သၞာံ (၂၀၂၆) ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၈) တုဲကၠုၚ်ဏအ်ဝွံ ဟိုတ်နူပဋိပက္ခ ပေါဲဗ္တိုက်အေဿရေကဵု အဳရာန် က္တဵုဒှ်ကၠုၚ်လဝ်ဂှ်တုဲ ပ္ဍဲကၟိန်ဍုၚ်သေံ ဒေါံဇူ/တၟာတ် ပရေၚ်သွံရာန်ကၠေၚ်ဓါတ်၊ ကၠေၚ်ဍေန် ဇရေၚ်ဍုၚ်ဇိုၚ်ဝုတ်ဒိုဟ်အိုတ်ရောၚ် နူပရိုၚ်သေံတအ်ဂမၠိုၚ်တအ် ချူဓမံက်လဝ်ရ။

စပ်ကဵုပဋိပက္ခပၞာန် အေဿရေကဵု အဳရာန် က္တဵုဒှ်ကၠုၚ်လဝ်တုဲဂှ် ကၟိန်ဍုၚ်သေံ ပရေၚ်ဆက်စၠောံ ပလံၚ်ထပၠုပ်ပ္တိတ်မံၚ် ကၠေၚ်ဓါတ်၊ ကၠေၚ်ဍေန် နူကဵု (ဟဝ်မုတ်ရေဝ်လက်ကျာ) (၂၀) တၟံကၠံဂှ် လ္ပါ်ကဵုအဳရာန်တအ် တၟာတ်လဝ်ရောၚ် ဂွံတီကေတ်ရ။

အကာဲအရာလၟုဟ်ဏအ်ဝွံ ၚုဟ်ကၠေၚ်ဍေန် ပ္ဍဲဂၠးတိဂှ် က္တဵုဒှ်ကၠုၚ်မံၚ်ပြဿနာနွံဂှ်ရ လ္ပါ်ကဵုအလဵုအသဳသေံတအ် လလောၚ်ကဵုဒေါံဇူ တၟာတ်ကၠုၚ်ကာတၟေၚ် သွက်ဂွံပလံၚ်ပ္တိတ် ကၠေၚ်ဓါတ်၊ ကၠေၚ်ဍေန် ဇရေၚ်ဍုၚ်ဍုၚ်ဇိုၚ်ဝုတ်ဒိုဟ်ရ။

ပ္ဍဲကၟိန်ဍုၚ်သေံဝွံ ဒၞါဲခြိုၚ်စွံကၠေၚ် ခြိုၚ်လဝ် သၟုဟ်ဓါတ်သဘာဝ၊ ကၠေၚ်ဓါတ်၊ ကၠေၚ်ဍေန် နွံမံၚ်ဗၞတ် ပွိုၚ် (၆၁) တ္ၚဲ ဗၞတ် (၂) ဂိတုပြၚ်တုဲ ပြဟ်ဟ်ဏအ် ပရေၚ်သ္ဒးဇီုကပိုက်ဂှ် ဟွံမွဲကၠုၚ်ဏီရ။

တၟာတ်ကၠုၚ်ဂၠံၚ်ဍာန် ပရေၚ်ဆက်စၠောံကၠေၚ်တအ် လအ်ကၠုၚ်မ္ဂး သွက်အဌာန်ဂတဏအ် ညးကၠောန်မံၚ်ကမၠောန်ပၟတ်ဓါတ်လလဳ ညးစကာမံၚ်ကၠေၚ်စက်တအ်ဂှ် ဒးဇီုကပိုက်ကၠုၚ် ပရေၚ်ကမၠောန်ကီု သီုကဵုဒှ်ကၠုၚ်ပရေၚ်အခက်ခုဲ ဗဂေတ်ကမၠောန်မာန်ရောၚ် ဂွံတီကေတ်ရ။

ပရေၚ်ဆက်စၠောံကၠေၚ်ဍေန် (ဟဝ်မုတ်ရေဝ်လက်ကျာ) ဏအ်ဝွံ တၟာတ်ပိုတ်လအ်အာမ္ဂး ၚုဟ်ကၠေၚ်ဍေန် ပ္ဍဲဂၠးတိဂှ် အကြာ (၁၀၀) ဒဝ်လာကဵု (၂၀၀) ဒဝ်လာ သၠုၚ်တိုန်အာမာန်တုဲ ပ္ဍဲကၟိန်ဍုၚ်သေံ ဇၟာပ်ၚုဟ်ကၠေၚ် သၠုၚ်တိုန်စိုပ် (၁၀) ဒဝ်လာမ္ဂး ၚုဟ်ကၠေၚ်တအ် သၠုၚ်ဒှ်အာ (၁) လဳတာ (၂) ၝာတ်၊ ၚုဟ်ကပေါတ်ဗၞိက်ကဵု ၚုဟ်ပၟတ်ဓါတ်လလဳတအ်လေဝ် သၠုၚ်တိုန်မံၚ်ထေၚ်ထေၚ်လဵုလဵုရ။

စနူဂိတုမာတ် စၟတ်တ္ၚဲ (၄) ဂတဏအ် ၚုဟ်ကၠေၚ်ဓါတ်၊ ကၠေၚ်ဍေန်တအ် အကာဲအရာ ဂွံသၠုၚ်တိုန်အာနွံတုဲ အကြာဂှ်မ္ဂး ဩန်သ္ဂောံဖေါဝ်ကၠုၚ်၊ ၚုဟ်ကပေါတ်ဗၞိက်ကဵု ၚုဟ်ပၟတ်ဓါတ်လလဳတအ်လေဝ် ဗၞတ်ဂၠိၚ်ကဵုဆ သၠုၚ်တိုန်ကၠုၚ်မာန်ရ။

ပ္ဍဲကၟိန်ဍုၚ်သေံဝွံ ဟိုတ်နူဒေါံဇူတၟာတ် ပရေၚ်သွံရာန်ကၠေၚ်ဓါတ်၊ ကၠေၚ်ဍေန် ဇရေၚ်ဍုၚ်ဇိုၚ်ဝုတ်ဒိုဟ် သီုပါလုပ်ကၟိန်ဍုၚ်ဗၟာဂှ်ရ ပ္ဍဲကဵုကၟိန်ဍုၚ်ဗၟာလေဝ် ၚုဟ်ကၠေၚ်ဓါတ်၊ ကၠေၚ်ဍေန်၊ ၚုဟ်ကပေါတ်၊ ၚုဟ်ပရေၚ်ဆက်စၠောံကပေါတ်ဗၞိက် သၠုၚ်တိုန်မာန်တုဲ ဩန်ပ္ဍဲဍုၚ်ဗၟာလေဝ် သ္ဂောံဖေါဝ်တိုန်ကၠုၚ်ဒှ်မာန်ရောၚ်။