တ္ၚဲဏအ် ဂိတုဖေဖဝ်ဝါရဳ စၟတ်တ္ၚဲ (၁၇) ၊ အခိၚ်နူဂယးပြဟ် ၜိုတ် (၂) နာဍဳဂှ်ဝွံ ပ္ဍဲကဵုခရိုၚ်သမုတ်ပရာကာန်၊ အရာပ်ဂၠံၚ်ဖရက်ဇြာ၊ ဒၞာဲရုၚ်ခဒမ်ကမၠောန်သိုၚ်ခၞံဂှ် သၟာကမၠောန်ကောန်ဍုၚ်ဗၟာၜါတၠ ဇကုကဵုဇကု အရေဝ်ဂၠိုၚ် တက်ဂစိုတ်ဂယိုၚ်ညးသ္ကအ်တုဲ ဒးချိုတ်အာလဝ်နွံဂှ် ဂွံတီကေတ်ရ။
ကောန်ဍုၚ်ဗၟာ ညးလုတ်လောန်လဝ်ဒုဟ် မၞုံယၟု ဝဵုလေန်သိုဝ် အာယုက် (၂၅) သၞာံမွဲတၠဏအ်ဝွံ တက်လဝ်ညးမွဲလ္ပါ်ဂှ် နကဵုလေံပသဲဒကုတ်တုဲ နာဲထောန်ခိုၚ် အာယုက် (၄၅) သၞာံဂှ် ဟိုတ်နူဒးလဝ်ဘဲဝပ် ဗွဲမသ္ကာတ်မြဟ်ဂှ်ရ လမျီုအိုတ် ဒးချိုတ်အာဒၞာဲဂှ်ရ။
သၟာကမၠောန်ကောန်ဍုၚ်ဗၟာ ညးၜါတၠဏအ်ဝွံ နွံဒၞာဲကြပ်မံၚ်မွဲစွံတုဲ နာဲထောန်ခိုၚ်ဂှ် ဟိုတ်နူဗ္ၜူကၠုၚ်အရက်ဂှ်ရ အခိၚ်မစဴစိုပ်ကၠုၚ်ဒၞာဲညးဂှ် ရမျာၚ်ကညာၚ်ထတ်ကီု သီုကဵုတေအ်မံၚ် ဗဒၚ်ဒၞာဲညးဒၟံၚ်ဂှ်တုဲ ညးမွဲလ္ပာ်ဂှ် အေၚ်ဟွံမာန် အခိၚ်တိက် ဟွံဂွံတိတ်ဂှ်ရ အရေဝ်ဂၠိုၚ်ညးသ္ကအ် ၜါလ္ပာ်တုဲ ဝဵုလေန်သိုဝ်ဂှ် ၜုၚ်တက်စုတ်ဏာ နာဲထောန်ခိုၚ် မွဲအသိၚ်ဂှ် လမျီုဒးအိုတ်ချိုတ်အာရောၚ် ဂွံတီကေတ်ရ။
ညးဒးဒုၚ်ချိုတ်အာ နာဲထောန်ခိုၚ်ဏအ်ဝွံ ကောန်ဍုၚ်ဗၟာ ညးလုတ်လောန်လဝ်ဒုဟ် ဝဵုလေန်သိုဝ် ဂှ် စံၚ်ကၠေံထောံ နကဵုကၠေၚ်ဓါတ်တုဲ ဟွံဂြိပ်ပဲါအာမွဲသာ် မၚ်ကဵုဗၠာဲသၟိၚ်တအ် ကၠုၚ်ရပ်ညးတေံရ။
ဟိုတ်ဒှ်သာ်ဂှ်ရ ဗၠာဲသၟိၚ်သေံတအ် ရပ်ထိၚ်ကော်ဏာ ကောန်ဍုၚ်ဗၟာ ညးလုတ်လောန်လဝ်ဒုဟ် ဝဵုလေန်သိုဝ် ဂှ်တုဲ ဟိုတ်နူလုတ်လောန်လဝ်ဒုဟ် အမှုဂဗုတ်ဂစိုတ်မၞိဟ်ဂှ်ရ ဆက်စၟဳစၟတ် ကေတ်မံၚ်အရေဝ်နွံဂှ် ဂွံတီကေတ်ရ။
