ဌာန်ပရိုင်ဗၠးၜးမန်၊ မာ် (၃) မံက်၊ ၁၃၈၇ သၞာံ။

နူကဵုကမ္မယှေန်ပၞာန်တအ် က္ဍိုက်ပ်ကၠောန်သ္ပမံင်ပေါဲရုဲမာဲ နကဵုသ္ကုတ် (၃) သ္ကုတ်ဂှ် ဂကောံဍုင်အာဇြဳယာန် ဟွံထံက်ဂလာန်ရောင် ညးမဒှ်ဝန်ဇၞော်ဍုင်သ္အာင်မလေဝ်ယှာ ဟီုပ္တိတ်လဝ်ဂှ် ဌာနပရိုင် New Straits Time ချူဓမံက်လဝ်ရ။

ဍုင် ၁၁ ဍုင် မပါလုပ်ဒက်ပ္တန်လဝ် နကဵုဂကောံအာဇြဳယာန်တအ်ဝွံ လ္တူပေါဲရုဲမာဲ ကမ္မယှေန်ပၞာန်ဂှ် ဟွံထံက်ဂလာန်သၟးဟွံက ဆေင်စပ်ကဵုညးလ္ရတ်မင်ရံင်ပေါဲရုဲမာဲ ဟွံဗလးဏာလဝ်ရောင် ဂးရ။

“နကဵုအာဇြဳယာန်ဂှ် ဟွံဗလးကဵုညးလ္ရတ်ပုဟ် ဟီုလဝ်တုဲမံင်ရ၊ ဒှ်သာ်ဂှ်ရ ပေါဲရုဲမာဲဂှ်လေဝ် ဟွံသ္ပလဝ်စၟတ်သမ္တီပုဟ်” သာ်ဝွံ ဝန်ဇၞော်ဍုင်သ္အာင်မလေဝ်ယှာ ဟာသာန် ဟီုလဝ်ရ။

ဍုင်ဗၟာဂှ် ဟိုတ်နူပဋိပက္ခပၞာန် မမံက်ဒှ်ကၠုင်လဝ် ဗွဲကြဴနူဒပ်ပၞာန် သီအဝဵု ပ္ဍဲသၞာံ ၂၀၂၁ တေံတုဲ ဒးလီုလာ်မံင် သွာင်ဇဳဒိုဟ် စဵုကဵုတ္ရဲဏအ်ရောင် ဌာန်ပရိုင်ဂှ် ချူဓမံက်လဝ်ရ။

မွဲလ္ပာ်ဂှ် အခိင်ကမ္မယှေန်ပၞာန်တအ် ကၠောန်ဗဒှ်ပေါဲရုဲမာဲ သ္ကုတ် (၁) နူသၞာံ ၂၀၂၅၊ ဒဳဇြေမ်ဗါ ၂၈ တေံ ဍုင်ပါလုပ်မံင် အပ္ဍဲဂကောံအာဇြဳယာန်လ္ရဵု ဗီုကဵုဍုင်သေံ၊ ဍုင်ဖိလေတ်ပါင်၊ ဍုင်လာအိုဝ်တအ် ဗလးဏာလဝ်ဂကောံမင်ရံင်လ္ရတ်နွံရ။

ဆဂး ဆေင်စပ်ကဵုဗလးဏာဂကောံညးလ္ရတ်ဏအ် ဟွံဆက်စပ်ကဵုဂကောံအာဇြဳယာန်တုဲ တန်တဴမံင်ကဵုသ္ဂုတ်သွာတ် ဍုင်ညးကဵုညးရောင် ဟာသာန် ဆက်ဟီုလဝ်ပၠန်ရ။

ပေါဲရုဲမာဲ ကမ္မယှေန်ပၞာန်ဂှ် နူကဵုကၠတ်ထဝ်မွဲတဆံင် သွက်ဂွံပၠုပ်အဝေါင်ကဵု ပရေင်အုပ်ဓုပ်ပၞာန် ဗွဲမလုပ်သၞောဝ်မွဲရောင် ဂကောံကုလသမဂ္ဂ၊ ရဲဍုင်ပလိုတ်ကဵု ညးချဳဒရာင်အခေါင်အရာမၞိဟ်တအ် ထံက်ထ္ၜးကၠုင်အိုတ်တုဲ လ္တူဏအ် ဂကောံကမ္မယှေန်ပၞာန်ဗၟာတအ် ဟွံဒုင်တဲ စှ်ေစးလဝ်ရ။

ခြာဟွံလအ် ဂိတုဂျာန္နဝါရဳ ၂၅ ဏအ်မ္ဂး သွက်ဂွံဆက်ကၠောန်အာပေါဲရုဲမာဲ သ္ကုတ် (၃) နွံဏီကၠာလေဝ် လဂွံကဵုသွဟ်ပေါဲရုဲမာဲပြဟ်ဟ်ဏအ်မ္ဂး နူကဵုဗော်လေံထံက်ဒပ်ပၞာန်ဗၟာ ကျဖောအ်တအ် ဇၞးအာလဝ်ဒၞါဲခုင်ကၠတ်ထဝ်ဂၠိုင်အိုတ်ရောင် ဂွံတီကေတ်ရ။