ပ္ဍဲကဵုအစဳအဇန် ပ္ကတ်ပ္ကေင်ကွတ်ပၞာန် မရနုက်ကဵု (၄၅) ဝါ ကော်ဂး Cobra Gold သွက်သၞာံ ၂၀၂၆ ဏအ်ဂှ် ဒပ်ပၞာန် နူကဵု (၃၀) ဍုင်၊ ဇြဟတ်ပၞာန် ဗၞတ် ၈ လ္ရီတၠပြင် ပါလုပ်ရောင် ပရိုင်သေံဂမၠိုင် ချူဓမံက်လဝ်ရ။

အစဳအဇန် ပ္ကတ်ပ္ကေင်ကွတ်ပၞာန်ဏအ်ဂှ် အဓိက သေံကဵု အမေရိကာန် က္ဍိုက်ပ်တုဲ ပံင်တောဲကၠောန်အာ ပ္ဍဲဍုင်ဇျောန်ဗူရဳ ကၟိန်ဍုင်သေံ အတိုင်လၟေင်သၞာံပၠန်ရောင်။

တင်ရန်ပ္ဍဲသၞာံဏအ်ဂှ် သွက်ဂွံကၟောန်ပခိုင်ပ္တိုန် ပရေင်ပံင်တောဲဆေင်စပ်ကဵုပရေင်ပၞာန်အကြာမွဲဍုင်ကဵုမွဲဍုင်ကီု၊ သွက်ဂွံသမၠုင်ပ္တိုန် စရာဲဍာ်ဒ္ကေဝ်ဒပ်ပၞာန် တိုက်၊ ဍာ်၊ ကျာ ကေုာံ ဆေင်ကဵုအာကာသ၊ ဇြာ်ဗါတအ်ကီုရောင် လ္ပာ်ဒပ်ပၞာန်သေံ ဟီုဂးလဝ်ရ။

ပ္ဍဲကဵုကဏ္ဍထ္ၜးစရာဲ ပ္ကတ်ပ္ကေင်ကွတ်ပၞာန်သၟးဂှ် သေံ၊ အမေရိကာန်၊ သကႅာပေါဝ်၊ အေန်ဒိုဝ်ဏဳယှာ၊ မလေဝ်ယှာ၊ ဂျပါန်ကဵု ကဝ်ရဳယျာသၠုင်ကျာတအ် ပါလုပ်တုဲ ပ္ဍဲကဏ္ဍပ္ကတ်ပ္ကေင် ဆေင်စပ်ကဵုပရေင်ရီုဗင်ဟံင်ပြာ်မၞိဟ် ကေုာံ ပွဳပွူသဘာဝတအ်ဂှ် ကြုက်၊ အိန္ဒိယ၊ အဝ်သတြေလျတအ် ပါလုပ်ရောင်။

ဍုင်ဗေန်ဂဠာဒေတ်၊ ကနေတာ၊ ဖဳဂျဳ၊ ဖြာန်၊ ယူကေ၊ အဳတလဳ၊ မန်ဂိုဝ်လျာ၊ နဳပဝ်၊ နျူဇြဳဠာန် ကေုာံ ဖိလေတ်ပါင်တအ်ဂှ် ပါလုပ်ကဵု နဒဒှ်ကဏ္ဍပူဗိုင်ထံက်ရီု သွက်အစဳအဇန် ပ္ကတ်ပ္ကေင်ကွတ်ပၞာန် Cobra Gold အလုံမွဲစုမ်ရောင်။

တုဲပၠန် ဍုင်ဗရူနာင်၊ ဂျာမဏဳ၊ ဂျဝ်ဒါန်၊ ဠာအိုဝ်၊ နေဝ်တာဠာန်၊ ပါကေဿတာန်၊ သဝ်ဒဳ၊ တဳမဝ်ဗၟံက်၊ ဗဳယေတ်နာမ် ဖ္အိုတ် ဗၞတ် (၁၀) ဍုင်တအ်ဂှ် နဒဒှ်ညးလ္ရတ်ပါလုပ်ရောင် ချူဓမံက်လဝ်ရ။

ဍုင်ဗၟာကဵု ဍုင်ခမေန် ဟွံပါလုပ်ရောင် ဂွံတီကေတ်ရ။

သၞာံဏအ်ဝွံ ခန်လ္ရတ်မပ္တံကဵု ပရေင်ကောပ်ကာဲထိင်ကြာပ်၊ ပရေင်ပ္ကတ်ပ္ကေင်ဗီုပြင်မုက်ပၞာန်၊ ပ္ကတ်ပ္ကေင်ပန်လွဟ်ဇၞော်၊ ပန်လွဟ်က္ၜင်ကျာပၞာန်ကဵု နဲကဲစဵုဒၞါစက်ဗရုသာဲ (ဒရုင်) တအ်ပါလုပ်ရောင် ဂးရ။

အစဳအဇန် ပ္ကတ်ပ္ကေင်ကွတ်ပၞာန်ဂှ် နူတ္ရဲဏအ် (ဖေဖဝ်ဝါရဳ ၂၄) စဵုကဵု ဂိတုမာတ် စၟတ်တ္ရဲ (၆) တေံ ကၠောန်အာပွိုင် (၁၁) တ္ရဲဏောင် ဂွံတီကေတ်ရ။