ကွဳလိုန်ဓာတ်တိတ်နူဍုၚ်ကြုက်ဂှ် ပံက်ကဵုလဝ်အခေါၚ်ကၠောန်လာၚ်ဇြေန်တုဲ ၚုဟ်မးသက်သာနူကွဳလိုန်ဓာတ်သေံ ကဝက်ပြၚ်လေဝ် သွံရာန်ဟွံလောဲနူကွဳလိုန်ဓာတ်သေံရောၚ် တၠဆေၚ်သွံရာန်တအ် ဟီုရ။
ကွဳလိုန်ဓာတ်သေံ မပ္တံကဵု ဟန်ဒါ ဝေပ် (Honda wave) ဂှ် ကၟာတ်လဝ်ကၠောန်လာၚ်ဇြေန်တုဲ ကွဳလိုန်ဓာတ်ကြုက် (Leader NZN) ဂှ်ဟေၚ် နူကဵုညးမကေတ်လဝ်ကာန်ထရိုက်တအ် ကၠောန်လာၚ်ဇြေန်ဂွံ ၚုဟ်မးသက်သာနူ ကွဳလိုန်ဓာတ်သေံ ကဝက်ပြၚ်မံၚ်ရ။
“ကွဳလိုန်ဓာတ်ကၠုၚ်နူသေံ စနူ ဟန်ဒါ ဝေပ် (Honda wave) ကီု ကလေတ် (Click) ကီု ကွဳသေံတှေ် ဍေံကၟာတ်ထောံလာၚ်ဇြေန် လၟုဟ်ကၠောန်ဟွံလောဲရ၊ လၟုဟ်ကွဳတိတ်မံၚ် ကွဳကြုက် (ဖက်စာတ်လဝ်ဗၟာ) တိတ်မံၚ် ဍေံကဵုလဝ် လာၚ်ဇြေန် ကဵုရဲကေတ်လဝ်ကာန်ထရိုက် တိတ်မံၚ်၊ ၚုဟ်ဍေံသက်သာနူ ကွဳသေံ ကဝက်ပြၚ်မံၚ်၊ ဆဂး ဒေသမန်ပိုဲဏံ မၞိဟ်ဒစိုတ်အောန် သွံဟွံဂြိပ်နူကွဳသေံ” သာ်ဝွံ တၠဆေၚ်သွံရာန်ကွဳလိုန်ဓာတ် နူမုဟ်ဍုၚ်မွဲတၠဂှ် ဟီုလဴထ္ၜးရ။
လာၚ်ဇြေန်ကွဳလိုန်ဓာတ်ဂှ် ကဵုညးဍုၚ်ကွာန်တအ် ဟွံကဵုလဝ်အခေါၚ်ကၠောန်လေဝ် နူကဵုတၠတမ်ရိုဟ်ကေတ်လဝ် ကာန်ထရိုက်သွံရာန်တအ် ပံက်ကဵုလဝ်အခေါၚ်တုဲ ကၠောန်နွံမံၚ်ရ။
ဟိုတ်နူကၟာတ်ထောံ လာၚ်ဇြေန်ကွဳလိုန်ဓာတ်သေံတုဲ ကွဳလိုန်ဓာတ်သေံလာၚ်ဇြေန် ကၠောန်လဝ်တုဲတုဲတေံဂှ် ၚုဟ်ထပ်ထလာ်တိုန်အာရောၚ် တၠဆေၚ်သွံရာန်ကွဳလိုန်ဓာတ်ဂှ် ထပ်ဟီုထ္ၜးရ။
“ကွဳသေံ ဝေပ် (Honda wave) တၟိတၟိဂှ်တှေ် ၚုဟ်နွံအကြာ (၁၆၀) ကိုဋ် နွံဒှ်မံၚ် တန်တဴကဵု ကွဳခိုဟ်ပရေံရ၊ ယဝ်ရ သၞာံအကြာ (၂၀၂၀) တှေ် ၚုဟ်နွံအကြာ (၁၀၀) ကိုဋ်၊ ကွဳကြုက်ဂှ် ကၠောန်လောဲမံၚ် ၚုဟ်လေဝ် သက်သာ၊ ဟိုတ်နူဍေံကၟာတ်ထောံ လာၚ်ဇြေန်ကွဳသေံတုဲတှေ် ၚုဟ်ဂှ် ထလာ်တိုန်အာ” သာ်ဝွံ သ္ဂးရ။
ကွဳကြုက် (ဖက်စာတ်လဝ်ဗၟာ) ဂှ် ကၠောန်ပတုပ်လဝ် ဗီုကဵုကွဳလိုန်ဓာတ် တိတ်နူသေံ ဒရေမ် (Dream 125) တုဲ ကဵုလဝ်ယၟု (NZN Leader) ရ။ ကွဳလိုန်ဓာတ်ဝွံ သၞာံ (၂၀၂၅)၊ (၂၀၂၆)) တၟိတၟိလၟုဟ်ဏံ ကၠောန်လဝ်လာၚ်ဇြေန်ဒတုဲမှဂှ် ၚုဟ်နွံအကြာ (၅၀) ကိုဋ်ရ။
အနာဂတ်ဂတဏံမ္ဂး ကၟိန်ဍုၚ်ဗၟာဂှ် စတမ်နူယာန်ကွဳစက် နူဍုၚ်ကြုက်ဂှ် သွက်ဂွံလုပ်ကေတ်ဒၞာဲ အပ္ဍဲဍုၚ်နွံမံၚ်တုဲ ကွဳလိုန်ဓာတ်တိတ်နူဍုၚ်ကြုက် (NZN Leader) ဂှ် ၜိုန်ရၚုဟ်မးသက်သာ နူကွဳလိုန်ဓာတ်သေံ ပိဆ မွဲဆ ဒှ်ကၠာလေဝ် သွံရာန်ဟွံဂြိပ်နူကွဳလိုန်ဓာတ်သေံရောၚ် တၠဆေၚ်သွံရာန်တအ်ဟီုဂှ် ဂွံတီကေတ်ရ။
