံကဵုဒါန်ဆီနွံရောၚ်။

ဆီမဂွံလဝ်ဂမၠိုၚ်ဂှ် ရန်တၟအ်ကဵု ညးယဲမနွံပၟိက်ဆီတအ်ဂွံကၠိဂွံလောဲသွာတုဲ ဖအပ်ကဵုအာ ရုၚ်ဂဥုဲဇၞော် (General Hospital) ကေုာံ တိုက်ဆီ (Blood Bank) ပ္ဍဲဍုၚ်မတ်မလီုတအ်ရောၚ် ဂွံတီကေတ်ရ။