လိက်ပရေင်၊ မယံင် (ဍုင်မန်)
တ္ၚဲကောန်ဂကူမန် မရနုက်ကဵု(၇၉)ဝါ တုဲကၠုင်ဏံဂှ် နူကၠာဟွံစိုပ်တ္ၚဲမာ်မွဲစွေက်ဏီဂှ် ရမျှာင်ဟီုဂး ပါ်ပါဲ လတူညးချဳ ဒရာင်ကၠောန်ဗဒှ်တ္ၚဲကောန်ဂကူမန်တအ်ထတ်သ္ကာတ်ကၠုင်နွံရ။
ဂကောံကၠောန်ဗဒှ်တ္ၚဲကောန်ဂကူမန် ဗွိုင်ပ္ဍဲဍုင်ဂမၠိုင်တအ် ချဳဒရာင်ရေင်တၠုင်ဒၟံင် ကိစ္စလၟေင်ကမၠောန်တ္ၚဲကောန်ဂကူ မန်ဂှ် နူကဵုတၠဂုဏ်အ္စာဃောသဂကူအိန် ဟီုထံက်ထ္ၜးဏာ ဒဒှ် ပရေင်ကၠောန်တ္ၚဲကောန်ဂကူမန် ပ္ဍဲကဵုပေါဲဓရ်သၠာတ်ဥ ဒျာန်မှာထေရ်ပါလိတ ဍုင်ကၟာဝက်(ရးဇြာ) ဗတမ်ပုဟ် ၁၄ စွေက်(ဂျာန်နဝါရဳ ၁၆)ဂှ် ညးမင်ရံင်အခါတ်အကာဲ လတူ ပရေင် ကမၠောန်တ္ၚဲကောန်ဂကူမန် ညးလ္ၚဵုလ္ၚဵုတအ် ဂွံကၠုင်အသိင်ပရေင်ပါ်ပါဲထတ်သ္ကာတ်ကၠုင် ဂွံဆဵုကေတ်ရ။
ဂလာန်တၠဂုဏ်အ္စာဂှ် “ယးကလဳတှ်ေ စိုပ်မာဲမွဲစွေက် ရဒှ်ဂိတုမန်ပိုဲလဴပုံရ လဴပုံလတူစင်လေဝ် တိုန်စင်တှ်ေ လဴပုံ မၞိဟ် သၟဝ်ဂှ် ကလင်ပုံ ဟံသာဝတဳဂှ် မု၊ ရာဇာဓိရာဇ်ပိုဲဂှ် မု၊ ဗညာဓရာံဗီုလဵု၊ နူကဵုသၞာံလဵု ပိုင်ကၠုင်ဍုင်မုစိသၞာံ လဴပုံ ကလင်ပုံ တုဲ ၜိုတ် ၉ နာဍဳတှ်ေ ပ္ဍဲဆေင်ဗဳယာဂှ် သီုရဲလဴပုံ သီုရဲကလင်ပုံ ကောံမံင်ပ္ဍဲဆေင်ဗဳယာဂှ်ဖအိုတ် အဵု မာ်မွဲစွေက်ဂှ် ဒှ်အာ ဗီုၜိုတ်ဆလဴစပုံဓဝ် လ္ပကၠောန်မာ်မွဲစွေက် ဂုဏ်ဟွံဟီုပုဟ် မာ်မွဲစွေက်ဂှ် ကၠောန်၊ ဆလ္ပကဵုဒှ်အဆံင်လဴစပုံဓဝ် ပရေင်ပ ညာဂွံတောတက်၊ ပရေင်စိုတ်ဓာတ်ဂွံၚုဟ်ကတဵုတိုန် မိက်ဂွံကဵုကၠောန်ဗီုဂှ်” တၠဂုဏ်အ္စာဟီုတွံရ။ ပ္ဍဲကဵု ပေါဲဓရ်ဂှ် သီု ကဵု ဗလးလဝ်ရုပ် Live ကီုတုဲ ဂလာန်တၠဂုဏ်အ္စာဟီုမြော်ဏာဂှ် မၞိဟ်ဗွဲမဂၠိုင်ကလေင်တြးဏာတုဲ လတူဂလာန်တၠဂုဏ် အ္စာဂှ် ဟီုဂး ပါ်ပါဲ ချူကဵုလညာတ် ဗီုညးကဵုညးအိုတ်ရ။
