သဘၚ်သၟာန်သွဟ်လိခ် ဂကောံဓမ္မယုတ္တိကနိကာယ အလုမ်ဂိုဏ်မဟာယျေန် မရနုက်ကဵု ၄၂-ဝါအလန်ဏအ်ဝွံ ကၠောန်ဗဒှ်အာ ပ္ဍဲကဵုဘာပုပ္ဖါရာမ-ကွာန်ဏံင်ခေတ်၊ ပွိုၚ်ဍုၚ်ကအ်ကြိက် တွဵုရးကရေင် ဂှ်နွံရောၚ် ဂွံတီကေတ်ရ။
သ္ဘၚ်သၟာန်သွဟ်လိက်ဏအ်ဝွံ ရန်ကဵုခမဳသၚ်တၠပညာ ပရိယတ္တိမကေက်သ္ကာဂမၠိုၚ် သ္ဂောံမံက်ဂတဝ် ကၠုၚ်မာန်တုဲ နူမပၠတရဴဂကောံဓမ္မယုတ္တိကနိကာယ (ဂိုဏ်မဟာယျေန် သ္ပတမ်နူဂိတုမာ် (၁၁)စွေက် စဵုစိုပ် (၁၄)စွေက် (နူဂိတုဝှိတ်ဝှဝ်ရဳ စၟတ်တ္ၚဲ ၁၁ စဵုကဵု ၁၅) ပွိုၚ် (၄) တ္ရဲဂှ် ကၠောန်သ္ပသွဟ်ဒၟံၚ်လိက်ရ။
သဘၚ်သၟာန်သွဟ်လိက်ဏံဝွံ ခမဳသၚ်ကျာ်ဇၞော်အ္စာတၠ(၈၀)ဇကုတအ် က္ဍိုက်က္ဍိုပ်ကောပ်ကာဲတုဲ ခမဳသၚ်၊ ထပိုဲသာမဏဳ ကေုာံ သဳလဂမၠိုၚ် နူတန်ဂုဏ်တၟေၚ်(၁၂)ဇကု၊ တန်ဓမ္မစရိယ(၇၆)ဇကု၊ တန်ဇၞော်(၃၁)ဇကု၊ တန်ဒေါဝ်(၅၃)ဇကု၊ တန်ဍောတ်(၈၇)ဇကု၊ တန်မူလ(၇၈)ဇကု ကေုာံ တန်ဥပစာ(၁၀၄)ဇကုတအ် အပံၚ်ဖအိုတ်(၄၄၁) ဇကုတအ် လုပ်သွဟ်ဒၟံၚ်လိက်နွံရ။
မွဲလ္ပာ်ပၠန်မ္ဂး နကဵုဂကောံရာမညနိကာယပရိယတ္တိတအ်လေဝ် ပ္ဍဲကဵုဂိတုဖဝ်ရဂိုန် ၁မံက် စဵုစိုပ် ၄ မံက် (နူဂိတုဝှိတ်ဝှဝ်ရဳ စၟတ်တ္ၚဲ ၁၆ စဵုကဵု ၁၉)ဏံမ္ဂး သွက်သ္ဂောံသၟာန်သွဟ်အာလိက် အလုံဒေသရးမန် မရနုကဵု (၄၄)ဝါ ပ္ဍဲကဵုဘာဒေါဝ်သာသနာ လ္တူဍုၚ်မတ်မလီုနွံတုဲ အခိၚ်လၟုဟ်ဏံမ္ဂး ခမဳသၚ်၊ ထပိုဲသာမဏဳ ကေုာံ သဳလဂမၠိုၚ် သွက်သ္ဂောံသွဟ်အာလိက်ဂှ် စုတ်လဝ်စရၚ် (၃,၀၀၀) ဇကုပြၚ်နွံရောၚ် ဂွံတီကေတ်ရ။
တုဲကၠုၚ်သၞာံ ၂၀၂၅ ဏအ်ဝွံ နကဵုဂကောံဓမ္မယုတ္တိကနိကာယတအ် ကၠောန်ကၠုၚ်လဝ် သဘၚ်သၟာန် သွဟ်လိက် အလုမ်ဂိုဏ်မဟာယျေန် မရနုက်ကဵု (၄၁) ဝါဂှ် ပ္ဍဲတိုက်လိခ်ခေမာသိဝံပရိယတ္တိ၊ ကွာန်ခဍာ တကအ်ခၟိုၚ်နွံတုဲ ခမဳသၚ်၊ ထပိုဲသာမဏဳ ကေုာံ သဳလ အပံၚ်ဖအိုတ် (၄၇၇)ဇကု လုပ်သွဟ်လဝ်ရောၚ်ဂှ် ဂွံတီကေတ်ရ။
ဂကောံဓမ္မယုတ္တိကနိကာယ (ဂိုဏ်မဟာယျေန်) ဝွံ ကၠောန်ဗဒှ်ကၠုၚ်မံၚ်သဘၚ်သၟာန်သွဟ်လိက် အလုမ်ဂိုဏ်မဟာယျေန် မွဲသၞာံမွဲဝါနွံတုဲ ဂိုဏ်ဝွံ ဒှ်ဂိုဏ်မန်အလဵုအသဳဍုင်ဗၟာ မစၟတ်သမ္တီလဝ် ပ္ဍဲစရင်ဂိုဏ် ဒစိတ်ပ္ဍဲကၟိန်ဍုင်ဗၟာရောၚ် ဂွံတီကေတ်ရ။
ဗီုရုပ်- ဘာပုပ္ဖါရာမ-ဏံင်ခေတ်
