ဂိတုဖေဖဝ်ဝါရဳ စၟတ်တ္ၚဲ (၂၄) စဵုစိုပ် (၂၅) နူတနေံဏအ်ကဵု တ္ၚဲဏအ်ဂှ်ဝွံ ပ္ဍဲကဵုဒေသရယံၚ် ညးတာလျိုၚ်ဗၠာဲသၟိၚ်သေံတအ် လုပ်စိုပ်စၟဳစၟတ်လဝ် ဒၞါဲရုၚ်ခဒမ်ကမၠောန်သိုၚ်ခၞံ သၟာကမၠောန်ကောန်ဍုၚ်မန်ဗၟာတအ် နွံကၠုၚ်ရောၚ် ဂွံဆဵုကေတ်ပရိုၚ် နူညးတာလျိုၚ်အုပ်ဓုပ် ပွိုၚ်ဍုၚ်ရယံၚ်တအ်ရ။
ညးတာလျိုၚ်စၟဳစၟတ် “နာဲချာန်ယရက် ၜဲဓံၚ်ချာန်” အာက္ဍိုပ် မၞုံပ္ဍဲဒေသရယံၚ်ဂှ်ဝွံ လုပ်စိုပ်စၟဳစၟတ်လဝ် ဒၞါဲကဵုရုၚ်ခဒမ်ကမၠောန်သိုၚ်ခၞံရယံၚ်ဂှ် သၟာကမၠောန်ကောန်ဍုၚ်မန်ဗၟာ လၟိဟ် (၂၄၆) တၠ နွံတန်တဴမံၚ်တုဲ ပ္ဍဲခဒမ်ပထမဂှ် မၞိဟ်တြုံ (၇၄) တၠ၊ မၞိဟ်ဗြဴ (၃၂) တၠ၊ ပ္ဍဲခဒမ်ဒုတိယဂှ် မၞိဟ်တြုံ (၁၁၀) တၠ၊ မၞိဟ်ဗြဴ (၃၁) တၠ ဒၟံၚ်တန်တဴမံၚ်ဂှ် ဂွံဆဵုကေတ်ရ။
မွဲကရောံဂှ်ဝွံ လုပ်စိုပ်စၟဳစၟတ်လဝ် သၟာကမၠောန်ကောန်ဍုၚ်မန်ဗၟာတအ်ကီုတုဲ ညးဟွံမွဲကဵု တၞးလိက်သက် သဳ (၃) တၠဂှ် ညးတာလျိုၚ်ဗၠာဲသၟိၚ်သေံတအ် ရပ်ထိၚ်ကော်ဏာတုဲ အတိုၚ်သၞောဝ်ဥပဒေကၟိန်ဍုၚ်သေံဂှ် ဆက်စၟဳစၟတ်ကေတ်မံၚ်အရေဝ်နွံရောၚ် ဂွံတီကေတ်ရ။
တုဲပၠန် ညးမၞုံကဵုတၞးလိက်သက်သဳတအ်ဝွံ ဟိုတ်နူဟွံကဵုသမ္တီ ပ္ဍဲရုၚ်ဗၠာဲသၟိၚ်အုပ်ဓုပ်ပွိုၚ်ဍုၚ်တအ်တုဲ နကဵုၝောံပိုဒ် (၃၈) အတိုၚ်သၞောဝ်ဥပဒေ ညးတာလျိုၚ်စၟဳစၟတ် (B.E. 2522 (1979) တအ်ဂှ် ကော်ပကောံ သၟာကမၠောန် ကောန်ဍုၚ်မန်ဗၟာဂမၠိုၚ်တအ်တုဲ အတိုၚ်သၞောတ်သၞောဝ်စေဝ်ပၞောန်ညးတအ်ဂှ် စၟဳစၟတ်ကေတ်မံၚ်အရေဝ်နွံရ။
ပြဟ်ဟ်ဏအ် သၟာကမၠောန်ကောန်ဍုၚ်မန်ဗၟာဂမၠိုၚ်တအ် ကိစ္စသ္ဒးပြံၚ်ကမၠောန်ဂှ် ညးလ္ၚဵုတအ် ပ္ဍဲကဵုတၞးလိက်အုပ်ဇကုဂှ် ဍေံဟွံကိတ်ညဳကဵု ကမၠောန်၊ ယၟု တၠကမၠောန်သေဌဳတအ်တုဲ ညးတာလျိုၚ်သေံတအ် ရပ်ထိၚ်ကော်ဏာလဝ် နွံကၠုၚ်ဗွဲမဂၠိုၚ်ရ။
အတိုၚ်စၞောန်နူကဵု အလဵုအသဳသေံတအ် ဖျေံလဝ်ဂှ်ဝွံ ဇၟာပ်ဒၞါဲဒေသခရိုၚ်ဂှ် ပတေၚ်လဝ်ပရေၚ်စၟဳစၟတ်တုဲ ပြဟ်ဟ်ဏအ် ဒၞါဲဒေသခရိုၚ်စွံအဓိကတုဲ ရပ်စပ်မံၚ်ဂှ် မပ္တံကဵု ပ္ဍဲအယုဒ္ဓယာ၊ သမုတ်သာဃန် (မဟ္ၚာဲ)၊ ရယံၚ်၊ ရနံၚ်၊ ကာန်ချနၜုရဳ (ကမ္မရဳ) တအ် ပါလုပ်မံၚ်ရ။
ပ္ဍဲကၟိန်ဍုၚ်သေံ ညးတာလျိုၚ်ဗၠာဲသၟိၚ် ရပ်စပ်စၟဳစၟတ် သၟာကမၠောန်ဟွံလုပ်ကဵုသၞောဝ်တအ် ဟိုတ်နူပတေၚ်လဝ်ပရေၚ်စၟဳစၟတ်တုဲ တၟော်ကဵုသၞာံ (၂၀၂၅) ကဵု သၞာံ (၂၀၂၆) ဏအ်မ္ဂး ရပ်စပ်ဂွံမံၚ် သၟာကမၠောန်ကောန်ဍုၚ်မန်ဗၟာတအ် လၟိဟ် (၄) ကိုဋ်တၠ လ္ပါ်လ္တူယျရောၚ် ဂွံတီကေတ်ရ။
ဗၠာဲသၟိၚ်သေံတအ်ဝွံ ရပ်စပ်ထိၚ်ဂွံလဝ် သၟာကမၠောန်ကောန်ဍုၚ်မန်ဗၟာ ဟွံလုပ်ကဵု သၞောဝ်ဂမၠိုၚ်ဂှ် ကဵုဒုဟ်ဒဏ်ထပၠုပ်ထံၚ်တုဲ ညးလ္ၚဵုတအ်ဂှ် ကလေၚ်ပလံၚ်ဏာ ဒၞါဲဍုၚ်ကွာန်ဌာန်ဇကုလေဝ်နွံ၊ ညးလ္ၚဵုဂှ် ဒးဒုၚ်ပအပ်ကဵု ဒပ်ပၞာန်ဗၟာတအ်လေဝ် နွံကၠုၚ်လဝ်ရောၚ် ဂွံတီကေတ်ရ။
ဗီုရုပ်: ညးလျိုၚ်စၟဳစၟတ်အုပ်ဓုပ်ပွိုၚ်ဍုၚ်ရယံၚ် (Rayong)