ဂကောံကၠောန်ဗဒှ်တ္ၚဲကောန်ဂကူမန် လ္ၚဵုတအ်လေဝ် ဆဵုမိင်ဒးဂလာန် တၠဂုဏ်အ္စာဟီုဂးပါ်ပါဲထံက်ထ္ၜးဏာ သာ်ဝွံဂှ်တုဲ စိုတ်ယံင်တိုန် လတူပွကမၠောန်တ္ၚဲကောန်ဂကူမန်ဂှ် နွံကီုရ။
“ရဲကၠောန်ဗဒှ်တ္ၚဲကောန်ဂကူမန်တအ်ကၠောန်ကၠုင်မံင်ဂှ် ပတိတ်လိက်ဟီုဂလာန် ဟီုဂလာန်ဆဝ်ဗ္ၚုဟ် ဗှ်ထ္ၜးဝင်မန် လတူစင်တုဲတှ်ေ တုဲအာ၊ ဟီုတုဲတှ်ေ တုဲအာ ရုပ်ရဴလၟေင်ကမၠောန်စပ်ကဵုပရေင်ဂကူ အရေဝ်၊ လိက်ပတ်၊ ယေန်သၞာင် ရုပ်ရဴလၟေင်ကမၠောန်နဲတဲ မုလေဝ်ဖျေံပရေင်ကမၠောန်ဟွံညာတ် ဒှ်အာဗီုဂှ်တုဲတှ်ေ တၠဂုဏ်အ္စာဟီုဏာဂှ်လေဝ် ခိုဟ်မံင် ရ ဂတနူဏံ ဂကောံကၠောန်တ္ၚဲကောန်ဂကူမန်တအ် ဂွံချပ်တိုန်” ကမ္မတဳကၠောန်ဗဒှ်တ္ၚဲကောန်ဂကူမန် ပွိုင်ဍုင်ဇြပ်ဗု မွဲ တၠဂှ် ဟီုရ။
အခါစိုပ်တ္ၚဲကောန်ဂကူမန်ဂှ် ဗွိုင်ပ္ဍဲဍုင်မ္ဂး စင်ဗဟဵုဂှ် ကၠောန်ဗဒှ်ပ္ဍဲကဵုဍုင်ဇိုင်ကျာ် ပွိုင်ဍုင်ပံင်တုဲ မပ္တံကဵု ပွိုင်ဍုင်ဍုင်မတ် မလီု၊ ပွိုင်ဍုင်တ္ကအ်ခၟိုင်၊ ပွိုင်ဍုင်ကျာ်မြဟ်၊ ပွိုင်ဍုင်မုဟ်ဍုင်၊ ပွိုင်ဍုင်ရေဝ် ကၠောန်ဗဒှ်ကၠုင်ဂြုဂြုတုဲ အဆံင်ဍုင်၊ အဆံင် ကွာန် အလုံဒေသဍုင်မန် ကၠောန်ဗဒှ်ကၠုင်ရ။
တ္ၚဲကောန်ဂကူမန်သၞာံဏံဂှ် ဗွဲကြဴနူကဵု ဒပ်ပၞာန်ဗၟာသီအဝဵု သၞာံ ၂၀၂၁ ဖေဖဝ်ဝါရဳ ၁ တုဲ စိုပ်သၞာံ ၂၀၂၆ ဏံမှ အဆံင်ပွိုင် ဍုင်၊ အဆံင်လတူဍုင်၊ အဆံင်ပွိုင်တိုက် အဆံင်ကွာန် စတိတ်ကၠောန်ကၠုင်ဗီုတြေံတေံပၠန်ရ။
