လဂွံကဵုတင်နင် ကမ္မယှေန်ပေါဲရုဲမာဲကၟိန်ဍုင် မလလောင်ပ္တိတ်လဝ်မ္ဂး ပ္ဍဲပေါဲရုဲမာဲ (၂၀၂၅-၂၀၂၆) တုဲကၠုင်ဂှ် ဗော်ပရေင်ဍုင်ကွာန်ဂကူကောန်ဍုင်အရင် သေံ၊ မန်၊ ကရေင်၊ ရခေင်၊ ချေင်၊ ကချေင်၊ ကရေင်ဍာဲတအ်ဖ္အိုတ် က္လိဂွံအမာတ်ကၠတ်ထဝ် (၁၅၅) တၠရောင် ဂွံတီကေတ်ရ။

ဗော်ဂွံဇၞးဂၠိုင်အိုတ်ဂှ် ဒှ် (ဗော်ကျာဖျူ) ဗော်ဒဳမဝ်ကရိတ်ဂကူကောန်ဍုင်အရင်သေံ (၃၉) ဒၞါဲတုဲ ဗော်ဂအုပ်ကောန်ဂကူပအိုဝ်-PNO ဖျေံသ္ဇိုင်ပ္ဍဲတွဵုရးသေံဂှ် (၁၈) ဒၞါဲ၊ ဗော်ညဳသၟဟ်မန် – MUP (၁၇) ဒၞါဲ၊ ဗော်ကောန်ဂကူနာဂ (၁၂) ဒၞါဲ၊ ဗော်ပၠတရဴရခေင် (၈) ဒၞါဲ၊ ဗော်ဒဳမဝ်ကရိတ်တေတ်ကောန်ဂကူကရေင် (၇) ဒၞါဲ၊ ဗော်ကောန်ဂကူဇြဵုမဳ (၇) ဒၞါဲ၊ ဗော်ကောန်ဂကူရခေင် (၆) ဒၞါဲ၊ ဗော်ညးဍုင်ကွာန်တွဵုရးကရေင်ဍာဲ (၃) ဒၞါဲ၊ ဗော်ညးဍုင်ကွာန် တွဵုရးကချေင် (၃) ဒၞါဲ၊ ဗော်ကောန်ကရိတ်ညးဍုင်ကွာန်ချေင် (၁) ဒၞါဲ စတမ်ဂမၠိုင် ပါလုပ်ရ။

အမာတ် နူဗော်ကောန်ဍုင်အရင်တအ်ဂှ် ဂွံဇၞးလဝ် ပ္ဍဲအဆံင်ကၠတ်ထဝ်တွဵုရး ဂၠိုင်တုဲ ပွဳပွူ (၅၀) တၠဟေင် ပါလုပ်အာ ပ္ဍဲအဆံင်ကၠတ်ထဝ်ကၟိန်ဍုင်ရောင် ဂွံတီကေတ်ရ။

အတိုင်စရင်မ္ဂး ဗော်ညဳသၟဟ်မန်ဂှ် ဂွံဒၞါဲပ္ဍဲကၠတ်ထဝ်ကၟိန်ဍုင် (ကၠတ်ထဝ်ညးဍုင်ကွာန်၊ ကၠတ်ထဝ်ကောန်ဂကူ) လၟိဟ်ဂၠိုင်အိုတ် (၁၀) တၠတုဲ ဒုတိယဂှ် ဗော်ကျာဖျူ (၈) တၠ ကေုာံ တတိယဂှ် ဒှ်ဗော်ကောန်ဂကူပအိုဝ် (၇) တၠရ။

တုဲပၠန် ဗော်ပရေင်ဍုင်ကွာန် မလုပ်ပြိုင် ပ္ဍဲပေါဲရုဲမာဲ ကမ္မယှေန်ပၞာန်ကၠောန်ဂှ် နွံလၟိဟ်ဖ္အိုတ် (၅၇) ဗော်ကၠာလေဝ် အယာံမာတ် (၃၁) ဗော်ဟေင် က္လိဂွံဒၞါဲ ပ္ဍဲကၠတ်ထဝ်တုဲ သှ်ေဒၟံင် (၂၆) ဗော်တအ်ဂှ် မွဲဒၞါဲလေဝ် ဟွံက္လိဂွံဒၞါဲသက်က်ရ။

ပ္ဍဲကဵုဗော်ဟွံဇၞးမာဲ (၂၆) ဗော်တအ်ဂှ် ဗော်မန်တောတက်၊ ဗော်ဂအုံဇြဟတ်ကောန်ဂကူတွဵုရးရခေင်၊ ဗော်ညးဍုင်ကွာန်၊ ဗော်ကောန်ဂကူခူမဳ၊ ဗော်ကောန်ဍုင်အရင်မျိုဝ်၊ ဗော်သၟာကမၠောန်ညးဍုင်ကွာန် စတမ်ဂမၠိုင် ပါလုပ်အိုတ်ရ။

ပ္ဍဲပေါဲရုဲမာဲ ကမ္မယှေန်ပၞာန် မကၠောန်ဗဒှ်လဝ်ကဵု (၃) သ္ကုတ်ဂှ် ဗော်ဇာဒိသိုင် (ဗော်ဒပ်ပၞာန်ဗၟာ ကျဖောအ်) ဇၞးမာဲဂၠိုင်အိုတ် (၇၃၉) ဒၞါဲတုဲ ဗော်ညဳသၟဟ်ကောန်ဍုင်အရင် (တစည) ဂှ် နွံလၟေင်ဒုတိယ ဂွံဇၞး (၆၈) ဒၞါဲ၊ တတိယဂှ် ဒှ်ဗော်ကျာဖြူ ဂွံ (၃၉) ဒၞါဲရောင် ဂွံတီကေတ်ရ။