အခိင်ပၞာန်သီလဝ်အဝဵုဏံ အခိင်ပၠန်ဂတးဒၟံင်ကဵု တၠအဝဵုပၞာန်တ္ၚဲဏံဂှ် ပ္ဍဲကဵုစင်တ္ၚဲကောန်ဂကူမန် ဒေသပွိုင်ဍုင်လ္ၚဵု ကၠောန်ကၠုင်ဗီုပြင်သဘင်ဂဳတဂှ်ကီု၊ ဗီုကဵုစင်လတူဍုင်ဇၞော်လ္ၚဵုဂှ်ပၠန် သီုကဵုကော်ဘိက်ကၠုင် ညးတာလျိုင်သွာင်အုပ်ဓုပ် တၠအဝဵုပၞာန်တအ်နွံတုဲ ဗွိုင်မ္ၚးဍုင်လ္ၚဵု ဟီုဂးပါ်ပါဲကၠုင်နွံဂှ်လေဝ် ဂွံဆဵုကေတ်ရ။
တ္ၚဲကောန်ဂကူမန်ကၠောန်ကၠုင်ဒၟံင်မွဲဒမြိပ် နူကၠာပၞာန်ဟွံဂွံသီအဝဵု ၂၀၂၁ တေံ ဒဵုလၟုဟ်ဂှ် ပရေင်ပြံင်သၠာဲမုဟွံမွဲဏီဂှ်တုဲ ညးမင်အခါတ်အကာဲလ္ၚဵု ဟီုထံက်ထ္ၜး ပါ်ပါဲကၠုင်နွံကီုရ။
တၟေင်မွဲတင်ပၠန်ဂှ် ဗွိုင်ဍုင်သေံဒၞာဲစင်တ္ၚဲကောန်ဂကူမန် ဒေသဗွဲမဂၠိုင်ဂှ် ချူသုင်စောဲကၠုင် ‘တ္ၚဲဂကူမန်’ ဂၠိုင်ကဵုစင်ဂွံဆဵု ကေတ်ရ။ ပ္ဍဲကဵုစင်တ္ၚဲဂကူမန် ဒေသဇဳတအ်ဂှ် က္ဍိုပ်သ္ကိုပ်ဗော်ပၠန်ဂတးမန်၊ က္ဍိုပ်သ္ကိုပ်ဂကောံပၠန်ဂတးမန်တအ် ဒေသ ဆက်စၠောံဗွိုင်ဗော်ညး ဂကောံညးဂွံလဝ်ဒၞာဲဂှ်လေဝ် ဂွံဆဵုကေတ်ရ။
တၟေင်မွဲသာ်ပၠန်ဂှ် လၟေင်အရိုဟ်ဟ်သၞာံ က္ဍိုပ်သ္ကိုပ်ဗော်ဍုင်မန်တၟိ တိုန်စိုပ်ဒၟံင် လတူစင် တ္ၚဲကောန်ဂကူမန် ဍုင်သေံဂှ် သၞာံဏံ က္ဍိုပ်သ္ကိုပ်ဗော်ဍုင်မန်တၟိ စင်အလဵုလေဝ် ဟွံဆဵုညာတ်ရ။
ပ္ဍဲကဵုတ္ၚဲကောန်ဂကူမန် မရနုက်ကဵု(၇၉)ဝါ သၞာံဏံဂှ် ပ္ဍဲဍုင်သေံကီု၊ ပ္ဍဲဍုင်မန်ကီု ဒြဟတ်ကောံကၠုင်တုဲ ဂွံသဳကၠဳမွဲစွံ၊ ဂွံ လဟိင်လှ်ေထ္ၜးပျးယေန်သၞာင်အခိုက်ကၞာမွဲစွံဂှ်တုဲ အကြာမန်ၜါဍုင်ဂှ် ဒှ်ဒြဟတ်သွက်ဂွံကောံကလောံဗွဲတၟေင်ရ။
ပ္ဍဲတ္ၚဲကောန်ဂကူမန် မရနုက်ကဵု(၇၉)ဝါသၞာံဏံဂှ် သ္ပဟိုတ်ကဵု အခိင်ပ္ၚံက်ပရေင်ဍုင်ကွာန် ဒှ်ဒၟံင်အခိင်ပၠန်ဂတးကဵုတၠအ ဝဵုပၞာန်တအ်ဂှ် ဗွိုင်ပ္ဍဲဍုင်ဒေသလ္ၚဵုကၠောန်မာ်မွဲစွေက်တ္ၚဲကောန်ဂကူမန်ဂှ် ဒှ်အာဗီုပြင် သဘင်ဂဳတလှ်ေဒယှ်ေနွံဂၠိုင်အာ ဂှ်တုဲ ဗၠေင်တိတ်အာနူကဵု တင်ပတဝ်က္ဍိုပ်တ္ၚဲကောန်ဂကူမန်မန်ဂှ်တုဲ ဒှ်အာ ဗီုပြင် ကၠောန်သဘင်ဂှ်လေဝ် မၞိဟ်လ္ၚဵု ညာတ်ကၠုင်နွံရ။
အခိင်တ္ၚဲကောန်ဂကူမန် မရနုက်ကဵု(၇၉)ဝါဏံဂှ် ဒှ်ဒၟံင်အခိင်ကာလပၠန်ဂတးတုဲ ဗွိုင်ဍုင်သအာင်၊ ဗွိုင်ဍုင်သေံ၊ ဗွိုင်ဗော်ဍုင်မန်တၟိ ဂှ် ဟီုဂလာန်ဆဝ်ဗ္ၚုဟ် ဗတိုက်ဖ္အောဝ် စပ်ကဵု လၟေင်ပရေင်ပၠန်ဂတးရပ်လွဟ်ဖအိုတ်ရ။
တ္ၚဲကောန်ဂကူမန် ဗွိုင်ပ္ဍဲဍုင်ဂှ် စပ်ကဵုပရေင်ဟီုဂလာန်ကီု လၟေင်ကမၠောန်အိုတ်သီုဂှ် အခေါင်အရာဂကူ၊ ပရေင် လိက်ပတ် ယေန်သၞာင် အခိုက်ကၞာ ပရေင်ပညာ ဆဏံဟေင် ဟီုဗ္တိုက်ဖ္အောဝ်ကၠုင်ရ။
ရံင်သရောပ်ကေတ် ကၠောန်ဒၟံင်တ္ၚဲကောန်ဂကူမန် အလုံမွဲလိုက်သီုဖအိုတ်ဂှ် ချူသုင်စောဲမလိက် ‘တ္ၚဲဂကူမန်’ ကဵု ‘တ္ၚဲကောန်ဂကူမန်’ နွံ၊ စၟတ်သမ္တီအလာံဂကူမန် ရုပ်ၜိုပ် ဟွံတုပ်နွံ၊ ယာတ်ခၟိင်က္ဍိုပ် ဟွံတုပ်နွံ၊ ဟီုဂလာန် ဆဝ်ဗ္ၚုဟ် ဗတိုက်ဖ္အောဝ် တၞဟ်ခြာနွံ၊ ဗီုပြင်ကၠောန်တၞဟ်ခြာကီုလေဝ် တ္ၚဲကောန်ဂကူမန် မွဲတ္ၚဲဂှ် ဒှ်တ္ၚဲပရဲ သွက်ဂွံသၠုင်ပရံင် ပတိုန်စိုတ်ဓာတ် ပရေင်ဂကူ ဗွဲစၟတ်ရောင်ဂှ် ပတိုန်ထ္ၜးဏာရ။
